Machaqanakar wakichapxañäni
1 Kunapachatï maynix Bibliat yatiqañ qallti jan ukax Diosatakjam ‘jakañ munki’ ukhaxa, Supayax wal jupar aynachtʼayañ muni (2 Tim. 3:12). Ukat inas irnaqir masinakasa uta jakʼankirinakas jan ukax yatiqir masinakasa, kunatakis ukar saräta sapxchispa. Ukat mä familiarax jupar yanaptʼañat jarkʼaspa ukhaxa, jupatakix jukʼamp chʼamäspawa (Mat. 10:21; Mar. 3:21).
2 Ukhamäñapapuniwa. Chiqansa, Diosar yupaychañanxa kunayman tuqit jarkʼataw uñjassna, ukampis ukhamatwa chiqpach cristianüxatas uñachtʼayaraktanxa, ukwa machaqanakax amuyasipxañapa (Juan 15:20). Yaqhipax Jehová Diosan Qhanañchirinakapar jan sum uñtʼasax jan walinakwa amuyapxi ukatwa jarkʼasipxi. Ukat kunapachatï maynix Jesusan arkiripätap layku kuna yantʼansa uñjasi ukat Diosar taqi chuyma istʼaraki ukhaxa, wali kusiskañawa sasin amuytʼayañamawa (Hech. 5:27-29, 40, 41). Ukat kunjamsa Alaxpachankir Awkisax jupanakar uñjaski, ukanakampiw wal chuymachtʼañasa (Sal. 27:10; Mar. 10:29, 30). Maynix yantʼanakansa Diosat jan jithiqtki ukhaxa, Diosan jachʼakankañap tuqit saytʼasitapwa uñachtʼayi (Pro. 27:11).
3 Diosan Arup sum uñtʼañax wakiskiriwa. Kuna jan waltʼäwi utjkipansa Diosan Arupat yatiqaskañamakiwa sasaw Bibliat yatiqiriruxa sañama. Supayax ukham jan walinakampi yantʼasawa Diosan chiqa yatichäwinakapxa machaqanakar armasiyañ muni (Pro. 4:23; Luc. 8:13). Ukatwa kuntï Diosan Arupax yatichki ukxa sum yatiqapxañapa, ukhamata iyawsäwin wali sum saytʼasipxañapataki (Sal. 1:2, 3; Col. 2:6, 7).
4 Janiw aynachtʼañasäkiti. Jan walinakar atipañatakix aguantañasawa, ukatxa wali askinakwa jikxataraksna (Luc. 21:16-19). Kunapachatï maynix machaqäkasin sum aguanti ukhaxa, janiw jupa sapakix askinak jikxatkaniti, jan ukasti yaqhanakas uñjapxarakiwa: kunjamsa Jehová Diosax jan jithiqtir chiqa chuyman luqtirinakapar bendicionanak churi ukwa uñjapxaraki (Sant. 1:12).
5 Tesalónica markankir jilat kullakanakax wali sum nayrar sartapxäna, ukatwa apóstol Pablox wal kusisïna. Jupaw uka jilat kullakanakarux Bibliat yatichatayna, ukatwa Diosar wal yuspäräna (2 Tes. 1:3-5). Jïsa, jiwasatix mä machaq jilatar jan ukax kullakar chʼullqhi saytʼasiñ yanaptʼañäni ukhaxa, ukhamarakiw kusisiñäni.