Yuspärasiñ chuymampi qhispiyäwi amtapxañäni
1, 2. ¿Kunatsa yuspärasir chuymampi qhispiyäwit amtañasaxa?
1 Aka uraqpachankir cristianonakawa, kunjamtï katuqawayktan ukarjam phuqasaxa Jesusan jiwäwip amtañataki aka maran tantachasipxañäni, ukasti marzo phaxsit 22 urunak saraqata sábado uruwa Inti jalantxaru apasini (Luc. 22:19; 1 Cor. 11:23-26). Uka luqtasïwi laykux kunanaksa katuqawaytan taqi ukanakat yuspärasaw ukürux amtañäni, uka luqtasïwi urutxa 1.975 maranakaw pasawayxi. Mä tʼaqhisiñ lawan jan jithiqtas aguantasawa Jesusax Awkipan qullan sutip jachʼañchawayäna ukat Supayan parlataparuw amuktʼayarakïna (Job 1:11; Pro. 27:11).
2 Ukat machaq arustʼäwix wilapxar uttʼayatarakïnwa, ukhamatwa jucharar jaqinakax Diosan wawanakapjam Cristomp chika apnaqapxañapataki uñtʼatäxapxäna (Jer. 31:31-34; Mar. 14:24). Kunjamtï Jesusax Nicodemorux siskänxa uka luqtasïwi utjayasawa Jehová Diosax jachʼa munasiñapxa uñachtʼayawayistu (Juan 3:16).
3. Jesusan jiwäwip amtir saririnakaxa, ¿kunjamsa askinak apsupxi?
3 Jawsäwi. Jesusan jiwäwip amtäwiru, uñtʼatanakar ‘jawstʼir sarañatakix mä papelar qillqtʼasiñax wali askïspawa’ sasaw Diosan Apnaqäwipat Yatiyañataki sat enero phaxsi qillqatanxa chʼamachasiskäna. ¿Jupanakar jawsir sarxtanti? Ukat kawkja chiqanakantix yatiyktan uka chiqanakan jakasir jaqinakarux marzo phaxsi qallta urutwa invitación lakirañäni, uksa yatxarakiktanwa. ¿Uka jaqinakar jawsir sarañatakix wakichatäxtanti? Amtañasawa, uka suma tantachäwin Bibliat arstʼaskani ukaxa tantachasirinakan iyawsäwipxa jukʼampi chʼamañchani ukat uka iyawsäwi utjipanwa wiñay jakañsa katuqapxaspa (Rom. 10:17).
4. Jesusan jiwäwip amtañatakixa tantachäwir nayraqat puriñaxa, ¿kunatsa wali askixa?
4 Tiempo utjanixa, janïr tantachäwi qalltkipan nayraqat puriñatakiw chʼamachasiñasa, ukhamat visitirinakaru sum katuqtʼañataki. Ukürux waljanipuniw tantachasipxani, jan jutapxirïki ukanakarux sum katuqtʼapxañasawa, ukat awisaki jutapxirinakatsa janiw armasipxañasäkarakiti.
5. ¿Kunjamsa ukürutakix chuymas wakichsna?
5 Chuymxa janïräkipanwa wakichañasa. Examinando las Escrituras diariamente sat qillqatansa ukat 2008 calendariosansa Biblia liyiñataki mä suma wakichäwiw utji, ukasti marzo 17 uka urutwa qalltani. Jesusax kunjamsa janïr jiwkasinxa aka Uraqin sarnaqawayäna uka tuqit amtañatakiw uka wakichäwi liytʼañax yanaptʼistani. Uka qullan qillqatanakarjam Diosat maytʼasisin lupʼiñaxa uka suma tantachäwitakiw chuymas wakichistani, Jehová Diosampi Yuqapampix wali munasiñanakapatwa qhispiyäwi utjayawayapxi ukar taqpach chuymampi yuspärañasatakiw yanaptʼistani (Esd. 7:10; Sal. 143:5).
6. Qhispiyäwit yuspärasiñ chuymampi amtañaxa, ¿kunjamsa yanaptʼistani?
6 Jesusan jiwäwip amtañ uru sapürutjam jakʼachasinipanxa, taqiniw wakichasiñ muntanxa. Ukat yaqhanakaru jutapxañapataki yanaptʼañsa wal munaraktanxa. Qhispiyäwita yuspärasiñ chuymampi amtañaxa Jehová Diosampiru Yuqapampiru jakʼachasiñwa jukʼampi yanaptʼistani (2 Cor. 5:14, 15). Ukat kunjamtï Jehová Diosax jiwasanakaru munaskistu ukham jaqi masisar munasiñwa yanaptʼarakistani (1 Juan 4:11).