‘¡Akapachajj tukusjjaniwa!’ sasin istʼasajja, ¿kuns amuyta? ¿Diosan aka Oraqer ninamp tukjaskiri? Jan ukajj ¿oraqpachan mä jachʼa guerra utjañapcha amuyta? Ukanak amuyasajj yaqhepajj wal sustjasipjje, yaqhepanakasti, janiw yäqapkarakiti, yaqhepanakajj larusipjjarakiwa.

Ukampis Bibliajja, “akapachan tukusiñapaw jutani” sasaw qhanañchi (Mateo 24:14). Akapachan tukusiñapa siski ukarojj ‘Diosan jachʼa urupa’ ukat “Armagedón” sat sutinakampiw Biblian uñtʼasiraki (Apocalipsis 16:14, 16). Akapachan tukusiñapat religionanakajj kunaymaninakwa yatichapjje, yaqhepanakajj jan amuykañwa parlapjje, ajjsarkañanakwa yatichapjje. Ukampis Bibliajj uka toqet sum qhanañchistu. Janiw ukakïkiti, akapachan tukusiñapajj jakʼankjjeti janicha ukat kunjamatsa qhespiyassna uksa qhanañcharakistuwa. Ukhamajja, kuna jan wali yatichäwinakas uka toqet utji ukat kunsa akapachan tukusiñapat Bibliajj yatichi uk yatjjatañäni. Ukjjarusti, kunanakas tukjatäni ukanakats yatjjatarakiñäniwa.

¿AKAPACHAN TUKUSIÑAPAT BIBLIAJJ KAMSISA?

• ORAQEJJ JANIW NAKHANTAYATÄKANITI

  Bibliajj akham siwa: “Oraqen saphiparojj sumpun thurtʼasiytajja, uttʼayatäkän ukawjat janipun unjjtañapataki” sasa (Salmo 104:5). Aka tʼaqansa ukat yaqha tʼaqanakansa Diosajj janipuniw aka Oraq kunäkipans tukjkaniti, ni tukjaykarakinisa sasaw Bibliajj sum qhanañchi (Eclesiastés 1:4; Isaías 45:18).

• AKAPACHAN TUKUSIÑAPAJJ JAYÄKIPANWA ARSUSJJÄNA

  Akapachajj kuna urus tukusini uk janiw yatksnati sasaw yaqhepajj amuyapjje, ukampis Diosajj kuna urus apanini uk Bibliajj sum qhanañchi. Akham siwa: “Uka urumpita horasampitjja, janiw khitis yatkiti, ni kikpa alajjpachankir angelanakas yatkiti, ni Diosan Yoqapasa, jan ukasti Dios Awki sapakiw yati. ‘Ukhamasti jumanakajj suyapjjam, amuyasipjjam, [...] janirakiw yatipktati kuna horasar puriniñapsa’” sasa (Marcos 13:32, 33). ‘Dios Awkejj’ akapachan tukusiñapajj ‘kuna horasas purinini’ uk sum yati.

• AKAPACHAJJ JANIW JAQENAKAMPIS NI MÄ METEORITOMPIS TʼUNJATÄKANITI

  Ukhamajj ¿kunjamatsa akapachan tʼunjäwipajj qalltani? Apocalipsis qellqatan akham siwa: “Alajjpacha jistʼarata uñjta, mä janqʼo caballorakiw uñstanïna. Uka caballor latʼjjatat jaqesti, Cheqa, Aski satarakïnwa [...]. Ukatsti uñjaraktwa uka jachʼa ajjsarkañ animalaru, ukhamarak akapach reyinakaru ejercitonakapampiru. Jupanakasti caballor latʼjjatatäkän uka toqe, ukhamarak ejercitop toqe nuwasiñatakiw tantasipjjatayna” sasa (Apocalipsis 19:11-21). Uka arunakajj janiw ukhampun paskaniti, mä uñtasïwikiwa, ak amuytʼañatakiw yanaptʼistu: Diosajj walja angelanakapwa khitanini, ukhamat uñisirinakapar qʼal tʼunjañataki.

• AKAPACH GOBIERNONAKARUW TʼUNJASINI

  Bibliajj siwa: “Alajjpachankiri Diosajj mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampejja, jan ukasti jupaw taqe yaqha reinonakarojj tukjani, wiñayan wiñayapaw uka reinojj utjarakini” sasa (Daniel 2:44). Kunjamtï uñjaniwayktanjja ‘akapach reyinakajja’, ‘caballor latʼjjatatäkän uka toqe, ejercitop toqe nuwasiñatakiw’ mayachtʼasipjjani (Apocalipsis 19:19). Ukampis Diosan Reinopaw qʼal tʼunjani.

• GUERRANAKASA, TʼAQHESIÑANAKASA UKAT JAN WALINAKASA CHAQTAYASJJANIWA

  Diosajj ‘oraqpachanwa nuwasiñ tʼakurayani’ (Salmo 46:9). Bibliajj akham saskakiwa: “Aski luriri qʼoma jaqenakasti, aka oraqenwa wiñayatak jakapjjani. Ukampis jan wali sarnaqer jaqenakasa, jan sum phoqhasa sarnaqerinakasa, aka oraqetjja apanukuta tukjatäpjjaniwa” sasa (Proverbios 2:21, 22). Ukat Diosajj ‘taqe kunwa machaqat lurani’ sasaw Apocalipsis qellqatan qhanañchi (Apocalipsis 21:4, 5).

• DIOSARU, JAQENAKARU KʼARINTIR RELIGIONANAKAJJ JANIW UTJJANITI

  Kʼari religionanakat parlkasajja, Jeremías qellqatan akham siwa: “Kuntejj profetanakajj yatiyapjje ukajj kʼariwa; sacerdotenakasti munañanakaparuw apnaqapjjaraki [...]. Ukampisa ¿kunsa lurapjjäta tukuya urojj purinkan ukkhajja?” sasa (Jeremías 5:31). ¿Kunas religionanakampi pasani? Jesusajj akham sänwa: “Uka urojj purinkani ukapachajja, waljanirakiw sapjjarakitani: ‘Tatay, Tatay, nanakajj sutimaruwa parlapjjäyäta, sutimarurakiw ñanqha ajayunakarus jaqsupjjäyäta, ukhamarak sutimjjarurakiw walja milagronaks lurapjjäyäta’ sasa. Ukapachasti nayajj jupanakarojj sarakïwa: ‘Janipuniw jumanakarojj uñtʼapksmati, nayat jitheqtapjjet jan wali luririnaka’” sasa (Mateo 7:21-23).

• INA CHʼUSAT TʼAQHESIYIRINAKASA, JAN WALI LURIR JAQENAKASA TUKJATÄNIWA

  “Khitinakatejj jan iyawsapki ukanakajj juchañchatäjjewa. Kunapachatejj qhanajj akapacharu jutki ukkhajj jaqenakajj chʼamakaruw jukʼampi munapjje qhanat sipansa, luräwinakapajj jan walïtap layku” sasaw Jesucristojj säna (Juan 3:19). Noé tiemponjja, Diosajj jan wali jaqenakarojj tʼunjänwa. 2 Pedro 3:5-7 qellqatan akham siwa: “Uka oraqejja uma juiciompi tʼunjatäjjarakïnwa. Jichhasti aka oraqempi alajjpachampisti ninampi tʼunjatarakïniwa, Diosan arunakaparjama, ukatak imatäskarakiwa. Uka ninawa qʼal nakhantani taripäwi urunjja, kunapachatï jan wali jaqenakajj tukjatäkani ukapacha” sasa.

Kunjamtï Noé chachan urunakapan jan wali lurir jaqenakar tʼunjaskänjja, ukhamarakiw ‘taripäwi urun’, mä arunjja, juicio urun tʼunjasini. Uka tiempon Diosajj janiw aka Oraq tʼunjkänti, jan ukasti, ‘jan wali jaqenakaruw’ uma juición tʼunjäna. ‘Taripäwi urunjja’, ukhamarakiw jan wali lurir jaqenakaru ukat Jupa contra saytʼasipki uka jaqenakar tʼunjani. Ukampis Jupan amigonakaparojj jarkʼaqaniwa, kunjamtï Noé chacharusa ukat familiaparus jarkʼaqkäna ukhama (Mateo 24:37-42).

Akapachan jan walinak utjki uk Diosajj qʼal tukj-jjani ukhajja, kusisitaw jakasjjañäni. Ukhamajj akapachan tukusiñapat Bibliajj parlki ukajj suma yatiyäwiwa. Ukampis inas akham jisktʼasisksta: ‘¿Akapachan tukusiñapajj wali jakʼankjjeti ukat kunjamatsa qhespirista?’ sasa. Uka toqet Bibliajj kamsisa uk yatjjatañäni.

Aka Oraqejj jaqenakampi apnaqatajj jukʼampi jan walinakanwa uñjasiski ¿Diosajj jaqenakampi apnaqayaskakiniti? Janiwa. Kunjamtï yatjjataniwayktanjja, niyaw akapach gobiernonaksa, tʼaqhesiñanaksa ukat jan walinaksa tukjjani. Ukhamajj kunapachas tukjani uk taqe jaqenakan yatipjjañapwa taqe kun Luriri Diosajj muni. ¿Kunjamsa uk yatiyistu?

Viajañs munkasma ukham amuytʼañäni. Kawknämsa saräta uk sum amuyañatakejja, nayraqatajj mä mapa uñjjattʼañamaw wakisini. Ukat viajkasajja, maparjam walik saraskatam amuyasajj janiw sinti llakisjjtati, kawkharutï puriñamäki ukar niya jakʼachasiskatam amuyta. Diosajj ukhamarakiw Biblia churistu, ukajj mä mapäkaspas ukhamawa. Cheqas Biblianwa, kunanakas akapacha tukusiñap jakʼajj aka oraqpachan pasani, ukanak sum qhanañchistu. Tiempompejja, taqe kunatï pasaski ukajj Bibliarjam phoqasiskatap amuyayistu. Ukhamatwa akapachan tukusiñapajj wali jakʼankjjatap amuytanjja.

Janïr akapacha tukuskipanjja, jukʼamp jan walinakaw utjani sasaw Bibliajj qhanañchi. Uka urunakanjja, kunayman jan walinakajj mä tiemponakwa taqpach pasañapäna, ukar uñtasitajj janipuniw kuna pachas uñjasiwaykiti. Jichhajj ukanakat mä qawqha uñjañäni.

1. ORAQPACHANWA JAN WALTʼÄWINAKAJJ UTJI Mateo 24 qellqatan jikjjataski uka profeciarjamajja, walja jan waltʼäwinak pasañatwa parli, ukasti mä señalarakïnwa. Ukarjamajja, uka señalajj ‘akapachan tukusiñap’ jakʼankjjatapwa qhanañchañapäna (3, 14 jiskʼa tʼaqanaka). Ukanakat mä qawqhajj akanakawa: guerranaka, pisin jakasiñanaka, oraq khatatinaka, jaqe jiwayañanaka, uñisisiñanaka ukat kʼari yupaychäwinaka (6-26 jiskʼa tʼaqakama). Cheqas taqe ukanakajja, nayratpach utjapunïnwa. Ukampis jichhajja, janïr akapacha tukuskipanwa, maykutinaki taqe ukanakajj pasañapäna. Ukat aka kimsa profecianakamp chikaw phoqasiñaparakïna.

2. ASKI LURÄWINAKAJJ CHHAQTJJEWA Bibliajj uka toqet akham siwa: “Qhepa urunakanjja jan wali tiemponakaw jutani. Jaqenakajj michʼaw tukupjjani, qollqe chuymaraki, jachʼa jachʼaw tukupjjani, jilamp parlirinakaraki. Diosat jan wali parlapjjani, awkinakaparus janiw istʼkjjapjjaniti, jan yäqasirïnakäpjjaniwa, Diosar arkañarus janirakiw jayskjjapjjaniti. Jan munasiñanïpjjaniwa ukhamarak jan khuyapayasiñani, arunak apnaqerinaka, jan wali luräwinakapjja janiw apanukupkaniti, wali qhorunakäpjjaniwa, aski luräwinakan uñisirinakaparakïniwa. Aljantasirïpjjarakiniwa, jan ajjsarasaw kuna jan walsa arsupjjarakini, jachʼa jachʼa tukuñampi phoqhantatäpjjarakiniwa, jupanakan pachpa munañanakapakwa thaqapjjani Diosan munañap thaqañat sipansa” sasa (2 Timoteo 3:1-4). Cheqas taqe ukanakajj nayratpach utjapunïnwa, ukampis “qhepa urunakanjja” jukʼampiw uka jan walinakajj jiljjattañapäna. Uka urunakajj ‘jan wali tiemponakäñapänwa’. Jaqenakajj jichhürunakan ¿ukhamäpjjewa sasmati?

3. AKA ORAQEJJ QʼALA TUKJATAWA ‘Aka oraqe tʼunjirinakarojja’ Diosajj tukjaniwa sasaw Bibliajj qhanañchi (Apocalipsis 11:18). Noé chachajj jakkäna uka tiemponjamarakiw aka Oraqejj qʼala tukjatäski. Bibliajj akham siwa: “Diosatakisti aka oraqejj ñanqha lurañampi kunayman casta jan wali lurañanakampi phoqhantatänwa, taqe jaqenakasti jan walëjjapjjapunïnwa. Diosasti uka taqe ñanqha lurañanakajj aka oraqer phoqhantatäp uñjasinsti, Noerojj sänwa: ‘[...], ukhamasti taqe jupanakaru, ukhamarak taqe akapacharuw tukjä’” sasa (Génesis 6:11-13). Jichhürunakanjja, sapürutjamaw jaqenakajj jukʼamp jan walëjje. Janiw ukakïkiti, jaqenakan lurat armamentonakajja, aka Oraqerusa ukat jaqenakarus cheqapuniw tukjaspa, nayrajj janiw ukanakajj utjkänti. Ukampirusa, jaqenakajj kunanakatï jakañatak wakiski, ukanakaruw jukʼat jukʼat jan waltʼayasipki, sañäni: samanaru, jachʼa lamar qotanakaru, animalanakaru, qoqanakaru ukat jukʼampinakaru.

Patak maranak nayrajja, jaqejj janiw jaqe masipar tukjirjamäkänti. Ukampis jichhajj tukjapjjaspawa. ¿Kunjamatsa uk yattanjja? Walja armamentonakwa imasipki ukat samansa, umsa, Oraqsa wal qʼañuchasipki. Tecnología nayrar sartatap laykojja, janiw jaqenakajj kunjamsa jan waltʼayasipki uk amuyapkiti. Ukampis janiw jaqenakajj aka Oraqe tukjapkaniti. ‘Jan wali jaqenakan janïr aka Oraqe tukjapkipanwa jupanakar tukjä’ sasaw Diosajj sistu.

4. ORAQPACHANWA DIOSAN ARUNAKAPAJJ YATIYASISKI Mateo qellqatanjja, akham sarakiwa: “Diosan reinopat aka suma yatiyäwisti aka oraqpachanwa yatiyatäni, ukhamat taqe markanakan yatipjjañapataki, ukatsti akapachan tukusiñapaw jutani” sasa (Mateo 24:14). Oraqpachan yatiyasiski uka suma yatiyäwinakajj janiw kunjamtï yaqha iglesianakajj walja maranak parlawayapki ukhamäkiti. Jan ukasti, ‘Diosan reinopatwa yatiyasi’. ¿Khitinakas Diosan Reinopat uka suma yatiyäwinak ‘aka oraqpachan yatiyasipki’?

Jehová Diosan testigonakapan Internetan jw.org sat cheqajja, ‘Diosan reinopat yatiyañataki’ luratawa. Ukanjja, 700 jila arunakatwa Bibliat apstʼat kunayman qellqatanakajj Diosan Reinopat qhanañchaski. ¿Khitinakas wal chʼamachasisa Diosan Reinopat jaqenakaru yatiyasipki? Internetas janïr utjkäna ukhaw Jehová Diosan testigonakapajj Diosan Reinopat suma yatiyäwinak yatiyirit uñtʼatäjjapjje. Ukat 1939 maratpachwa Yatiyañataki sat revistan “Jehová Diosan Apnaqäwipat (Reinopat) Yatiyaski” sasin qellqatajj uñstaraki. Religionanak toqet parlir mä libronjja, Jehová Diosan testigonakapat akham siwa: “Kunjamsa taqe cheqana ukat taqe chuyma yatiyasipki ukajj muspharkañawa” sasa. Cheqas jupanakajj Diosan Reinopajj niyaw akapacharojj tukj-jjani sasaw qhanañchapjje.

JAN WALI URUNAKANWA JAKASKTANJJA

Kuna profecianakattï aka yatichäwin yatjjataniwayktan ukanakan ¿phoqasiskatap amuytati? Aka revistajj patak maranakaw kunayman jan walinak aka oraqpachan pasaskatapat yatiyjje, ukanakajj qhepa urunakan jakasjjatas uñachtʼayi sasaw liytʼirinakapajj amuyapjje. Ukampis ukanakar jan creyirinakajja, ukajj janis cheqäkaspa, jaqenakakis mayjtʼayapkaspa ukham amuyapjje. ‘Akapachajj nayraruw sartaski ukatwa taqe kunas jankʼak yatisjje’ sasaw sapjje. Ukhamäkchisa, waljanejj ‘jukʼamp jan wali tiemponwa jakjjtanjja’ sasaw sapjjaraki.

Amuytʼañataki, pasïr 2014 maranjja, akham sasaw ciencia toqet yaqhep yatjjatatanakajj yatiyapjjäna: “Kunanakatï jaqenakar jan waltʼayaski taqe ukanak sum uñakiptʼasajja: tecnología toqet nayrar sartaskatap laykuw kunayman jan walinakan uñjasiñäni sasaw sapjje”. Taqe ukanakajja, aka revista luririnakarusa, liyirinakat waljanirusa, cheqapun qhepa urunakan jakjjatasa ukat akapachan tukusiñapajj wali jakʼanjjatapwa qhan amuyayi. Ukampis janiw uk ajjsarañasäkiti. Antisas kusisiñasawa. ¿Kunatsa ukham sistanjja? Kunattejj qhespiyassnawa.

Akapachan tukusiñapatjja, Diosan Arupasti akham sistuwa: ‘Jachʼa tʼaqhesiñaw utjani. Ukham tʼaqhesiñsti janiw jichhürkamajj khitis uñjkiti aka oraqe luraski ukürutpacha. Diosatejj uka urunakjja jan jiskʼaptaykaspa ukajja, janiw khitis qhespiyaskaspati’ sasa (Mateo 24:21, 22). Ukat qhespirinakajj utjarakiniwa sasaw akham saraki: “Akapachajj tukusirikiwa [...], ukampis kawkïritejj Diosan munañap lurki ukajj wiñayatakiw jaki” sasa (1 Juan 2:17).

¿Qhespiyasiñatakejj kun lurañasasa? ¿Taqe kunanak imkatañati wakisispa? Janiwa. Bibliajj akham sasaw ewjjtʼistu: “Taqe kunas ukham tukjaschini ukajja, jumanakajj ¡kunja Tatit chuymas jupar wali katuyasita jakapjjañamajja! Tatitun jutañap ursti suytʼapjjam, jankʼakïñapa munasa” sasa (2 Pedro 3:10-12). Kunanakas ‘tukjasini’ ukanakat mä qawqhajj akanakäspawa: Aka ñanqha pacha apnaqer gobiernonaka, khitinakatï uka gobiernonakar yanapapki ukat Diosan gobiernop contra saytʼapki ukanaka. Ukhamajj inakiw taqe kunanak imkatsna, janiw tʼunjäwi urut qhespiykistaniti.

Jehová Diosajj kunjamtï sarnaqañas munki ukarjam sarnaqañäni ukat Jupat jan jitheqtas yupaychañäni ukhakiw qhespiyasiñäni (Sofonías 2:3). Qhepa urunakan jakaskatas amuyañasawa, janiw jan creyipki ukanakampi mayachasiñasäkiti, antisas ‘Tatitun urup suyañasawa’. Kunsa qhespiyasiñatakejj lurañama ukjja, Jehová Diosan testigonakapaw Bibliampi yatichapjjeristam.