Wawäkasajj taqeniw jaqosirïtanjja, uk ¿jumajj amtasisktati? Jaqosisajja inas kayu jan ukajj ampar usuchjaschiyäta. Mamamajj kunjamsa chuymachtʼayätam uk amtasiskpachätawa, inas jankʼak qolljjatchiyätam, jumajj wal jachpachayäta, ukampis mamitamampi chuymachtʼatäsajj walikiw uñjasjjpachayäta. Wawäkasajj jankʼakiw chuymachtʼapjjestäna.

Ukampis jakäwisajj marat maratjamaw mayjtʼawayjje. Jan walinakajj jukʼampiw jiljjatjjaraki, ukatwa chuymachtʼatäñ wal muntanjja. Jan walinakan uñjasipki uka jaqenakarojja, janiw kunjamtï mä taykajj wawapar chuymachtʼki ukham chuymachtʼañjamäjjeti. Uk jichhajj uñjañäni.

• Jumajj inas trabajot jaqsuta uñjasisajj wal llakisirïsta. Ukhaman uñjasisajja, Julian chachajj akham sasaw jisktʼasïna: “¿Kunjamarak jichhajj familiajar uñjästi? Walja maranakaw uka empresan irnaqawayta, ¿kunatsa trabajot jaqsupjjpachïtu?” sasa.

• Inas chachamampi jan ukajj warmimampi jaljtasajj llakita jikjjatasta. Raquel warmejj akham siwa: “Chachajajj sarjjäna ukhat niya pä maraw pasjje. Nayajj wali llakita, chuymas kawkstʼataw sarjjatapat uñjasiyäta. Jañchi toqetsa wali aynachtʼataw jikjjatasiyäta. Janiw kunsa lurirjamäkayätti” sasa.

• Inas wali usuta jikjjatasta ukat jan jankʼak walirjjstati. Jumajj inas Job chachjam jikjjatasiraksta, jupasti wali usut uñjasisajj akham sänwa: “Janiw jukʼampi jakañ munkjjtti” sasa (Job 7:16). Luis sat mä chachajj 80 maraniwa, jupajj akham sarakiwa: “Jan walinakan uñjasisajja, awisajj jiwañak suyjjta” sasa.

• Inas mä familiaraman jiwatapat wali llakita jikjjatasta ukat chuymachtʼatäña munsta. Robert chachajj akham siwa: “Wawamajj mä avionajj jaqoqtki ukan jiwatayna sasin yatiyapkitäna ukhajja, janiw ukajj cheqaw sañjamäkänti. Uka qhepatjja walpun llakisiyäta. Bibliajj maynis mä espadampi chhoqontkistaspa ukhamawa sasaw uka toqet qhanañchi” sasa (Lucas 2:35, NM).

Robert, Luis, Raquel ukat Julian chacha warminakajj llakinakansa uñjasipkchïnjja, chuymachtʼataw uñjasipjjäna. Alajjpachankir Diosaw jupanakarojj chuymachtʼäna. ¿Kunjamsa Diosajj chuymachtʼistaspa? Chuymachtʼatäñ munkañäni ukhajj ¿Diosajj chuymachtʼarakistaspati?

Apóstol Pablojj akham sasaw Jehováa Diosat säna: “Taqe tʼaqhesiñanakasanwa Diosajj chuymachistu” sasa (2 Corintios 1:3, 4). Uka arunakarjamajja, Diosajj taqeniruw chuymachtʼistaspa ukat jan walinakansa Jupaw yanaptʼarakistaspa.

Diosampi yanaptʼatäñ munstan ukhajja, nayraqatajj Juparuw uñtʼañasa. Ak amuytʼañäni, jiwasatï qollayasiñ munstan ukhajja, doctoran ukar sarañasaw wakisi. Bibliajj akham siwa: “Diosar jakʼachasipjjam, jupasti jumanakarojj jakʼachasirakiniwa” sasa (Santiago 4:8).

Diosajj jakʼachasistaspati janicha uk ¿kunjamatsa yatsna? Nayraqatajja, Jupajj jiwasar wal jakʼachasiñ muni sasaw Bibliajj qhanañchi (ukatakejj recuadro uñjjattʼam). Maysa toqetjja, Diosajj walja jaqenakaruw chuymachtʼi, ukatwa jiwasar chuymachtʼarakistaspawa sasin sissna.

Jichhürunakanjja, waljaniw jan walinakan uñjasisajj Diosar yanaptʼa mayisipjje. David reyejj ukhamwa lurarakirïna, mä kutejj akham sasaw Jehová Diosar ruwtʼasïna: “Yanap mayisksma ukapachajj arnaqasitajjarojj istʼakimaya” sasa. ¿Diosajj istʼänti? Jïsa. David chachajj akham saskakïnwa: “Jupasti yanaptʼituwa. Chuymajjajj kusisitawa” sasa (Salmo 28:2, 7).

JESUSAJJ LLAKITANAKAR CHUYMACHTʼÄNWA

Jehová Diosajja, Jesusajj jaqenakar chuymachtʼaspa ukwa suyäna. Jesusarojj walja luräwinak churäna, ukanakat mayajja aynachtʼata jikjjatasipkäna ukanakaruw yanaptʼañapäna ukat ‘taqe llakitanakarus chuymachtʼañaparakïnwa’ (Isaías 61:1, 2). Jesusajj ‘taqe qarjatanakaru ukat jatjatanakaruw’ yanaptʼäna, ukajj profecianakarjamaw phoqasïna (Mateo 11:28-30).

Jesusajj jaqenakar suma ewjjtʼanak churasa, munasiñampi uñjasa ukat usutanakar qollasaw chuymachtʼäna. Mä kutejja, akham sasaw lepra usuni mä jaqejj Jesusar ruwtʼasïna: “Munsta ukajj, aka usojjat kʼumaraptayitasmawa” sasa. Jesusajj jupat khuyaptʼayasisajj akham sänwa: “Muntwa, kʼumaräjjaraktawa” sasa (Marcos 1:40, 41). Uka qhepatjja lepra usuni jaqejj sumakejjänwa.

Jichhürunakanjja, Jesusajj janiw aka Oraqen jiwasamp chikäjjeti, ukhamajj janiw chuymachtʼitaniw sasin suyjjsnati. Ukampis Jehová Diosaw chuymachtʼistaspa Jupajj ‘chuymachasir’ Diosjamajj khitinakatï yanaptʼa munapki ukanakaruw chuymachtʼi (2 Corintios 1:3). Kuna toqes Diosajj chuymachtʼistu uk jichhajj uñjañäni.

• Biblia toqe. “Taqe kunatejj nayratpach Qellqatan uchatäkän ukanakajj jiwasanakaruw yatichistu, llampʼu chuyma toqe suytʼañasataki, ukanrakwa mä samarañsa jikjjattanjja” (Romanos 15:4).

• Qollan ajay toqe. Jesusajj jiwjjäna uka qhepatjja, cristiano taman samarañaw utjäna. ¿Kunatsa? Cristianonakajja, “Tatitur ajjsarasarakiw sarnaqapjjäna” ukhamatwa qollan ajayun chʼamapampejj nayrar sartapjjäna (Hechos 9:31). Qollan ajayojja wali chʼamaniwa, ukhamasti Diosajj qollan ajay toqew jaqenakar chuymachtʼaspa.

• Oración toqe. Bibliajj akham siwa: “Jan jumanakajj kunats llakisipjjamti, taqe kunsa Diosar sapjjam oracionana, mayipjjam yuspagarapjjarakim. Diosajj jumanakarojj churapjjarakïtamwa samarañapa, ukasti taqe kuntejj jaqejj amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa” sasa (Filipenses 4:6, 7).

• Jilat kullakanak toqe. Jupanakajj mä amigor uñtasitaw chuymachtʼapjjestaspa. Apóstol Pablojj jilanakapat akham sänwa: “‘Jan waltʼäwinakajjana, llakisïwinakajjana’ uñjaskta ukhajja, ‘jupanakasti nayarojj wal chuymachtʼapjjetäna’” sasa (1 Tesalonicenses 3:7; Colosenses 4:11).

Kunjamsa aka yatichäwin uñjawayktan ukanakajj yanaptʼistaspa sasin inas jisktʼasta. Ukatakejj qalltan parltʼaniwayktan uka jaqenakat yatjjatañäni. Jupanakajj Isaías libron qellqatäki uka arunak phoqasirwa uñjapjjäna, ukansti akham siwa: “Kunjämatejj mä taykajj wawaparojj chuymachejja, ukhamarakiw nayajj jumanakarojj chuymachapjjäma” sasa (Isaías 66:13).

JAN TRABAJON UÑJASKTAN UKHA

Seth chachajja akham siwa: “Esposajampejj panpachaniw jan trabajon uñjasipjjayäta. Pä maranakaw familiajan yanaptʼapampi ukat kunayman jiskʼa trabajonaka lurasajj qollqe jikjjatapjjayäta. Ukhaman uñjasisajja, Priscilla esposajajj llakimpiw aynachtʼäna, nayasti janis kunatak askïkirista ukhamaw amuyasirakiyäta”.

“¿Kunjamsa uka jan walinakar saykatapjjayäta? Priscilla esposajajj kuntï Jesusajj Mateo 6:34 qellqatan arskäna ukwa amtasïna, uka qellqatanjja ‘jan llakisipjjamti kunatï qharürojj paskani ukatjja, sapürurakiw ukham llakinakampi phoqantatäski’ sasaw qhanañchi. Esposajarojj Diosar taqe chuyma mayisiñaw yanaptʼawayi. Nayarojj Salmo 55:22 qellqataw chuymachtʼarakitäna. Salmo qellqerjamaw llakinakajj Diosar katuyayäta, Jupajj yanaptʼitänwa. Jichhajj trabajonëjjtwa, ukampis kunjamtï Mateo 6:20-22 qellqatanakan siski ukarjamaw kunatï munaski ukampik jakasjjapjjta. Ukhamarus chacha warmjamasa ukat Diosampisa wali sumaw apasjjapjjarakta” sasa.

Jonathan chachajj akham sarakiwa: “Familiajan negociopajj aynachtʼkäna ukhajj wali llakitaw uñjasiyäta. Markajanjja qollqe toqet aynachtʼañaw utjäna, ukhamïpansti 20 maranak trabajitajj ina chʼusaruw tukusjjäna. Esposajampejj qollqet wal toqesjjapjjayäta. Alasipkayäta ukanak tarjetampi pagañsa ajjsarayasipjjayätwa”.

“Suma amtanakar puriñatakejja, Diosan Arupampi ukat qollan ajayumpiw yanaptʼapjjetäna. Taqe kunan trabajiñ yateqayäta ukat qollqe ina chʼusar jan tukjañwa amtapjjarakiyäta. Nanakajj Jehová Diosan Testigopapjjtwa, ukhamasti jilat kullakanakaw yanaptʼapjjarakitäna. Jupanakajj wal chuymachtʼapjjetäna, jan walin uñjasipkayäta ukhasa yanaptʼapjjarakitänwa” sasa.

JALJTAÑAJJ UTJKI UKHA

Raquel warmejj akham siwa: “Chachajajj akatjamat sarjjäna ukhajja, chuyma ustʼata ukat wali coleratayätwa. Wali aynachtʼatäyätwa, ukampis Diosar jakʼachasisaw chuymachtʼata uñjasiyäta. Sapüruw mayisiyäta, ukaw jan sinti llakisiñatak yanaptʼawayitu. Diosajj qollampis qolltʼkitaspa ukhamänwa”.

“Chuyma ustʼata, colerata jan jikjjatasiñatakejja, Bibliaw yanaptʼawayitu. Romanos 12:21 qellqatanjja, apóstol Pablojj akham sänwa: ‘Jan ñanqhampejj atipjayasimti, ukatsipan ñanqharojj askimpi atipjam’ sasa”.

“Ukjjarojj mä kullakaw yanaptʼarakitäna. Jupajj Eclesiastés 3:6 qellqat uñachtʼayasajja, ‘chhaqayañ horatakis’ tiempojj utjarakiwa sasaw wali munasiñampi ewjjtʼitäna. Uka ewjjtʼa phoqañajj chʼamäkchïnsa, uk lurañajaw wakisïna. Jichhajj sumakëjjtwa” sasa.

Elizabeth warmejj akham sarakiwa: “Chacha warmjam jaljtañ utjki ukhajj yanaptʼatäñwa maynejj muni. Nayarojj amigajaw yanaptʼitäna. Jupajj nayamp chikaw jachiri, chuymachtʼiri ukat sum uñjarakitäna. Jehová Diosaw nayar chuymachtʼañatak khitani sasaw amuyayäta” sasa.

JAÑCHI TOQEN AYNACHTʼAÑAJJ UTJKI UKHA

Qalltan parltʼkayätan uka Luis chachajja, chuymat usutätapatjja pä kutin niyapuniw jiwäna. Jupasti 16 horanakaw sum samsuñataki oxigenomp yanaptʼayasiñapa. Jupajj akham siwa: “Sapüruw Jehová Diosar mayista. Uka qhepatsti Diosan chʼamapas yanaptʼkitaspa ukhamänwa. Diosar mayisiñajj chʼam churitu, nayajj taqe chuymaw Diosar confiyasta, Jupaw nayar uñjaskarakitu” sasa.

Petra warmejj 80 jila maraniwa, jupasti akham sarakiwa: “Taqe kunwa lurañ munta ukampis janiw chʼamajj utj-jjetuti. Marat maratjamaw jan chʼamani jikjjatasjjta. Wali qaritäjjtwa ukat qollanakampikiw sarnaqaskta. Awisajja Jesusan arunakapat lupʼta, jupajj akham sänwa: ‘Awkejjay, wakischi ukajja, aka tʼaqhesiñatjja qhespiyita’ sasa. Jehová Diosaw Jesusar chʼam churäna, nayarojj Jupaw chʼam churarakitu. Diosar sapüru mayisisajj sumakëjjtwa” sasa (Mateo 26:39).

Julian chachajja, esclerosis múltiple sat usumpiw niya 30 maranak tʼaqhesiski, jupajj akham siwa: “Nayrajj suma sillan qontʼataw trabajiyäta, jichhajj silla de ruedan qontʼatakëjjtwa. Ukampis jaqenakar yanaptʼasajj wali sumaw jikjjatasta. Mayninakar yanaptʼañajj jan sinti llakisiñatakiw yanaptʼitu ukhamarus Jehová Diosaw jan walinakar saykatañatak yanaptʼaskitu. Pabljamarakiw akham sirista: ‘Criston chʼamapampejj taqe kunaruw saykatirista’ sasa” (Filipenses 4:13).

MÄ MUNAT FAMILIASAJJ JIWKI UKHA

Antonio chachajj akham siwa: “Tatajajj autompi taqjjatayasisaw jiwäna, ukajj janiw cheqaw sañjamäkänti. Jiwañapajj janiw wakiskänti sasaw amuyirïta. Ukampis janiw kunsa lurirjamäkayätti. Tatajajj phesqa urunakampiw hospitalan jakasiwaykäna. Mamajampirïkta ukhajj jan jachañatakiw chʼamachasirïta, ukampis sapakejj walpun jachirïta. ‘Kunatarak tatajasti jiwpacha’ sasaw kutin kutini jisktʼasirïta”.

“Jan sinti llakisiñatakisa ukat jan jachañatakisa Diosaruw yanaptʼa mayisiyäta, ukaw yanaptʼitäna. ‘Jan waltʼañajj taqeniruw puri’ sasaw Bibliajj qhanañchi, uksa amtarakiyätwa. Diosajj arsutanakap phoqapuniwa, ukatwa jutïrin tatajar wasitampi uñjaña suyaskta” sasa (Eclesiastés 9:11; Juan 11:25; Tito 1:2).

Robert chachajj akham sarakiwa: “Esposajampejj Diosaruw wal mayisipjjayäta, ukatsti Filipenses 4:6, 7 qellqatanakajj qhanañchi uka samarañ jikjjatapjjarakiyäta. Ukarakiw kuna suytʼäwitï jiwatanakatak utjki ukanakat periodistanakampi parlañatak yanaptʼapjjetäna. Avionajj jaqoqtkäna ukansa yoqajajj jiwawaykchïnjja, jupampejj kunanaksa lurapjjeriyäta ukanakat lupʼiñatakiw chʼamachasipjjta”.

“Walja jilat kullakanakaw akham sapjjetäna: ‘Televisionan uñjapjjsma, parlapkayäta ukhajj janiw sinti llakit parlanipkayätati’ sasa. Nanakajj akham sapjjayätwa: ‘Jumanakan Diosar mayipjjatamaw yanaptʼawayapjjetu’ sasa. Jehová Diosajj yanaptʼasipuniwa, mensajenak qellqanipkitäna ukhajja, Diosas ukham qellqanipjjañapataki yanaptʼkaspa ukhamwa amuyayäta” sasa.

Uka sarnaqäwinakanjja, kunjamsa Diosajj jaqenakar chuymachtʼaspa ukwa uñjawaytanjja. ¿Jumat kamsasirakispasa? Inas jumajj jan walinakan uñjasiraksta.b Ukhamajj Jehová Diosar jakʼachasim Jupajj taqe llakinakasan ‘chuymachtʼasir Diosawa’ (2 Corintios 1:3).