¿Kunjamsa Jesusan jiwäwip amtañataki jutirinakarux yanaptʼsna?
1. 2008 marzo phaxsit 22 urunak saraqataruxa, ¿kuna suma qhanañchtʼäwis istʼasiskani?
1 2008 marzo phaxsit 22 urunak saraqatarux millón millón jaqinakaw mä suma qhanañchtʼäwi istʼasipkani. Kunjamsa Jehová Diosax akapachar munasitap laykux mä qhispiyäw churi uka tuqitwa Jesusan jiwäwip amtañataki tantachasirinakax istʼapxani (Juan 3:16). Ukhamaraki Diosan Apnaqäwipata ukat kunjamsa uka Apnaqäwix Diosan munañapa aka Uraqin phuqayani uka tuqitsa qhanañchasiskarakiniwa (Mat. 6:9, 10). Visittʼirinakarux munasiñamp arunttʼañäni ukhaxa jupanak kikparakiwa uñjapxani Diosan markapax munasirïtapa ukat mayachtʼat jakasirïtapsa (Sal. 133:1).
2. Jesusan jiwäwip amtañataki jutapkani uka Bibliat yatiqirinakaruxa, ¿kunjamsa yanaptʼsna?
2 Bibliat yatiqirinaka. Tantachasirinakatxa inas yaqhipanakax jichhaki Bibliat yatiqañ qalltasipkchi, wali askïspawa jilat kullakanakasaru uñtʼayañaxa, ukat kunjamas tantachäwinakax apasi uksa yatiyaraksnawa, ukat Tantachasiñ Uta mä jukʼsa uñakiptʼayaraksnawa. Ukatxa, arstʼirixa Diosar yupaychañ tuqit jiltasipkakiñapataki jupanakarux chʼamañchtʼaskarakiniwa, ukhamasti arstʼirin aruparjamaw jiwasax chʼamañchtʼaraksna.
3. ¿Jan yatiyir mistxapxi uka jilat kullakanakarux kunjamatsa chʼamañchsna?
3 Jan yatiyir misturinaka. Ukürux jan yatiyir mistxapxi uka jilat kullakanakarakiw jiwasamp chikäni, jupanakar jakʼachtʼasisina munasiñampi arunttʼañaxa wali askïspawa. Ukampisa, amuytʼasisaw parltʼañasa, janiw kunatï jan jisktʼañäki ukanak jisktʼañasäkiti, ukat janiw kunatix phinqʼasiykaspa ukanak parlañasäkiti. Walik juttaxa sañatakisa, jutïr tantachäwir jutañapatakisa, Jesusan jiwäwip amtäwi uru pasatatwa irpir chuymaninakax uka jilat kullakanakar visittʼirix sarapxani.
4. ¿Kuns lursna tantachäwir jutirinakaru yanaptʼañatakixa?
4 Tantachäwir jutirinaka. Jutirinakatxa inas uñtʼat masinakasasa, familiaranakasasa, jan ukax qillqatanak lakirkäyatan uka qillqat katuqtʼasirinakasa ukankapxchini. Tantachäwin jan uñtʼatanakar uñjasaxa, ¿janit sum arunttʼasina sutisa yatiyañax askïkaspa? Inas janipun tantachäwinakar nayrax jutapxirïkchïna. Jupanakamp parltʼasax inas kawkjans jakasi ukat kunjamatsa jupanakampi jikissna uk yatiychistaspa; ukhamatwa Jesucriston jiwäwip amtañ urut mä qhawqha urunak pasatatxa jupanakar visittʼir sarsna jan ukax jawstʼsna Bibliat yatiqañ munaskakiñapataki ukhamaraki Bibliat yatichañataki.
5. ¿Kunjam arunakampis qalltsna Bibliat yatiqapxañapatakixa?
5 Wasitat kuttʼasinxa kuna tuqitsa arstʼirix parlänxa ukarjamaw Kunsa yatichi sat librompi parltʼaraksna. Sañäni, arstʼirixa Isaías 65:21-23 qillqat liytʼani, uka tuqit amuytʼasax akhamwa saraksna: “Jesusan jiwäwipxarux kuna suma bendicionanakampsa katuqsna uka tuqit uñachtʼayañ munayäsma” sasa. Ukatxa Kunsa yatichi sat librot 4 ukat 5 jananakapat uñakiptʼaraksnaxa. Jan ukaxa akhamwa saraksna: “Walja jaqinakaw jisktʼasipxi kunjamsa aka profecianakax phuqaspachani” sasa, ukatxa 9 jaljan 1-3 tʼaqanakapatwa uñakiptʼaraksnaxa. Jan ukax arstʼirin arunakaparjamaruw arxaysna ukat Kunsa yatichi sat librot parltʼasaxa kunjamsa Bibliat jukʼampi uka libromp yatiqtʼaspa ukwa amuytʼayaraksnaxa.
6. ¿Jesusan jiwäwip amtasaxa, ¿kuna aski luräwinaksa lursna?
6 Ukhamasti Bibliat yatiqirinakarusa, jan yatiyir misturinakarusa, tantachäwir jutirinakarusa taqin yanaptʼapxañäni (Luc. 22:19). Ukhamtï Diosan Apnaqäwip layku mayninakar yanaptʼañataki chamachtʼasiñänixa Jehová Diosan bendicionanakapsa katuqarakiñäniwa.