KUNAS JAN WALTʼAYÄNA. Biblia qellqerinakasa ukhamarak copiapkäna ukanakasa, papironakaru ukat pergaminonakaruw qellqapjjerïna (2 Timoteo 4:13, MT).a Niyakejjay papironakaru, pergaminonakar Bibliajj luraschïnjja, ¿kunas tiempompejj pasaspäna?

Papirojj chʼiyanoqtjjakiwa, jankʼakiw qaqarjje ukat janirakiw jayas imañjamäkiti. Nayra Egipto markat yatjjatir Richard Parkinson ukat Stephen Quirke chachanakajj uka toqet akham sapjjewa: “Tiempompejja, papirojj qʼalaw pʼiystasin tukusjje. Papirotï jan sum imasispa ukhajja, qorawrantjjaspawa jan ukajj ñusantjjaspawa. Oraqer allintasispa ukhajja, achakunakana, jiskʼa laqʼonakana ukat janqʼo kʼisimiranakan manqʼantataw uñjasispa” sasa. Jikjjataskäna uka papironakat yaqhepajja, lupiru jan ukajj chʼaranawjaruw uchasïna, ukhamïpansti jankʼakiw tukusjjapjjäna.

Pergaminojj papirot sipansa jukʼamp jayaw aguanti. Ukampis juntʼu cheqaru, chʼaranawjaru, lupiru uchaski ukhajja, jankʼakiw tukusjjaspa.b Maysa toqetjja, jiskʼa laqʼonakaw manqʼantañatak thaqhapjjaraki. Ukatwa nayra qellqatanakajj jichhürunakan jan utj-jjeti. Ukhamajj Bibliatï uka jan walinakampi chhaqtayatasapäna ukhajja, yatichäwinakapajj ukamp chikaw tukusjjarakispäna.

KUNJAMATSA JAN CHHAQTAYASKÄNA. Judionakar churatäkäna uka Leyirjamajja, reyinakajj Biblian nayrïr phesqa libronakapwa jupataki copiasipjjañapäna (Deuteronomio 17:18, NM). Ukhamarusa, copiañ toqet yatjjattʼatanakajj walja copianakwa Qollan Qellqatanakat lurapjjäna. Jichha pacha nayrïr 100 maratakejja, Israel markpachanwa sinagoganakan utj-jjäna ukhamarak Macedonia markansa utjarakïnwa (Lucas 4:16, 17; Hechos 17:11). ¿Kunjamatsa uka nayra qellqatanakajj jichhürunakan utjaskakpacha?

Machaq Testamento qellqatat yatjjatata Philip Comfort chachajj akham siwa. “Judionakajj Qollan Qellqat rollonakjja, wakullanakaruw imapjjerïna” sasa. Cristianonakajj ukhamarakwa lurapjjäna, ukatwa nayra qellqatanakajj ñeqʼet lurat wakullanakana, yänak imañ jiskʼa utanakana, qarqa pʼiyanakana ukat waña cheqanakan jikjjatasiwayi.

KUNJAMSA UKAJJ YANAPTʼAWAYI. Walja nayra qellqatanakaw jichhakamajj Bibliat utjaski. Ukanakat yaqhepajj 2.000 jila maranakaniwa. Janipuniw yaqha ukham nayra qellqatanakajj utjkiti.

KUNAS JAN WALTʼAYÄNA. Walja marka apnaqerinakasa, religión pʼeqtʼirinakas Biblia chhaqtayañ munapjjäna. Jupanakajja, jaqenakan Biblianïpjjañapsa, lurasiñapsa ukat yaqha arunakar jaqokipasiñapsa jarkʼapjjänwa. Uk jichhajj yatjjatañäni:

• Khä 167 nayra pacha maranakana. Siria marka apnaqeri Antíoco Epífanes reyejja, Hebreo Arut Qollan Qellqatanak chhaqtayañwa amtäna. Ukhamat judionakajj griegonakan religionanakapar tukupjjañapataki. Uka toqetjja, Heinrich Graetz yatjjattʼat chachajj akham sasaw qellqäna: ‘Uka reyin yanapirinakapajja, “katjapkäna uka rollonakjja, phichantapjjänwa ukhamarak chʼiyanoqapjjarakïnwa. Ukat khitinakatï uka rollonaka chuymachtʼatäñataki, chʼamañchtʼatäñatak liyipkäna ukanakarojj jiwayapjjarakïnwa”’ sasa.

• Khä 500 marat 1500 marakama. Católica Iglesia pʼeqtʼirinakat waljanejja, khitinakatï Bibliat jaqenakar yatichapkäna ukanakaruw arknaqapjjäna. Jupanakarojj latín arut Salmo libronïpjjañapak jaytapjjäna, janiw yaqha libronipjjañapäkänti. Mä tantachäwejj iglesia pʼeqtʼirinakat apaskäna ukanjja, akham sasaw sapjjäna: ‘Mä qawqha chachanakar sapa iglesian ajllisipjjam, ukhamat “iglesian yatichäwinakap contra saytʼapki uka jaqenakar thaqhapjjañapataki. [...] Utanakansa ukat yaqha cheqanakansa thaqhapjjañapataki. [...] Maynin utapantï rollonak katjjasini ukhajja, utapajj phichantatäñapawa”’ sasa.

Uka jaqenakatï Biblia chhaqtayapjjasapäna ukhajj yatichäwinakapajj chhaqtayasirakispänwa.

KUNJAMATSA BIBLIAJJ UTJASKAKI. Antíoco reyejja, israelitanakarojj costumbrenakap armasiyañ munäna. Ukampis uka tiempotakejja, walja markanakanwa judionakajj jakjjapjjäna. ‘Nayrïr patak maranakatakejja, sapa patakat sojjta tunka jila judionakaw yaqha markanakan jakjjapjjäna’ sasaw yatjjattʼatanakajj sapjje. Sinagoganakanjja, Qollan Qellqatanakat copianakajj apnaqasiskakïnwa, ukhamatwa judionakan mayni mita masinakapasa ukat cristianonakas uka pachpa qellqatanakat liytʼasipkakïna (Hechos 15:21).

Khä 500 marat 1500 marakamajja, Bibliar munasir jaqenakajj arknaqatpachas yaqha arunakar jaqokipasipkakïnwa ukat copiasipkakïnwa. Khä 1400 maranakatakejja, Bibliajj 33 arunakaruw jaqokipasjjäna. Ukhajj janiw imprimiñatak maquinanakas utjkänti. Ukhat aksarojja, Bibliajj walja arunakaruw jaqokipasjjäna ukat waljarakiw lurasjjarakïna.

KUNJAMSA UKAJJ YANAPTʼAWAYI. Walja marka apnaqerinakasa, religión pʼeqtʼirinakas Biblia chhaqtayañ munapkchïnjja, Bibliajj waljapuniw lurasiwayi ukhamarak yaqha arunakar jaqokipasiwayi. Bibliajj jaqenakajj parlasipki uka arunak sum parlañatakisa, jakäwinakap mayjtʼayañatakis ukat markanakan leyinakap apsuñatakisa yanaptʼawayarakiwa.

KUNAS JAN WALTʼAYÄNA. Bibliajj jan waltʼayata, chhaqtayañ munatas utjaskakïnwa. Ukampis yaqhep copierinakampi, yaqha arur jaqokipirinakampejj Biblian yatichäwinakap mayjtʼayañ amtapjjäna. Biblian yatichäwinakapar istʼañat sipansa jupanakan yatichäwinakaparjamakiw mayjtʼayapjjäna. Ukanakat mä qawqha uñjañäni:

• Kawkhansa Diosar yupaychasiñapäna. 300 ukat 100 nayrïr pacha maranakanjja, Pentateuco Samaritano qellqerinakajj Éxodo 20:17 jiskʼa tʼaqarojja, “Monte Gerizim. Uka cheqaruw mä altar lurañama” sasaw yapjjatapjjäna. Ukampejja, samaritanonakajj Monte Gerizim qollun templo lurapkäna ukajj Qollan Qellqatanakarjamäkaspas ukhamwa amuytʼayañ munapjjäna.

• Trinidad yatichäwi. Biblia qellqañ tukuyatat niya 300 maranakakiw pasaskäna, ukhaw kimsa diosanakajj mayakiwa sapki uka yatichäwir arjjatiri mä chachajj 1 Juan 5:7 jiskʼa tʼaqar aka arunak yapjjatäna: “Alajjpachana: Dios Awki, Jakañ Aru, Qollan Ajayu; aka kimsanisti mayakiwa” sasa. Uka arunakajj janiw nayra qellqatanakan utjkiti. Biblia toqet yatjjattʼat Bruce Metzger chachajj akham siwa: “Uka arunakajj 500 maranakat aksaruw Versión Latina Antigua ukat Vulgata latina qellqatanakan jukʼamp uñstawayjje” sasa.

• Diosan sutipa. Judionakajj janiw Diosan sutipajj sapa kuti apnaqasiñapäkiti sasin amuyapkäna ukarjamajja, walja yaqha arur jaqokipirinakaw Bibliat Diosan sutip apsjjapjjäna. Uka lantejja, Dios jan ukajj Tatitu sasakiw uchjjapjjäna. Biblianjja, uka arunakajj janiw taqe kun lurir Diosatakik apnaqaskiti, jan ukasti jaqenakat parlañataki, kʼari diosanakat parlañataki ukhamarak Supayat parlañatakis apnaqasirakiwa (Juan 10:34, 35; 1 Corintios 8:5, 6; 2 Corintios 4:4).a

KUNJAMATSA BIBLIAJJ UTJASKAKI. Biblia copierinakat yaqhepajja janiw sum yatjjatapkänti ukat kʼarisipjjänwa, ukampis jila parte copierinakajja, wali amuyumpiw lurapjjäna. Khä 500 ukat 900 maranakanjja, masoretas sasin uñtʼatäpki ukanakaw Hebreo Arut Qollan Qellqatanak copiapjjäna, ukajj masorético sasin uñtʼatawa. Jupanakajja, jan pantjañatakejj qawqha arunakasa ukat letranakasa utji ukanak sum jaktʼapjjerïna sasaw qhanañchasi. Kuntï copiapkäna ukajj pantjatjam amuyapjjerïna ukhajja, thiyanakaruw uka toqet qellqtʼapjjerïna. Janiw kunäkipansa Biblia mayjtʼayañ munapjjerïkänti. Moshe Goshen-Gottstein sat yatichirejj masoretanakat akham sänwa: “Jupanakatakejj aleqat nayra qellqatanak mayjtʼayañajja, wali jachʼa juchänwa” sasa.

Jikjjatasiwayki uka nayra qellqatanakajja, Biblia toqet yatjjatapki ukanakaruw yanaptʼi. Amuytʼañataki, walja maranakaw religión pʼeqtʼirinakajj latín arut Bibliajj utjki ukajj nayra Qollan Qellqatarjam luratawa sasin yatichapjjäna. Ukhamïpanjja, 1 Juan 5:7 jiskʼa tʼaqarojj qalltan parlaniwayktan uka pantjat arunak uchapjjäna. Español arur jaqokipat Reina-Valera sat Bibliarusa uka pantjat arunakajj uchasiwayarakiwa. Ukampis kunapachatï yaqha nayra qellqatanak jikjjataskäna ukhajj ¿kunas qhanstawayi? Biblia toqet yatjjattʼata Bruce Metzger chachajj akham qellqäna: “[1 Juan 5:7 jiskʼa tʼaqan] yapjjatat uñstki uka arunakajj janiw nayra (siríaco, copto, armenio, etiópico, árabe, eslavo) qellqatanakan uñstkiti, latín arut qellqatanakwa uñsti” sasa. Qhepatjja, Reina-Valera sat Bibliansa ukat yaqha qellqatanakansa, uka yapjjatat arunak apsjjapjjänwa.

Nayra qellqatanakajja, Biblian yatichäwinakapajj jan majtʼayasitapwa uñachtʼayistu. Khä 1947 maran Rollos del Mar Muerto sasin uñtʼat rollonaka jikjjatasajja, yatjjatatanakajj hebreo arut qellqata masorético qellqatampiw igualtʼayapjjäna. Rollos del Mar Muerto qellqatanak luririt maynïrejja, akham sänwa: “Walja maranakas pasawaykchejja, [uka mä rollokiw] judionakajj jan mayjtʼayasa ukhamarak wali amuyumpi Biblia copiapjjatap uñachtʼayistu” sasa.

Dublín (Irlanda) markankir Biblioteca Chester Beatty sat bibliotecanjja, papiror qellqat Griego Arut Qollan Qellqatanakajj niya taqpachaw utji. Ukanakat yaqhep nayra qellqatanakajj 100 jichha pacha maranakatawa. The Anchor Bible Dictionary sat qellqatajj akham siwa: “Papiron qellqatäki ukanakajj walja machaq yatiyäwinakanïkchisa, Biblian yatichäwinakap jan mayjtʼayasitapsa qhanañcharakiwa” sasa.

KUNJAMSA UKAJJ YANAPTʼAWAYI. Walja nayra qellqatanaka jikjjatasitapasa ukat wali jaya maranakatätapasa janiw Biblian yatichäwinakap mayjtʼayawayapkiti, antisas jukʼamp qhanäñapatakiw yanaptʼawayi. Sir Frederic Kenyon chachajj Griego Arut Qollan Qellqatanakatjja, akham qellqäna: “Janiw kuna nayra qellqatas jichha tiempon ukham sum qhanañchkiti ni waljas utjkiti, ukat janiw confiyañjamäkiti sasajj janiw khiti yatjjatiris siskaspati” sasa. Hebreo Arut Qollañ Qellqatanakatjja, William Henry Green yatjjattʼat chachajj akham sarakïnwa: “Janiw kawkïr nayra qellqatanakas uka qellqatjamajj kunjamäkänti ukhampach sum qhanañchkiti” sasa.