“Jumajj nayar arkaskakita”

1-3. 1) ¿Kunjamsa Jesusajj apostolonakapat despedisïna, ukat kunatsa jupanakan llakisipjjañapajj jan wakiskäna? 2) Aka oraqet sarjjäna ukhat jichhakamajj kunanaksa Jesusajj luraski uk yatiñasajj ¿kunatsa wali wakiskirejja?

OLIVOS qollu patankapkäna ukhajja, 11 apostolonakajj wal munasipkäna respetapkarakïna uka Yatichiriparuw wali atencionamp uñchʼukisipkäna. Cheqas jupanakajj Jesusaruw uñchʼukisipkäna, jupajj jiwatat jaktasajj wasitatwa Jehová Diosan wali chʼamani angelapäjjäna. Apostolonakajja, Yatichiripan instruccionanakapar istʼasajj qhep qhepa kutinwa Olivos qollun jupamp tantachasipjjäna.

² Olivos qollojj Cedrón valle jakʼankänwa, Jerusalén markasti uka qollu uñkatasinkarakïnwa. Jesusajj uka qollunkkasajja, kunanakatï ukan paskäna taqe ukanakwa amtaspachäna. Sañäni, uka qollu kayunkkäna uka Betania markanwa Lázaro amigopar jiwatat jaktayäna. Ukat mä qhawqha semananak nayrajja, uka qollu jakʼankir Betfagué jiskʼa markatwa mä asnor qonjjatat Jerusalenar saräna, ukanjja wali musparkañwa jaqenakajj jupar katoqapjjäna. Amuyatajj Getsemaní jardinajj Olivos qollunkarakïnwa, ukanwa Jesusajj janïr katuntatäkasajj walja horanak quedasïna. Jichhajj uka pachpa qollunwa munat amigonakaparu, discipulonakapar jaytañatakejj wakichtʼasïna. Jupanakat suma arunakamp despedisisasa, qhep qhepa kutin chʼamañchtʼawayasas alajjpacharuw sarjjäna. Jupajj alajjpachar aptatäkäna ukhajja, apostolonakajj wali atencionampiw qenayan chhaqtañapkamajj jan chʼipjjtas uñchʼukipjjäna (Hechos 1:6-12).

³ Kunatï uka urojj paskäna uk uñjasajj ¿apostolonakajj llakisipjjpachänti? Janiwa. Jupanakarojj pä angelanakaw jan aynachtʼapjjañapatak chʼamañchtʼäna (Hechos 1:10, 11). Apostolonakajj wali kusisitäpjjänwa, kuna laykutejj Jesusajj mä suma razonatwa alajjpacharojj sarjjäna. Jupajj sarjjäna ukhat jichhakamajj kunanaksa luraski uk Bibliajj wali sumwa qhanañchi, uk yatiñajj wali importanterakiwa. ¿Kunatsa ukham sistanjja? Kuntï Jesusajj Pedror siskäna uk amtañäni, jupajj akham sänwa: “Jumajj nayar arkaskakita” sasa (Juan 21:19, 22). Ukhamasti, Jesusar arkañatakejj sapüruw chʼamachasiñasa, janiw awisakejj Jesusan arkiripäksnas ukham tukuñasäkiti. Ukatakejja kunsa Yatichirisajj alajjpachan jichhajj luraski, kuna asignacionanaksa alajjpachan katoqawayi uk sum amuyañaw yanaptʼistani.

¿Kunsa Jesusajj alajjpachar kuttʼasajj luraski?

4. Bibliarjamajj ¿kunsa Jesusajj alajjpachar kuttʼasajj lurañapäna?

⁴ Kunjamsa Jesusajj alajjpachar purïna, kunjamsa juparojj katoqapjjäna, Awkipamp jikisisajj kunja kusisitänsa uka toqenakat janiw Bibliajj qhanañchkiti. Ukampis alajjpachar kuttʼasajj kunsa lurañapäna uk Bibliajj qhanañchjjänwa. Bibliarjamajja, judionakajj 1.500 jila maranakaw mä sagrado tantachäwi amtapjjäna. ¿Kunjamas ukajj amtasirïna? Maran mä kutejja, mä arun Juchanakat Qʼomachasiñ Urunjja, jachʼa jilïr sacerdotejj sacrificiot loqtat animalanakan wilapampiw Santisimor mantirïna, uka wiljja pactor mantat arca nayraqataruw chʼalltʼirïna. Uka urun kunatï luraskäna ukajja, kunsa Mesiasajj jutïrin lurañapäna ukwa uñachtʼayäna. Ukhamasti Jesusajj alajjpachar kuttʼkäna ukhajja, Jehová Diosan ukarojj sacrificiot loqtaskäna uka vidapan wilapampiw mantäna, ukhamatwa wiñayatak salvawayistu (Hebreos 9:11, 12, 24). ¿Diosajj uka sacrificio katoqaspachänti?

5, 6. 1) ¿Jehová Diosajj Jesusan sacrificiop katoqasïnti? 2) ¿Khitinakas Jesusan jiwatapat beneficiasipjje?

⁵ Uk yatiñatakejja, Jesusajj alajjpachar sarjjäna ukhat mä qhawqha urunakat kunas pasäna uk yatjjatañaw yanaptʼistani. Pentecostés Fiesta urunjja, mä 120 discipulonakaw Jerusalenan mä altus utan tantachatäsipkäna, ukhamaruw mä akatjamat wali chʼaman thayas thaytʼankaspa ukham istʼasïna. Ukatjja lajjranakar uñtasit nakhaskir ninanakaw sapaqat mayni patjjar mayakam purïna. Taqenirakiw espíritu santompi phoqtʼatäpjjäna, ukatwa jupanakajj kunayman arunakat parlañ qalltapjjäna (Hechos 2:1-4). Kunatï uka urun paskäna ukajja, kunjamsa Jehová Diosajj yaqha machaq marka (Diosan Israelapa) ajllisïna ukwa uñachtʼayäna, ukhamat uka markankirinakajj ‘ajllit tribunkirïpjjañapataki ukat sacerdotenakjam servir reyinakäpjjañapataki’. Jupanakajj aka oraqen Diosan voluntadap lurapjjañapatak asignatäpjjänwa (1 Pedro 2:9). Maysa toqet kunatï Pentecostés Fiestan paskäna ukajja, kunjamsa Jehová Diosajj Jesusan sacrificiop katoqasïna ukwa uñachtʼayarakïna. Cheqas Diosajj uka sacrificio katoqaskäna uka qhepatwa espíritu santo Jesusan discipulonakapjjar apayanïna, ukhamatwa Jesusan jiwatapat nayrïr bendicionajj katoqasïna.

⁶ Jesusan jiwatapajja, aka oraqenkir taqe servirinakaparuw yanaptʼawayi. Alajjpachan Jesusamp chik apnaqapkani uka “jiskʼa tama” taypinkir cristianonakasa, aka oraqen Diosan Reinopamp apnaqat jakapkani uka ‘yaqha ovejanakas’ taqeniw Jesusan jiwatapat beneficiastanjja (Lucas 12:32; Juan 10:16). Jesusan jiwas layku jiwatapatjja, jutïrin wiñayatakiw jakañ puediñäni, juchanakasas perdonatäjjarakiniwa. Uka uru puriniñapkamajja, Jesusar confiyatassa jupar sapüru arkatassa uñachtʼayaskakiñäni. Ukhamatwa qʼoma conciencianïñäni, jutïritakis mä suma suytʼäwinirakïñäniwa (Juan 3:16).

7. Alajjpachar kuttʼasajj ¿kuna autoridadsa Jesusajj katoqawayi, ukat kunjamatsa jupar apoyatas uñachtʼaysna?

⁷ Jesusajj jiwatat jaktasajj jukʼamp autoridadwa katoqawayi (Mateo 28:18). Cheqansa, Diosajj congregación pʼeqtʼañapatakiw Jesusar uttʼayawayi. Jesusasti munasiñampi ukat cheqaparjamaw asignacionap phoqawayi (Colosenses 1:13). Ukat kunjamtï profecianakan qellqaskäna ukarjamajja, arkirinakapar sum cuidapjjañapatakejj experienciani jilatanakwa Jesusajj ajlliwayi (Efesios 4:8). Sañäni, Pablorojj ‘yaqha markanakar khitat apostolot’ serviñapatakiw uttʼayäna, ukatjja suma yatiyäwinak taqe cheqan predicañapatakiw khitarakïna (Romanos 11:13; 1 Timoteo 2:7). Ukat 96 mara jakʼanakanjja, Jesusajj apóstol Juan taypiw cartanak qellqäna, ukatjja uka cartanakajj Asia provinciankir paqallqo congregacionanakaruw apayasïna. Ukhamat uka congregacionanakar chuymachtʼañataki, ewjjtʼañataki ukat cheqañchañataki (Apocalipsis, capítulos 2 y 3). Jesusaw congregacionan pʼeqepajja sasajj ¿taqe chuymat confiytanjja? (Efesios 5:23). Ukhamächi ukhajja, congregación uñjapjjañapatak Jesusajj uttʼayawayki ukanakarojj taqe chuymaw istʼañasa, taqe kunan yanaptʼañatakiw chʼamachasiñasaraki.

8, 9. ¿Kuna autoridadsa Jesusajj 1914 maran katoqawayi, ukat uk yatiñajj kunjamsa yanaptʼistu?

⁸ Jesusajj 1914 maranwa jukʼamp autoridad katoqawayi, Jehová Diosaw uka maran Reinopan Reyit apnaqañapatak uttʼayawayi. Jesusajj Reyjam apnaqañ qalltkäna ukhajja, “alajjpachan mä guerraw sartarakïna”. ¿Kunas uka guerran pasäna? Supayampi demonionakapampejj aka oraqer jaqoqanitaw uñjasiwayapjje. Uka qhepatjja, aka oraqen kunayman jan walinakamp tʼaqesiñanakaw wal utjawayi. Guerranakasa, lunthatanakasa, jaqe jiwayirinakasa, ajjsarañanakasa, manqʼat pistʼañanakasa, kunayman usunakasa ukat terremotonakas walipuniw jiljjattawayi. Taqe ukanakan pasatapajja, Jesusajj alajjpachan apnaqjjatapwa uñachtʼayistu. Maysa toqetjja, Supayan ‘aka mundon apnaqaskatapwa’ uñachtʼayarakistu, ukampis ‘jupajj jukʼa tiemponikëjjewa’ (Apocalipsis 12:7-12; Juan 12:31; Mateo 24:3-7; Lucas 21:11). Ukhamäkchisa Jesusajj taqeniruw mä oportunidad churaski, ukhamat Jesusar Reyipjam ajllipjjañapataki.

⁹ Diosan Reinopan Reyip toqet saytʼasiñasajj wali importantepuniwa. Sapürojj kuna amtanakarutï purkañäni taqe ukanakajja, Jesusan chuymapar purtʼkirïñapawa, janipuniw aka mundompejj apayasiñasäkiti. Jesusajj “reyinakansa Reyipa, munañaninakansa Tatitupa” ukhamawa, jupajj kunatï cheqapäki ukarojj wal munasi. Ukhamajj aka oraqer uñtanki ukhajja, jan walinak lurir jaqenakar uñjasajj wal colerasi, ukampis sum sarnaqer jaqenakar uñjasajj wal kusisiraki (Apocalipsis 19:16). ¿Kunatsa ukham sistanjja?

¿Jesusajj kunjam chuymanisa?

10. ¿Jesusajj kunjam chuymanisa, ukat kunatsa awisajj wal colerasi?

¹⁰ Jesusajj Awkipjam kusisir chuymaniwa (1 Timoteo 1:11). Aka oraqenkkäna ukhajja, janiw kunanakatï jupar jan gustkäna ukanakat Jesusajj quejasirïkänti, janirakiw taqe kuns amtaparjamak lurasiñap mayirïkänti. Ukampis kuna jan walinakatï aka oraqen luraski ukanak uñjasajj wal colerasi. Sañäni, falso religionanakajj Jesusan sutipjjaruw parlapjjta sasinsa sapkchejja, Jesusajj uka religionanakatakejj wali coleratawa. Jupajj uka religionanakat parlkasajja, akham sasaw mä profecía arsüna: “Janiw taqe khitinakatï ‘Tatay, Tatay’ sasin sapkitu ukanakajj alajjpachankir Reinorojj mantapkaniti, jan ukasti taqe khitinakatï alajjpachankir Awkijan munañap lurapki ukanakakiw mantapjjani. Uka urunjja waljaniw akham sapjjetani: ‘Tatay, Tatay, ¿janit profecianak sutimjjar arsupktjja [...], janit walja milagronaksa sutimjjar lurapkaraktjja?’ sasa. Ukampis nayajj jupanakar akham säwa: ‘¡Janipuniw jumanakar uñtʼapksmati! ¡Nayat jitheqtapjjeta, ley pʼakintir jaqenaka!’” sasa (Mateo 7:21-23).

11-13. Jesusan sutipjjar “walja milagronaksa” yaqhepajj lurapkchejja, ¿kunatsa Jesusajj jupanakatak wali coleratäpacha? Uk mä uñachtʼäwimp qhanañchtʼam.

¹¹ Khitinakatï jichha tiempon cristianöpjjtwa sasin sapki ukanakajja, Jesusan arunakap liytʼasajj janiw sum amuyapkiti. Jesusan sutipjjar “walja milagronaksa” yaqhepanakajj lurapkchïnjja, ¿kunatsa Jesusajj chuyma ustʼayir arunak arspachäna? Jichhürunakanjja, cristianöpjjtwa sapki uka Iglesianakajj pobrenakar yanaptʼañwa amtapjje, escuelanaksa hospitalanaksa lurayapjjarakiwa, yaqha ukham toqenakan jaqenakar yanaptʼañatakis wal chʼamachasipjjaraki. Ukampis ¿kunatsa Jesusajj jupanakatakejj wali coleratäpacha? Uk sum amuytʼañatakejj mä uñachtʼäwit parltʼañäni.

¹² Mä awk taykajj wali jayar viajiñwa amtapjje, janirakiw wawanakapar irpañ puedipkiti, ukatwa wawanakapar uñjañapatakejj mä niñera contratapjje. Juparojj aka instruccionanakwa churawayapjje: “Wawanak sum uñjarapitäta, manqʼa churarapitäta, jareqtʼarapitätawa ukat jan usuchjasipjjañapatakejj sumwa cuidarapitäta” sasa. Ukampis awk taykajj kuttʼanjjapjje ukhajja, wawanakaparojj manqʼat awtjata, qʼala qʼañuntata ukat usuntata ukhamwa jikjjatapjje. Uka wawanakajj yanaptʼayasiñatak walsa jachapkchejja, janiw niñerajj jupanakar istʼkiti, kuna laykutejj mä escalera patjjan saytʼataw ventananak qʼomachaski. Uk uñjasajj awk taykajj walpun colerasipjje, ‘¿kunatsa wawanakajar jan sum uñjkta?’ sasaw jisktʼapjjaraki. Niñerajj akham sarakiwa: “¡Uñjapjjam! Nayajj uta ventananak qʼomachta, utan askichañäki ukanaks askicharaktwa. Jumanak laykuw taqe ukanak lurta” sasa. Awk taykajj ukanak istʼasajj ¿sumakit jikjjatasipjje? ¡Janiwa! Jupanakajj janiw ukanak lurañap mayipkänti, jan ukasti wawanakapar sum uñjañapwa mayipjjäna. Uka awk taykajj wali coleratapunïpjjewa, kuna laykutejj niñerajj janiw instruccionanakaparjam phoqkänti.

¹³ Cristianöpjjtwa sapki uka iglesianakajj uka niñerar uñtasitäpjjewa. Jesusajj aka oraqenkkäna ukhajja, qhana instruccionanakwa arkirinakaparojj churawayäna. Jupanakajj Bibliankir cheqa yatichäwinakwa mayninakar yatichapjjañapäna, cheqaparjam Diosar adorañs jaqenakar yanaptʼapjjañaparakïnwa (Juan 21:15-17). Ukampis iglesianakan pʼeqtʼirinakapajja, janiw Jesusan instruccionanakap phoqawayapkiti. Jupanakajj janiw Bibliankir cheqa yatichäwinak jaqenakar yatichawayapkiti, janirakiw cheqaparjam Diosar adorañsa jaqenakar yanaptʼawayapkiti. Antisakiw kunayman kʼarinak yatichawayapjje (Isaías 65:13; Amós 8:11). Ukhamasti, jupanakajj kunayman sumanaksa aka oraqen lurawayapkchejja, janiw Jesusan instruccionanakap phoqawayapkiti, ukatwa Jesusajj jupanakatak wali coleratajja. Cheqas aka jan wali mundojja, mä utar uñtataw tʼunjat uñjasini. Bibliajj uka toqet parlkasajj akham sarakiwa: “Aka mundosa munañanakapasa tukusiskiwa” sasa (1 Juan 2:15-17).

14. ¿Kun uñjasas Jesusajj jichhürun wal kusisi?

¹⁴ Maysa toqetjja, Jesusajj walja millón discipulonakapar predikir uñjasajj wali kusisitapunïpachawa, kuna laykutejj jupan instruccionanakapar istʼasajj walja jaqenakaruw discipulopar tukuyasipki (Mateo 28:19, 20). ¡Jesusar kusisiyañajj mä suma privilegiopuniwa! ‘Suma phoqeri amuyasir esclavor’ yanaptʼañas wali kusiskañawa (Mateo 24:45). Uka esclavo taypinkir ajllit cristianonakajja, janiw iglesianakan pʼeqtʼirinakapjamäpkiti. Jan ukasti, jupanakajj Jesusan instruccionanakapar istʼasajj predicación wali sumwa sarayasipki, ukatjja Jesusan arkirinakaparojj horasaparuw Diosar servisipkakiñapatakejj yanaptʼanak churapjjaraki.

15, 16. 1) Akapachan kunjamsa munasiñajj chhaqtaski uk uñjasajj ¿kunjamsa Jesusajj jikjjatasi, ukat ukhamätap kunjamatsa yattanjja? 2) ¿Kunatsa Jesusajj religión pʼeqtʼirinakatakejj wali coleratäpacha?

¹⁵ Akapachanjja, jaqenakajj janiw maynit maynikam munasiñ uñachtʼayasjjapjjeti, uk uñjasajja wal Jesusajj coleraspacha. Ak amtañäni, Jesusajj sábado urun jaqenakar qollkäna ukhajja, fariseonakajj wal jiskʼachapjjäna. Jupanakajj jan munasirinaka ukat jachʼa jachʼa tukurinaka ukhamäpjjänwa, ukatjja Moisesan Leyipar yapjjatapkäna ukanakakwa phoqañ munapjjäna, janirakiw Jehová Diosan leyinakaps sum amuyapkänti. Jesusan milagronak luratapajja, walja jaqenakaruw yanaptʼäna. Kusisitäpjjañapatakisa, tʼaqesitanakapat sumak jikjjatasipjjañapatakisa, Diosar jukʼamp confiyapjjañapatakis yanaptʼarakïnwa, ukampis fariseonakarojj janiw ukanakajj importkänti. Ukatwa Jesusajj jupanakatak wali ‘coleratäna’, jupanakan “qala chuymanïpjjatap yatisajj walpun llaktʼasirakïna” (Marcos 3:5).

¹⁶ Jichhürunakan kunayman jan walinak uñjasajja, Jesusajj ‘wali llakitapuniw’ jikjjatasi. Cristianöpjjtwa sapki uka iglesianakan pʼeqtʼirinakapajja, religionapan costumbrenakaparjama ukat yatichäwinakaparjamakiw sarnaqapjje. Ukhamarusa, Diosan Reinopat suma yatiyäwinak predicapki ukanakarojj wal uñisipjje. Sañäni, walja markanakanjja religión pʼeqtʼirinakajj Diosan Reinopat predicapki ukanakar arknaqasiñapatakiw mayninakar wal chʼamañchapjje (Juan 16:2; Apocalipsis 18:4, 24). Ukhamarus uka religión pʼeqtʼirinakajja, guerrar sarapjjañapataki ukat jaqe masipar jiwayapjjañapatakiw arkirinakapar wal chʼamañchapjje. ¡Ukanak uñjasajj janipuniw Jesusajj kusiskiti!

17. ¿Kunjamsa cheqpach cristianonakajj Jesusar kusisiyapjje?

¹⁷ Ukampis Jesusan cheqpach arkirinakapajja, jaqe masipar munasiñatakiw wal chʼamachasipjje. Jesusjamarakiw ‘taqe kasta jaqenakar’ suma yatiyäwinak predicapjje, arknaqatpachas ukamp phoqañatakiw wal chʼamachasipjje (1 Timoteo 2:4). Ukatjja maynit maynikamaw taqe chuym munasipjje, ukhamatwa jupanakajj cheqpach cristianöpjjatap uñachtʼayapjje (Juan 13:34, 35). Jupanakajj munasiñampi, respetompi ukat jan jiskʼachasaw jilat kullakanakaparojj uñjapjje, ukhamatwa Jesusat yateqasipjjatap uñachtʼayapjje. ¡Ukanak uñjasajj walpun Jesusajj kusispacha!

18. ¿Kunanakas Jesusar llakisiyi, ukat kunjamsa jupar kusisiysna?

¹⁸ Maynejj Diosar sirvkasin jan walinakamp apayasi, Jehová Diosats jitheqtjjaraki ukhajja, Jesusajj walpun llakisi (Apocalipsis 2:4, 5). Ukampis tukuykam aguantirinakar uñjasajj wal kusisi (Mateo 24:13). Ukatwa jiwasajj mandatop janipun armañasäkiti, jupajj akham sistuwa: “Jumajj nayar arkaskakita” sasa (Juan 21:19). Jiwasatï tukuykam aguantaskakiñäni ukhajja, Jesucristo Reyisat walja bendicionanakwa katoqañäni. Jichhajj uka bendicionanakat mä qhawqha yatjjatañäni.

Jesusajj servirinakapar bendisiwa

19, 20. 1) ¿Kuna bendicionanaksa Jesusan arkirinakapajj katoqasipki? 2) ¿Kunatsa Jesusarojj ‘Wiñay Awkisarjam’ uñjañasa?

¹⁹ Jiwasatï Jesusar taqe kunan istʼañäni ukat jupan kayup arkañ amtarakiñäni ukhajja, jichha tiemponsa jutïrins walja bendicionanakwa katoqañäni. Ukat kuntï jaqenakajj wal thaqapki ukwa jikjjatarakiñäni. Sañäni, chuymar purtʼkir trabajonïñäniwa, jilat kullakanakasampejj wali sumaw apasiñäni, suma conciencianïñäniwa, chuymasans sumakiw jikjjatasirakiñäni. Mä arun cheqpachapuniw kusisit jakasiñäni, ukat jukʼamp bendicionanakwa katoqañäni.

²⁰ Aka oraqen wiñay jakañ katoqapkani ukanakatakejja, Jehová Diosajj Jesusaruw ‘Wiñay Awkjam’ uttʼayawayi. Adán nayrïr awkisajj juchachasisajj jan waliruw aptʼawayistu, ukampis Jesusajj wiñay jakañ katoqañasatakiw yanaptʼistani (Isaías 9:6, 7). Jiwasatï ‘Wiñay Awkisarjam’ Jesusar uñjañäni ukat jupar wal confiyarakiñäni ukhajja, wiñayatakiw jutïrin jakasiñäni, Jehová Diosarus jukʼampiw jakʼachasirakiñäni. Kunjamtï yatjjatawayktanjja, jiwasatï Jesusat yateqasiñatak sapüru chʼamachasiñäni ukhajja, “Diosan munat wawanakapjamajj jupat yateqasipjjam” siski uka mandamientor istʼañajj facilakïniwa (Efesios 5:1).

21. Jesusan arkirinakapajj ¿kunjamsa aka jan wali mundon mä qhanjam qhantapjje?

²¹ Jesusampit Jehová Dios Awkisampit yateqasiñatak chʼamachastan ukhajja, mä qhanjamaw aka mundon qhantʼtanjja. Aka mundon jakiri jaqenakat jilapartejja, Supayamp engañjataw uñjasipjje, Supayan amuyunakapampiw apayasipjjaraki. Ukampis Jesusan arkirinakapajja, jupar arkañataki ukat jupjam chuymanïñatakiw chʼamachastanjja. Taqe chuymaw jaqenakarojj Biblian cheqa yatichäwinakap uñtʼaytanjja, kunjamsa kusisita, mayninakar munasisa ukat sumankañan jakasipjjaspa uks yaticharaktanwa. Maysa toqetjja, Jesusan kayup arkasajj Jehová Diosaruw jukʼamp jakʼachasiraktanjja. ¡Ukham yaqha privilegiojj janipuniw utjkiti!

22, 23. 1) Tukuykam Jesusar arkirinakajj ¿kuna bendicionanaksa jutïrin katoqapjjani? 2) ¿Kunsa sapa maynejj amtañasa?

²² Jehová Diosajj kunsa jiwas laykojj jutïrin lurañ muni uka toqet jichhajj amuytʼarakiñäni. Jesusajj niyaw Supayampisa jupan apnaqat gobiernonakampis mä guerran nuwasini. ¡Uka guerran Jesusaw atipjani! (Apocalipsis 19:11-15). Uka qhepatjja, Jesusajj Waranqa Maranakaw Reyjam aka oraq apnaqani. Uka tiempon Jesusampi jupamp chik apnaqapkani uka ajllit cristianonakampejja, jaqenakaruw perfector tukupjjañapatak yanaptʼapjjani, ukhamarus Jesusan jiwatapat kuna askinakatï utjawayki ukanak katoqapjjañapatakiw jupanakar yanaptʼapjjarakini. ¡Uka tiempon jakañajj wali sumapunïniwa! Taqeniw wayn tawaqor tukjjañäni, taqenirakiw jan usuntas wali sum jakasipjjañäni, ukatjja Diosan mayni servirinakapamp chik trabajisaw aka oraq mä suma paraisor tukuyapjjañäni. Waranqa Maranak apnaqañ tukuyjjani ukhajja, Jesusajj “Dios Awkiparuw Reino katuyjjani” (1 Corintios 15:24). Jiwasatï jan jitheqtas tukuykam Jesusar arkañäni ukhajja, ‘Diosan wawanakapjamaw libre jakasiñäni’. ¡Ukham premio katoqañajj wali sumapunïniwa! (Romanos 8:21). Cheqansa, kunanaktï Adanampi Evampejj aptʼawayapki uka bendicionanakwa katoqañäni. Jiwasanakajj Jehová Diosan wawanakaparuw tukjjañäni, janipuniw mayampis Adanan juchapar katuyatäjjañäniti, ‘janirakiw jiwañas jukʼamp utj-jjaniti’ (Apocalipsis 21:4).

²³ Capítulo 1 ukan parlaniwayktan uka wali qollqeni waynat amtañäni. Juparojj “jutam, nayar arkita” sasaw Jesusajj säna, ukampis uka waynajj janiw Jesusan invitacionap katoqaskänti (Marcos 10:17-22). Jiwasajj janiw uka waynat yateqasiñ munktanti, antisas Jesusan invitacionap taqe chuymaw katoqasiñ muntanjja. Ukhamasti, kuna jan walinakasay utjaskpan kunanakasay pasaskpan janipun Jesusar arkañat jitheqtapjjañäniti. Ukhamtï lurañänejja, ¡Jehová Diosan taqpach promesanakap phoqasirwa uñjañäni!