12 YATICHÄWI
¿Kunatsa mayninakxat parlasiñax jan walïki?
“Mä kutix mä fiestaruw sarta, ukat mä yuqallampiw ikintasitayna sasinwa qhipürux taqin parlapxäna. ¡¿Kamisaraki ukham kʼarinak parlxapxanisti?!” (Linda)
“Awisaxa, ‘uka imillampiw uñtʼasiñatak mistusipki’ ukham arunak istʼasta, janiw ni uka imillarus uñtʼkti. Jan sum yatisaw ukhamanak parlapxi, chiqati janicha uksa janiw jisktʼasipkiti.” (Miguel)
MAYNIX yaqxat taqpach siw säwinakar istʼaspa ukhaxa, maynin jakäwipax noveläkaspa ukhamwa amuyaspa. Ambera sat 19 marani tawaqux siwa: “Usuriwa, walja kutiw wawa apsuyasi, droganakampiw qulljasi ukat droganak alji, ukhamanakwa nayat parlapxatayna. Janiw kamachtʼañjamäxisa. Janipuniw akchʼas amuykti, kunatsa ukhamanak parlapxpacha”.
Maynix uñisiñatxa, jan kun lakapamp arsusaw jumar jan wali jaqit uñtʼayiristamxa, uksti Internetata ukat celularatwa luraspa. Mä qhawqha limtʼäwimpikiw wali yatxatañ munir jaqinakarux jan wali cuentonak jumxat puriyaspaxa. Ukat Internetanxa, jan wali jaqit uñtʼayañataki lugaranakaw utji. Kunjam jaqisa maynixa uka tuqit qillqatanakaw Internetan utji (blogs), ukanxa ancha kʼarinakapuniw qillqatäxi, janiw khitis nayaw uk lurta siskaspati.
Ukhamaxa, ¿janipunit khititsa parlañäkaspa?
¿Mayninakxat parlasksnati?
Ukhamäpachati janicha uk chimptʼäta:
Maynxat parlañax janiw walïkiti. □ Janiw ukhamäkiti □ Ukhamawa
¿Kamsasmasa? Paypachaw walïskaspa. Kawkjan parltʼasiskasasa yaqhanakatxa arsupuntanwa, ukax walikïskiwa. Ukat Bibliaxa, “kunatix mayninakataki askïki” uk thaqhapxam siwa, mä arunxa, cristianonakarux mayninakat llakisipxam sasaw iwxi (Filipenses 2:4). Chiqasa, ukampix janiw jaqinakan chʼaxwapar mitisipxam jakäwipat wal yatxatapxam sañ munkiti (1 Pedro 4:15). Ukampis mayninakamp parltʼasapuniw mayninakatxa yattanxa; ukhamatwa khitis jaqichasxi khitis wawanïxi uksa yatiraktanxa. Qhan sañäni: jupat llakistwa saraksna, ukat janirak jupat mä jukʼsa arsksnasa, ¿ukax waliskaspati?
Ukampis ukham parlañanakaxa, siw säwiptxaspawa. Sañäni, “Pedrompi Anampix sum sarnaqapxaspa” sasin maynix saspa ukhaxa, mayninakax “Pedrox Anampiw siwa” sasaw parlxapxaspa. “Kuna jan walirakisti” sakismawa, ukampis Pedrompiru Anampiru jisktʼam jupanakax kamsapxakïtamsa...
Julia sat 18 marani tawaqurux siw säwinakax wal tʼaqhisiyatayna. “Yatista ukhaxa, walpun colertʼasta, janich khitirus atinisiñäxaspa ukham lupʼta” siwa. Jane sat 19 marani tawaqurux niya ukhamarakiw pasatayna: “Khitimpiw sasatix parlapkatayna, uka yuqallarux janiw jakʼachasxtsa. Ukampis mayninakan juchapat ukham lurañax janiw walïkänti, kunattix amigojänwa. Khitimp parltʼipansa mayninakax jankʼakiw kunsa parlxapxi ukax janiw walïkiti”.
Ukhamanak utjipanxa yaqha tuqitwa parlxañama
Ukhamaxa, ¿yaqxat maynir awistʼañ munsta ukhax kamachasmasa? Uk qhanañchañatakixa, jumax auto apnaqirïkasmas ukham sañäni. Walja carronak thakin sarasipkaspa ukat akatjamat kun pasipan maysa tuqir jithiqañaxa jan ukax mayni auton pasañapatak jithiqañax wakischispa, jan ukax auto saytʼayañamas wakischispa ukhaxa, ¿kamachätasa? Jumatix kuna jan waltʼäwis utji uk sum amuyäta ukhaxa, jankʼakiw kuns luräta.
Ukhamarakiw mä parltʼäwinx pasaspa. Jaqxat ‘jan walinak’ parlañax juti ukhaxa, qhan maynix amuyaspa. Ukhaxa jankʼakiw yaqha tuqit parlañax wakisispa. Jan ukasti, maynin sutipwa qʼañuchsnaxa. Miguel sat waynax siwa: “Mä kutixa, ‘uka tawaqux yuqallanakak uñchʼukiski’ sasjamaw arsta, ukat jupax arsutajat yatisitayna. Kunjamtix jutasin parlawaykitu ukx janipuniw armkäti. Walpun chuyma ustʼaypachätxa. Uka tuqit sum aruskipxapxta, ukampis ukham ñanqhachatajatxa walpun arrepentista, jan walipuniw jikxatasta.”
Ukhamasti, qhanawa, arunakasax jan walinwa maynir uñjasiyaspa. Bibliax akham siwa: “Utjapuniwa parlatanakapampi mayniru usuchjirixa” sasa, mä arunxa, parlatanakasax mä espadampjamaw usuchjaspa (Proverbios 12:18). Ukhamasti, janïr arskasax sum amuytʼasiñamawa. Chiqpachansa, ukham suma parltʼasïwiru tukuyxañax chʼamakïspawa. Carolina sat 17 marani tawaqux akham siwa: “Janiw maynix siw säw arunak istʼasax parlatatañapäkiti. Khitis uk satayna uk jan sum yatisaxa, kʼarinakwa parlaskaspa” sasa. Ukham payachassta ukhaxa, apóstol Pablon aka iwxaparuw istʼañama: “Samarat jakañaru munapxam, jumanakan luräwinakamat lupʼisipxam” siwa (1 Tesalonicenses 4:11).
Ukhamasti, ¿kunjamatsa mayninakan jakäwipar jan mitisisax jupanakat llakissna? Khitit parltʼañ munsta ukhaxa, akanakwa jisktʼasiñama: “¿Ukhamäskapunit janicha? ¿Kuna amtampis uk parlta? ¿Jan wali jaqitti uñtʼapxitaspa?” sasa. Chiqpachansa, mayninakxat parlasiri jaqit uñtʼayasiñaxa, kʼarintat jaqit sipansa jukʼamp jan waliwa.
Jumat jan wal parlapxaspa ukhaxa, ¿kamachasmasa?
Eclesiastés 7:9 qillqatax siwa: “Jan colerañampi atipayasimti” sasa. Ukhamasti, kuna jan waltäwitsa janiw jukʼamp jachʼaptayañamäkiti. Kunjamtï Bibliax siskixa, “jan istʼamti taqi kuntix parlapki ukanakxa [...]. Walja kutiwa jumax mayninakxata jan wali parl[arak]taxa, uksti juma pachpawa sum yatistaxa” (Eclesiastés 7:21, 22).
Chiqpachansa, kʼarix kʼarikipuniwa. Ukampis jumatï sinti colertʼasisma ukhaxa, jukʼamp jan walinwa uñjasisma. Renata tawaqjam lurañaw askïspa, jupax akham siwa: “Nayat ukham parlasax walsay chuym ustʼayapkchituxa, janiw parlatanakapar yäqkti. Ukham parlkasax mä qhawqha tiempot yaqhanak jichh parlxapxani”.a
Tukuyxañataki: ukhamax khiti tuqit jan wali parlañ qalltapxani ukhaxa, amuyasiñamawa, yaqha tuqitwa parlxañama. Ukat juma contra jan wali arunak istʼasïta ukhaxa, jan yäqamti, jan jukʼamp jachʼar tukuyamti. Kunjam jaqïtas ukxa sarnaqäwimamp uñachtʼayma (1 Pedro 2:12). Ukhamatwa taqinimpis sum apasïta ukat Jehová Diosan nayraqatapansa suma jaqit uñtʼatarakiyätawa.
[Qhanañchäwi]
a Awisaxa, uka kʼarinak uñstayirimpi parlañaw wakisispa, ukampis wali sum amuytʼasisa. Awisax janiw ni parlañas wakiskaniti, kunattix “munasiñasti walja juchanakwa perdonaraki” (1 Pedro 4:8).
BIBLIAX KAMSISA
“Khititix amuytʼampi jukʼa aruki parlki ukaxa, jupa pachpawa imasiskani, ukampis khititï jan amuytʼasa sinti parlki ukaxa, jupa pachparakiwa jan waltʼañaru puri.” (Proverbios 13:3)
AKHAM LURASMAXA
Maynitï jaqxat parlañ qalltstam ukhaxa, akham sasmawa: “Janiw jupat parlañ munkti, yamas jan akankkipanxa janipuniw parlkiristti” sasa.
¿YATIYÄTATI?
Kunapachatï jaqxat parliriru istʼkta ukhaxa, jumax yanapiriparuw tukuraktaxa, kunattix jukʼamp parlañapatakiw yanaptʼasktaxa.
¡AKANAK LURÄ!
Yaqha urutï ukham jaqit parlasiñ munkä ukhaxa ․․․․․
Nayxat jan walinak parlasir istʼasï ukhaxa, ak lurä: ․․․․․
Awkijarus jan ukax taykajarusa, ¿kuns aka tuqit jisktʼañ muntxa? ․․․․․
JUMASTI, ¿KAMSASMASA?
● ¿Kunapachas maynxat parlañax wakisispa?
● ¿Jumxat jan walinak parlir istʼirïtati? ¿Kunsa jumax ukat yatiqta?
● ¿Kunatsa yaqhxat parlañax jan wali jaqit uñtʼayiristamxa?
[107 janan qhanañchäwipa]
“Jan wali parlatajat yatisisinxa, nayan ukaruw qhanañchayasir jutatayna, ukanwa yatiqawayta. Janiw kunat ukham lursma sañjamäkänsa. Jamasat parlaskañat sipansa qhan sañaw jukʼamp askixa, uk amuyawayta.” (Paula)
[118 janan fotopa]
Jaqxat kʼarinak parlañaxa, mä espadjamäspawa, maynirux jan walinwa uñjasiysna