Diosan Apnaqäwipat yatiyapxañapataki yatiqirinakar yanaptʼapxañäni
1 Mateo 28:19, 20 qillqataxa janiw nayra tiemponaki phuqasiñapäkänti, jan ukasti jichhürunakansa phuqasiskakiñapänwa. Jesusax arkirinakaparux arkirinak tukuyapxäta sasaw säna, ukat uka arkirinakapasti yaqhanakarurakiw yanaptʼapxarakiñapäna. Jichha qhip qhipa urunakanxa ukarjamarakiw suma yatiyäwinakax yatichasiski (Mat. 24:14).
2 Wawanakasaru ukhamaraki yatiqañ munir jaqinakaruwa Bibliat yatichaskpachätanxa. Jupanakax Jesucriston arkiripäpxañapatakixa yaqhanakar yanaptʼapxarakiñapawa, ukhamax uk lurapxañapatakiw chʼamañchañ muntanxa (Luc. 6:40).
3 Yatiyir mistsuñapataki yatichapxañäni. Bibliat yatiqirinakaruxa, yatiqatanakamat yaqhanakar parlätaw sasaw chʼamañchañasa, ukax wali wakiskiriwa. Ukat yatiyir sarasax kuna askinaksa uñjaniwayta uka tuqinakatsa sum parltʼañamawa. Wawanakamaruxa, wawatpachwa yatiqataparjam yatiyir mistuñapatakix yatichañama (Sal. 148:12, 13). Yatiyir mistuñax kunja wakiskirisa ukax arunakamansa luratanakamansa qhanäñapawa (1 Tim. 1:12).
4 Khitinakatix mayitanakaparjam sarnaqki ukanakarukiw Jehová Diosax yatiyir sarapxañapatakix khiti. Chiqpachansa, machaq yatiyirixa, janiw Diosar katuyata, bautisata, wali yatxattʼat jilatjamax lurkaspati, janiw ukham lurañapas mayiskarakiti, ukampis Biblian qallta yatichäwinakaparjamaw sarnaqañapa ukat uk qhanañchtʼañsa yatiñaparakiwa (Organizados, 79-82 jananakap uñxattʼäta). Jachʼa Babiloniatxa mistxañapawa ukat janiw kuna politicarus mitisxañapäkiti, ukatxa tantachäwinakarux jutañaparakiwa (Apo. 18:2, 4; Juan 17:16; Heb. 10:24, 25).
5 Juman Bibliat yatiqirimax janïr bautisaskasin yatiyir mistuñatak mayitanak phuqxchi ukhaxa, irpir chuymaninakan pʼiqtʼiriparuwa yatiyañama. Jupaw pä irpir chuymaninakaru parltʼani jumampi yatiqirimampi uka tuqit parltʼapxañapataki, ukhamat tamamp chikax suma yatiyäwinak yatiyxaniti jan ukax suytʼakinicha uk amuyapxañapataki. Ukat tamamp chika yatiyir mistxani ukhaxa jumaw yatiqirimarux jukʼampi yanaptʼaskakïta.