¿Diosax akhamäñapti munpachäna?

PERIÓDICO liyisasa, televisión uñchʼukisasa jan ukax radio ischʼukisasa, ¿kuna yatiyäwinakakis utjaski? ¡Ñanqha luräwinakakiw utjaski ukhamaraki chʼaxwäwinakasa jaqi jiwthapiyirinakasa anchapuniwa! Llakinakamat jichhax amuytʼarakma. Mä familiaramasa jan ukax munat masimasa usutächi jan ukax chhaqtawayxchi, inas ukanakat wal llakisisksta. Inas Job chachjama jikxatasta, uka suma jaqisti akham sänwa: “Qʼalpunwa llakimp” aynachtʼta sasa (Job 10:15).

Inas akham jisktʼasta:

• ¿Nätakis jan ukax taqi jaqinakatakisa Diosax akhamäñapti munpachäna?

• ¿Jan waltʼäwinakat mistsuñataki kawkinsa yanaptʼa jikxatirista?

• ¿Sumankañax Uraqin utjaspati?

Ukanakxa Bibliaw sum qhanañchi.

URAQINXA AKANAKWA DIOSAX SUMAPTAYANI SASAW BIBLIAX YATICHI.

“Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa” (Apocalipsis 21:4).

“Suchunakasti taruja qallunakjamaw sinkʼusipxani” (Isaías 35:6).

“Juykhunakax uñjapxani[wa]” (Isaías 35:5).

“Taqi jiwatanakasti [...] jaktapxaniwa” (Juan 5:28, 29).

“Janiw khitis sis[xani]ti: ‘Usutätwa’ sasaxa” (Isaías 33:24).

Jutïrinakan “trigox [jan ukax manqʼañax] yapunakan jilarkir utjpan” siwa (Salmo 72:16).

BIBLIAN YATICHÄWINAKAPA SUM YATIQÄTA

Pusimpi phisqampi uka jananaka uñxatasaxa samkakïpachaw sas janiw mäki amuyätati. Diosax ukhamäniw siwa, ukat Bibliax qhanañcharakiwa kunjamsa ukanakxa phuqani.

Janiw ukakïkiti. Bibliax yaticharakistuwa kunjamsa jichhasa kʼuchiki sum jakassna. Jan waltʼäwinakamatsa llakinakamatsa amuykiptʼarakma. Inas qullqitächi, familia tuqitächisa jan ukax mä familiaramas usuntchi jan ukax jiwchi. Ukhamaxa, Bibliax uka jan waltʼäwinakaru saykatañwa yanapistu, chuymacharakistuwa aka jisktʼanakaru sum qhanañchasa:

• ¿Kunatsa tʼaqhistanxa?

• ¿Kunjamsa llakinakaru saykatsna?

• ¿Kunsa kamachsna familiasampi kʼuchiki sum jakasiñasatakixa?

• Jiwatatxa, ¿jakañax utjaskakpachati?

• ¿Jiwat familiaranakasampix wasitat uñjasiñäniti?

• ¿Kunatsa Diosax arsutanakapxa phuqapuniniw sasax sisna?

Aka qillqatanak liyisinxa, uñachtʼaytawa Biblian yatichäwinakapa yatxatañ munatama. Aka librowa yatxatañ yanaptʼätamxa. Sapa janan tukuyaparuxa sapa tʼaqatakiw jisktʼanakax utji. Millón millón jaqinakawa Jehová Diosan Qhanañchirinakapan akhama jisktʼanakampi jaysanakapampi Biblia uñakipañaruxa khusapuniw sapxixa, jumatakix ukhamarakïspa ukwa munapxta. Kunsa chiqpachapuni Bibliax yatichi uka suma yatiqäwimanxa Diosaw yanaptʼätamxa.