‘Jan wali tiemponakanwa’ jaktanjja, llakinakas sapüruw utjaraki (2 Timoteo 3:1). Walja jaqenakajja, qollqe toqeta, familiata, guerranakata, usuñanakata ukat jan waltʼäwinak utjipanwa llakisipjje. Sapa mayniw kunayman llakinïpjje. Yaqhepasti, doctorajj cáncer usunïtaw siskitanicha sasaw ajjsarayasipjje. Yaqhepajj wawanakajasa, allchhinakajas kunjamakis jakasipjjani sasaw llakisipjjaraki.

Llakisiñajj utjapuniwa. Sañäni, examen churañatakisa, jaqenak nayraqatan parlañatakisa jan ukajj trabajon katoqayasiñatakisa, mä jukʼa llakissnawa. Cheqas mä jukʼa llakisiñajj jan walinakatsa jarkʼaqarakistuwa. Ukampis llakimpi aynachtʼjjsna ukhajja, jukʼampikiw jan waltʼayistaspa. Niya jichhakiw 68.000 jila, jilïr jaqenakat yatjjatasiwayi, ukanjja, kunjamsa llaki usunakajj waynpacharu tawaqpacharu jiwayaspa ukaw qhanstawayi. Jesusajj ukatwa akham jisktʼpachäna: “Wali llakisitapatsti, ¿khitis jumanakatjja jakañapjja mä horampisa yaptʼasispa?” sasa. Cheqas inamayaw wal llakisisksna, janiw llakisisajj jukʼamp maranak jaksnati. Jesusajj akham ewjjtʼarakïna: “Jan llakisipjjamti” sasa (Mateo 6:25, 27). Ukampis ¿kunjamatsa jan llakimpi aynachtʼksna?

Ukatakejj kunanakas yanaptʼistaspa uk lurañasa, Diosaruw yanaptʼa mayiñasa, ukat kuntï siskistu ukarus confiyañasarakiwa. Paul sat chacharusa, Janet, Alona sat warminakarus kunjamsa ukajj jan sinti llakisiñatak yanaptʼäna, ukanak jichhajj yatjjatañäni. Janis jichhajj jupanakjam jikjjataskstanjja, mä akatjamatwa ukhaman uñjassna.

Paul sat chachajj akham siwa: “Markajan taqe kunas wal irjjatjjän ukhajja, janiw manqʼañanakajj utj-jjänti, utjchïn ukasa, wali jilänwa. Manqʼañ alasiñatakejj walja kutiw walja horanak filasipjjerïta, ukat waktʼjjapjjerïtu ukhajja, janiw kunas utj-jjeriti. Jaqenakajj manqʼatjamaw callenakan desmayasjjapjjeri ukat qʼalaw tʼukharjjapjjeri. Kunatï sapürutak manqʼañajj munaski ukanakajj ratukiw wal irjjattawayjjäna, qollqejj janipuniw kunatakejjänsa. Bancon qollqe utjkitäna uksa, jubilasiñatak trabajon qollqe imaskayät uksa qʼal aptʼasiwayta” sasa. Jupajj pä yoqall wawaniwa.

Paul chachajja, familiapan jan manqʼat jiwapjjañapatakejj kunatï wakiski ukanakwa lurañapäna (Proverbios 3:21). Jupajj akham siwa: “Electricistjam trabajiñ yatiyäta. Ukampis kuna trabajsa katoqakiyätwa, mä jukʼaksa pagapkchitäna ukas walikïnwa. Yaqhepanakajja, trabajitajat manqʼañanakwa churapjjetäna jan ukajj kuna yänaksa churapjjakitänwa. Sañäni: pusi jabón churapjjetäna ukhajja, payak jiltʼayasiyäta, paysti alj-jjarakiyätwa. Ukat jukʼat jukʼatjja, 40 chhiwchhinakwa jikjjatta, uywarasajja, aljarjjtwa ukat 300 chhiwchhinakwa alasjjarakta. Ukatsti, 50 chhiwchhinakjja, pä quintal tonqo jakʼumpiw turkasta. Uka pä quintalampiw familiajarus, yaqhanakarus manqʼat jan jiwapjjañapatak walja tiempo yanaptʼawayta” sasa.

Paul chachatakejja, Diosar confiyañaw jukʼamp wakiskirïna. Diosar istʼtan ukhajja, Jupajj yanaptʼistuwa. Kunatï jakañatak munaski ukanakatjja, jan llakisipjjamti sasaw Jesusajj säna. Jupajj akham siwa: “[Awkimasti] yatiwa taqe akanak jumanakan munapjjatanakamjja” sasa (Lucas 12:29-31).

Ukampis Supayajja, yänakanïñas taqe kunat sipan wali wakiskirïkaspa, ukhamwa jila parte jaqenakarojj amuyayi. Ukatwa yänaka jikjjatañatakejj wal irnaqapjje, janiw sumsa ikipkiti. Yaqhanakasti, waljanak maysusisajja, maytʼirin esclavoparuw tukupjje, ukat qhepatak amtasipjje (Proverbios 22:7).

Yaqhepanakajj janiw suma amtar puripkiti. Paul chachajj akham siwa: “Waljanejj ‘sum jakasiñ’ munasajja, familianaka, amigonak jaytawayasaw yaqha markar sarjjapjjäna. Ukampis uka markankañatak jan documentonïsajja, janiw trabajo jikjjatapkänti. Awisajj policiampi jan katjayasiñatakejj imantasipjjañapänwa jan ukajj callenwa ikipjjañapäna. Janiw Diosan yanaptʼap thaqapkänti. Ukampis nanakajj familjam mayachtʼata, Diosan yanaptʼapampi uka jan waltʼäwinakar saykatañ amtawayapjjta” sasa.

JESUCRISTON EWJJTʼAPA

Jupajj akham saskakiwa: “Jesusajj akham sänwa: ‘Jan llakisipjjamti kunatï qharürojj paskani ukatjja, qharürusti taqe uka llakisiñanakapampi phoqtʼatarakïniwa, sapürurakiw ukham llakinakan phoqhantatäski’ sasa. Ukatwa Diosar sapüru uka toqet mayisiyäta. Cheqas kuntï Jesusajj siskäna ukajj phoqasïnwa, Diosajj kuntï arski ukjja, phoqapuniwa. Awisajj janiw kuntï munapkäyät ukpun jikjjatapkayätti. Mä kutejja, tiendat alasiñatakiw filasta, ukampis yogurak jikjjatta. Janiw kunäkipansa ukajj gustkitänti. Ukampis ukakiw utjäna, jaypʼojj uka pitakiw ikjjapjjta. Jehová Diosarojj walpun yuspärta, Jupajj janipuniw manqʼat jiwayapkitänti” sasa.a

“Jichhajj qollqejj utj-jjapjjetuwa. Cheqas Diosar confiyañaw jan llakimpi aynachtʼañatakejj wali askejja, ukwa familjamajj yateqawayapjjta. Jiwasatï Jehováb Diosan munañaparjam kuns lurañänejja, Jupajj yanaptʼapunistaniwa. Kuntï Salmo 34:8 qellqatan siski uka arunakajj cheqäskapuniwa, ukan akham siwa: ‘Yantʼapjjam, uñjapjjarakim, Tatitun munasir kankañapa, jupar taqe chuymamp makhatirejj kusisiñan jaqewa’ sasa. Ukham qollqet pistʼañ utjipanjja, jan sinti llakisiñatakiw ukajj yanaptʼawayapjjetu” sasa.

“Jakaskakiñatakejja, janiw qollqsa ni trabajsa munktänti jan ukasti, manqʼwa muntanjja. Ukatwa ‘trigojj yapunakan jilarkir utjpan, qollu patanakansti jilantarakpan’ sasin Bibliajj siski uka arunak jankʼak phoqasiñap muntanjja. Uk janïr phoqaskipanjja, kunatï utjkistu ukanakampejj kusisitakiw jakasiñasa. Bibliajj akham ewjjtʼistu: ‘Janirak qollqerus munapjjamti; kunatejj utjapjjtam ukampejj kusisitakïpjjam, Diosajj siwa: “Janiw kunapachas jaytkämati ni armtʼaskämasa” sasa’.c Uka arunakaw wal chuymachtʼapjjetu.”

Diosampi irpayasiñatakejj Paul chachampit familiapampit yateqasiñasa, jupanakajj Diosaruw wal confiyasipjjäna (Génesis 6:9). Inas jichhürunsa jan ukajj jutïrinsa qollqet pistʼata uñjaschiñäni, ukampis Paul chachajj kunatï wakiskäna ukanakwa luräna, jupatwa yateqassna.

Ukampis familia taypin jan waltʼäwinak utjipan llakistan ukhasti, ¿kunsa luraraksna?

Janet warmejj akham siwa: “Tataj jiwatatjja, chachajajj ‘yaqha warminëjjtwa’ sasaw situ. Jupajj amukiw isinakap apasjjatayna, ukat pä yoqall wawajampiruw jaytjawayapjjetu” sasa. Janetajj trabajsa jikjjatkchïnjja, janiw qollqepajj bancor pagañatakis alcanskänti. Ukampis janiw ukatak llakiskänti, jupajj saskakiwa: “Kunjamaksa familiajar nä sapaki uywäjja, sasaw wal llakisiyäta. Yaqha awk taykanakjam kuntï wawanakajajj munapki uk jan churirjamäsajj nayas juchanikirista ukham amuyasiyäta. Jaqenakajj nanakat kamsapjjakpachasa sasin jichhas llakisiskaktwa. ‘Chachapampi jan jaljtañatakejj janiw chʼamachasiwaykiti’ sasin inas sapjjchitu” sasa.

Diosar mayisiñaw Janetarojj jan sinti llakisiñatakisa, Diosar jukʼamp jakʼachasiñatakis yanaptʼi. Jupajj akham siwa: “Arumanakaw jukʼamp llakista. Sapakïsajja, kunanakatï pasawaykitu ukak lupʼiskta. Oracionampi, Biblia liyiñampiw ikiñatakejj yanaptʼitu. Ukat Filipenses 4:6, 7 qellqatas wal yanaptʼarakitu, ukan akham siwa: ‘Jan jumanakajj kunats llakisipjjamti, taqe kunsa Diosar sapjjam oracionana, mayipjjam yuspagarapjjarakim. Diosajj jumanakarojj churapjjarakïtamwa samarañapa, ukasti taqe kuntejj jaqejj amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa’ sasa. Arum paqaraw Diosar mayista, ukat kunjamsa Jehová Diosajj jan sinti llakisiñataki yanaptʼitu uksa amuyaraktwa” sasa.

Jesusajj Wali Uñtʼat Arstʼäwipanjja, Diosar mayisiñatwa parläna, ukajj kunayman llakinakar saykatañatakiw yanaptʼistu. Jupajj akham sänwa: “Awkimajj janïr arsupktas ukkhaw yatjje kuntï jumanakajj mayipkäta ukjja” sasa (Mateo 6:8). Ukhamäkchisa, Diosajj mayiñaswa muni. Oracionajj Diosar jakʼachasiñatakiw yanaptʼistu. Bibliajj akham siwa: “Diosar jakʼachasipjjam, jupasti jumanakarojj jakʼachasirakiniwa” sasa (Santiago 4:8).

Oracionajj janiw Jehová Diosar llakinakas awistʼañatakikïkiti, Diosajj ‘mayisitanakas istʼiriwa’, Jupar confiyasipki ukanakarojj jarkʼaqewa (Salmo 65:2). Ukatwa Jesusajj ‘jan qarjtasa oración luraña’ arkirinakapar yatichpachäna (Lucas 18:1). Ukhamajj jiwasar irpañapatakisa, yanaptʼañapatakisa, Diosar mayisiñ janipun armasiñäniti, Jupajj istʼistaniwa. Jiwasatï Diosar jan qarjtasa mayisiñäni ukhajja, Jupar confiyatassa ukat iyawsäwinitassa uñachtʼayarakiñäniwa (1 Tesalonicenses 5:17).

IYAWSÄWINÏÑAJJ ¿KUN SAÑS MUNI?

Diosar iyawsäwinïñajja, Jupar sum uñtʼaña sañ muni (Juan 17:3). Bibliat yatjjatasaw kunjamas Jupajja, kunsa amuyi ukanak yateqsna. Sapa maynit llakisitapsa yateqaraksnawa. Ukampis janiw Jupar aleq uñtʼañaki wakiskiti, jan ukasti, mä suma amigorjamaw uñtʼañasa. Cheqas mä suma amigjja, janiw ratuki jikjjatksnati, jayatwa amigosaskaspa. Diosar iyawsäwiniñatakisa ukat confiyañatakisa, ukhamarakiw tiempojj munasi. Jukʼat jukʼat sum uñtʼjjasaw kuntï Diosajj munki ukanak lurjjsna, ukat kunjamsa yanaptʼistu uksa amuyjjaraksna (2 Corintios 10:15; Juan 8:29). Janetarojj Diosar iyawsäwinïtapaw jan llakimpi aynachtʼañatakejj yanaptʼi.

Jupajj akham siwa: “Jehová Diosajj kunjamsa llakitakayät ukhajj yanaptʼitäna uk amuyañaw wal yanaptʼawayitu. Kunayman jan walinakaw pasapjjetäna, janipuniw ukanakat mistkäti sañjamänwa. Ukampis Diosar walja kuti mayista ukaw jan waltʼäwinak askichañatakejj yanaptʼawayitu, naya sapakejj janipuniw kuns lurkiriskayätti. Sapakuti, Diosar yuspärañataki mayiskta ukhajja, taqe kunanaktï Jupajj naya layku lurawayki ukanak amthapta. Diosan yanaptʼapjja, kuna horasatï munkta ukhapuniw awisajj katoqerïta. Jupajj suma amigonakampiw bendicitu, jupanakajj yanaptʼañatakejj jankʼakïpjjewa ukat wawanakajatakis yateqaskayäpjjarakiwa” sasa.a

“Malaquías 2:16 qellqatan Jehová Diosajj ‘jaljtañarojj uñistwa’ siski ukjja, jichhaw amuyta. Jan juchanïki uka warmitakisa, jan ukajj chachatakisa, yaqhampi ikintasisin chachapas jan ukajj warmipas engañawayki ukajj jukʼamp jan walipuniwa. Walja maranakas pasjjchejja, awisajj sapakiw jikjjatasta. Ukampis jan sinti llakisiñatakejj yaqhanakar yanaptʼañatakiw chʼamachasta.” Ukhamatwa Janetajj jan mayninakat yaqhaqtkiti, Biblian ewjjtʼaparjamaw luri (Proverbios 18:1).b

Janetajj akham saskakiwa: “‘Diosajj wajchanakan awkipawa, ijma warminakan arjjatiripawa’, uk yatiñajj wal chuymachtʼitu. Jupajj janipuniw jaytanukupkitaniti” sasa (Salmo 68:5). Diosajj janiw jan walinakampi jaqer yantʼkiti, antisas sum amuytʼasiñatakiw yanaptʼistu. Ukat ‘jachʼa chʼamapsa’ churarakistuwa, ukhamat jan sinti llakisiñataki, taqe ukanakwa Janet warmejj yateqawayi (Santiago 1:5, 13; 2 Corintios 4:7).

Ukampis jakäwi aptʼasiñjam jan walinak utjipan llakistan ukhasti, ¿kunsa luraraksna?

Alona sat warmejj akham siwa: “Sirenanak wararir istʼasajja, wal sustjasta, ukat jankʼakiw imantasir tʼijtta. Ukansa, sustjatakïsktwa. Yamas jan utankta ukhajj jukʼampiw sustjasta. Mä kutejja, thakin sarkipanwa sirenajj wararjjäna, istʼasajj jachjjayätwa, janiw samsurjamäjjäyätti. Walja horanakatwa walikejjayäta. Ukampis wasitampiw sirenajj wararjjarakkïna” sasa.

Taqeniw ajjsarayastanjja, janiw guerrajj utjki ukhanak ajjsarayasipkiti. Sañäni, familiasat jan ukajj amigosat jan qollkay usunïtap yatisajj wal sustjastanjja. Yaqhepajj jutïr urunakat wal llakisipjje; inas akham jisktʼasipjjchi: “¿Wawanakajas allchhinakajas kawkinaks jakasipjjani? ¿Kawkhantï oraqes samanas umas qʼañuchatäki, guerranakasa, usunakas utjki ukanti jakapjjani?” sasa. Ukanakat jan sinti llakisiñatakejj ¿kuns lursna?

Bibliajj akham siwa: “Chʼikhi jaqejj jan waltʼaña uñjasinjja jaltjjewa” sasa (Proverbios 27:12). Uka ewjjtʼajj ¿wali askejjaya? Cuerposar jan walinakat jarkʼaqañatakejj wal chʼamachastanjja, ukhamarakiw kunatï amuyusarusa ukat chuymasarus jan waltʼaykaspa ukanakat jarkʼaqasiñasa. Jan wali kusistʼañanakasa, sustjasiñjam jan wali yatiyäwinakasa, jukʼampikiw jiwasarus wawanakasarus llakisiyjjestaspa. Ukanak jan uñchʼukisajja, jan walinakatwa jarkʼaqasiñäni. Diosajj janiw jan wali amuyunakampi pʼeqesar phoqantañataki lurkistuti, antisas kunatï cheqäki, qʼomäki ukat sumäkaraki, ukanakampi phoqantañaswa muni. Ukham lurañäni ukhajja, “sumankañ Diosasti” jan sinti llakisiñatakiw yanaptʼistani (Filipenses 4:8, 9).

ORACIONAJJ WALI WAKISKIRIWA

Kunjamtï yatjjataniwayktanjja, cheqpach iyawsäwiniñajj jan sinti llakisiñatakiw yanaptʼistu. Bibliajj ‘oración jan jaytas lurañasatakiw’ ewjjtʼistu (1 Pedro 4:7). Ukhamajja, Diosaruw yanaptʼsa, yatiñsa, jan ajjsarasa taqe kun suma amuyumpi lurañataki mayiñasa. Ukat istʼitaniwa, sasajj taqe chuymaw confiyañasaraki (1 Juan 5:15).

“Akapacha apnaqerejj” Supayaw siw Bibliajja, ukhamajj janiw Diosajj apnaqkiti (Juan 12:31; 1 Juan 5:19). Jesusajj Supayat parlkasajj Diosar akham mayiñasatakiw yatichistu: “Ñanqhatjja qhespiyapjjeta” sasa (Mateo 6:13). Cheqas oracionaw jan sinti llakisiñatakejj yanaptʼistaspa. Alona warmejj akham siwa: “Sirenanak wararki ukhajja, jan sinti sustjasiñatakejj Diosaruw mayista. Esposojasa, jankʼakirakiw celularat jawsanitu, jupampiw mayisipjjarakta. Ukajj walpun yanaptʼitu” sasa. Bibliajj siwa: “[Jehová] Tatitojj artʼasirinakapan jakʼapankaskiwa” sasa. Diosajj taqe chuyma mayisipki ukanakarojj istʼiwa (Salmo 145:18).

¿KUNJAMAS JUTÏRIN JAKASJJAÑÄNI?

Jesusajj Wali Uñtʼat Arstʼäwipan akham mayisipjjañapatakiw arkirinakapar yatichäna: ‘Reinomajj jutpan’ sasa (Mateo 6:10, NM). Diosan Reinopaw llakisiykistu ukanak tukjani. Diosajj Jesucristoruw mä arunjja, “Sumankañan Jilïripa[ruw]” nuwasiñanak aka oraqpachan tukjañapatak ajlliwayi (Isaías 9:6; Salmo 46:9). Diosaw “taqe markanakarus cheqapar uñjani [...]. Janirakiw kawkïri markas armanakjja aptkjjapjjaniti yaqha marka contrajja, janirakiw guerran nuwasiñatakis yatichäwinakjja katoqkjjapjjaniti. Ukapachasti taqenis jan ajjsarasaw jakasipjjani” (Miqueas 4:3, 4). Taqe familianakaw “utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini” (Isaías 65:21). Ukat ‘janiw khitis usutatwa sasajj sisjjaniti’ (Isaías 33:24).

Ukampis jan walinakat jarkʼaqasiñatak taqe kunsa lurkchiñänejja, “horasajj jan waltʼañajj [mä akatjamat] taqeniruw puri” (Eclesiastés 9:11). Inas jan wali cheqan jikjjatassna, jan ukajj ukhapun kuna jan walis utjchispa. Kunjamtï yatktanjja, walja jaqenakaw guerranakana, jan waltʼäwinakan ukat jan wali usunakampi jiwapjje. Ukhamajj ¿kuna suytʼäwis jupanakatak utji?

Waljaniw jaktapjjani, qawqhanipunis jaktapjjani uk Diosakiw yati. Diosajj janiw jupanakar armkiti, ‘horasajj purininiwa taqe jiwatanakasti jaktapjjaniwa’ (Juan 5:28, 29). Uka toqet Bibliajj akham siwa: “Uka suytʼäwiw sum katjjäsistu ukhamarak almasa uñjaraki, kunjämatejj anclajj mä barcorojj katjjäsejja ukhama” sasa (Hebreos 6:19). Ukat Diosajja, Jesusar “jiwatat jaktayasaw taqe jaqenakar [mä garantía churawayi]” (Hechos 17:31).

Jichhürunakan Diosar serviñataki chʼamachasirinakas llakin uñjasipjjarakiwa. Paul, Janet, Alona jupanakarojja, kunanakatï yanaptʼirjamäki ukanak luraña, Diosar mayisiña, ukat Diosajj kuntï jutïrin lurkani ukanakar confiyañaw jan sinti llakisiñatakejj yanaptʼawayi. Jiwasarojj ukhamarakiw yanaptʼistaspa, Bibliajj akham siwa: “Uka suytʼañ churiri Diosajja, kusisiñampi, sumankañampi jumanakar phoqhantpan” sasa (Romanos 15:13).