JAN waltʼäwiw utjäna. Bautisir Juanaruw jiwayapxäna. Apnaqirin Herodías sat warmipaw Juanar uñisïna. Ukat Juanar pʼiq khuchuqañapatakiw apnaqirirux iyawsayatayna.

Kunapachatï Jesusax uka tuqit istʼäna ukhax wal llakisïna. Yaqha chiqaruwa sapaki saräna. Ukampis walja jaqinakaw arkapxäna. Jesusax uka jaqinakar uñjasax khuyaptʼayänwa. Ukatwa, Diosan apnaqäwipat yatichäna, usutanaksa qulläna.

Ukat uka arumax arkirinakapaw jakʼachasin akham sapxäna: ‘Jaypʼüxiwa, wasarankaraktanwa. Jakʼankir markanakar manqʼa alasiri sarapxam sas khitanukxam’ sasa.

‘Jupanakax janiw sarapxañapäkiti, jumanak manqʼa churapxam’ sänwa Jesusaxa. Ukat Feliperux akham sasaw jisktʼäna: ‘¿Taqi aka jaqinakatakix kawkitsa manqʼa alaniñäni?’ sasa.

‘Taqinitaki ma jiskʼakam alañatakis walja qullqiw munasispa’ sasaw Felipex säna. Andresax akham sarakïnwa: ‘Aka wawaw phisqa tʼantʼani ukat pä chawllani. Ukampis taqinitakix pistʼaspawa’ sasa.

‘Taqinis pastun quntʼasipxpan sama’ sänwa Jesusaxa. Ukat Diosaruw uka manqʼat yuspärtʼäna, ukat jiskʼa jiskʼwa pachinuqäna. Ukat arkirinakapaw taqi jaqinakaru tʼantʼampi chawllampi lakiräna. 5.000 chachanakaw ukankäna, ukat waranq waranq warminakampi wawanakampi. Taqiniw manqʼarapxäna sistʼasiñkama. ¡Ukat kunapachatï arkirinakapax jiltʼanak apthapipkäna ukhaxa 12 canastanakaruw phuqarayapxäna!

Galilea quta pasapxañapatakiw Jesusax arkirinakapar botet khitxäna. Ukat arumaxa mä jachʼa thayaw sartäna ukat uxix wal boter maysat maysaru aytiliyäna. Jesusan arkirinakapax wal sustjasipxäna. Ukat uka arumaxa, mä jaqiruw uma patxan sarnaqaskir uñjapxäna. Ukat axsarañatwa wararipxäna, kunattix janiw khitïtapsa yatipkänti.

‘Jan axsarapxamti, nayätwa’ sänwa Jesusaxa. Janiw jupäspaw sapkänti. Ukat Pedrox akham säna: ‘Tata, jumästaxa, uma patan sarnaqayita’ sasa. Jesusasti jupar ‘¡jutmay!’ sänwa. ¡Ukat Pedrox uma patxan sarnaqäna! Ukat axsartʼayasïna ukhax umaruw chhaqantäna, ukampis Jesusaw waysüna.

Qhipatxa, wasitampiw waranq waranqa jaqinakar manqʼayäna. Ukanxa paqallq tʼantʼampi mä qhawqha chawllampikiw manqʼayäna. Taqinitakirakikiw utjäna. ¡Jesusax kunjamtï jaqinakaru yanaptʼkäna uka tuqit yatiñaxa wali askipuniwa! ¡Apnaqxani ukapachax janiw kunatsa llakisxañäniti!

JESUSAX jiskʼa yuqallar qhumantaski uk uñtma. Jupax wawanakar wal munasi. Uñchʼukisipki uka jaqinakax apostolanakapawa. ¿Jesusax kamspachas uk yattati?

Wali jaya saräwitwa Jesusampi apostolanakapampix kuttʼanisipkäna. Thakinxa jiskhisisaw apostolanakapax jutapxäna. Ukatwa purinxasax Jesusax akham jisktʼäna: ‘¿Kuna tuqitsa thakin jiskhisipxta?’ sasa. Jesusax yatiskänwa kuna tuqitsa jiskhisisipkän ukxa. Ukampis apostolanakax arsupxanit janich uk yatiñatakiw jisktʼäna.

Apostolanakax janiw kamsapkänsa, kunattix thakinxa khitis jilïrispax uka tuqitwa parlasipkäna. Yaqhipanakax mayninakat sipansa wali aytat jilïriñwa munapxäna. ¿Ukham amuyañax janiw walïkit sañatakixa Jesusax kamachänsa?

Mä wawaruw jawsäna, ukat nayraqataruw saytʼayäna. Ukat akham sasaw arkirinakaparux säna: ‘Ak sum yatipxañamawa: Janitï wawanakjam tukupkätaxa, janiw Diosan apnaqäwipar mantapkätati. Khititï wawjam tukki ukaw Diosan apnaqäwipanxa jilïrixa’ sasa. ¿Kunatsa ukham sispachän uk yattati?

Jiskʼa wawanakaxa janiw taqit sipan jilïriñ munapkiti, ni wali aytatäñsa munapkiti. Ukatwa apostolanakapax yatiqapxañapäna wawanakjam sarnaqaña, janiw jiskhisipxañapäkänti jilïriñatsa ni aytatäñatsa.

Jesusaxa yaqhürunakasa wawanakar munasitapxa uñachtʼayarakikïnwa. Mä qhawqha phaxsitxa, Jesusar uñjapxañapatakiw awk taykanakax wawanakapar irpanipxäna. Apostolanakapax janiw jakʼachasiyañ munapkänti. Ukampis Jesusax akham sänwa: ‘Wawanakax jutasipkpan jan jarkʼxasipxamti, kunattix Diosan apnaqäwipax jupanakjam jaqinakankaniwa’ sasa. Ukatwa wawanakarux qhumantäna, ukat bendicirakïna. ¡Jesusax wawanakar wal munasïna uka tuqit yatiñax wali askiwa!, ¿janichä?

MÄ URUXA Jesusax akham sänwa mä jaqiruxa: jaqi masimar munasiñamawa sasa. Ukat uka jaqix akham sasaw jisktʼäna: ‘¿Khitis jaqi masijaxa?’ sasa. Jïsa, Jesusax yatïnwa kunsa uka jaqix amuyaskäna ukxa. Jupa kasta jaqikicha, yupaychäwipankirikicha jaqi masipäspa ukhamwa uka jaqix amuyäna. Kamsäns Jesusax uk jichhax yatxatañäni.

Jesusaxa sarnaqäwinakat arstʼasaw yatichirïna. Ukham mä sarnaqäwit arstʼasaw uka jaqirux yatichäna. Mä judiompin mä Samariankirimpin sarnaqäwipatwa arstʼäna. Walja judionakax Samariankirinakaruxa uñisipxirïnwa uka tuqitxa yatiqxaraktanwa. Uka sarnaqäwixa akhamänwa:

Mä uruxa mä judiow qullut Jericó tuqiru saraqaniskäna. Ukat lunthatanakaw uka judiorux qʼal qullqip lunthatsupxatayna ukat niya jiwayañkamaw nuwjapxatayna.

Uka qhipatxa, judío mä sacerdotew uka thaknam saraqanirakïna. Ukat uka nuwjat jaqwa uñjäna. ¿Kamachpachänaw sasmasa? Maysnam muytʼäna. Ukatxa yaqha jaqirakiw saraqanïna. Jupasti Diosar yupaychir levitänwa. ¿Yanaptʼpachänti? Janirakikiw yanaptʼkänti. Aka dibujonwa ukax uñjasiski, sacerdotempi levitampixa khuri aynach saraqasipki.

Ukampis uñtam jichhax khitis nuwjat judío jaqimpi chikäskixa. Samariankir mä jaqiwa. Yanaptʼaskiwa. Usuchjatanakaparuw qulltʼaski. Ukatxa, qurpachasiñ utaruw apäna samartʼañapataki usuchjatanakap jakayasiñapataki.

Uka sarnaqäwit parlañ tukuyasaxa, uka jisktʼasiri jaqirux akham sänwa: ‘Walikiwa, ukhamasti aka kimsanitxa, ¿kawkïris uka nuwjatan jaqi masipaxa? ¿Sacerdoteti, levitacha jan ukax Samariankiricha?’ sasa.

Ukat uka jaqix akham sänwa: ‘Samariankir jaqiwa. Kunattix nuwjat jaqirux jupaw khuyaptʼayänxa’ sasa.

Ukat Jesusax akham sänwa: ‘Ukhamäskapuniwa. Jichhaxa, yaqha jaqinakarux ukham khuyaptʼayanirakim’ sasa.

¿Kunjamtï Jesusax yatichkäna ukax janit jumatakix askïki? Jesusan yatichäwinakapax Biblian qillqatawa, ukatxa wali suma yatichäwinakwa yatiqaraksnaxa, ¿janichä?

JESUSAX markpach muytaskäna ukhaxa, usutanakaruw qulläna. Ukat uka luräwinakat taqi chiqan parlasïna. Ukatwa, suchʼunaka, juykhunaka, cojonaka, taqi kun usuni jaqinaka Jesusar irpkatapxäna. Ukat Jesusax taqiniruw kʼumaraptayäna.

Jesusar Juanax bautiskäna uka maratxa kimsa mara jilaw saraqxäna. Ukatxa Jesusax apostolanakaparux Jerusalenaruw saräxa sänwa, ukanwa jiwayapxitani ukat jiwatanak taypitwa jaktanïxa sasa. Ukat usutanakarux qullaskakïnwa.

Mä uruxa, sabadow Jesusax yatichaskäna. Judionakatakix sabadox samarañ urünwa. Akankki uka warmix 18 maraw ukham kʼumu sarnaqäna, janiw chiqaptirjamäkänti. Ukatwa, Jesusax llamktʼäna, ukhamat uka warmix chiqaptxäna. ¡Kʼumaräxänwa!

Uk uñjasaw judionakan yupaychäwip irpirinakax wal colerasipxäna. Ukat maynix akham sasaw arusïna: ‘Suxta uruw lurañatakix utji, ¡uka urunakanwa qullayasirix jutapxañamaxa, janiw samarañ urunxa!’ sasa.

Ukampis Jesusax sänwa: ‘¡Jan sinttʼasir jaqinaka! Jumanakax samarañ urunxa asno jararasin umtʼayirix jiskhapxasmawa. Ukhamasti, ¿janit 18 mara usuntat khuyañ warmir qullañax walïkaspa?’ sasa. Ukhamakiw uka jan sinttʼasir jaqinakax phinqʼa uñnaqapxäna.

Ukat Jesusampi apostolanakapampix Jerusalenaruw sarasipkäna. Jericor jakʼachasipxän ukhaxa, mayjasiri pä juykhunakawa Jesusar akham sas artʼapxäna: ‘Jesús, yanaptʼasipxita’ sasa.

Jesusax uka juykhunakaruw jawsäna, ukat ‘¿jumanak laykux kuns luriristxa?’ sasaw jisktʼäna. ‘Tata, uñjañwa munapxta’ sapxänwa. Jesusax nayrat llamktʼäna, ¡ukjpacharakiw uñjxapxäna! ¿Kunatsa Jesusax taqi uka milagronak lurpachänxa? Kunattix wal jaqinakar munasïna ukat jupar atinisipxañapwa munäna. Ukat Jesusax aka Uraqi apnaqxani ukhaxa janiw khitis usutäxaniti.