Aka folletoxa, ¿kuna amtampi qillqatasa?
“JANIW jaqin luräwinakapat sawkasiñsa jiskʼachañsa ni uñisiñsa munkti, jan ukasti wali amuyumpiw uñjañ munta” sasaw Holanda markankir Spinoza sat amuytʼir jaqix satayna. Jïsa, chʼamäkchisa, jumax yatichirjamaxa ukhamarakwa yatiqirinakaman luräwinakapsa amuyunakapsa sarnaqäwinakapsa sum amuyañ munpachätaxa, inas yaqhipax Jehová Diosan Qhanañchirinakapan wawanakapäpxchi. Awisax uka yatiqirinakan amtäwinakapax mayjäspawa, ukampis maynitix mä yupaychäwir saratap layku jan ukax jakäwipan mayj sarnaqirïtap layku yaqha amtanïni ukhaxa, sum amuytʼañaw wakisispa. Ukatakiw Jehová Diosan Qhanañchirinakapax aka qillqata apsupxi, yatichirinakax kunjamsa wawanakapar uñjapxaspa uka tuqit yanaptʼañataki. Ukhamasti, aka qillqat sum liytʼasma ukhaxa wali askïspawa.
Yaqhanakan yupaychäwipat yatxatañax janiw iyawsäwiparjam ukat yatichäwiparjam sarnaqañ sañ munkiti, uka tuqit yatxatañaxa janiw arkiripar tukuñ sañs munkarakiti. Aka qillqatampix janiw munkir jan munkir jumarusa yatiqirinakamarusa Jehová Diosan Qhanañchiriptayañ munapksmati. Kunsa yatichapxi, jan ukax kunsa amuyapxi uk yatxatañamatakiw wakichanipxta, mä arunxa, mä qhawqha yatiqirinakaman awk taykanakapax kunjamsa amuyapxi, uk yatiñamatakikiwa, ukhamat wawanakapar sum uñtʼañamataki ukat yanaptʼañamatakisa. Ukampis amuyapxaraktwa, inasa kuntï yatiqapki ukanakax jan jupanakan amuyunakaparjamäkapunchiti, kunattix sapa mayniw concienciaparjam sarnaqañ yatiqasipkaraki, awisax jiskʼa wawanakax janiw yatichatarjam sarnaqapkapuniti, kuna laykutix jichhaw amuytatasisipki.
Jehová Diosan Qhanañchirinakapax mayni awk taykanakjamarakiw wawanakapan sum yatiqapxañap munapxaraki. Ukatwa yatichirinakar istʼapxañapatakix wawanakapar yatichapxi. Ukat awk taykanakasa wawanakapasa yatichirinakan jupanakar wali amuyumpi ukat respetomp uñjapxatapatxa wal yuspärapxaraki.
Jehová Diosan Qhanañchirinakapax taqi chiqansa wali uñtʼatäpxiwa, ukampis awisax jan walinakwa jupanakat parlañ yatipxi. Ukatwa Qhanañchirinakan wawanakapar sum uñtʼañamataki aka qillqat wakichtʼanipxta. Chiqas awisax janis mayninakjama lurañ munapkchinixa, ukhamäkipansa kunatsa jan lurañ munapki uka amtar respetasiñap munapxirista. Jïsa, taqi ukanakat amuyañamwa munapxta.
[2 janan fotopax khitin apsutasa]
NAYRÏR JANANXA: faraón: The Complete Encyclopedia of Illustration/ J. G. Heck. QHIPÄXANSTI: pirámides: The Pictorial History of the World uka librot apstʼatawa; pilpintu: The Complete Encyclopedia of Illustration/ J. G. Heck