4 YATICHÄWI

¿Kunapachas juchäxixa?

Ukhamäskapunit janicha uk qhanañchtʼma:

Uñtʼatamp katthaptʼasiñax juchawa.

□ Jïsa

□ Janiw ukhamäkiti

Mä parejax janïr ikthapkasax wachuq juchar purispawa.

□ Jïsa

□ Janiw ukhamäkiti

Kunanaktï chacha warmix lurapki, ukanak uñtʼasirinakax jan lurapki ukhax janiw munasipkiti.

□ Jïsa

□ Janiw ukhamäkiti

MAYNIMP uñtʼasiñatak mistusksta ukhaxa, ukanak tuqitwa jisktʼaspachätaxa. Kunattixa, kawkikamas munasiñ uñachtʼaysna ukax janiw yatiñjamäkiti. Ukhamasti taqi ukanakat mayat mayaru yatxattʼañäni ukat Bibliamp yanaptʼayasiñäni, kunapachas juchax uk amuyañataki.

● Uñtʼatamp katthaptʼasiñax juchawa.

Janiw ukhamäkiti. Bibliax munasiñat katthaptʼasiñarusa yaqha munartʼasiñanakarusa janiw juchaw siskiti. Sulamitampin uwij awatirimpin sarnaqäwipat amuytʼañäni. Janïr casaraskasax janiw kuna jucharus puriwayapkänti, ukampis, kunjamtix Bibliax siskixa panipax purapat munartʼasipxirïnwa (El Cantar de los Cantares 1:2; 2:6; 8:5). Jichhürunakanxa, parlatäxapxi, mä arunxa, jaqichasiñ amtxapxi ukanakatakixa, ukham munartʼasiñax janirakiw juchäkiti.a

Ukhamäkipansa, sumwa amuytʼasipxañapa. Jampʼattʼasiñasa, qhumanttʼasiñasa ukat ukham munartʼasiñanakasa, parejarux ikthapiñ munañaruw puriyaspa. Suma amtanïsipkpansa, jankʼakiw munañamp apayasisax wachuq juchar purtʼasipxaspa (Colosenses 3:5).

● Mä parejax janïr ikthapkasax wachuq juchar purispawa.

Jïsa. Wachuq jucha sasin jaqukipaski uka aruxa griego arunxa pornéia sas qillqatawa, ukax janiw chacha warmi ikthapiñ mayakïkiti. Jan chachapäki jan warmipäki ukanakamp ikthapiñäkis ukaruw wachuq jucha sasixa ukhamaraki chhuxurasiñapamp axtasiñanak lurapxi ukas wachuq jucharakikiwa. Ukhamasti, wachuq juchaxa janiw jan casaratäkasin ikthapipxi ukakïkiti; jan ukasti yaqhanakar chhuxurasiñap llawqʼañasa, lakat lurañasa, qhipäxat lurañasa wachuq jucharakikiwa.

Ukampis Biblianxa, janiw wachuq juchatak parlkiti, jan ukasti yaqha jachʼa juchanakat parlarakiwa. Apóstol Pablox waljanakat parläna, ukanakarusti jañchin luräwinakap sas uñtʼatarakiwa, uka listan akanakampiw uñsti: “Qʼañu lurañanaka, vicionaka [mä arunxa, “jan phinqʼani juch lurañanaka”, NM]”. Ukat sarakïnwa: “Khitinakatix akanak lurapki ukanakaxa janiw Diosan reinopanxa katuqatäpkaniti” sasa (Gálatas 5:19-21).

Ukampis ¿kunas “qʼañu lurañanaka[xa]”? Taqpach qʼañu luräwjam uñtʼatäki ukanakaruw Pablox uka arumpix säna, qʼañu parlañasa ukan jakhutarakikiwa. Amuytʼañataki, akanakaw qʼañu luräwinakaxa: isi manqhar luqantas maynir llawqʼaña, ukhamarak maynir isi apsuña jan ukax jan llamktʼañäki uka chiqanak llamkhaña, sañäni, ñuñunaka. Bibliarjamaxa, casadonakakiw munasisax ñuñut llamktʼasipxaspaxa (Proverbios 5:18, 19).

Mä tuqitxa, yaqhip wayn tawaqunakax jan phinqʼaniwa, jan axsartʼasawa Diosan arunakapxa pʼakintapxi. Yatkasawa ukanak lurapxi, jan ukax ukham qʼañu luräwinakxa, khitinakampis lurapxaspa uka warminakaruw jan ukax uka chachanakaruw thaqhapxi. Apóstol Pabloxa, “jan phinqʼani juch luraña” siskänxa ukaruw yaqhipanakax purtʼasipxi. Griego arun qillqatäkäna ukarjamaxa, “sinti jan wali luräwinaka” jan ukax “jiljañanaka” sañ muni, ukhamaraki “jan phinqʼani”, “warmi jan ukax chacha munañansa atipjata” “jan axsartʼir chuymani”. Chiqpachansa, janiw mä cristianosa ukham jan phinqʼan luräwinakar purtʼasiñxa munkaspati, janirakiw jan axsartʼasaxa ‘kunayman qʼañu luräwinakarus katuyaskaspati’ (Efesios 4:17-19).

● Kunanaktï chacha warmix lurapki, ukanak uñtʼasirinakax jan lurapki ukhax janiw munasipkiti.

Janiw ukhamäkiti. Yaqhipanakax ukham amuyapxi. Ukampis ukham sarnaqirinakaxa, janiw respetasxapxiti, janirakiw maynit maynirus atinisxapxiti. Laurarux kunas pasatayna uk amuykiptʼañäni. “Mä urux mamajax janiw utankkänti, ukat uñtʼatajax televisión uñtiriw jutatayna. Qalltanxa, amparatak katthaptʼitu, ukampis qhipatxa, jukʼampinakaruw puripxta. Colerasisincha sarawayxaspa sas axsarayasisax janiw kamsktsa” siwa.

¿Jumax kamstasa? ¿Uñtʼatapax chiqpachapunit Laurar munpachäna, jan ukax jañchipan munañapatakcha lupʼiskpachäna? Maynix qʼañu lurañanakar puriñataki wiytiristam ukhaxa, ¿taqi chuymaw munitu sasmati?

Kunapachatï mä waynax uñtʼatapan concienciapar jan yäqasa ukat Bibliat yatiqataparu jan yäqasa, jan walinak lurañataki wiytki ukhaxa, Diosan kamachipwa pʼakintaski. Ukhamaraki, uka waynax janiw ni uñtʼataparus taqi chuyma munaskpachati sañjamäspawa. Mä tuqitxa, kunapachatix mä tawaqux jan walir wiytatäsaxa jan cuerpopat jarkʼaqaski ukhaxa, qʼañu luräwit juchanirakikiwa, ukat wachuq juchatsa juchanirakikïspawa (1 Corintios 6:9, 10).b

Qhan parlapxma

Jumatï uñtʼasiñ qalltawayxstaxa, ¿kunjamatsa jan juchar purkasma? Nayraqatwa kunanaks jan lurapkät ukanakxa qhan parlapxañama. Kunjamtï Proverbios 15:22 siskix ukhamarjama: “Kunapachatix jan jisktʼasiñax utjki ukkhax, amtäwinakaxa aynachtʼiwa”. Ukhamax nayrkipan uñtʼatamampix amtapxam kunas walïski kunas jan walïki ukanaka. Jañchin munañanakapax juchar puriyirjamäxtam ukhak parlañax janiw askïkiti. Amuytʼañataki, utax nakhantatäxaspa ukhakisa maynix familiapamp nin jiwarayañat parlañ amtaskasma ukamp sasïspawa.

Inas uñtʼatamamp qalltatpach uka tuqit parlañax chʼamjamächispa jan ukax phinqʼasiñjamächispa. Ukampis ukax askitakiwa. Amuytʼaskakiñäni, jichhak naktaski uka nina kunjamatsa jiwarayaña uk familiax yatxani ukhaxa, janïr phichhantaskipanwa jiwarayani. Ukhamarakiw parejamampitix nayrkipan kunas walïski kunas jan walïki ukanakat qhan parlapxäta ukhaxa, janiw juchar puripkätati. Ukatxa, sumti sarnaqapxäta janicha uk amuyañsa yanaptʼarakïtamwa. Ukat jañchin munañapar atipjaña, paciencia chuymanïña ukat mayninakan askip thaqhañsa yanaptʼarakïtamwa, ukhamatwa jaqichatäxasax chacha warmi chikthapïwinsa sum phuqasipxäta (1 Corintios 7:3, 4).

Chiqpachansa, Diosan mayitanakaparjam lurañax chʼamakiwa. Ukampis iwxanakaparux istʼañamawa. Isaías 48:17 qillqatan jupax siwa: “Nayasti kunatix jumatakix askïki ukwa yatichsma, kawki thakinjamtix sarañamäki ukanjam irparaksma” sasa. Janipun armasimti, Jehová Diosax janiw llakin sarnaqañam munkiti, jan ukasti suman jakasiñamwa muni.

JUKʼAMPI YATXATAÑATAKIX MAYÏR LIBRON 24 YATICHÄWIP UÑXATÄTA

[Qhanañchäwinaka]

BIBLIAX KAMSISA

“Khitintix munasiñax utjki ukax [...] janiw kuna jan walsa lurkiti.” (1 Corintios 13:4, 5)

¿YATIYÄTATI?

Chiqpachansa, janïr jaqichaskasax parejanakax jan parlañäki uka tuqinakatwa qhan parlapxañapa. Ukampis amuytʼasipxañapawa: jañchin munañanakap sartayas parlañaxa qʼañu lurañ juchamp sasiwa, celularatsa qillqasisipkpan jan ukax telefonotsa parlasipkpana.

AKHAM LURASMAXA

Uñtʼatamamp mistsuñ munasaxa waljaniw mistsupxañama, jan ukax maynimpiruw irpapxañama. Jan walir puriyirjamäki uka lugaranakanxa janiw sapakïpxañamäkiti, sañäni, autox saytʼataski ukhaxa janiw panimakix ukankapxañamäkiti, janiw ni kawki utansa sapakïpxañamäkiti.

¡AKANAK LURÄ!

Jan lurañäki ukanak lurañ munä ukhaxa, akanak lurä: ․․․․․

¿Uñtʼasisipkta uka waynax jan ukax uka tawaqux wachuq juch tuqir wiytitani ukhax kamachäsa? ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● Parlatamamp mistsuskstaxa, ¿kunjamkamakis munartʼasiñax utjañapa?

● Wachuq juch lurañasa, qʼañu luräwinak lurañasa ukat juch jan phinqʼani lurañasa, kunatsa jan pachpäkixa, uk qhanañchtʼma.

[46 janan qhanañchäwipa]

“Uñtʼatajampixa, kunjamatsa jan juchar puripkiristxa uka tuqit Bibliat apstʼata walja qillqatanak uñxattʼapxta, ukaw suma qʼuma chuymanïñatakix wal yanapawayapxitu.”​(Leticia)

[44 janan recuadropa]

¿Juchar purtʼasxstasti?

¿Jachʼa juchar pursta ukhax kamachätasa? Jan sallqjasimti, janiw jumapachax uk askichkasmati. “Jehová Diosarux sapa kutiw yanapap mayisiyäta ukanak wasitamp jan lurapxañajatakixa, awisax janiw lurirïkti, ukampis awisax juchar purtʼasipunirïtwa” sasaw mä tawaqux arsusi. Nayraqatxa awk taykamampiw parlañama. Ukatxa, kunjamtï Bibliax siskixa, tamankir irpir chuymaninakamp parlañaw wali askïspa (Santiago 5:14). Tam uñjir uka jilatanakax chiqañchtʼapxiristamwa ukat sumwa iwxtʼapxarakiristamxa. Ukhamatwa Jehová Diosampix sumankxasma.

[47 janan fotonakapa]

¿Phichhantasxaspa ukhakiti maynix familiapamp nina jiwarayañat parlañ amtaskaspa? Ukhamasti jañchin munañanakapax juchar puriyirjamäxtam jan ukapachakix uka tuqit parlañar uchasimti

5 YATICHÄWI

¿Kunatsa wachuq juchar jan purisa sarnaqaskakiñajäspa?

“Maynimp ikthapiñarux wal wiytapxi.” (Kelly)

“Janipuniw khiti imillampis ikthapirïkti ukat mayj amuyasta.” (Yimi)

“¿JUMAX uk lurirïtati?” Ukham jisktʼapxiristam ukhax axsarayasiñjamawa. Yaqhip chiqanakanxa, waynitutpach tawaqitatpachwa wachuq juch lurapxi, ukat ukham jan luririnakax mayjäpkaspas ukham uñjatäpxiwa.

Jumax munarakta ukat mayninakax wiytapxaraktma

“Jan khitis wachuqa jucha lurañan sarnaqpati” siski uka arunak istʼañasatakiw Bibliax chʼamañchistu, jumatix cristianüstaxa uk sum yattaxa (1 Tesalonicenses 4:3). Ukhamäkipansa, jañchin munañapar apnaqañax chʼamäkispawa. Pablo sat mä waynax akham arsusïna: “Awisanakax chacha warmi ikthapiñ tuqit amuyunakaw jutitu, ukampis kunatsa ukham amuyunaka jutpachitu ukxa janiw amuykti” sasa. Awisax ukham amuyunakax mä jukʼa jutasipuniwa, janiw jan walïkiti.

Ukampis janiw uka amuyunakakix jutaskiti, jan ukasti jaqinakas uka tuqir wiytarakistuwa. Yaqhip yatiqir masinakamax akham sapxiristamxa: “Janitix warm uñtʼkstaxa janiw chachäktati jan ukax janitix chach uñtʼkstaxa janiw warmïktati” sasa. Elenax siwa: “Janïr jaqichaskasa ikthapiñax wali khusaspasa, janis ukham lurañax utjkaspa ukat janis juchäkaspa ukham amuyañajwa yatiqir masinakajax munapxi. Ukat jan ukham luripanxa, mayjatwa uñjapxitu” sasa.

Ukampis yatiqir masinakamaxa, ¿kunsa jan yatiyapktamxa? Mariyax uñtʼatapampi ikintasitayna uka qhipatxa kunjamasa jikxatasïna ukwa akham sasax amti: “Wali phinqʼachatapuniw uñjasiyäta, ukat nayatakis jupatakis wali coleratapuniyätwa”. Niya taqpach wayn tawaqunakaw uk lurasax ukham jikxatasipxi. Waynitpach tawaqitpach ukham wachuq jucha lurapxatapatxa, waljaniw trauma apapxi ukat qhiparux jan waltʼäwinakan uñjasipxi.

Ukampisa, inas Shanda sat tawaqjam jisktʼasiraksta, jupax akham siwa: “Jaqichasiñkamaxay suyañächixa, ¿ukhamasti kunatsa wayn tawaqükasin ukham munañanakani Diosax lurpachïstu?” sasa. Uka tuqit yatxatañax wali askiwa.

¿Wachuq jucha lurañakti munta, janit yaqha munañanakax utjktamxa? Chiqasa, yaqha munañanakax utjiwa. Jehová Diosax kunayman muniri lurawayistu ukat yaqha kusisiñanaksa churawayarakistuwa.

¿Jan amuytʼasisati jañchin munañapxa lurta? Janiwa, kunattix Diosax munañam apnaqirwa lurtamxa.

¿Ukax kamsañs muni? Jañchin munañapax utjaspawa, ukampis ukarux apnaqsnawa. Ukhamasti, maynimp ikthapiñ munañaxa, mä jaqir sapa kuti nuwjañ munasin nuwjkasma ukamp sasïspawa, ukax luqhikankañawa.

Wawanïñataki luratäki uka chiqanakxa janiw jan walitakix apnaqasiñapäkiti, ukxa Diosax qhanpunwa arsüna. Maynix “janirak jañchipan munañanakapsa, ni jan wali amtatanakapsa lurpati” siw Bibliaxa (Colosenses 3:5). Kunjamtï “munasiña horasa[sa], uñisiñ horasa[sa]” utjkixa, ukhamarakiw chacha warmi ikthapiñ horasasa, jarkʼaqasiñ horasasa utjaraki (Eclesiastés 3:1-8). Ukhamasti, jañchin munañanakapxa jumax apnaqasmawa.

Virgenäskatam yatisax jumat larusipxani ukhaxa, ¿kamachätasa? Jan aynachtʼayasimti. Jiskʼachañ laykuki parlchi ukhaxa, akhamwa sasma: “Ukhamäskapuniway... janiw uk lurirïkti. Ukampis yatiñamataki... Walxay ukhamäskstsa” sasa. Jan ukaxa: “Nayaxay kunjamäskstsa, ukxa janiw yaqhanakamp parlirïkti” sasa (Proverbios 26:4; Colosenses 4:6).a Ukat ukham parlañ muniriru qhanañchaña wakischini ukhaxa, Bibliarjamaw kun jams jumax amuyta ukxa qhanañchañama.

Virgenäskatamat jan ukax jan warmi uñtʼatamat larusipxaspa ukhaxa, ¿kunanakamps sasma?

․․․․․

Suma regalo

Janïr jaqichatäkasin ikintasipki uk uñjasaxa, ¿kunjamas Diosax jikxataspacha? Amuytʼañataki: mä amigotakis mä regalo imaskasma ukham sañäni. Ukampis janiraw churktati, ukhamat jupax taqi tuqi uñanuqasa thaqtasa regalo katjaspa, ukat jistʼaraspa ukhaxa, ¿janit coleraskasma? Chacha warmi ikthapiñaxa regalükaspas ukhamawa, ukhamasti amuytʼma, janïr jaqichaskasa uka regalo jisktʼarasma ukhaxa, ¿kunjamas Diosax jikxatasispa? (Génesis 1:28).

Ukhamasti, ukham jan wali amtanak pʼiqir jutätam ukhaxa, ¿kamachätasa? Janiw ukham munañanakampix atipayasiñamäkiti, apnaqañamawa. Atipjasmawa. Jehová Diosar qullan ajayup mayim ukaw jañchin munañapar atipjañxa yanaptʼätamxa (Gálatas 5:22, 23). Amtapunïtawa, “jan kamskay aski jakir jaqinakarux, [Jehová] Tatitux munasiwa, jachʼaruw apti, askinakap churaraki” (Salmo 84:11). Gordon sat mä waynax siwa: “Janïr jaqichaskasa ikintañar purirista ukhaxa, janis sinti juchäkaspa ukhamwa awisax amuytxa. Ukampis Diosar yupaychañ tuqitwa qʼal aynachtʼiristxa sasaw amuyasirakta. Kuna juchar puriñ layku Jehová Diosat jithiqtañax janipuniw mä jukʼas askïkaspati”.

Virgenäskañax janiw kuna phinqʼasiñäkisa, janirakiw ukhamäsax mayjäktasa. Chiqpachansa, wachuq juchar puririnakaw niyas phinqʼachat uñjasipxi, jupanakaw niyas aynachtʼapxi ukat jan walinakarus puripxi. Ukhamasti, jan akapachan amuyunakapar istʼamti, jupanakatakix Biblian arunakapar pʼakintañax walikïskaspas ukhamawa. Wayna jan ukax tawaqu jaqichasiñkam virgenaskäta ukhaxa, kʼumarakiw sarnaqäta, janiw kuna llakinakansa sarnaqkätati ukat chiqpachansa Diosampix sum apasirakïta.

JUKʼAMPI YATXATAÑATAKIX MAYÏR LIBRON 23 YATICHÄWIP UÑXATÄTA

[Qhanañchäwi]

BIBLIAX KAMSISA

“[Maynitix] chuymapan amtchi, jan chach uñtʼiripa imaña [jan ukax virgen sarnaqaskaña ukhaxa], walik luri.”​(1 Corintios 7:37, MT)

AKHAM LURASMAXA

Religionamanktwa saskpansa, jan Diosaru istʼiri qʼañu amtani jaqinakampix janipun chikachasimti.

¿YATIYÄTATI?

Maynitix khitimpis wachuq juch luraskakchi uka jaqixa, jaqichasisax janiw mayjtʼkaspati. Ukampisa, khitinakatix sapäkasin Diosan suma iwxtʼanakaparjam sarnaqapki uka wayn tawaqunakax jaqichasxasinxa warmipampikiw jan ukax chachapampikiw sarnaqapxi.

¡AKANAK LURÄ!

Jan chacha uñtʼasa, jan warmi uñtʼasa jaqichasiñatakixa, akanak lurä: ․․․․․

Amigonakajatï juchar puriyañ munapxitani ukhaxa, akanak lurañ amtta: ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● Jan wachuq juchar purisa sarnaqirinakaruxa, ¿kunatsa yaqhipanakax phinqʼachapxi?

● ¿Kunatsa warm jan uñtʼasa jan ukax chach jan uñtʼasa sarnaqaskakiñax chʼamäpacha?

● Jan wachuq juchar purisa maynix jaqichasispa ukhaxa, ¿kuna askinakas utjaspa?

● Kunatsa virgenäskañax wali askixa uk sum amuytʼasiñapatakixa, ¿kamsasmas sullkamaruxa?

[51 janan qhanañchäwipa]

“Wachuq juchan sarnaqirisa qʼañunak luririsa janiw Diosan Apnaqäwiparux mantkaniti uka amtañaw jan juchar puriñajatakix yanaptʼitu.” (Lidia, Efesios 5:5 qillqatarjama)

[49 janan recuadropa]

Wakichasiñatak jananaka

¿Kunsa jan yatiyapktamxa?

Jichha tiempo anattʼañanakasa kusistʼañanakasa kunarus maynir puriyaspa ukxa luririnakapax janiw arsupkiti, niya ukhamarakiwa, wachuq juch lurir walja wayn tawaqunakax kuna jan waltʼäwinakansa uñjasipxi ukxa janiw arsusipkarakiti. Jichhax kimsa jan waltʼäwinakat parltʼañäni ukat jisktʼanakax utjarakiniwa. Kunjamsa uka jisktʼanakar qhanañchtʼasma uk amuytʼma.

● Mä yatiqir masimax walja tawaqunakampiw ikintasta sasaw jachʼa jachʼa tukusa parlaspa. Uk lurañax wali askipuniwa ukat janirakiw khitirus jan waltʼaykiti, sasaw sarakispa. ¿Kuntï siski ukax chiqäspati? Ukat uka tawaqunakaxa, ¿kunjamsa jikxatasipxaspa? ․․․․․

● Mä peliculanxa, mä waynamp mä tawaqumpiw munastan sasin ikintasipxi. Jan peliculäkaspa ukhaxa, ¿jupanakamp kunas pasaspa? ¿Ukarukit tukuyaspa? ․․․․․

● Mä suma uñnaqtʼan waynar uñtʼasma, jupax jumamp ikintasiñwa munaspa. Janiw khitis uk yatiñapäkiti sasin siristma. Iyaw sasma ukhaxa, ¿kunas pasaspa? ․․․․․

[54 janan fotopa]

Janïr jaqichaskasa wachuq juchar puriñaxa, jan churatäkasin regalo jistʼarañamp sasiwa