Kunjamtï Samuel chachasa, Teresa ukat Magdalene warminakas sapkejja, jaqenakajj kunayman toqet mayisipjje. Yaqhepanakan mayisitanakapajj wali askiwa, ukampis yaqhepan janiw ukhamäkiti. Waljaniw examen churañatakisa, pelot anatir equipopan atipañapatakisa, familiapar yanaptʼañapatakisa, jan ukajj yaqha toqenakatsa mayisipjje. Taqe ukanakajj jaqenakatak mayisiñajj wali askïtap uñachtʼayistu. Cheqas ‘jan religionanïpki ukanakas mayisipjjarakiwa’ sasaw yatjjatasiwayi.

¿Jumajj mayisirïtati? Ukhamächi ukhajja, ¿kunatsa mayista? Jumajj mayisirïstasa janisa, inas akham jisktʼasta: “¿Mayisiñajj yanaptʼistaspati? ¿Mayisitanakas istʼirejj utjpachati?” sasa. Mä qellqerejja, “mayisiñajj mä qollampi sasikiwa, [...] kunjamtï maynejj uywapar parlkaspa ukhama” sasaw amuyi. Yaqhep qollirinakajja, niya pachparak amuyapjje, mayisiñajj “yanaptʼir qolljamawa” sasaw sapjjaraki. ¿Jumajj kamsasmasa? ¿Jaqenakajj aleq mayisiñatakti mayisipjjpacha? Jan ukajj ¿kuna yanaptʼanak jikjjatañatakikich mayisipjje?

Bibliajja, mayisiñajj yanaptʼir qollanakat sipansa, jukʼamp askiwa sasaw qhanañchi. Ukatjja, munañaparjam mayisipki ukanakar istʼiwa sasaw saraki. ¿Ukajj cheqäpachati? Uka toqet jichhajj yatjjatañäni.

Yaqhep jaqenakajja, mayisiñajj tiempo apaqakiwa sasaw sapjje. Yaqhepanakasti mayisipjjewa, ukampis janiw khitis jaysankituti sasaw amuyapjje. Diosajj janiw utjkiti siri mä chachajja, kunjamäpachas Diosajj sasaw amuytʼäna, ukatwa akham sasin mayisïna: “Istʼaskchista ukhajj jaysita, mä jukʼsa parlita” sasa. Ukampis Diosajj janiw kuns arskänti “amukïnwa” sasaw säna.

Ukampis Bibliajj mayisitanakas Diosaw istʼaski sasaw qhanañchi. Nayra tiemponjja, markaparojj akham sasaw säna: “Tatituw jumatjja khuyaptʼayasïtam yanap mayisisa arnaqasitamata, istʼasinsti jaysarakïtamwa” sasa (Isaías 30:19). Yaqha jiskʼa tʼaqajj akham siwa: “Kusisiñampiwa katoqe cheqa jaqenakan mayisitanakapjja” sasa (Proverbios 15:8).

Biblianjja, kunjamsa yaqhep jaqenakan mayisitanakapar istʼasïna ukas qhanañchasirakiwa. Bibliajj siwa: ‘Jesusajj khititejj qhespiyañatak chʼamanïkäna ukaruw mayisïna, “Diosasti istʼänwa”’ sasa (Hebreos 5:7). Yaqhanakajj Daniel 9:20, 21 ukat 2 Crónicas 7:1 qellqatanakanwa jikjjatasiraki.

¿Kunatsa yaqhepanakajj janis khitis mayisitanakap istʼkaspa ukham amuyapjje? Mayisitanakas istʼatäñapatakejja, Bibliajj parlki uka Jehová Dios saparukiw mayisiñasa.a Janiw yaqha diosanakarus ni nayra achachilanakarus mayisiñasäkiti. Janiw ukakïkiti, kuntï maykañäni uk “munañaparjama” mayisiñas Diosajj munaraki. Ukhamti mayisiñänejja, ‘Jupajj istʼistaniwa’ (1 Juan 5:14). Ukhamajj mayisitanakas Diosajj istʼañapatakejja, Juparuw uñtʼañasa ukat istʼañasarakiwa.

Waljaniw mayisiñajj janiw religionanakan aleq mä costumbrepakïkiti sasin sapjje, jan ukasti, Diosajj mayisitanakas istʼistuwa ukat jaysanistaspawa sasin amuyapjje. Kenia markankir Isaac sat chachajja, siwa: “Biblia sum amuytʼañatakiw Diosar mayista. Qhepatjja, mä jaqew jikjjatitu, jupaw Biblia sum amuytʼañ yanaptʼawayitu” sasa. Filipinas markankir Hilda sat warmejja, cigarro pitañ jaytañ munäna, ukampis janiw jaytirjamäkänti. Qhepatjja chachapajj akham sänwa: “Diosar yanaptʼañapataki mayisim” sasa. Ukatwa Hilda warmejj mayisïna, jupajj siwa: “Kunjamsa Diosajj yanaptʼawayitu ukajj wali muspharkañawa. Jukʼat jukʼatwa cigarro pitañ jan munjjayätti. Ukhamatwa jaytawayjjta” sasa.

¿Mayisitamatï Diosan munañaparjamächejja, llakinakar saykatañatakejj yanaptʼirïstamti?

Diosajj jupampi sum apasiñas muni.

Amigonakajj parltʼasipki ukhajj wali sum apasipjje. Diosajj jupamp parltʼasisma ukwa munaraki, ukhamat amigopäñataki. Jupajj akham sistuwa: ‘Jumanakajj nayaru artʼasipjjetäta, nayaru mayisisa, nayasti mayisitanakamjja istʼapjjarakïmawa’ sasa (Jeremías 29:12). Ukhamti mayisïtajja, ‘Diosaruw jakʼachasïta, jupasti jumanakarojj jakʼachasirakiniwa’ (Santiago 4:8). Bibliajj akham siwa: “Tatitojj artʼasirinakapan jakʼapankaskiwa” sasa (Salmo 145:18). Diosarutï sapür mayisïtajja, Jupamp wali sum apasïta.

Diosajj yanaptʼañ munistu.

Jesusajj akham sänwa: ‘¿Utjaspati jumanak taypinjja wawapajj tʼantʼa mayispa ukatsti awkipajj qalak churaspa ukhamajja? ¿Jan ukajj wawapajj chawlla mayi ukhajj awkipasti mä asiru churaspati? Jumanakajj jan walïkasinsa, sumäkis ukwa wawanakamarojj churapjjtajja. ¡Alajjpachankir Awkimasti ukatsa jukʼampiwa khitinakatejj Jupar mayki ukanakar sumanaka churañatakejja!’ sasa (Mateo 7:9-11). Diosajj jupar mayisisma ukwa muni “Jupasti jumanakatjja llakisirakiwa” (1 Pedro 5:7). Llakinakam Jupar yatiyasma ukwa munaraki. Bibliajj akham siwa: “Jan jumanakajj kunats llakisipjjamti, taqe kunsa Diosar sapjjam oracionana, mayipjjam yuspagarapjjarakim” sasa (Filipenses 4:6).

Jaqenakajj ajay toqet yanap muntanjja.

Jaqenak toqet yatjjatirinakajja, niya taqe jaqenakaw Diosar mayisipjje sasaw sapjje. Diosajj janiw utjkiti, Diosar janiw uñtʼksnati sirinakas uka taypinkapjjarakiwa.a Ukajja, jaqenakajj Diosan yanapap munatas amuytʼayistu. Jesusajj “kusisiñanïpjjew khitinakatejj ajay toqen aynachtʼatäpjjatap amuyasipjje ukanakajja, Diosan reinopajj jupanakankarakiwa” sasaw säna (Mateo 5:3). Ukhamajj ajay toqet sumankañatakejj sapüruw Diosar mayisiñasa.

Diosar mayisisajj ¿kuna askinaksa jikjjatañäni?

Janïr kun lurañ qalltkasajja, akham sasin jisktʼasipuntanwa: ‘¿Kunjamsa ukajj yanaptʼitani?’ sasa. Mayisiñ toqet ukham jisktʼasiñajj ¿walikïskaspati? Jïsa. Jaqenakajj kuntï lurkañäni ukajj yanaptʼistaniti janicha, uk yatiñ munapuntanwa. Job chachas akham sasaw may kutejj jisktʼasirakïna: ‘Jupar jawsirïsta ukhajj ¿istʼitaspati?’ sasa (Job 9:16, NM).

Uñjaniwayktan uka yatichäwinakanjja, mayisiñajj janiw religionanakan aleq mä costumbrepakïkiti ni mä yanaptʼir qollampi saskisa. Jehová Diosar munañaparjama, ukat kunatï Jupatak walïki ukarjam mayisiñäni ukhajja, Jupajj istʼistaniwa. Cheqas Jupar jakʼachassna, ukwa Diosajj muni (Santiago 4:8). Ukhamasti, Diosar sapür mayisiñajj ¿kunjamsa jakäwisan yanaptʼistani? Ukanakat jichhajj mä qawqha uñjañäni.

Amuyusan sumankañatakiw yanaptʼistu.

Jan walinakan jikjjatasisajj ¿llakimp aynachtʼirïtati? Ukhamächi ukhajja, Bibliajj “jan inaktʼas orapjjam” ukhamaraki “taqe kunsa Diosar sapjjam oracionana” sasaw chʼamañchtʼistu (1 Tesalonicenses 5:17; Filipenses 4:6). Ukhamtï mayisiñänejja, Diosajj samarañap churapjjätam “uka samarañasti jumanakan chuymanakamsa, amuyunakamsa imaniwa Cristomp mayakïpjjatam layku” sasaw Bibliajj qhanañchistu (Filipenses 4:7). Diosarutï llakinakas jaytañänejja, sumakiw jikjjatasiñäni. Cheqas “Diosar llakinakam katuyam, jupasti chʼaman tukuyätam, Diosar jaysirin aynachtʼañapjja, janipuniw jupajj munkaniti” sasaw Salmo 55:22 qellqatajj qhanañchi.

Diosan samarañap waljaniw jikjjatawayapjje. Corea del Sur markankir Hee Ran sat warmejj akham siwa: “Jan waltʼäwinakan uñjaskta ukhajj Diosaruw mayista. Ukhamat jan walinakar saykatañatak chʼaman jikjjatasta” sasa. Filipinas markankir Cecilia sat warmejj akham sarakiwa: “Wawanakajatsa, mamajatsa walpun llakista, mamitajajj usuntataw uñjasi, ukat janiw khitïtsa uk amuyjjeti. Mayisiñajj uka jan walinakar saykatañatakiw yanaptʼitu, ukhamatwa llakinakajj jan aynachtʼaykituti. Jehová Diosaw jupanakar uñjañ yanaptʼaskitani sasaw confiyarakta” sasa.

Jan walin uñjasktan ukhaw chuymachistu ukat chʼam churistu.

Jan walinakan jikjjatasisajj ¿wali llakitat uñjasta? ‘Khuyapayasir Awkisaru’, mä arunjja, Jehová Diosaru mayisisma. Bibliajj “taqe tʼaqhesiñanakasanwa Diosajj chuymachistu” sasaw qhanañchi (2 Corintios 1:3, 4). Sañäni, Jesusajj wali llakita jikjjataskäna ukhajj “orañatakiw killtʼasirakïna”. ¿Kunas pasäna? “Alajjpachat mä [angelaw] uñstäna juparu chʼamañchañataki” (Lucas 22:41, 43). Nehemías chachajj jan wali jaqenakamp arknaqataw uñjasïna, ukhamat Diosan munañap jan phoqañapataki. Ukatwa jupajj Diosar ‘jukʼamp chʼamam’ churita sasin mayisïna. Diosajj jan ajjsaras munañap phoqañapatakiw yanaptʼäna (Nehemías 6:9-16). Ghana markankir Reginald sat kullakajj akham siwa: “Kunapachatï jan walinakan uñjaskta ukhajja, mayni cheqpach yanaptʼirirus parlkirista, ukat jupajja, jan llakisimti sasinsa chuymachtʼkitaspa ukhamawa” sasa. Cheqas Diosar mayisiñäni ukhajj Jupajj chuymachistaniwa.

Diosan yatiñ kankañapampiw yanaptʼistu.

Kunanaktï lurañ amtktan ukanakajj jiwasarusa, familiasarus yanaptʼaspawa, jan ukajj aynachtʼayaspawa. ¿Kunjamsa suma amtanakar pursna? Bibliajj akham siwa: “Jumanakat maynintejj jan yatiñ kankañapajj utjkchi ukapachajj, Diosat maypan, [ukajj jan walinakan uñjaskañäni ukhaw yanaptʼistani] Diosasti juparojj churaniwa. Jupasti jilarkirwa churi, khitirus jan kuns sasaw churaraki” sasa (Santiago 1:5). Diosar yatiñ kankañap mayiñäni ukhajja, Jupajj qollan ajayup toqew suma amtanakar puriñasataki yanaptʼistaspa. Jesusajj akham sänwa: ‘Alajjpachankir Awkimajj qollan ajayup churani mayipki ukanakarojja’ sasa (Lucas 11:13).

Jesusajj suma amtanakar puriñatakejj Awkiparuw mayisirakirïna. 12 apostolonakap ajlliñapäkäna ukhajja, “jupajj arum paqariw Diosat mayisïna” sasaw Bibliajj qhanañchi (Lucas 6:12).

Jichhürunakan waljanirakiw suma amtanakar puriñatak Diosar mayisipjje, mayisitanakapar jaysatap amuyasajja, Jesusjamarakiw wali sum jikjjatasipjje. Filipinas markankir Regina sat warmejja, walja jan walinakanwa uñjasïna, chachap jiwkäna uka qhepatjja sapakiw jikjjatasïna, jan trabajoni ukhamaw uñjasïna. Janiw ukakïkänti, pä phuchanakap uywañajj jupatak wali chʼamarakïnwa. ¿Kunas suma amtanakar puriñatak yanaptʼawayi? Jupajj akham siwa: “Taqe chuymaw Jehová Diosar yanapap mayisirïta, Jupasti istʼapunitänwa” sasa. Ghana markankir Kwabena sat chachajj Diosaruw yanaptʼañapatak mayisïna. Jupajj akham siwa: “Utanak luratajat walja qollq pagapjjetäna, uka irnaqäw aptʼasiwayta” sasa. Uka toqet sumpach amuytʼasajja, jupajj akham siwa: “Jehová Diosar mayisiskakiyätwa, ukhamat mä suma amtar puriñataki”, ukampis “Diosajj suma amtanakar puriñatakiw yanaptʼawayitu, jichhajj familiajarojj ajay toqetsa, jañchi toqetsa sum yanaptʼaskta” sasa. Diosajj suma amtanakar puriñatak jumar yanaptʼarakiristamwa.

Kunjamsa mayisiñajj yanaptʼistaspa uk mä qawqhanak uñjaniwaytanjja. (Jukʼampjja, “Mayisiñajj aka toqenakan yanaptʼistaspa” siski uka recuadro uñjjattʼam). Diosajj mayisitam istʼañapatakejja, nayraqatajj Juparuw uñtʼañama ukat kunas amtapajj uksa yatjjatañamarakiwa. Ukhamajj ¿kunsa ukatak lurasma? Jehová Diosan Testigonakaparuw Bibliat yatjjatañatak mayisma.a Ukhamatwa Diosar jakʼachasisma, Jupasti ‘mayisitanakar istʼiriwa’ (Salmo 65:2).