Kimsïri: Suma jaqinakax taqpachaniw alaxpachar sarapxi

¿Kunjamatsa uka kʼari yatichäwix uñstäna? Patak maranak tukuyxäna uka qhipatxa, Jesusan apostolanakapas jiwxapxäna ukhax yupaychäw tuqit yatxattʼat mä qhawqha jaqinakaw wali uñtʼatäxapxäna, jichhürunakanxa Padres de la Iglesia uka sutimpi uñtʼatäxapxarakiwa. Mä enciclopedia librorjamaxa, “maynix jiwxi ukspachaw almapax qʼumachatäxasin alaxpachar sarxi sasaw uka jaqinakax yatichapxäna” (New Catholic Encyclopedia, 2003).

¿Bibliax kamsisa? “Kusisiñanïpxiw llampʼu chuymaninakaxa, jupanakarakiw Diosan arsutaparjama uraqi katuqapxani.” (Mateo 5:5.)

Jesusax arkirinakaparux alaxpachan mä utjäwi wakichanirapipxäma siskchïnsa, janiw suma jaqinakax taqpachaniw alaxpachar sarapxani sasax siskänti (Juan 3:13; 14:2, 3). Ak amtañäni, Jesusax janiw munañamax alaxpachan luraspan sasinak Diosar maykänti, jan ukasti munañamax aka Uraqin luraspan sasaw mayirakïna (Mateo 6:9, 10). Chiqpachansa, aski jaqinakatxa mä qhawqhanix alaxpacharuw Cristomp chika apnaqir sarapxani, ukampis jila partix aka Uraqinwa wiñayatak jakasipxani (Apocalipsis 5:10).

Qalltan utjkän uka Iglesiax kuntï luräwipat amuykäna uka amuyupax tiempompix mayjtʼxänwa. “Jukʼat jukʼatwa Iglesiax Diosan Apnaqäwip lanti saytʼxäna” sasaw mä libronx qhanañchtʼasi (The New Encyclopædia Britannica). Jesusaxa, arkirinakajax ‘janiw akapachankirïpkiti’ sasin siskchïnsa, Iglesiax jukʼamp munañanïñatakix politicar mitisiñwa qalltxäna (Juan 15:19; 17:14-16; 18:36). Constantino sat Romankir apnaqirin amtaparjamaw Iglesiax yaqhip yatichäwinakap mayjtʼayxäna. Kunjamtï yatxatkañänixa, uka yatichäwinakat maynïrixa Trinidad sat yatichäwiwa.

Aka qillqatanakat yatxattʼam: Salmo 37:10, 11, 29; Juan 17:3; 2 Timoteo 2:11, 12.

CHIQA YATICHÄWI:

Suma jaqinakatxa, jila partix aka Uraqinwa wiñayatak jakasipxani, janiw alaxpachar sarapkaniti.

[6 janan fotopax khitin apsutasa]

Art Resource, NY