Kunanaksa Jehová Diosar chursna
1 ¿Kunsa Jehová Diosar chursna? Abel chachax uwijanakapatxa suma likʼïkis ukwa sacrificiot Diosar luqtäna, niya uka kikparakiwa Noé ukat Job sat chachanakax luqtapxirïna (Gén. 4:4; 8:20; Job 1:5). Ukampis luqtäwinakapax janiw Lurir Diosasar qamiriptayañatakïkänti, kunattix jupankiw taqi kunasa. Chiqansa, taqi chuyma churasaxa Diosaru wal munasitapwa uñachtʼayapxäna. Jiwasax ukhamarakiwa Diosar yupaychañatakixa, tiempo, chʼama, kunatï utjkistu ukanakxa ‘suma sacrificionakjam churaraksnaxa’ (Heb. 13:15).
2 Tiempo. Jan wakiskir luräwinakäki ukanakat tiemp apstʼasisa jukʼamp yatiyir sarañax wali askiwa (Efe. 5:15, 16). Sañäni, tiempo apstʼasisaxa, mä maranxa mä kuti jan ukax mä qhawqha phaxsinak precursor auxiliarjam irnaqtʼañax wali askïspawa. Jan ukax yatiyir mistktan ukhasa qhawqtï yatiyirïktan ukats mä jukʼa tiempompwa yatiyaraksna. Sapa semanatï 30 minutonakampi yatiysna ukhaxa, yatiyatasax mä phaxsinxa ¡pä horampiw jilxattaspa!
3 Chʼama. Taqi chuyma yatiyir sarañ munstanxa, kuna luräwinakatï jan ukax kuna irnaqäwinakatï chʼam laqʼaykistaspa ukanak janiw lurañasäkiti, ukhamatwa Jehová Diosar sum luqtañäni. Ukhamaraki taqi chʼamasampi Diosar sum luqtañatakixa, llakinakampix janiw apayasiñasäkiti (Pro. 12:25). Chiqpachansa kuna llakis utjakispawa, ukampis sinti llakisiñat sipansa walïspaw Diosaru llakinakasxa katuyañasa (Sal. 55:22; Fili. 4:6, 7).
4 Kunatï utjkistu. Yatiyasiskakiñapatakixa kunatï utjkistu ukanakampiw yanaptʼaraksna. Ukat Pablox cristiano masinakaparux kunatï utjapktam ukat mä jukʼa ‘apaqapxañamaw’ mayninakar yanaptʼañatakix sasaw säna (1 Cor. 16:1, 2). Jiwasax ukhamarakiw kunatï utjkistu ukanakampixa tamar yanaptʼaraksna ukat uraqpachan Bibliat yatiyasiñapatakis yanaptʼaraksnawa. Janisay walj churkchiñänixa, ukampis taqi chuymamp churañäni ukhaxa Jehová Diosatakix wali askïniwa (Luc. 21:1-4).
5 Chiqansa, Jehová Diosax walj churistu (Sant. 1:17). Kunapachatï tiempo, chʼama ukat kunatï utjkistu ukanak Diosar yupaychañatak churañänixa jupar wal munataswa uñachtʼayañäni. Ukham lurasaxa juparux kusisiyañäniwa kunattix “Diosasti kusisit chuymampi chuririruw munaraki” (2 Cor. 9:7).