Uraqpachan Jilïr Irpirinakan QILLQANITAPA
Munat jilat kullakanaka:
Alaxpachankir Jehová Dios Awkisaru jachʼañchañatak jumanakampi mayachtʼat irnaqtʼasaxa, ¡wali kusisitapunïpxtwa! ¡Aka tiempon ukham irnaqtʼañax wali kusiskañapuniwa! (Sof. 3:9; Juan 14:12.)
Jehová Diosaru ukham kusisita luqtasaxa, janipunis kuna jan waltʼäwinakan jikxatasksna ukham sañ munkiti. Pasïr 2009 septiembre phaxsit 2010 agosto phaxsi tukuykamaxa, uraq khathatinak utjatapata, jallux wal purintatapata, jachʼa thayanak utjatapat ukat kunayman chijinaka utjatapatxa, jumanakat yaqhipax kunaynam llakinakanwa jikxatasiwayapxta, yaqhipasti niyaw jakäwinakams aptʼasiwayapxta (Mat. 24:7). Ukat waljanixa, usuntatäpxatap layku jan ukax chuymankipstatäpxatap laykux sapüruw tʼaqhisisipki. Ukat taqinirakiwa kunaynam ‘tʼaqhisiñanakar’ saykatañatakix chʼamachasisktanxa (Mat. 24:8). Armenia, Eritrea, Corea del Sur ukat yaqha markanakansa jilat kullakanakax iyawsäwip laykux carcelan jistʼantataw uñjasipxi (Mat. 24:9).
Ukham jan waltʼäwinakan uñjasisasa, ¿kunas kusisit chuymampi irnaqtʼaskakiñasatakix yanaptʼistu? 2010 marataki Bibliat apstʼat arunakaw ak amtayistu: ‘Munasiñax taqi kun aguanti. Munasiñax janipuniw tukuskiti’ (1 Cor. 13:7, 8). Ukax chiqäskapuniwa, maynit maynikam munastan ukat Jehová Diosarus munasiraktan ukaw aguantaskakiñasatakix yanaptʼistu.
Diosan suma yatiyäwinakap waljaniru ukat jan qarjtas yatiyaskakitasatxa, cristianüpxtwa sapki ukanakatxa waljaniw wal muspharapxi. Jupanakax iyawsäwisaru ukat kuntï yatichktan ukar janisay askit uñjapkchixa, yaqhipax akham kun sapxi: “¡Kuntï jumanakax lurapkta ukxa nänakaw lurasipkañajänxa!” sasa. ¿Kunas Jehová Diosan Qhanañchirinakaparux sapüru yatiyasipkakiñapatakix yanaptʼi? Munasiñaw jupanakarux yanaptʼi. Alaxpachankir Awkisjamarakiw taqinin qhispipxañap munaraktanxa (2 Ped. 3:9). Taqinin ukham arrepentisipxañap munatasax qhanaw amuyasi. Kunattixa, pasïr 2009 septiembre phaxsit 2010 agosto phaxsi tukuykamaxa 7.508.050 ukha yatiyirinakaruw jilxattawaytanxa. ¿Janipunixay yaqha yupaychäwinakanx ukham walja yatiyirinakanïpkitixa?
Isaías qillqatan jikxataski uka profecian phuqasiskakitap uñjañax wali chʼamañchtʼkiripuniwa, ukanxa akham siwa: “Qhipa urunakansti suma saytʼatäxarakiniwa, kawkhankkitix [Jehová] Tatitun templopax uka qulluxa. Wali alto qullüniwa, taqi qullunakat sipansa wali altorakïniwa. Taqi markanakasti uka qulluruw jutapxarakini” sasa (Isa. 2:2-4). Pasïr 2009 septiembre phaxsit 2010 agosto phaxsi tukuykamaxa, 294.368 bautisasirinakaw Diosan markapar mantawayapxaraki. Uka munat jilat kullakanakaruxa walikpun Diosan markapar jutapxtaxa sasaw munasiñ chuymampi katuqtanxa. Munasiñasatwa uka jilat kullakanakasarux Supayan sipitapar saykatapxañapatak yanaptʼañ muntanxa (1 Ped. 5:8, 9).
Marzo 30, 2010 maranxa, Jesusan jiwäwip amtañatakix 18.706.895 jaqinakaw tantachtʼasiwayapxi, ukaw millón millón jaqinakax jiwasamp chika Jehová Diosar yupaychañ munapxatap qhan uñachtʼayi. ¡Jehová Diosax janïr aka ñanqha pachar tukjatapatxa walpun kusistanxa! Uka uru suyañkamaxa, munasiñaw aguantaskakiñatakix yanaptʼistu (2 Tes. 3:5).
“Jehová Diosat janipun jithiqtapxañäniti” sat kimsa uru Jachʼa Tantachäwix pasïr 2010 maran apaskäna ukaxa, Jehová Dios Awkisamp sum apasiskakiñasatakiw chʼamañchtʼawayistu. Salmonak qillqirin aka arunakapax chiqapunïskiwa: “¡[Jehová] Tatitut Diosanïki uka markax kusisiñaniwa!” sasa (Sal. 144:15). Kunas kunäpan Jehová Diosatï jiwasampïskchixa janiw kunsa axsarañasäkiti (Sal. 23:4). Jehová Diosaxa, niyaw mä jukʼa tiempotxa Jesucristo Yuqap tuqix ‘Supayan luratanakap tʼunjani’ (1 Juan 3:8). Uka uru puriñapxa walpun suytanxa. Ukampis uka uru janïr purinkipanxa, Diosatak irnaqtʼañax waljaw utjaskistu (1 Cor. 15:58).
Nänakax jumanakat oracionanakajan amtasipxapunsmawa, uk janipun armasipxamti (Rom. 1:9). Ukhamax taqini “Diosan munasiñapan jakapxam, kunürutï Tatit Jesucristosax khuyapayasiñapanxa wiñay jakañxa churkistani uka uru suytʼasina” (Jud. 21).
¡Taqiniruw munasipxsma!
Jilatanakama,
Jehová Diosan Qhanañchirinakapan Uraqpachan Jilïr Irpirinakapa
[5-8 jananakan tablapa]
JEHOVÁ DIOSAN QHANAÑCHIRINAKAPAN IRNAQÄWIPA (SEPT. 2009-AG. 2010)
(Sumpach amuyt’añatakix qillqatan mistki uk uñxatañamawa)
2009 septiembre phaxsit 2010 agosto tukuykamaxa, 155.000.000 dólares ukha qullqwa precursores especiales, misioneros ukat tamanak tumptʼir jilatanakan luräwinakapar yanaptʼañatakix irtasiwayi.
Qhawqhanis jesusan jiwäwip amtasax vino umtʼapxatayna ukat tʼantʼsa manqʼapxarakitayna: 11.202
[9, 10 jananaka]
Qillqt’asiñataki