5 yatichäwi

Amtasarjam sarnaqir luratätanwa ukax wali askiwa

1, 2. ¿Kunjamsa Diosax luristu?

KUNATSA Diosax tʼaqhisiñanak jan tukjpacha ukat kunsa lurani uk yatiñatakixa, kunjamsa jiwasar luristu uk yatiñasawa. Jupax janiw cuerponi ukat lixwini ukhamaki lurkistuti. Jan ukasti, amuyuni ukat chuymani ukham wali sum luristu.

² Amuyunsa chuymansa kun lurañas jiwasatäxiwa. Ukhamwa amtasarjam sarnaqañatakix luristu. Ukaxa, Diosan wali suma churäwipawa.

Kunjamsa Diosax luristu

3-5. ¿Kunatsa amtasarjam sarnaqañ muntanxa?

³ ¿Amtasarjam sarnaqirïtas laykuti Diosax jan walinak jan tukjkpacha? Uk jichhax amuytʼañäni. Kuntï jumax luräta, arsüta, manqʼäta, kunjamsa isisïta, kawkinsa irnaqäta, kawkinsa ukat kunjamsa jakasïta ukxa jumaw ajlltaxa, jan ukax ¿kuntï jakäwiman lurkäta ukxa yaqhampich sayasiñ munta?

⁴ Kunsa jakäwisan lurañäni ukxa, janiw khitis yaqhamp sayasiñ munktanti. ¿Kunatsa? Kunatix Diosaw ukham luristu. Diosax ‘jupar uñtasitwa’ jaqinakar luratayna, Jupax kunsa amtaparjamaw luraraki (Génesis 1:26; Deuteronomio 7:6). Kunapachatï jaqir lurkatayna ukhaxa, amtaparjam sarnaqirwa luratayna, kunjamtï Jupax kunsa amtaparjam lurkixa ukhama. Ukatwa, tʼaqhisiyïr apnaqirinakampix jan apnaqayasiñ munktanti.

⁵ Ukham jan apnaqayasiñ munatasax janiw ukhamakïkiti, Diosax janiw apnaqayasiñ munkiti ukat janirakiw Jupax khitirus jan munkipanxa apnaqkiti. Bibliax akham siwa: “Kawkhantï Tatitun Ajayupax utjki ukkhanxa [amtasarjam] sarnaqasiñaw utji” sasa (2 Corintios 3:17). Ukhamaxa, Diosaw amtasarjam sarnaqir luristu. Kunjamsa amuyusarjam ukat chuymasarjam sarnaqañäni ukxa yatïnwa, ukat kunjamatsa kusisit sarnaqsna uksa yatirakïnwa.

6. Amtasarjam sarnaqañatakixa, ¿kunjamsa Diosax lixwis luratayna?

⁶ Ukampis amtasarjam sarnaqañatakix Diosax amuytʼayarakistuwa, ukat kunatï walïki, jan walïki uk uñtʼañatakis yaticharakistuwa (Hebreos 5:14). Diosax janiw autjam uksar aksar apnaqayasiñasatak lurkistuti. Janirakiw animalanakjam jan amuytʼasirsa lurkistuti. Jan ukasti, amtasarjam sarnaqañatak lixwin luratätanwa.

Qalltanxa taqi kunas wali sumänwa

7, 8. ¿Kunjamsa Diosax nayrïr awk taykasarux luratayna?

⁷ Diosax janiw Adanamp Evampirux amtaparjam sarnaqiriki lurkataynati, jan ukasti taqi kunatï jakañatak wakiski ukwa churarakitayna. Mä suma paraisonwa jakasipxäna. Taqi kunanïpxänwa. Jan juchanjamaxa janiw chuymankipstapxañapäkänti ni usuntäpxañapäkänsa, janirakiw jiwapxañapäkänsa... wiñayatakiw jakapxaspäna. Ukat wawanakapas janirakiw juchanipkasapänti ukat wiñayatakiw kusisit jakasipxarakispäna. Ukat jukʼat jukʼatwa Uraqxa paraisor tukuyapxaspäna (Génesis 1:26-30; 2:15).

⁸ Diosan luratanakapatxa, akham siw Bibliaxa: “Diosasti taqi kuntix lurkän ukanakan sumätapwa uñjäna” sasa (Génesis 1:31). Bibliax Diosat sarakiwa: “Luräwipasa chiqaparakiwa” sasa (Deuteronomio 32:4). Jïsa, Luririsax wali sumwa jaqirux chhijnuqäna. Wali munasirïtapatwa ukham luristu.

Janiw taqi kunansa munañaparjam sarnaqapxañapäkänti

9, 10. ¿Kunatsa kamachinakar istʼañasa?

⁹ ¿Taqi kunansa munañaparjamakit sarnaqapxañapäna? Janiwa. Amuytʼañäni: Mä markanx munañaparjamaki jaqinakax autonak apnaqapxaspa, ¿kunas kamachaspa? Jan waltʼäwinakapuniw utjaspa, inas jaqir takxatasax usuchjapxchispa jan ukax jiwayapxchispa.

¹⁰ Jiwasampix ukhamarakïspawa. Munañasarjamak sarnaqañ munsna ukhaxa, jan waltʼäwinakarupuniw pursna. Ukhamaxa, jaqinakan sum sarnaqapxañapatakix kamachinakax utjañapapuniwa. Akham sasaw Bibliax iwxtʼistu: “Qhispiyata sarnaqasiñan jaqinakjam sarnaqapxam, ukampis uka qhispiyat sarnaqasiñanakamasti janiraki kuna jan wali lurañatakïpasa” sasa (1 Pedro 2:16). Ukhamaxa, janiw munañasarjam taqi kunans sarnaqañasäkiti, jan ukasti kamachinakapar istʼañasawa, ukax jiwasan askisatakiwa.

¿Khitin kamachinakapsa istʼañasa?

11. ¿Khitin kamachinakapsa istʼañasa?

¹¹ Ukhamaxa, ¿khitin kamachinakapsa istʼañasa? 1 Pedro 2:16 jiskʼa tʼaqax akham saskakiwa: “Diosan esclavonakapjam sarnaqapxam” sasa. Ukax janiw tʼaqhisiñ sañ munkiti, jan ukasti Diosan kamachinakapar istʼasax kusisiñwa jikxatsna, ukwa sañ muni (Mateo 22:35-40). Kamachinakapax janiw jaqin apsut kamachinakjamäkiti, jan ukasti wali sumaruw irpistu. “Nayätwa [Jehová] Tatitu Diosamaxa, nayasti kunatix jumatakix askïki ukwa yatichsma, kawki thakinjamtix sarañamäki ukanjam irparaksma” sasaw qhanañchistu (Isaías 48:17).

12. ¿Kunjam sarnaqasiñsa Diosan kamachinakapax yanaptʼistu?

¹² Ukampisa, Diosan kamachinakapax chuymasarjam sarnaqañwa yanaptʼistu. Ukatwa, taqinis jan kikpäktanti. Kunatï uraqpachan utjki uka tuqinakat amuytʼañäni. Manqʼasa isisa kusistʼäwinakasa ukat utanakasa janiw kikpäpkiti. Uka tuqinakatxa sapa mayniw ajllistanxa, janiw khitis ajllirapkistuti.

13. ¿Jiwasan askisatakix kuna kamachinakarus istʼañasa?

¹³ Ukhamaxa, Diosan kamachinakapar istʼasaw kusisit jakassna, ukham jakañasatak luratätanwa. Jan usuchjasiñasatakix Diosan kamachinakapax utjarakiwa. Amuytʼañataki, mä altus utat liwiqtsna ukhaxa, wal usuchjassna jan ukax jiwañaruw pursna. Ukat manqʼat awtjatax jan manqʼksnati, umat pharjatas janirak umksnati ukat iki puritas janirak iksnati ukhaxa, jiwaraksnawa.

14. Jaqinakax janiw Diosat jithiqtat jakañatak luratäktanti ukxa, ¿kunjamatsa yattanxa?

¹⁴ Diosax janiw jan usuchjasiñasatakik jan ukax jan jiwañasatakik kamachinak churkistuti, jan ukasti sarnaqañ tuqitsa ukat taqinimp sum apasiñ tuqitsa kamachinak churarakistuwa (Mateo 4:4). Jaqinakax janiw Luriripat jithiqtatax sum jakasipkaspati. Jeremías profetax akham sasaw säna: “Jaqix janiw alaskiti pachpa jakañapxa, janirakiw tukuyawipsa munañapar apnaqkaspati. Chiqa kankañamarjama askichapxita” sasa (Jeremías 10:23, 24). Jaqix Diosan munañaparjam sarnaqañatak luratätanwa, janiw jaqin munañaparjam sarqañatak luratäktanti, ukwa ukax uñachtʼayistu.

15. ¿Adanampi Evampitakix Diosan kamachinakap istʼañax chʼamäpachänti?

¹⁵ Nayrïr awk taykasatakix Diosan kamachinakap istʼañax janiw chʼamäkänti. Jupanakatï uka kamachinakar istʼapxaspänxa, wawanakapatakix wali askïspänwa. Chiqpachansa, ¡mä paraisonwa jakasisänxa! Janiw jan waltʼäwinakasa tʼaqhisiñanakasa ni jiwañas utjkaspänti.

[11 janan fotopa]

Luririx wali sumwa jaqirux chhijnuqatayna

[12 janan fotopa]

Mä markan munañaparjam autonak apnaqapxaspa ukhaxa, ¿uka taypin apnaqañ munasmati?