Aka qhep “qhepa urunakanjja” Diosar serviñan walpun trabajipjjañäni

1. ¿Kunatsa ‘qhepa urunakan’ jakatasat jan pächasktanjja?

JIWASATÏ 1914 marat aksar nasirïstanjja, ‘qhepa urunakanwa’ jakasktanjja (2 Tim. 3:1). Kuntï Jesusajj jichhürunakatak siskäna ukanak phoqasir taqeniw istʼtanjja. Ukanakat yaqhepajj akanakawa: guerranaka, manqʼat pistʼañanaka, terremotonaka, usunaka, jan wali luräwinakan jiljjattatapa, Diosan servirinakapar jan waltʼayañatak arknaqasitapa (Mat. 24:3, 7-9, 12; Luc. 21:10-12). Jaqenakajja, kunjamtï apóstol Pablojj siskäna ukhamwa sarnaqapjje, uks uñjaraktanwa (“¿Jaqenakajj jichhürunakan kunjamäpjjesa?” sat recuadro uñjjattʼäta). Jichhürunakan ‘qhepa urunakanwa’ jakasktanjja, Jehová Diosan servirinakapajj janiw uka toqet pächasktanti (Miq. 4:1).

2. ¿Kuna jisktʼanakar qhanañchañas wali wakiskirejja?

² Khä 1914 marat jichhakamajj walja maranakaw pasawayjje, ukhamajj qhep ‘qhepa urunakanwa’ jakaskpachätanjja. Niyakejjay akapachan tukusiñapajj wali jakʼäjjchejja, aka pä jisktʼanakar qhanañchañaw wali wakiskiri: ¿Kunanakas qhep ‘qhepa urunakan’ pasani? Uka uru puriniñapkamajj ¿kun lurañassa Jehová Diosajj muni?

¿KUNAS QHEP ‘QHEPA URUNAKAN’ PASANI?

3. Kuntï 1 Tesalonicenses 5:1-3 texton siski ukarjamajja, ¿kunsa marka apnaqerinakajj yatiyapjjani?

³ (1 Tesalonicenses 5:1-3 liytʼañataki). Pablojj ‘Jehová Diosan urupatwa’ parli. Uka texton parlki uka ‘Diosan urupajja’, ‘Jachʼa Babiloniaru’, mä arunjja, taqpach falso religionanakar tukjañampiw qalltani, Armagedonampiw tukuyarakini (Apoc. 16:14, 16; 17:5). Ukampis uka uru janïr qalltkipanjja, marka apnaqerinakajj “suman jakasiñampi jan ajjsaras jakasiñampiw utj-jje” sasaw yatiyapjjani. Awisajj marka apnaqerinakajja, niya ukham arunakwa ‘markanakajj jukʼamp sumaw apasipjjañapa’ sañatak apnaqapjje.b Ukampis Biblian parlki uka yatiyäwejj janiw ukhamäkaniti. ¿Kunatsa ukham sistanjja? “Suman jakasiñampi jan ajjsaras jakasiñampiw utj-jje” sasin yatiyaskani ukhajja, waljaniw akham sapjjani: “Gobiernonakaw akapachan jan ajjsaras jakasiñ jikjjatapjje” sasa. Ukampis ukhaw ‘wali tʼaqesiñ tiempojj’ qalltani, marka apnaqerinakjjarus “tʼunjäwejj jutani” (Mat. 24:21).

4. “Suman jakasiñampi jan ajjsaras jakasiñampiw utj-jje” sasin yatiyaskani uka toqet ¿kunsa jan yatktanjja, ukat kunsa yatiraktanjja?

⁴ Marka apnaqerinakajj kunjamsa ukat kunatsa “suman jakasiñampi jan ajjsaras jakasiñampiw utj-jje” sasin yatiyapjjani uk janiw yatktanti. Mä kutikiti jan ukajj walja kutich yatiyaspachäni uks janirakiw yatktanti. Ukampis akwa yattanjja: uka yatiyäwimpejj janiw engañjayasiñasäkiti, marka apnaqerinakaw sumankañ utjayapjje sasin sapkani ukarus janirakiw creyiñasäkiti. Antisas yatiyasiñap suyaskayätan uka yatiyäwejja, “Jehová Diosan urupajj” niya qalltañampïskatapwa uñachtʼayistani.

5. ¿Kunjamsa 1 Tesalonicenses 5:4-6 textojj ‘Jehová Diosan urupa’ wakichtʼat suyañatak yanaptʼistu?

⁵ (1 Tesalonicenses 5:4-6 liytʼañataki). Pablojja, kunsa ‘Jehová Diosan urupa’ wakichtʼat suyañatakejj lurañasa ukwa qhanañchistu. ‘Janiw mayninakjam ikjañasäkiti, jan ukasti uñnaqapuniñasawa, wali amuyumpiw sarnaqañasaraki’. Sañäni, politicar jan mitisiñatakejj amuyasiñasawa, ukhamat akapachar jan mitisiñataki. Mitissna ukhajja, akapachankirïksnas ukhamäspawa (Juan 15:19). Cheqas Diosan Reinopakiw sumankañ apanispa.

6. ¿Kunatakis jaqenakar yanaptʼañ muntanjja, ukat kunatsa?

⁶ Jan ikjañataki wal chʼamachasisajja, ikit sartapjjañapatak yanaptʼañwa yaqhanakar muntanjja, mä arunjja, Bibliarjamajj kunatï akapachar paskani uk amuyapjjañapatak yanaptʼañwa muntanjja. Ak janipun armañäniti: wali tʼaqesiñ tiempojj qalltkani ukhajja, Jehová Diosar uñtʼañatakejj janiw tiempojj utj-jjaniti. Ukatwa jichhürunakan Diosan arunakapat yatiyañajj wali wakiskiri.c

JAN INAKTʼAS PREDICAPJJAÑÄNI

7. ¿Kun lurañassa Jehová Diosajj muni?

⁷ ‘Jehová Diosan urupa’ puriniñapatakejj jukʼa tiempokiw faltjje, ukapachkamajj jan inaktʼas prediksna ukwa Jehová Diosajj muni. Ukatakejja, ‘Tatitur serviñan wal trabajiñasawa’ (1 Cor. 15:58). Aka qhepa urunakan kunanakatï pasañapäkäna uka toqet parlasajja, Diosan servirinakapajj kunanaksa lurapjjañapäna uka toqetwa Jesusajj parläna. Akham sänwa: “Nayraqatajj taqe markanakanwa suma yatiyäwinakajj yatiyasini” sasa (Mar. 13:4, 8, 10; Mat. 24:14). Diosan arunakap yatiyir sartan ukhajja, Jesusan uka arunakap phoqasiñapatakiw yanaptʼasktanjja.

8. ¿Kunjamsa Diosan Reinopat yatiyirinakajj jiljjattawayi?

⁸ Sapa maratjamaw jukʼamp jaqenakajj Reinon suma yatiyäwinakap istʼapjje. Diosan Reinopat yatiyirinakajj kunjamsa aka qhepa maranakan jiljjattawayi uka toqet parltʼañäni. 1914 maranjja, 5.155 yatiyirinakaw 43 markanakan utjäna. Jichhürunakansti, mä 8.500.000 yatiyirinakaw 240 markanakampina cheqanakampin utj-jje. Ukampis Diosan arunakap yatiyañ janïraw tukuyktanti. Diosan Reinopakiw taqe jan walinak chhaqtayjjani sasin yatiyaskakiñasawa (Sal. 145:11-13).

9. ¿Kunatsa Diosan Reinopat yatiyaskakiñasa?

⁹ Jehová Diosajj ‘jan yatiyjjapjjamti’ siskani ukhakamajj yatiyaskakiñäniwa. Ukampis ¿qhawqha tiempos jaqenakatakejj Jehová Diosampiru Jesucristompir uñtʼapjjañapatakejj utjaski? (Juan 17:3). Janiw yatktanti. Ukampis akwa yattanjja: wali tʼaqesiñ tiempojj qalltkani ukapachkamajja, ‘taqe khitinakatï wiñay jakañatak suma chuymanïpki ukanakajj’ Diosan arunakap istʼapjjaspawa, Jupar serviñsa amtapjjarakispawa (Hech. 13:48). ¿Kunjamsa uka jaqenakarojj wali tʼaqesiñ tiempo janïr purinkipan yanaptʼsna?

10. Arupat yatichañatakejja, ¿kuna yanaptʼanaksa Jehová Diosajj churistu?

¹⁰ Jehová Diosajja, kunanakatï Arupat yatichañatakejj munaski taqe ukanakwa markap toqejj churistu. Sañäni, semanan apaski uka tantachäwinjja, sapa semanaw kunjamsa yatiyañ qalltsna revisitanaks lursna ukanak yateqtanjja, kunjamsa Bibliat yatichañasa uks yateqaraktanwa. Diosan markapajja, Bibliat yatichañataki yanaptʼanaksa (kit de enseñanza) churarakistuwa. Ukanakajj akanakatakiw yanaptʼistaspa:

• jaqenakampi Bibliat parlañ qalltañataki,

• jaqenakar Diosat yatiñ munapjjañapatak yanaptʼañataki,

• Diosat jukʼamp yatjjatañ munapjjañapatak yanaptʼañataki,

• Bibliat yatichkasin kunatï cheqäki uk yatichañataki

• Diosat yateqañ munirinakarojj Internetan jw.org^® cheqar mantapjjañapataki, Tantachasiñ Utar sarapjjañapatak invittʼañataki.

Bibliat yatichañataki yanaptʼanakjja, janiw aleqak apnaqañasäkiti, jan ukasti, ukanakampiw jaqenakar yatichañasa.d Sañäni, jiwasatï Bibliat jukʼamp yateqañ muniri mä jaqemp parltʼasin mä tratado, jan ukajj mä revista jaytañäni ukhajja, uka jaqejj uka qellqatat jukʼampiw mayan jupamp jikiskañäni ukhakamajj yatjjatani. Cheqas Diosan arunakap sapa phajjsi yatiyañatakejj sapa mayniw chʼamachasiñasa.

11. ¿Kunatsa Curso bíblico en línea sat yanaptʼajj wakichasiwayi?

¹¹ Jehová Diosajj kunjamsa jaqenakarojj arunakap yateqapjjañapatak yanaptʼaraki uk uñjañäni. Internetan jw.org cheqanjja, Curso bíblico en líneae sat mä yanaptʼaw utji. ¿Kunatsa ukajj wakichtʼasiwayi? Sapa phajjsejja, oraqpachan waljaniw Internetan Bibliat yateqañataki yanaptʼa thaqapjje. Internetan jw.org cheqan utjki uka yanaptʼajja, Diosan arunakap yateqapjjañapatakiw jaqenakar yanaptʼaspa. Diosan arunakapat jaqenakamp parlktan ukhajja, inas yaqhepajj mä estudio qalltañ pächasipjjchispa. Ukampis jw.org cheqan utjki uka yanaptʼwa uñjjattʼaysna, jan ukajja, uka cheqan direccionapwa Internetan mantapjjañapatak apaysna.

12. ¿Kunanaksa jaqenakajj Internetan utjki uka yanaptʼampejj yateqapjjaspa?

¹² Internetan utjki uka yanaptʼajja, Bibliata, Jehová Diosata, Bibliajj jukʼamp parlki uka jaqenakata, kuntï jutïrin katoqkañäni uka toqenakata yaqha toqenakampitwa parli. Ukanakat yatjjatasajja, jaqenakajj akanakwa yateqapjjaspa:

• Bibliajj kunjamsa jakäwisan yanaptʼistu,

• Jehová Diosasa, Jesusasa, angelanakas khitinakäpjjesa,

• Diosajj kuna amtampis jaqenakar lurawayi,

• tʼaqesiñasa jan walinakas kunatsa utji.

Internetan utjki uka yanaptʼampejja, maynejj akanakwa yateqarakispa:

• Jehová Diosajj kunsa tʼaqesiñ jan utj-jjañapatakisa jiwañajj jan utj-jjañapatakis lurani,

• kunjamsa Diosajj jiwatanakar jaktayani,

• Diosan Reinopajj kunjamsa gobiernonak lanti uttʼayasini.

13. Curso bíblico en línea sat yanaptʼajj janiw maynir Bibliat yatichañampi sasïkiti sasin ¿kunatsa sistanjja?

¹³ Curso bíblico en línea sat yanaptʼajja, janiw maynir Bibliat yatichañampi sasïkiti. Jesusajj jiwasaruw ‘jaqenakar nayan discipulojar tukuyapjjam’ sasin sawayistu. Cheqas jaqenakajj Internetar mantasin uka yanaptʼa liytʼapjjaspa, ukan yateqapkani uk wali valoranit uñjapjjaspa, Diosat yatjjatañ jukʼamp munapjjaspa ukwa muntanjja. Ukhamäni ukhajja, inas mä publicadorampi Bibliat yateqañ munapjjchini. Sapa yatichäwi tukuyarojja, mä solicitud phoqantañapatakiw liytʼirir chʼamañchtʼasi, ukhamat Bibliat maynimpi yateqañapataki. Sapürojj Internetan jw.org cheqanjja, mä 230 ukhaniw Bibliat yatichayasiñatakejj oraqpachan mayipjje. Cheqas jaqenakan Bibliat maynimpi yateqapjjañapajj wali wakiskiriwa.

JAQENAKAR CRISTON DISCIPULOPAR TUKUYAÑATAK CHʼAMACHASISKAKIÑÄNI

14. Jesusajj kuntï Mateo 28:19, 20 qellqatan siskäna ukarjamajja, ¿kunatakis chʼamachastanjja, ukat kunatsa?

¹⁴ (Mateo 28:19, 20 liytʼañataki). Bibliat maynir yatichkasajja, Criston discipulopar tukuñapataki yanaptʼañatakiw chʼamachasiñasa, kuntï Jesusajj yatichkäna ukanak phoqañapatakis yatichañasarakiwa. Cheqas Jehová Diosar serviñasa Reinop toqet saytʼasiñas jupatak kunja wakiskirisa uk amuyañapatakiw yanaptʼañasa. Ukatakejja, yateqki ukarjam sarnaqañapataki, jakäwip Diosar katuyasiñapataki ukat bautisasiñapatakiw chʼamañchtʼañasa. Ukhamatakwa Jehová Diosan urupan salvasini (1 Ped. 3:21).

15. ¿Kunatakis tiempojj jan utj-jje, ukat kunatsa?

¹⁵ Kunjamatï akhakam yateqktanjja, mä jukʼa tiempokiw akapachan tukusiñapatakejj faltjje. Ukhamajj khitinakatï Criston discipulopar jan tukuñ munapki ukanakar Bibliat yatichaskakiñatakejj janiw tiempojj utj-jjeti (1 Cor. 9:26). Jichhakamajja, waljaniw Diosan arunakap janïr istʼapkiti, ukatwa jan inaktʼas yatiyaskakiñasa.

FALSO RELIGIONANAKAT JITHEQTJJAÑASAWA

16. Apocalipsis 18:2, 4, 5, 8 textonakarjamajja, ¿kunsa taqenis lurañasa? (Qhanañchäwip uñjjattʼäta).

¹⁶ (Apocalipsis 18:2, 4, 5, 8 liytʼañataki). Uka versiculonakajja, Jehová Diosajj kunamp lurañassa muni ukwa uñachtʼayistu. Taqe cheqpach cristianonakaw Jachʼa Babiloniat mistjjañasa. Bibliat janïr yateqkasajja, inas maynejj mä religionar sarirïchïna. Inas cultonakapar sarirïchïna, qollqempi jan ukajj yaqha ukhamanakampi yanaptʼirïchïna. Ukampis janïr bautisatäkasin Diosan arunakap yatiyañapatakejja, nayraqatajj taqe kunanwa falso religionat jitheqtjjañapa. Ukatakejja, ‘janiw aka religionar jutjjäti’ sasaw mä carta apayañapa, jan ukajja, janiw mayampsa sarañapäjjeti, Jachʼa Babilonia partëki uka religionanakarus janirakiw sarañapäjjeti.f

17. ¿Kuna trabajonaksa cristianonakajj janipun katoqkañäni, ukat kunatsa?

¹⁷ Cheqpach cristianonakajj janipuniw trabajosampejj Jachʼa Babiloniar mitisiñasäkiti, uka toqet wal amuyasiñasawa (2 Cor. 6:14-17). Sañäni, janipuniw mä iglesiatak trabajkañäniti. Inas mä empresan trabajstan, ukapachas janipuniw walja trabajsa ni jaya tiempo trabajsa katoqasiñ munktanti. Jiwasatï trabajon dueñöstanjja, janiw mä trabajsa falso religionanakat katoqkañäniti, ni mä contratsa jupanakamp lurkañäniti. ¿Kunatsa ukham lurañ amttanjja? Janipuniw Dios nayraqatan qʼañut uñjat uka falso religionanakan luratanakapatsa juchanakapatsa juchañchatäñ munktanti (Is. 52:11).g

18. Mä iglesian trabajiñapatak mayipjjäna ukhajja, ¿kunsa mä jilatajj luräna?

¹⁸ Pasïr maranakanjja, contratonak lurir mä jaqew trabajopan dueñökäna uka mä jilïr irpirirojj mä trabajo lurañapatak mayïna. Jilatajja, kunanaktï carpinteronakajj lurapki uka trabajwa jakkäna uka markankir mä iglesian lurañapäna. Contrato lurir jaqejja, uka jilatan iglesianakana jan trabajiñ munatap yatïnwa. Ukampis trabajojj iglesian jankʼak lurasiñapwa munäna. Ukhamäkchïnsa, jilatajj Biblian wiñay yatichäwinakapar respetatapat janiw uka trabajo katoqkänti. Qhepa semanajja, uka markankir periodicon mä fotow uñstäna, uka fotonjja, kunjamsa mä carpinterojj iglesiar mä cruz apkatäna ukaw uñjasïna. Jilatatï uka trabajo katoqaspänjja, jupaw uka foton uñstaspäna. Ukhamäspäna ukhajja, ¿jilat kullakanakajj kunjamsa jilatar uñjapjjaspäna? ¿Jehová Diosajj kunjamas jikjjatasispäna?

¿KUNSA YATEQAWAYTANJJA?

19, 20. 1) ¿Kunsa jichhakam yateqawaytanjja? 2) ¿Kuna toqetsa akjjar jutki uk yatichäwin yatjjataskañäni?

¹⁹ Biblian profecianakaparjamajja, “suman jakasiñampi jan ajjsaras jakasiñampiw utj-jje” sasaw jutïrin yatiyasini. Ukampis marka apnaqerinakajja, janiw jan tukuskiri cheqpach sumankañ apanipkaniti sasaw Jehová Diosajj yatichistu. Ukhamajj “suman jakasiñampi jan ajjsaras jakasiñampiw utj-jje” sasin yatiyaskani ukapachkamasa, ‘wali tʼaqesiñ tiempojj’ qalltkani ukapachkamas ¿kunsa lurañasa? Jehová Diosajja, Reinopat jan inaktʼas yatiyaskaksna, jaqenakarus Criston discipulopar tukupjjañapatak yanaptʼaskaksna ukwa muni. Janirakiw kunäkipansa falso religionanakar mitisiñasäkiti. Ukatakejja, janipuniw uka religionanakar sarañasäjjeti, ni trabajosampis yanaptʼañasäkiti.

²⁰ Janiw yateqawayktan ukanakakejj aka qhep ‘qhepa urunakan’ paskaniti, ¿kunanakampis paspachäni? ¿Kunanakampi lurañassa Jehová Diosajj munpacha? Kunanakatï jutïrin paskani ukatakejja, ¿kunjamsa wakichtʼassna? Akjjar jutki uka yatichäwinwa uka toqet yatjjataskañäni.