¿Kunjamäsipkis jiwatanakajj sasin jisktʼasirïtati? ¿Tʼaqhesisipkpachati? ¿Jupanakampejj wasitat jikissnati? ¿Kunjamatsa jiwañat cheqpach yatsna? Uka jisktʼanak qhanañchañatakejja, kunsa Bibliajj uka toqet yatichi uk jichhajj yatjjatañäni. Nayraqatjja, kunsa Bibliajj jiwañ toqet yatichi uk uñjañäni, ukjjarusti yaqha kimsa jisktʼanakaruw qhanañchaskañäni.

¿Kunjamäsipkis jiwatanakajja?

BIBLIAJJ AKHAM SIWA: “Khitinakatejj jakasipki ukanakajja yatisipjjewa jiwjjañanakapa, ukampis jiwatanakajj janiw kunsa yatipkiti, janirakiw kunsa jikjjatapkarakiti, jupanakajj armatäjjatap layku. Kuna lurañatejj jumataki utjkani ukjja chʼamamarjam luram, jumajj sepulcror sarkätas ukanjja janiw kuna lurañas utjkiti, kuna lupʼiñasa, uñtʼañasa, janirakiw yatiñanïñasa utjkiti” sasa (Eclesiastés 9:5, 10).a

Sepulcrojja, mä arunjja jiwatanakajj kawkhankapkitï ukajja, janiw cheqpach mä lugaräkiti, jan ukasti mä uñtasïwikiwa, ukanjj janiw kuna yatiñas ni kuna lurañas utjkiti. Job chachatakejj ¿kunäns sepulcrojja? Jupajj mä urunakwa taqe yänakapa, wawanakapa aptʼasïna. Ukat jan qollkaña llejjti usumpiw usuntarakïna. Ukhamïpansti, akham sasaw Diosar wal ruwtʼasïna: “Walïspawa nayaru jiwañan munañaparu [mä arunjja, sepulturaru] imantjjañamajja” sasa (Job 1:13-19; 2:7; 14:13). Kunjamtï amuyktanjja, Job chachatakejj sepulcrosa jan ukajj infiernosa, janiw ninan tʼaqhesiñ lugaräkänti. Antisas tʼaqhesiñat samartʼañ lugaränwa.

Jiwatanakajj kunjamäsipkisa uk yatiñatakejja, jiwatanakar jaktayaskäna ukanak Biblian liytʼañaw yanaptʼistani. Ukatakejja, “Kimsaqallqo jaqenakaruw jaktayasïna” siski uka recuadro uñjjattʼam.

Janiw jupanakat maynis ‘wali suma lugarawa, jan ukajj ninan tʼaqhesiñawa’ sasajj sapkänti. Yaqha cheqar sarapjjaspäna ukhajja, ¿janit uka toqet yatiykistaspäna? ¿Janit ukajj Bibliar qellqaskarakispäna, ukhamat jiwatanakajj kunjamäsipkisa uk yatiñataki? Ukampis Bibliajj janiw uka toqet kuns qhanañchkiti, ni uka kimsaqallqo jaqenakas uka toqet kuns sapkarakiti. ¿Kunatsa? Jiwatäpkäna ukhajja, janiw kuns amuyapkänti, wali sums ikisipkaspa ukhamäsipkänwa. Biblian jiwañ toqet parlañatakejja, awisajj “ikiña” arwa apnaqaraki. Sañäni, Davitasa ukat Estebanas jiwjjapjjänwa sañatakejj “iktʼawayjjewa” sasaw qhanañchi (Hechos 7:60; 13:36, MT).

Ukhamajja, ¿taqe kunas jiwañarukit tukusjje, jan ukajj uka ‘ikit sartsnacha’?

¿Jiwatanakajj jaktapjjaniti?

BIBLIAJJ AKHAM SIWA: “Horasajj purininiwa taqe jiwatanakasti arupjj istʼapjjaniwa. Ukatsti uka jiwatanakajj jaktapjjaniwa” sasa (Juan 5:28, 29).

Jesusajj jutïrin apnaqjjani ukhajj taqe jiwatanakaruw jaktayani, ukjja, jupa pachpaw arsuwayarakïna. Pasïr yatichäwin yatjjataniwayktan uka Fernando chachajj akham sarakiwa: “Juan 5:28, 29 qellqata liytʼasajj walpun muspharta. Uka suytʼäwejj wali askipuniwa, ukatwa uka urunak jankʼak puriniñap suyaskta” sasa.

Job chachajja, Diosajj jutïrin jaktayitaniwa sasaw taqe chuyma confiyäna. Akham sasaw jisktʼasïna: “¿Mä jaqesti jiwjjasinjja wasitat jaktanjjaspati?” sasa. Ukat jupa pachpaw akham sarakïna: “Nayasti qawqhaya wakischispa ukhakamaw suytʼirista, tʼaqhesiñajjan tukusiña puriniñapkama [sepulcro manqhankañkama]. Jumatejj jawsitasmajja, nayajj jaysarakirismawa” sasa (Job 14:14, 15).

Lázaro chachan Marta kullakapajj ukhamarakiw jaktañajj utjapuniniwa sasin taqe chuyma confiyarakïna. Lázaro jilap jiwjjäna uka qhepatjja, Jesusajj jupar akham sänwa: “‘Jilamajj jaktaniwa’ sasa. Martasti sarakïnwa: ‘Jïsa, jiwatanakan qhepa urun jaktañapjja yattwa’ sasa. Ukjjarojj Jesusajj sänwa: Nayätwa jaktañasa, jakañasa. Khititejj nayaru iyawsarakitu ukajja jiwatäkanisa, jakaniwa” sasa (Juan 11:23-25). Uka qhepatwa Jesusajj Lazaror jaktayäna. Ukajja, kunjamsa jutïrin jiwatanakajj jaktapjjani ukwa qhan amuytʼayistu. Millón millón jaqenak jaktanir uñjañajj ¡kunja kusiskañakïkani!

¿Alajjpachar sarañatak jaktirinakajj utjaniti?

BIBLIAJJ AKHAM SIWA: Biblian kimsaqallqo jaqenakar jaktayasitapat parlki ukanakat sipansa, Jesucriston jaktäwipajja mayjänwa sasaw Bibliajj qhanañchi. ¿Kunansa mayjäna? Uka kimsaqallqo jaqenakajja aka Oraqen jakañatakiw jaktapjjäna. Ukampis Jesucriston jaktäwipatjja, Bibliajj akham sarakiwa: “Jupasti alajjpacharuw makhatjje ukatsti Diosan kupëjjaparuw qontʼasjje” sasa (1 Pedro 3:21, 22). ¿Jesucristo sapakit alajjpachan jakañatak jaktpachäni? Arkirinakaparojj akham sataynawa: “Sarjjasinsti ukat mä utjäw wakichasinjja, wasitampiw jutä jumanakaru irpasjjañataki, kawkhankkätï nayajj jumanakajj ukkhankapjjañamatakiraki” sasa (Juan 14:3).

Jesusajj alajjpachar sarjjasajja, yaqhep arkirinakapar katoqañatakiw wakichtʼäna. Bibliarjamajja, 144.000 jaqenakaw alajjpachar sarapjjani (Apocalipsis 14:1, 3). Ukampis ¿kunsa jupanakajj alajjpachan lurapjjani?

Cheqas jupanakajj walja luräwinïpjjaniwa. Bibliajj akham siwa: “Kusisiñanïpjjewa, Diosar katuyatäpjjarakiwa khitinakatejj nayrïri jaktäwin jaktapki ukanakajja. Qhepïri jiwasti jupanakjjarojj janiw kuna chʼamanïkisa, jan ukasti jupanakajj Diosampina Cristompina sacerdotepäpjjaniwa. Waranqa mararakiw jupampejj reinapjjani” sasa (Apocalipsis 20:6). Jupanakajj reyinakjama, sacerdotenakjamaw Jesusamp chika aka Oraqer apnaqanipjjani.

¿Aka Oraqen jakañatak jaktirinakajj utjaniti?

BIBLIAJJ AKHAM SIWA: Apóstol Pablojj akham sasaw Biblian qellqäna: “Jupanakjamarakiw Diosar iyawsas suytʼaskta, jiwatanakat ñanqha jaqenakansa, aski jaqenakansa jaktañapjja” sasa (Hechos 24:15).

Apóstol Pablojj “aski jaqenaka” sasinjja, ¿khitinakatsa parlaskäna? Sañäni, Daniel profetajja, aski jaqet uñtʼatänwa. Jupajj Diosar jan jitheqtasaw loqtawayäna, ukatwa Diosajj janïr jiwkipan akham säna: “Samartʼarakim, qhepa urunakanwa sartasjjarakïta, kunatejj waktʼkätam uka katoqañamataki” sasa (Daniel 12:13). ¿Daniel profetajj kawkhan jakañatakis jaktani? Bibliajj akham siwa: “Aski jaqenakajj oraq katoqapjjani, wiñayatakiw ukan jakapjjarakini” sasa (Salmo 37:29). Jesusajj akham sarakïnwa: “Kusisiñanïpjjew llampʼu chuymaninakajja, jupanakarakiw Diosan arsutaparjama oraqe katoqapjjani” sasa (Mateo 5:5). Daniel profetasa ukat Diosar jan jitheqtas loqtawayapki ukanakasa, aka Oraqen wasitampi jakañatakiw jaktapjjani, ukat wiñayatakiw jakapjjarakini.

Apóstol Pablojj “ñanqha jaqenaka” sasinjja, ¿khitinakatsa parlaskäna? Diosar jan uñtʼasa ukat Biblian yatichäwinakap jan uñtʼasa jiwawayapki, uka millón millón jaqenakatwa parlaskäna. Jupanakajj jaktjjasinwa Jehováa Diosarusa, Jesucristorusa uñtʼapjjani, ukat jupanakar wal munasipjjarakini (Juan 17:3). Khitinakatï Diosar serviñ amtapkani ukanakajja, wiñayatakiw jakapjjani.

¿Kunjamänis aka Oraqen jakañajja?

BIBLIAJJ AKHAM SIWA: “Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa” sasa (Apocalipsis 21:4). “Jaqenakasti utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini” (Isaías 65:21).

Munat familiaranakasajj jaktanjjapjjaniwa, jupanakampi jakasiñajj ¡kunja kusiskañakïkani! Ukampis ¿kunjamatsa ukajj cheqapunïniwa sasajj taqe chuyma confiysna?

Jiwatanakajj jaktapjjaniwa sasin amuyañajj janis walïkaspa ukham yaqhepanakajj amuyapjje. Ukampis apóstol Pablojj janiw ukham amuykänti, ukatwa akham säna: “Jiwasan Cristor suytʼañasatejj aka oraqen jakañasatakikïchejja, taqe jaqenakat sipansa wali llakkañätanwa. Ukampis janiw ukhamäkiti. Cheqpachansa Cristojj jiwatanak taypitjja jakatatawayiwa, jupajj nayraqat achükaspas ukhamarakiw taqe jiwatanakat jaktirinakatakejja” sasa (1 Corintios 15:19, 20). Pablojj jiwatat jaktañajj utjaniwa sasaw confiyäna, jupatakejj Jesusan jaktatapaw mä garantiyjamäna (Hechos 17:31).a Ukatwa apóstol Pablojj Jesusajj “nayraqat achükaspas” ukhamawa sasin säna, kunattejj jupaw wiñay jakañatak nayraqat jaktayatäna. Niyakejjay Jesusajj nayraqat jaktayatächïnjja, ukhamajj jaktirinakajj utjaskakiniwa.

Jiwatanakajj cheqapuniw jaktapjjani sañatakejja, mayajj akarakiwa: Jehová Diosajj ‘janiw kʼarisir’ Diosäkiti (Tito 1:2). Jupajj janipuniw kunapachas kʼariskänti ni kʼariskarakinisa. Jiwatanakar jaktayäwa sasajj janiw Diosajj aleqaki arskaspati, jaktayañatak chʼamanïtapsa uñachtʼayarakïnwa, ukampis uka arsutap jan phoqkaspa ukajj ¿walïspati? Cheqas ukajj janiw walïkaspati.

Jehová Diosajj munasirïtap laykuw jiwatanakar jaktayañ amtawayi. Job chachajj akham jisktʼasïna: “¿Mä jaqesti jiwjjasinjja wasitat jaktanjjaspati? [...]. Jumatejj jawsitasmajja, nayajj jaysarakirismawa; munasiñampiw uñtanitasmajja, jumajjay nayaru uskuschistajja uka layku” sasa (Job 14:14, 15). Job chachajja, Diosajj munasiñampiw uñtanitani sasaw confiyäna. ¿Diosan amtapajj pachpakïskpachati? Bibliajj akham siwa: “Nayatwa [Jehová] Tatitu Diosajja, nayasti pachpakïsktwa” sasa (Malaquías 3:6). Cheqas Jupajj jiwatanakar jaktayañ wal muni, kusisit jakasiñassa munarakiwa. Awk taykanakajja, jiwapki uka wawanakapan jaktaniñap wal munapjje, ukampis janiw jaktayañatakejj chʼamanïpkiti. Diosasti janiw jaktayañak munkiti, jaktayañatakis chʼamanirakiwa (Salmo 135:6).

Jehová Diosajja, Yoqaparuw jiwatanakar jaktayañatakejj chʼam churani, ukhamajj khitinakatï munat familianakap aptʼasiwayapki ukanakajj wal kusisipjjani. Jesusajj jiwatanakar jaktayañjja, wal munaraki. ¿Kunatsa ukham sistanjja? Lázaro sat amigopar janïr jaktaykasajja, kunjamsa kullakanakapasa amigonakapas wal jachapjjäna uk uñjasajja, ‘Jesusajj jachaqtʼasirakïnwa’ (Juan 11:35). Mä kutejja, mä viuda warmiru mä sapa wawapat wal jachaskir uñjasajja, Jesusajj “jupatjja khuyaptʼayasïnwa, ukat [akham] saraki: ‘Jan jachamti’ sasa”. Ukat jankʼakiw wawap jaktayarakïna (Lucas 7:13). ¿Kunsa uka sarnaqäwinakajj yatichistu? Jiwañajj kunjamsa mayninakar tʼaqhesiyi uk uñjasajja, Jesusajj wal sinttʼasiraki. Ukatwa jiwatanakar jaktayasajj wal kusisini.

¿Mä munat familiamat jiwawayjje? Inas janiw mayampis uñj-jjati sasin amuysta. Ukampis janiw ukhamäkiti, Diosajj jiwatanakarojj jaktayaniwa, Yoqaparuw jaktayañapatakejj uttʼayawayi. Diosajj jaktanipkani uka munat familianakamar katoqañam munaraki. Jupanakampi kunsa jutïrin lurapjjäta ukanak amtañajj ¡kunja kusiskañakïkani! Ukanjja, wiñayatakiw jupanakampi jakasjjañäni.

Qalltan parltʼaniwayktan uka Lionel chachajj akham siwa: “Jiwatanakajj jaktanipjjaniwa sapkitäna ukhajja, janiw cheqaw sañjamäkänti. Ukampis Bibliat yatjjatasaw cheqapunïskatap amuyjjta. Achachilajan jaktaniñap kusisitaw suytʼaskta” sasa.

¿Kunatsa jiwatanakajj jaktanipjjaniwa sasin confiysna? Jukʼamp yatjjatañatakejja, Jehová Diosan Testigonakapaw Bibliampi qhanañchtʼapjjeristam.b