[34 janan recuadropa]

“Mä chʼulla chʼulla yuntar uñtatäpxasmawa”

2 Corintios 6:14 qillqatan jikxataski uka yatichäwixa, jumatak wali askïpachawa, kunattix Diosar jan yupaychirinakamp sarnaqañax janiw walïkit sasaw iwxtʼistu. Ukhamäkipansa, jan religionamankki uka jaqir munañaw utjaspa. ¿Kunjamatsa ukax pasaspa? Awisax suma uñnaqtʼanïtap laykuw ukax pasaspa. Marco sat waynax siwa: “Ejercicio lurañ utan uñjayäta, ukat parltʼañ laykux kunaymanit jakʼachasiñ munitäna. Ukat jankʼakiw amigoptapxta” sasa.

Kunas jumatak askix uk sum yatissta, Biblian yatichäwinakapar iyawsaraksta ukat amuytʼasirïxaraksta ukhaxa, kunatix lurañäki uk luräta. Diosar jan uñtʼir jaqixa, —suma uñnaqtʼanïskpansa, suma parltʼirïskpansa, respetasirjamäskpansa— janiw Diosar munasiñamatakix yanaptʼkätamti (Santiago 4:4).

Ukham jaqimpi uñtʼasir mistusksta ukhaxa, chiqpachansa jupamp tukuyañax chʼamäniwa. Gloriarux ukaw pasatayna. “Jurnäl jurnälaw jachtxa. Jupa mayatak kuna horas lupʼiskayätxa, tantachäwinakansa janiw armtʼkayätti. Walpun munasiyäta, jupamp tukuyañat sipansa jiwañ muniriskayäta.” Ukat tiempompixa, Gloriax wal mamapar yuspäräna, kunattix jupaw tukuyxañapatakix iwxtʼatayna. Ukat sarakiwa: “Uka waynamp tukuyxatajatxa kusistwa. Jehová Diosaw uñjaskitäni ukaruw taqi chuyma atinista” sasa.

¿Jumax Gloria kullakjamarakiti jikxatasta? Janiw sapakïktati: awk taykamampiw yanaptʼayasisma. Kunapachatix Yimix ukham yatiqir masipar munatayna ukhaxa ukham luratayna. “Awk taykajampiw parlapxta —siwa—, ukat jupanakawa chuymajan munasiñax utjkitäna uk chhaqtayañ yanaptʼapxitu.” Ukat tamamankir mä irpir chuymanimpiw parltʼarakisma, juparuw kunas pastam ukxa awistʼasma (Isaías 32:1, 2).

Yatiqaskañ sarnaqäwinaka: Sulamita

Sulamita sat tawaquxa, munasiñatxa qhan parlirïna. Ukatwa tawaq masinakaparux akham parläna: “Juramentonwa achiktʼasipxsma [...] jan munasiñaj sartayapxistati, janirak munasiñarus wiytapxistati, jupapachpaw uka tuqir saraskani” sasa. Chuymax jan waliruw aptʼaspa ukx sum jupax amuyasïna. Mayninakar istʼasaxa iyawsakispawa ukat jan jupatakjamäki uka jaqiruw iyawsaspa uksa sum amuyasirakïna. Ukatxa, suma amuytʼasiñsa munasiñax aptʼaspawa. Ukatwa, “pirqjamätwa” sasax säna (El Cantar de los Cantares 8:4, NM; El Cantar de los Cantares 8:10).

Jumasti, ¿maynimp munasiñarux Sulamitjamarakiti uñjta? ¿Pʼiqimpiti lupʼta jan ukax chuymampich apayasta? (Proverbios 2:10, 11.) Janïr wakichatäkipanwa yaqha jaqinakax uñtʼatanïñamatakix wiytapxiristamxa. Jan ukax juma pachpaw uk chuymaman lupʼiskasma. Amuytʼañataki, kunapachatix mä waynamp mä tawaqump amparat kattʼasita sarnaqaskir uñjta ukhaxa, ¿jumax ukham sarnaqañti wal munarakta? ¿Jan religionamankki uka jaqimpix mistsusmati? Sulamitax wali amuytʼasir tawaqünwa, ukat jumax ukham amuytʼasirirakïñamawa.