¿Khitisa Miguel sat arcangelaxa?

BIBLIANXA mä qhawqha chiqanakwa Miguel sata angelaruxa aytasi. Uka qillqatanakanxa uka angelax kuns luraskapuniwa. Daniel libronxa, ñanqha angelanakampiwa nuwasiski; Judas qillqatanxa Supayampiw jiskhisiski, ukat Apocalipsis libronsti Supayampi ukat saxranakampiwa nuwasiskaraki. Ukhamasti, Jehová Diosaruxa arxatapuniwa, ukatsti Diosan uñisirinakaparuxa saykatapuniwa. Sutipaxa, “¿Khitisa Diosjamaxa?” sañ muni, ukhamatwa Miguelaxa sutiparjama sarnaqi. Jichhasti, ¿khitirakïpacha Miguelasti?

Janïra uk yatxatkasaxa ak amuytʼañäni: yaqhipanakaxa pä sutinïpxiwa. Jacob chachaxa Israel satarakïnwa, ukat apóstol Pedroxa Simón sutimpi uñtʼatarakïnwa (Génesis 49:1, 2; Mateo 10:2). Ukhamarakiwa, Miguel sutixa Jesucriston yaqha sutipaw siw Bibliaxa, janira aka Uraqiru jutkäna ukhawa uka sutimpi uñtʼatänxa, ukat alaxpacharu sarxäna ukat aksaruwa ukham sutimpi uñtʼatarakixa. Kunatsa ukhamaw sistanxa, ukatakixa Bibliata jukʼampi yatxatañäni.

Arcángel. Miguelax “arcángel pachpa[w]” siwa Diosan Arupanxa (Judas 9). Aka arux “jilïr ángel” sañ muni. Ukhamasti, Miguelax mä arcángel satawa, jupa sapakiwa arcangelaxa. Ukatsti Biblianxa janipuniw “arcangelanak” siskiti jan ukasti “arcángel” sakiwa, mayakïkaspas ukhama. Ukatxa, Jesusas uka arcangeläkaspas ukham siwa 1 Tesalonicenses 4:16, ukatxa kunsa jaktanit Jesusax lurani uka tuqitwa ukanxa akham saski: “[Jesucristo] Tatit pachpawa alaxpachat saraqanini taqi munañan arupampi, [mä arunxa] arcangelan arupampi” sasa (Jesucristo Tatitusan Machak Testamentopa, 1974). Aka jiskʼa tʼaqanxa Jesusawa arcángel arupampi saraqani siwa. Ukhamasti, akanxa qhan amuytʼayistu, Jesusawa arcangelaxa.

Pʼiqiñchiri. ‘Arcángel Miguelasti angelanakapampi saytʼasisinxa, Dragonampi angelanakapampiwa nuwasïna’ siw Bibliaxa (Apocalipsis 12:7). Ukhamasti uka Miguelaxa chiqap angelanakar pʼiqiñchiriwa. Apocalipsis libronxa Jesusax chiqap angelanakaru pʼiqiñchirjam aytasitarakiwa (Apocalipsis 19:14-16). Ukat apóstol Pabloxa qhanpunwa akham säna “Tatitu Jesusax [...] alaxpachat nina taypina chʼamani angelanakapampi” jutani, sasa (2 Tesalonicenses 1:7). Ukhamasti Bibliaxa, “Miguelasti angelanakapampi” siwa, ukatxa Jesusax “chʼamani angelanakapampi” sarakiwa (Mateo 13:41; 16:27; 24:31; 1 Pedro 3:22). Diosan Arupanxa janipuniwa chiqap angelanakax pä tamäkaspasa ukham parlkiti, mayaxa Jesusampi pʼiqiñchatäkaspasa ukat mayniraki Miguelan pʼiqiñchatäkaspasa ukhama. Ukhamasti, Miguel arcangelaxa alaxpachana apnaqirita uttʼayata Jesucristowa.a