JESUSAX coleratawa. ¿Kunatsa chuym ustʼayaspacha uk yattati? Kunattix Jerusalenan Diosan utapankaski uka jaqinakaxa wali qullqi chuymäpxänwa. Diosar yupaychir jutir jaqinakat wal qullqichasiñ munapxäna.

¿Vacanak uwijanak palomanak uñjtati? Uka jaqinakax Diosan utapanwa uka animalanak aljasipki. ¿Kunatsa? Diosar luqtañatakixa, israelitanakax uywanak jamachʼinak munapxäna.

Mä jaqix kuna jan wali lurasasa, Diosarux mä ofrenda luqtañapawa sänwa Diosan kamachipaxa. Ukat yaqhanakampitwa ukham ofrendanak luqtapxañapäna. Ukat ¿kawkitsa jamachʼinaka uywanaka jikxatapxasapänxa?

Yaqhipanakaxa uywanaka jamachʼinakxa utapanwa uywasipxäna ukwa Diosar luqtañatak apanipxäna. Ukampis walja israelitanakaxa janiw uywanipkänti ni jamachʼinipkänsa. Ukat yaqhipanakax jayatwa Jerusalenar jutapxäna ukhamasti janiw Diosan utapar uywanakas aptʼasitax jutañjamäkänti. Ukhamasti jaqinakax akar purinisakiwa uywanaksa jan ukax jamachʼinaksa alasipxirïna. Ukampis uka aljirinakaxa wali irxatataruw aljapxirïna. Jaqinakar wal qullqi apsupxirïna. Ukhamarusa Diosan utapanxa janiw kuns aljapxañapäkänti.

Ukatwa Jesusax colerasïna. Ukhamasti Jesusax qullqinpach mesanak jaqthapïna qullqinakapsa willthapïna. Ukatxa, mä chikut wakichtʼasisaw uywanak Diosan utapat ansüna. Paloma aljirinakarusti: ‘Akat palomanak apsupxma. Awkijan utapxa jan mä qhatur uñtat tukuyapxamti’ sasaw Jesusax säna.

Yaqhip arkirinakapaxa jupamp chikaw Jerusalenan Diosan utapankasipkäna. Jesusan luratap uñjasaxa wal muspharapxäna. Diosan Wawapat parlasaxa Biblianxa akham sänwa: ‘Diosan utapar munasiñaxa ninjamaw chuymapan nakhani’ sasa, ukwa arkirinakapax amtapxäna.

Jerusalenaru Pascua amtiri jutasaxa walja milagronakwa Jesusax luräna. Ukatxa, wasitatwa Judeat Galilear kuttʼxäna. Ukat Samaria marknamwa sarxäna. Ukat Samaria markan kunas paspachäna uk yatxatañäni.

JESUSAX Samaria markan mä phuju jakʼaruw samartʼäna. Ukäñkamasti arkirinakapax manqʼa aliriw markar sarapxäna. Akan Jesusampi parlaski uka warmix um waytasiriw jutaskäna. Ukat Jesusax akham sänwa: ‘Um waxtʼita’ sasa.

Ukat warmix kunatarak um maypachïtu sasaw säna. ¿Kunatsa uka warmix ukham sispachäna? Kunattix Jesusax judío jaqïnwa, ukat uka warmisti Samariankir warmirakïnwa. Niya taqi judionakaw Samaria markankirinakarux uñisipxäna. ¡Janiw mä judiox arxayirïkänti! Ukampis Jesusax taqi jaqinakaruw munasïna. Jupax akham sänwa: ‘Khitis um mayktam uk yatismaxa, jumaw jupar um mayismaxa, kunattix jupax jakkir umwa churiristamxa’ sasa.

‘Tata, phujux wali manqhawa, janiw kunamp um waysuñamas utjkiti. ¿Kunjamats jakkir um churitasma?’ sasaw uka warmix säna.

‘Jumatï aka phujut umätaxa wasitamp um munaskakïtawa’ sasaw Jesusax qhanañchaskakïna. ‘Ukampis churkä uka umaxa maynirux wiñayatakiw jakayaspa’ sänwa.

‘Tata, ¡uka umay churita! Janiw mayampis um munxäti. Janirakiw aka um waytasirix jutxäti’ sänwa uka warmixa.

Jesusax chiqa umatcha parlaskpacha ukhamwa uka warmix amuyäna. Ukampis Jesusax Diosan apnaqäwipatwa parlaskäna ukat Diosat chiqa yatichäwipampita parlaskäna, ukasti jakañ churir umäkaspa ukhamawa. Wiñay jakañwa churaspa.

Ukat Jesusax ‘chachamar irptanim’ sänwa uka warmiruxa.

‘Janiw chachanïkti’ sänwa jupaxa.

‘Chiqakwa sasktaxa. Ukampis phisqa chachanïyätawa, ukat jumamp chikäski ukax janiw chachamäkiti’ sänwa Jesusaxa.

Uka warmisti wal muspharäna, kunattix Jesusax chiqak parlaskäna. ¿Kunjamatsa taqi ukanak yatpachänxa? Jesusax Diosan khitanit Wawapawa, ukat Diosaw juparux yatiyäna. Jesusan arkirinakapax kuttʼanxapxänwa, mä Samariankir warmimpi parlaskipanxa arkirinakapax muspharapxänwa.

¿Kunsa akat yatiqtanxa? Jesusax taqi kasta jaqinakaruw khuyapayäna. Ukhamäpxañasarakiwa; janiw yaqha kasta jaqïpanxa qhuru jaqïpachaw sañasäkiti. Wiñay jakañar apir chiqa yatichäwinaka taqinin yatiñap Jesusax muni. Ukat jiwasax ukhamarakiw yanaptʼañasa chiqa yatichäwinak yatiqapxañapatakixa.

JESUSAR uñtma. Galileankir mä qullun waljanir yatichaski. Jupa jakʼankirinakax arkirinakapawa. Uka arkirinakapatxa tunka payaniruw apostolanakapatak ajllïna. Apostolanakax Jesusan wali munat arkirinakapänwa. ¿Kamsatäpxänsa?

Nayrïrixa Simón Pedro satänwa ukat jilapasti Andrés satarakïnwa. Ukatxa, Santiagompi Juan jilapampi. Ukat mayni apostolaxa Santiago satarakikïnwa, ukat yaqhaxa Simón satarakïnwa. Pä apostolaw Judas satapxänxa. Mayax Judas Iscariote ukat maynir Judasax Tadeo satänwa. Ukat maynix Felipe satänwa ukat yaqhasti Natanael sata (yaqha sutipax Bartolomé), ukat Mateompi Tomasimpi.

Samariat kuttʼxasawa ‘alaxpach apnaqäwix jakʼankiw’ sasax nayraqat yatiyäna. ¿Kamsañsa muni apnaqäwi aruxa uk yattati? Diosan suma gobiernopa sañwa muni. Jesusaw apnaqirit uttʼayataxa. Jesusaw alaxpachat apnaqani ukat aka Uraqpacharuw sumankañ apanini. Diosan apnaqäwipax apnaqxani ukhaxa uraqpachaw suma huertaptayatäni.

Akanxa, Jesusax Diosan apnaqäwip tuqitwa jaqinakar yatichaski. ‘Jumanakax akham mayisipxäta: ‘Alaxpachankir nanakan Awkija, sutimax jachʼañchatäpan. Apnaqäwimax jutpan. Munañamax luraspan alaxpachansa aka Uraqinsa’ sasaw Jesusax saski. Waljaniwa ‘Jesusan mayisïwipa’ sasa aka mayisïwirux uñtʼapxi. Yaqhipanakax ‘Nanakan Awkija’ sapxarakiwa. ¿Jesusan mayisïwip taqpach sasmati?

Maynit maynikamax kunjamsa uñjasipxañapa uka tuqitwa Jesusax yaticharakïna. ‘Kunjam uñjatäñtï munapkta ukham mayninakarux uñjapxarakim’ sasaw säna. ¿Mayninakax munasiñamp uñjapxtam ukax janit jumatakix askïki? Jïsa, ukatwa mayninakarux sum uñjañasaxa. ¡Wali askipunïniw kunapachatï aka Uraqin taqinis ukham munasiñampi uñjasxapxani ukapachaxa!, ¿janichä?

AKANKASKI uka lulux 12 maraniwa. Jesusaw amparat wayxasiski ukat tatapampi mamapampix jakʼapankaskiwa. ¿Kunatsa wal kʼuchisipxpacha uk yattati? Yatxatañäni.

Uka lulun tatapax wali aytat jaqïnwa, Jairo satänwa. Mä uruxa aka luluw usuntäna ukat ikiñaruw iktʼayapxäna. Ukampis janiw waliptkänti, jukʼampi jukʼampiw usuntäna. Tatapampi mamapampix wal llakisipxäna, kunattix jiwirjamänwa. Janiw yaqha wawanïpkänti. Jesusan milagro luräwinakapat istʼasaxa Jesusar thaqhiriw Jairox saräna.

Kunapachatï Jesusar uñjäna ukhaxa, Jesusax walja jaqinakampi muyuntatäskänwa. Ukampis Jairox jaqinak taypi pasasinwa Jesusan kayupar qunqurtʼasïna. ‘Imill wawajaw usuta. Mirä amp suma sarañäni, qulltʼanirapita’ sasaw achiktʼasïna. Jesusax jutäw sasaw säna.

Jutasipkän ukhaxa, jaqinakax Jesusar jakʼachasiñatakix wal nuknaqasipxäna. Ukat Jesusax mayak saytʼäna ukat akham sasaw jisktʼäna: ‘¿Khitis llamktʼitu?’ sasa. Jesusax jupat chʼama mistsutapwa amuyasïna ukat maynin llamktʼatapwa amuyasïna. Ukampis ¿khitis llamktʼpachäna? 12 mara usuta mä warmiw llamktʼäna. ¡Jakʼachasisinwa Jesusan isipat llamktʼäna ukat kʼumaräxänwa!

Uk uñjasaw Jairox chuym qhanartayasïna kunattix janiw Jesusatakix maynir qullañax chʼamäkänti. Ukampis mä jaqiw Jairor yatiyirix saräna akham sasa: ‘Jan jukʼampi Jesusar arxayxamti. Phuchamax jiwxiwa’ sasa. Jesusax uk istʼasax Jairor akham sänwa: ‘Jan llakisimti; jupax waliptaskaniwa’ sasa.

Ukat Jairon utaparu purinipkäna ukhaxa, wal jaqinakax jacharasipkäna. Ukampis Jesusaxa: ‘Jan jachapxamti. Janiw jiwatäkiti. Ikiskiwa’ sänwa. Uk istʼasax jaqinakax larusipxänwa, kunattix jiskʼa imillan jiwxatapatxa sum yatipxäna.

Ukatxa, kawkïr utankkänti uka utaruw Jesusax mantäna, uka lulun tatapampi mamapampi ukat kimsa apostolanakapampi. Ukat amparat kattʼasaxa Jesusax akham sänwa: ‘¡Sartam!’ sasa. Ukatxa jiwatat jaktäna, kunjamtï akan uñjaskix ukhama. ¡Jaktasinxa sarnaqänwa! Ukatwa tatapampi mamapampix wal kusisipxänxa.

Janiw juparuki Jesusax jaktaykänti. Naín markan utjasir viuda warmin yuqaparuw nayraqat jaktayäna. Ukatxa, Mariampin Martampin Lázaro jilaparuw jaktayarakïna. Jesusax Diosan uttʼayata apnaqirjam apnaqxani ukhaxa, waljaniruw jaktayani. ¿Janit ukax kusisiykistu?