Uka arunakjja, mä munat amigapaw chuymachtʼañ amtampi satayna. Bebe sat warmejj awkipar wal munasïna, ukatwa uka arunakajj jukʼamp aynachtʼayäna. “¿Kunjamaraki Diosan munañapänisti?” sasaw walja kut jisktʼasïna. Mä qawqha maranak qhepatjja, mä libroruw uka arunak qellqäna, ukaw awkipat amtasiskakitap amuytʼayistu.

Ukhamajja, walja tiempotwa jiwat familiarapat maynejj armasiskaspa, ukwa Bebe warmin sarnaqäwipat amuysna. Bibliajja, “qhepïri uñisiristi jiwañawa” sasaw sistu (1 Corintios 15:26). Jiwañajja wali chʼaman mä uñisirir uñtasitawa, uka uñisirejj mä akatjamatwa mä munat familias apaqasin jakäwis mayjtʼayaspa. Janiw khitis jiwañat qhespkaspati, ukatwa kunjamsa uka jan waltʼäwir atipjsna uk jan yatktanti.

Inas akham jisktʼasirista: ‘¿Qawqha tiempotsa uka llaki armjjerista? Jan sinti llakisiñatakejj ¿kunsa lurirista? Uka llakin uñjasipki ukanakarojj ¿kunjamsa yanaptʼirista? Jiwatanakatakejj mä suytʼäwejj ¿utjpachati?’ sasa.

Maynejj usuntasinjja, usupat qollasisajj jankʼakiw armasjjaspa. Ukampis mä munata familiarap jiwaspa ukhajj janiw jankʼak armkaspati. Alan Wolfelt sat doctorajj Healing a Spouseʼs Grieving Heart (Consuelo tras la muerte del cónyuge) sat libropanjja, akham siwa: “Maynin jiwatap armañajj wali chʼamawa. Ukampis mayninakan yanaptʼapampejja, tiempompejj janiw sint llakisjjaspati” sasa.

Abraham chachat parltʼañäni, Sara warmipajj jiwjjäna ukhajja, wali llakitaw uñjasïna ukat wal jacharakïna sasaw Bibliajj qhanañchi. Ukampis, walja tiempotwa chuymachasiskäna.a Jacob chachat parltʼarakiñäni, juparojj José yoqapajj mä monte animalan manqʼantatas jiwkaspa ukhamwa yoqanakapajj kʼarintapjjäna. Cheqäpachaw sasajja ‘jaya tiempow’ wawapat jachäna, inamayakiw familiaranakapas chuymachapjjäna. Walja maranak qhepatsa, wawapat jachaskakïnwa (Génesis 23:2; 37:34, 35; 42:36; 45:28).

Jichhürunakanjja, ukhamarakiw jaqenakajj familiarapana jan ukajj amigopan jiwatapat wali llakit jikjjatasipjje. Uk jichhajj mä qawqha uñjañäni.

• “Robert esposojajj julio phajjsit 9 urunak saraqataruw 2008 maran mä chijin jiwawayi. Alwanakajj juntʼüm umtʼasitarojja, jampʼattʼasisa, qhomanttʼasisaw ‘wal munsma’ sasin janïr utat mistuwaykipan sasipjjerïta. Uka alwajja, ukhamarakwa sasiwayapjjta. Jiwatapat niya paqallq maraw pasawayjje, ukhamäkchisa jupat llakisiskaktwa. Janjakiw armkäti” (Gail, 60 marani).

• “Esposajan jiwatapat 18 maranakas pasawayjjchejja, jan nayampi chikäjjatapat llakisiskaktwa, janiw armirjamäkti. Kunanakatï aka Oraqen utji ukanak uñjasajja, esposajat amtasipuntwa, ukanak uñjasajj kunja kusisitas jikjjatasispäna sasaw lupʼirïta” (Etienne, 84 marani).

Maynin jiwatapat jaya tiempo llakita jikjjatasiñajj walikïskiwa. Taqeniw mayj mayjätanjja, ukhamajj janiw maynin sinti llakisitap uñjasajj jan wal amuyañasäkiti ni jan sinti llakisipki ukanakarus kʼumiñasäkiti. Ukhamajj ¿kunas llakimpi jan aynachtʼañatak yanaptʼistaspa?

Jan sinti llakisiñatakejj kunayman ewjjtʼanakaw utji, ukampis janiw taqenir yanaptʼkapuniti. Sañäni, inas yaqhepajj janiw jachañamäkiti sapjjchispa, yaqhepasti jachaqtʼasiñamajj walikïskiwa sapjjarakchispa. Ukampis uka toqet Bibliajj suma ewjjtʼanakaniwa, ukjja jichhak yatjjatasiwayki ukanakaw qhanañchistu.

Yaqhep cheqanakanjja, mä chachan jachatapajj janiw askit uñjatäkiti. Ukhamajj ¿jaqenakan uñjkata jachañjja phenqʼasiñasäspati? ‘Maynejj jiwjje ukhajja, jachaqtʼasiñajj walikïskiwa’ sasaw yatjjattʼatanakajj sapjje. Ukhamajj llakita uñjasisin jachaqtʼasiñajj walikïskiwa, jan sinti llakisiñatakiw yanaptʼistaspa. Ukampis maynitï amuki jachap imjjasispajja, jukʼampiw aynachtʼaspa. Bibliajj janiw jachañajj walïkiti ni chachanakajj janiw jachapjjañapäkiti sasins siskiti. Jesusat amtañäni, jupajj jiwatanakar jaktayañatak chʼamanikchïnsa, Lázaro amigopan jiwatapatjja, janiw jaqenak nayraqatan jachañ phenqʼaskänti (Juan 11:33-35).

Maynin akatjamat jiwatapatjja, wali llakitäsajj maynejj colerampiw apayasispa. Sañäni, inas chuyma ustʼayiri arunak maynejj jupar sischispa, ukatwa colerasispa. Sudáfrica toqenkir Mike chachajj akham siwa: “Tatajajj 14 maranïkayät ukhaw jiwjje. Tatajar niya allintañampëjjapjjäna ukhajja, anglicano iglesiankir mä pastorajj akham sänwa: ‘Diosajj suma chuyman jaqenakaruw alajjpachan muni, ukatwa apasjje’ sasa.a Ukajj walpun colerayitäna, tatajajj nanakampi chikäskañapwa munayäta. Jiwatapat 60 jila maranakas pasjjchejja, uka arunak amtasajj coleraskaktwa” sasa.

Maynin akatjamat jiwatapatjja, inas maynejj jupa pachpa juchañchasisajj akham amuychispa: “Nayatï jan uk lurkiriskayäta ukhajj janiw jiwkasapänti” sasa. Yamas jupampi toqesiwayapjjchi ukhajja, jukʼampiw jupas juchanïkaspa ukham amuyasispa.

Jumas juchanïkasma jan ukajj colerata jikjjatassta ukhajja, janiw amukiñamäkiti, uka toqet parlañamawa. Inas amigomar awistʼaschisma, jupaw sum istʼasin chuymachtʼiristam. Bibliajj akham siwa: “Mä amigojj taqe horasan munasiripuniwa; llakisiñansti mä jiljamaw chuymachasi” sasa (Proverbios 17:17).

Ukham llakinakanjja Jehová Diosaruw jakʼachasiñama, Jupasti mä suma amigosawa. Ukhamajj taqe llakinakam Jupar awistʼasim ‘Jupajj jumat llakisiwa’ (1 Pedro 5:7). Ukhamtï lurätajja, ‘Diosajj samarañapwa churarakïtam’ (Filipenses 4:6, 7). Biblia toqew Diosajj chuymachtʼarakiristam. Bibliankir kawkïr jiskʼa tʼaqanakas chuymachtʼiristam ukwa mä hojar qellqtʼasisma ukat mä qawqhanak pʼeqeruw yatsurakisma (ukatakejj recuadro uñjjattʼam). Ikejj jan purkätam, sapakïkta ukhanakaw ukanakat lupʼiñajj yanaptʼiristam (Isaías 57:15).

Niya jichhakiw 40 marani mä chachan warmipajj cáncer usumpi jiwawayi. Jupajj wali sapakiw awisajj jikjjatasi, ukampis ukham jan jikjjatasiñatakejj oracionaw yanaptʼawayi. Jupajj akham siwa: “Jehová Diosampi parlkta ukhajja, janiw sapak jikjjatasjjti. Awisajja arumanakajj ikit sartasajj janiw wasitamp ikirjamäjjtti. Ukhamïpanjja Biblia liytʼasin uka toqetwa lupʼta. Ukatsti Diosaruw kunjamsa jikjjatasta uk sarakta. Ukanak lurasajj sumakiw jikjjatasta ukat sumakiw ikjjarakta” sasa.

Vanessa tawaqot parltʼarakiñäni, mamapajj usuntasinwa jiwäna. Vanessarojj Jehová Diosar mayisiñaw yanaptʼawayaraki, jupajj akham siwa: “Wali llakita jikjjatasirïta ukhajja, walpun jachaqtʼasirïta, Diosan sutipsa walja kutiw aytirïta. Jupasti mayisitaj istʼasajj yanaptʼapunirïtuwa” sasa.

Mä munat familiaparu aptʼasipki ukanakajja jan sinti llakisiñatakejj mayninakaruw yanaptʼapjjañapa. Sañäni, markapan kuna lurañanakay utjchi ukanwa yanaptʼapjjaspa, ukaw llakimpi jan aynachtʼañatakisa, nayrar sartañatakis yanaptʼaspa sasaw yaqhep yatjjatatanakajj sapjje (Hechos 20:35). Mä munat familiapar aptʼasiwayapki uka cristianonakajja, mayninakar yanaptʼañajj kusisit jikjjatasiñatakiw yanaptʼi sasaw sapjjaraki (2 Corintios 1:3, 4).

Maynin mä munat familiarapajj jiwjje ukhajja, jupar chuymachtʼañajj chʼamakiwa, awisajj amukiw qheparjjtanjja janiw kuns lurirjamäjjtanti. Ukampis jupanakarojj yanaptʼsnawa.

Awisajja, janiw kun sañas wakiskapuniti, jupanakampi chikäña jan ukajj kunja llakitas jikjjatastan ukanak sañakiw wakisiraki. Yaqhep cheqanakanjja, qhomanttʼasa, amparat katthaptʼasaw jupanakat llakisitap uñachtʼayapjje. Familiapar aptʼasipki ukanakatï jiwasar kunsa parltʼapjjestani ukhajja istʼañasawa. Jan ukajj wakiskani ukhajja manqʼa phayasa, wawanakapar uñjasa ukat kunanakatï jiwatar imtʼanjjañatak wakiskani ukanakanwa yanaptʼaraksna. Taqe ukanakaw jupanakat llakisitas uñachtʼayani.

Tiempompejja, jiwki uka familiapajj kunanaksa lurirïna, kunjam jaqënsa ukanakat parlañ munapjjaspawa. Ukanakat parlañajj wali askïspawa, ukhamatwa jupanakar kusistʼaysna. Pam sat warmirojj ukaw yanaptʼäna, chachapan jiwatapajj sojjta maräjjewa. Jupajj akham siwa: “Kuntï Ian esposojajj luririkatayna ukanakwa cuenttʼapjjetäna, janiw nayajj ukanak lurirïtap akchʼas yatkayätti, ukanak yatiñajj wal kusisiyitu” sasa.

Mä munat familiap aptʼasipki ukanakarojj qalltanakwa yanaptʼapjje, ukampis qhepatjja amigonakapajj armasjjapjjewa sasaw yatjjattʼatanakajj sapjje. Ukhamajj janiw jupanakat armasiñasäkiti, chuymachtʼaskakiñasawa.a Jupanakajja kunjamsa jikjjatasipjje ukjja mayninakampiw parltʼañ munapjje, jiwasatï jupanakar istʼañäni ukhajj wal yuspärapjjestani.

Japón markankir Kaori tawaqot parltʼañäni, jupanjja mamapaw jiwäna. 15 phajjsinak qhepatjja jilïr kullakapaw jiwarakïna, ukhaman uñjasisajj wali llakitaw jikjjatasïna. Uk uñjasajj amigonakapaw wal yanaptʼapjjäna, yamas Ritsuko sat mä jilïr warmejj nayaw yanaptʼaskäma sasaw säna. Kaorejj akham siwa: “Ukajj janiw nayatakejj waljamäkänti. ‘Mamaj lantejj janiw khitis utjkaspati’ sasaw amuyirïta, ukhamäkchïnsa jupajj wali sum uñjitäna, ukaw jupar munasiñatak yanaptʼawayitu. Qhepatjja, mamajarjamaw uñj-jjayäta. Sapa semanaw yatiyirisa, tantachäwirusa panin sarapjjerïta. Juntʼümsa, manqʼsa wajjtʼapunirïtuwa, tarjetanaksa cartanaksa churarakirïtuwa. Ritsuko ‘mamajajj’ walpun yanaptʼawayitu” sasa.

Mamapan jiwatapatjja, 12 maranakaw pasawayjje. Jichhajja, Kaori kullakajj esposopampiw Bibliat vecinonakaparu yatichasipki. Jupajj akham siwa: “Ritsuko ‘mamajajj’ janipuniw nayat armaskiti. Utajar sarkta ukhajja, jupar visittʼirejj sarapuntwa ukat wali kusisitaw jikjjatasirakta” sasa.

Chipre markankir Poli sat kullakarojja, ukhamarakiw mayninakajj yanaptʼapjjatayna, jupajj Jehová Diosan Testigopawa. Sozos sat esposopajj wali munasirïnwa, tamapankir wajchanakaru, viudanakarojja utaparuw manqtʼasiñataki invittʼirïna (Santiago 1:27). Jupajja, 53 maranïkäna ukhaw pʼeqen tumoranïtap layku jiwjjäna. Esposapajj akham siwa: “Wali munat esposojampejj 33 maranakaw jakasiwayapjjta, jichhajj jiwatäjjewa” sasa.

Chachapan jiwatap qhepatjja, Poli kullakajj 15 marani Daniel sullka yoqapampiw Canadá markar sarjjapjjäna. Uka markanjja, Jehová Diosan Testigonakapan tantachäwiparojj sarasipkakïnwa. Kullakajj akham siwa: “Kuna jan walitï pasapkitäna ukjja, janiw uka markankir jilat kullakanakajj yatipkänti. Ukhamäkchïnsa, suma arunakampiw parltʼapjjetäna, yanaptʼapjjarakitäna. Ukajj wawajatakejj wali askipunïnwa, jupajj jan awkinëjjasajj ukham yanaptʼatäñ walpun munäna. Tama uñjir jilatanakajj Daniel wawajarojj wal yanaptʼapjjäna, jupanakat maynïrejj kusistʼañatakisa, pelot anatir sarañatakis jawsapunirïnwa” sasa. Jichhajja, Poli kullakampi Daniel yoqapampejj kusisitaw jakasisipki.

Khitinakantï mä munat familiarapajj jiwjje ukanakarojj kunayman toqetwa yanaptʼsna ukat chuymachtʼaraksna. Bibliajja, jutïr urunjja janiw jiwañajj utj-jjaniti sasaw chuymachtʼistu. Uka toqetwa akjjar jutki uka yatichäwin yatjjataskañäni.

Payïr yatichäwin yatjjataniwayktan uka Gail warmit ¿amttati? ‘Janjakiw Robert esposojar armkäti’ sasaw jupajj säna. Ukampis Paraison esposopampi wasitat jikisiñ wal suytʼaski. Jupajj siwa: “Nayarojj Apocalipsis 21:3, 4 qellqataw wal yanaptʼawayitu” sasa. Uka qellqatajj akham siwa: “Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa” sasa.

Jupajj akham saskakiwa: “Uka qellqatajj wali sum maynïr chuymachtʼi. Mä munat familiarap aptʼasipki ukanakat walpun sinttʼasta, jupanakajj jiwatanakan jaktapjjañapjja janiw yatipkiti” sasa. Uka arunakar taqe chuyma confiyatapjja, jaqenakar ‘janiw jiwañajj utjkjjaniti’ sasin walja horanak yatiyasaw uñachtʼayaski.

Inas uka arunakajj jumatak jan creyiñjamäkchiti, ukampis Job chachat amtañäni (Job 2:7). Jupajj wali usutäsin jiwjjañsa munkchïnjja, Diosajj aka Oraqen jakasiñatakiw wasitampi jaktayitani sasaw taqe chuyma confiyäna. Ukatwa akham säna: “Walïspawa nayaru jiwañan munañaparu imantjjañamajja [...]. Jumatejj jawsitasmajja, nayajj jaysarakirismawa; munasiñampiw uñtanitasmajja, jumajjay nayaru uskuschistajja uka layku” sasa (Job 14:13, 15). Kunjamtï amuyktanjja, Job chachajj janiw ukjjat pächaskänti.

Jehová Diosajj aka Oraqe mä suma Paraisor tukuykani ukhajja, ukwa lurani (Lucas 23:42, 43). Bibliajj akham siwa: ‘Jiwatanakajj jaktanipjjaniwa’ sasa. Ukhamajj Job chachasa ukat yaqha jiwatanakas jaktanipjjaniwa (Hechos 24:15). Jesusajj akham sarakïnwa: “Jan muspharapjjamti ak arsutajjatjja, horasajj purininiwa taqe jiwatanakasti arupjj istʼapjjaniwa. Ukatsti uka jiwatanakajj jaktapjjaniwa” sasa (Juan 5:28, 29). Job chachajj uka arunak phoqasirwa uñjani, qhepatsti jupajj ‘wayna tiemporuw kutjjani’ (Job 33:24, 25). Diosajj jiwatanakar jaktayaniwa sasin confiyapki ukanakasa, ukhamarakiw wayn tawaqor kuttjjapjjani.

Inas mä munat familiamajj jiwjjchi, cheqas kunanaktï yatjjataniwayktan ukajj janiw llakim chhaqtaykaspati. Ukampis kuntï Bibliajj uka toqet qhanañchki ukanakat lupʼiñajja, chuymachtʼiristamwa, jan aynachtʼañatakis yanaptʼarakiristamwa (1 Tesalonicenses 4:13).

Jan sinti llakisiñatakejj ¿kunanakampsa lurasma uk yatiñ munasmati? Inas akham jisktʼasirista: ‘¿Kunatsa Diosajj jan walinaka ukat tʼaqhesiñanaksa utjaypacha?’ sasa. Uk yatiñatakejja, Internetan jw.org sat cheqaruw mantasma. Ukanwa, Bibliat apstʼat suma qhanañchäwinak jikjjatasma.