Taman Bibliat Yatxatañataki
1. Taman Bibliat Yatxatañataki sat tantachäwinxa, ¿kuna qillqatanakatsa jutïr phaxsinakan yatxataskañäni?
1 Marzo 14 urut qalltkani uka semanat uksaruxa, ¿Chiqapuniti Diosax Sum Jakasiñas Munpacha? sat folletotwa taman yatxataskañäni. Ukat julio 25 urut qalltkani uka semanat uksaruxa, ¿Jehová Diosan Qhanañchirinakapax yatiqañ tuqit kamsapxisa? sat folletotwa yatxataskarakiñäni. Paypach qillqataxa, Jehová Diosar yupaychañ tuqit suma chʼamañchtʼatäñasataki ukat sum yatiyir sarañatakiw yanaptʼistani.
2. ¿Chiqapuniti Diosax Sum Jakasiñas Munpacha? sat folletox kuna tuqinakats qhanañchi uk arstʼam.
2 ¿Chiqapuniti Diosax Sum Jakasiñas Munpacha? sat folleto. Aka qillqataxa, khitinakarutï Jehová Diosata ukat kuna amtanakanisa jiwasatakix uk yatiñ munapxi uka altʼat chuyman jaqinakaruw yanaptʼi. Ukatxa, kunatsa Diosax tʼaqhisiñanak jan tukjpacha, kunjamsa Diosan utjatap yatsna ukat kunjamsa amtasarjam sarnaqir lurawayistu taqi ukanak sumwa qhanañchaski. Ukhamarus qhipa yatichäwinakapanxa, kunja suma suytʼäwinïtansa uka tuqitwa qhanañcharaki ukat Jehová Diosan markapamp chik Jupar luqtañatakiw chʼamañchtʼistu.
3. ¿Jehová Diosan Qhanañchirinakapax yatiqañ tuqit kamsapxisa? sat folletox kuna tuqinakats qhanañchi uk arstʼam.
3 ¿Jehová Diosan Qhanañchirinakapax yatiqañ tuqit kamsapxisa? sat folleto. Yatiqañ tuqitxa, kunjamakis cristianonakjamax sarnaqapxi ukat kuna lurañanaksa sum phuqapxañapa uk sum qhanañchtʼapxañapatakiw aka folletox awk taykanakaru ukat wawanakar yanaptʼi, uka amtamp luratarakiwa. Ukhamatwa yatichirinakax Jehová Diosan Qhanañchirinakapax kunjamäpxis uk sum amuyapxani ukat yanaptʼapxarakini. Ukat kunatsa akapachar jan mitisktan, kunatsa wali uñtʼat fiestanak jan amtktan ukat jukʼampi yatxatañ tuqit kunsa amuytan ukanakatxa Bibliarjamaw qhanañcharaki. Ukatxa, kunjamsa awk taykanakax suma sarnaqañ tuqit wawanakapar yatichapxi uksa sumwa yatichirinakarux qhanañchi. Ukat suytʼäwisat jisktʼapxistu ukanakar qhanañchtʼañatakixa wakichtʼatarakiñäniwa (1 Ped. 3:15).
4. ¿Kunjamatsa uka qillqatanakat askinak yatiqsna?
4 Jumatï askinak yatiqañ munstaxa, janïräkipanwa yatxatañama ukat taman arstʼañatakis wakichtʼasiñamawa. Janiraki tantachäwinakarus faltasimti, ukat kunjamsa sapa yatichäwix yatiyañatakix yanaptʼiristam uk amuykiptʼañamarakiwa. Aka suma qillqatanakax Diosan Apnaqäwipat sum yatiyañasatakix taqinir chʼamañchtʼistaspa ukwa suytanxa (Hech. 28:23).