-
¿Khitinakas Jehová Diosan Testigonakapajja?Yatiyañataki 2015 | septiembre 1
-
-
NAYRÏR JANAN PʼEQEÑCHÄWIPA
¿Khitinakas Jehová Diosan Testigonakapajja?
“Jaya maraw Mike sat chacharojj uñtʼta, jupajj Jehová Diosan Testigopawa. Ukampis iglesiapan kuns lurapjjpacha, ¿khitis Jehová Diosajja? ¿Kunatsa Jehová Diosan Testigonakapajj fiestanak jan amtapki? sasaw jisktʼasirïta. Ukatwa Mikit wal llakisiyäta.” (Becky, California, Estados Unidos)
“Vecinonakajajj Jehová Diosan Testigonakapampiw Bibliat yateqañ qalltapjjäna, ukatwa akham sasin lupʼirïta: ‘¡Uka sutejj janiw mä religionatakejj khusäkiti! ¿Kamsañs munpacha?’ sasa.” (Zenon, Ontario, Canadá)
“Kunatsa iglesiar jan sarapki sasin aynachtʼayañatakiw Jehová Diosan Testigonakapajj jutapjjpacha sasaw esposajampejj amuyapjjerïta. Ukampis niyakejjay wali uñtʼata religionanakajj jan jisktʼanakas qhanañchirjamäpkchejja, janiw Testigonakajj kunsa qhanañchapkistaspati sasaw amuyapjjayäta.” (Kent, Washington, Estados Unidos)
“Janiw Testigonakar uñtʼkayätti ni kunarus creyipjje uksa yatkarakiyätti.” (Cecilie, Esbjerg, Dinamarca)
Inas Jehová Diosan Testigonakapar utat uta, callenakana yatiyir uñjirïsta. Ukhamaraki Bibliat apstʼat qellqatanak churiri, Bibliat jan kun mayisak yatichir uñjarakirïsta. Jupanakaw liytʼaskta uka revistsa churarakpachätam. Ukampis inas jumajj parltʼaniwayktan uka jaqenakjam amuyaraksta, ukat inas ¿khitinakas Jehová Diosan Testigonakapajja? sasin jisktʼasiraksta.
Jehová Diosan Testigonakapajj ¿kunarus creyipjje? ¿Kawkhatsa yatiyañatakisa, tantachasiñ utanak lurañatakis qollqe apsupjje? ¿Kunatsa utat uta, callenakana yatiyapjje? sasin jisktʼassta ukhajja, ¿kunsa jumajj lurasma? ¿Kawkhansa jisktʼanakaman qhanañchäwip jikjjatasma?
Cecilie sat warmejj akham siwa: “Internetaruw khitinakäpjjes Jehová Diosan Testigonakapajj uk yatjjatañatak mantta. Ukanjja, jupanakat jan walinak parlapjjäna, ukhamasti nayajj jan walirak Testigonakat amuyjjayäta” sasa. Ukampis Jehová Diosan Testigonakapampi parljjäna ukhajj janiw ukham amuyjjänti.
Inas jumajj Testigonakat jukʼamp yatjjatañ munaraksta. Ukhamächi ukhajja, jupanakaruw jisktʼasma. Jupanakaw aka revista lurapjje, ukat sumpach uka toqet qhanañchtʼapjjeristam (Proverbios 14:15). Akjjar jutkani uka yatichäwinakajja, ¿khitinakäpjjesa, kunarus creyipjje ukat kunsa lurapjje? Taqe ukanakaruw qhanañchaskani.
-
-
¿Kunjam jaqenakäpjjes Jehová Diosan Testigonakapajja?Yatiyañataki 2015 | septiembre 1
-
-
NAYRÏR JANAN PʼEQEÑCHÄWIPA | ¿KHITINAKAS JEHOVÁ DIOSAN TESTIGONAKAPAJJA?
¿Kunjam jaqenakäpjjes Jehová Diosan Testigonakapajja?
Oraqpachankir mä organizacionäpjjtwa, janiw yaqha religionanakampi kunansa mitisipkti. Jehová Diosan Testigonakapar oraqpachan uñjaski uka oficinanakajj Estados Unidos markanwa jikjjatasi. Ukampis Testigonakajj oraqpachanwa utji. Taqpachanejj 8.000.000 ukhanipjjtwa. 230 jila markanakanwa Bibliat yatichapjjarakta. Ukhamatwa Jesusan arunakarjam phoqasipkta. Jupasti sänwa: “Diosan reinopat aka suma yatiyäwisti aka oraqpachanwa yatiyatäni, ukhamat taqe markanakan yatipjjañapataki” sasa (Mateo 24:14).
Testigonakajj markan leyinakaparjamaw sarnaqapjjta ukat respetompiw uñjapjjarakta. Ukampis janiw politicar mitisipkti. Ukhamatwa Jesusan arunakaparjam sarnaqapjjta, jupasti akham sänwa: “[Jumanakajj] janiw akapachankirïpktati” sasa (Juan 15:19, MT; 17:16). Ukatwa Jehová Diosan Testigonakapajj Payïr Jachʼa Chʼajjwäwin carcelar jistʼantata, tʼaqhesiyata ukat jiwayata uñjasipjjäna. Alemania markankir mä exobispojj akham sasaw qellqäna: “Tercer Reich apnaqäwinjja, (jan ukajj Hitler chachajj apnaqkäna) ukhajj Testigonakakiw Bibliarjam sarnaqasajj jan guerrar mitisipkänti” sasa.
“[Jehová Diosan Testigonakapajja] janiw jan walinak lurapkiti. Jupanakajj wali sum marka apnaqerjamasa irnaqtʼapjjaspa, ukampis janiw politicar kunäkipansa mitisipkiti. [...] Marka apnaqerinakarojj istʼapkchisa, jupanakajj Diosan Reinopakiw taqe jan walinak chhaqtayani sasaw taqe chuyma confiyapjje.”(Periódico Nová Svoboda, República Checa)
Janis akapachar mitisipkstjja, mayni jaqenakjamarakiw akapachan jakasipkta. Jesusajj akham sasaw Diosar mayïna: “Janiw mayksmati akapachat apsuñamataki” sasa (Juan 17:15). Ukatwa trabajirisa, alasirisa ukat escuelarus vecinonakjam sarasipkta.
-
-
¿Kunarus Jehová Diosan Testigonakapajj creyipjje?Yatiyañataki 2015 | septiembre 1
-
-
NAYRÏR JANAN PʼEQEÑCHÄWIPA | ¿KHITINAKAS JEHOVÁ DIOSAN TESTIGONAKAPAJJA?
¿Kunarus Jehová Diosan Testigonakapajj creyipjje?
‘Taqe Qellqatajj Diosan amuytʼayatawa, askirakiw yatichañataki’ sasaw Testigonakajj creyipjjta (2 Timoteo 3:16). Ukatwa Diosar uñtʼañatak Bibliat yatjjatapjjta, ewjjanakaparjam sarnaqañatakis chʼamachasipjjaraktwa.
Bibliajj akham siwa: “Juma sapak [Jehová] Diosätam yatipjjpan, aka oraqjjar juma sapak Alajjpachankirïtam yatipjjarakpan” sasa (Salmo 83:18).a Ukatwa Jehová Dios saparuki yupaychapjjta, jaqenakarus sutipsa yatiyapjjarakta (Isaías 43:10-12).
Jesusan arkiripäpjjtwa, Jesusajj ‘Diosan Wawapawa’,b jupajj aka Oraqeruw jutäna, ukat Mesiasaruw tukuwayi sasaw creyipjjta (Juan 1:34, 41; 4:25, 26). Jesusajj jiwatat jaktasajj alajjpacharuw sarjjäna (1 Corintios 15:3, 4). Qhepatjja, Reyjamaw Diosan Reinopan uttʼayatäjje (Apocalipsis 11:15). Uka Reinojj alajjpachan uttʼayatäjjewa, uka Reinow aka Oraqe mä Paraisor tukuyani (Daniel 2:44). Bibliajj siwa: “Llampʼu chuymaninakasti oraq katoqapjjani, jilarkir sumankañampiw kusisipjjarakini” sasa (Salmo 37:11, 29).
“Biblia liytʼapki ukhajja, Diosas parlkiristam ukhamawa. Jan walinakan uñjasipki ukhajj Diosan Arupan ewjjtʼanakap thaqtapjje. [...] Jupanakatakejja, Diosan Arupajj jakaskiwa.”(Sacerdote católico Benjamin Cherayath, Münsterländische Volkszeitung sat periódico, Alemania)
Bibliajj taqeniruw jichhürunakan yanaptʼaspa sasaw Testigonakajj creyipjjta (Isaías 48:17, 18). Ukatwa Biblian ewjjtʼanakaparjam sarnaqañataki chʼamachasipjjta. Sañäni, Bibliajj janiw cuerpomsa, amuyumsa qʼañuchapjjätati sasaw ewjjtʼistu, ukat cigarrsa jan pitapkti ni droganakampis qolljasipkti (2 Corintios 7:1). Janirakiw Diosajj jan walit uñjki ukanaksa lurapkti. Janiw machjasipkti ni qʼañu luräwinakansa sarnaqapkti ni lunthatasipkaraktsa (1 Corintios 6:9-11).
a Qullan Arunaka Biblianjja, glosariopan “Tatitu” siski uka pʼeqeñchäwinjja, ‘Tatitojj Yavé [jan ukajj Jehová] sutimpiw uñtʼasiraki’ sasaw qhanañchi.
b Bibliajj ‘Diosan mä sapa Yoqapa’ sasaw Jesusar saraki. Cheqas jupa saparukiw Jehová Diosajj jan khitin yanaptʼat luräna. Ukatjja, Diosajj taqe kunanak lurkäna ukanakat Jesusajj nayrïriwa (Juan 3:18; Colosenses 1:13-15).
-
-
¿Kunjamsa qollqe toqet yanaptʼasipjje?Yatiyañataki 2015 | septiembre 1
-
-
NAYRÏR JANAN PʼEQEÑCHÄWIPA | ¿KHITINAKAS JEHOVÁ DIOSAN TESTIGONAKAPAJJA?
¿Kunjamsa qollqe toqet yanaptʼasipjje?
Sapa maraw millón millón Biblianaka, Bibliat apstʼat qellqatanak imprimipjjta, ukat lakirapjjarakta. Oraqpachan sucursalanakasa, imprentanakas utji. Walja tamanakar jalanoqotapjjtwa, Tantachasiñ Utanakan tantachasipjjta ukanakajj Diosar yupaychañatakjam suma lurtʼatawa. ¿Kawkhatsa ukanakatakejj qollqe apsusi?
Taqe ukanakajja, yanaptʼañ munirinakan churäwinakapampiw apasi (2 Corintios 9:7). Khä 1879 marana Zionʼs Watch Tower sat revistajj payïr kuti apsuskäna ukanjja, akham sänwa: “[Aka revistajja] JEHOVÁ Diosan yanapapampi apsutawa, ukhamajj janiw qollqejj mayjaskaniti, ni jaqenakan yanaptʼapsa maykarakiniti” sasa. Jichhürkamas pachpak amuyasipkta.
Maynitï qollqemp yanaptʼañ munchejja, sucursalaruw apayaspa, jan ukajj Tantachasiñ Utanakan cajanakajj utjki ukaruw uchaspa. Janiw diezmo mayipkti, ni qollqes apthapiskarakiti. Janirakiw mayninakar yanaptʼatatsa, Bibliat apstʼat qellqatanakatsa qollqejj mayiskiti. Yatiyir saratatsa, tantachäwinakan yatichatatsa ni tantachasiñ utanak luratatsa janiw khitis pagapkituti. Jesusajj sänwa: ‘Inakiw lurapjjäta, inaki katoqapjjatam layku’ sasa (Mateo 10:8). Janirakiw Testigonakan oficinanakapana, jan ukajj sucursalanakan irnaqapki ukanakarusa, ni Oraqpachan Jilïr Irpirinakarus pagaskiti.
“Jehová Diosan Testigonakapajj taqe kunanaktï lurapki ukanakajja, yanaptʼañ munirinakan churatapampiw apasi. Ukhamasti sapa mayniw qawqha qollqsa churani ukat qawqha kutis churarakini ukjja, chuymapan amtapjje.”(Tribunal Europeo de Derechos Humanos, 2011)
Yanaptʼañ munirinakajj churapki uka qollqempejja, jan waltʼäwinakan uñjasipki ukanakar yanaptʼañatakis irtasirakiwa. Nayrïr cristianonakajja, ukhamarakiw jan waltʼäwinakan uñjasirinakar yanaptʼapjjerïna (Romanos 15:26). Jichhürunjja, ukhamarakiw jan walinakan uñjasipki ukanakan utapsa askichapjjta, ukhamaraki manqʼsa, isinaksa, ukat qollanakampis yanaptʼapjjta. Janiw ukakïkiti, Tantachasiñ Utanaksa askichapjjaraktwa.
-
-
¿Kunatsa Diosan arunakap yatiyapjje?Yatiyañataki 2015 | septiembre 1
-
-
NAYRÏR JANAN PʼEQEÑCHÄWIPA | ¿KHITINAKAS JEHOVÁ DIOSAN TESTIGONAKAPAJJA?
¿Kunatsa Diosan arunakap yatiyapjje?
Jilapartejj Diosan arunakap yatiyiritwa Testigonakar uñtʼapjje. Utat uta, callenakana, mercadonakana ukat kawkhantï jaqenakajj utjki ukawjanakanwa yatiyapjjta. ¿Kunatsa yatiyir sarapjjta?
Jehová Diosan Testigonakapajj Diosar jachʼañchañataki ukhamarak sutip qhanañchañatakiw yatiyapjjta (Hebreos 13:15). Ukham lurasajj Jesucristoruw istʼapjjta, jupasti akham sänwa: “Taqe akapachankir jaqenakar yatiyir sarapjjam, nayar arkir tukuyapjjam [...]. Yatichapjjarakim taqe kuntejj nayajj jumanakar yatichapksma ukanaka” sasa (Mateo 28:19, 20).
Ukampis jaqenakaruw munasipjjta, ukatwa taqenir Diosan Arup yatiyapjjta (Mateo 22:39). Jilapart jaqenakajj kunaymaniruw creyipjje, ukatwa awisajj suma yatiyäwinak jan istʼañ munapkiti. Ukampisa, Biblian ewjjtʼanakapajj jaqenakar jan walinakat qhespiyaspawa sasin taqe chuymaw confiyapjjta. Nayrïr cristianonakjamarakiw ‘Cristo Jesusjjat suma yatiyäwinaka’ jan qarjtasa yatiyasipkta (Hechos 5:41, 42, NM).
Antonio Cova Maduro sat sociologojj akham sänwa: ‘Taqe chuyma, jan qarjtasa ukat jiwañkamaw Jehová Diosan Testigonakapajj Diosan arunakap taqe cheqar yatiyir sarapjje’ sasa. (Periódico El Universal, Venezuela)
Revista liytʼirinakat jilapartejja, janiw Jehová Diosan Testigonakapäpkiti. Yaqha religionanïpki ukanakarus Bibliat yatichapjjaraktwa, jupanakajj ukham lurapjjatajat wal yuspärapjje.
Inas yaqha jisktʼanakajj utjaskakstam. Ukatakejja aka cheqanakanwa jisktʼanakaman qhanañchäwip jikjjatasma:
Jehová Diosan mä Testigoparuw jisktʼasma.
Internetan jw.org sat cheqaruw mantasma.
Jan ukajj tantachäwiruw jutasma. Ukan janiw qollqejj mayiskiti ukat khitis jutakispawa.
-