17 YATICHÄWI
¿Yatiqir masinakajat amigonïñax janipunit walïki?
“Kunapachatï walja yatiqir masinakajar sum parltʼasir uñjta ukhaxa, awisax akham amuyta: ‘¡Wali amigüpxapuniwa! Nayax ukham amigonakanïñ munarakta’ sasa.” (José)
“Nayatakix amigonïñ amiganïñax janiw chʼamirïkiti. Ukaw jan askïkänti.” (María)
TAQINIW amigonakanïñ muntanxa, ukhamat jupanakamp jan wali tiemponsa suma tiemponsa parltʼasiñataki. Jesusas amigonakanïnwa ukat jupanakampïskasax wal kusisirïna (Juan 15:15). Kunapachatix lawar chʼakkatatäkäna ukhaxa, Juan sat wali munat amigopax jupa jakʼankaskänwa, jupax ‘wali munat discipulopänwa’ (Juan 19:26-27; 21:20). Walinsa jan walinsa jumamp chika sarnaqiri amigonakanïñ munarakpachätawa.
Ukham amigo yatiqañ utan jikxatta sasina inas saraksta: inas uka yatiqir masimampix qalltatpach sum uñtʼasipxsta ukat yatthaptapxaraksta. Jumjam amtanakanïspawa, ukat jupanakamp parltʼañax wali khusarakïspawa. Janiw jan wali amigonakaw sañjamäkaspati (1 Corintios 15:33). “Sapüruw jupanakar uñjtaxa. Ukat jupanakampïkasax janiw axsarayasktati. Ukampis tamankir jilat kullakanakampïkasaxa, awisax wali amuytʼasisaw kunas luraña. Yatiqañ utanxa kuns luraskakismawa” siw Carmen sat tawaquxa. Ukhamaraki, inas Luisa sat tawaqjam amuyaraksta, jupax siwa: “Jehová Diosan Qhanañchirinakapax janiw mayjäktanti jan ukasti jupanakjamäsktanwa uk uñachtʼayañ munayäta” sasa. ¿Kamsasmasa? ¿Ukhamanak amuytʼasin yatiqir masinakamp amigonïñax walïskaspati?
Sumwa amuytʼasïta
Qalltan siskayätan uka María tawaqurux kunas pasatayna uk amuytʼañäni. Taqinimpis wali parltʼirinwa ukat jankʼakiw amigonaksa jikxatirïna. Janiw jan sañ yatkänti. “Taqinimpis sum uñtʼasiñ munayäta. Ukampis jukʼat jukʼatwa akapachampix apayasiwayta” siw jupaxa. Niya ukhamarakikiw Luisa sat tawaqurux pasatayna. “Yatiqir masinakajan amtanakapaw chuymajar mantawayi, ukat jupanakjamaw sarnaqxayäta” siw Luisaxa.
Ukax ukhamäskapuniwa. Kunattix maynin wali munat amigopäñatakixa, jupjam sarnaqaña, jupjam amtañaw wakisi. Ukhamax jan cristianüpki, jan cristianjam sarnaqapki uka jaqinakamp amigonïsaxa, jupanakjamarakiw tukxäta (Proverbios 13:20). Ukatwa apóstol Pabloxa, jan cristianüpki uka jaqinakampix janiw amigonïñasakiti sas akham iwxäna: “Jan jumanakax Tatitur jan iyawsirinakampix chikachasipxamti, jupanakampi chikachasipxasmaxa, mä chʼulla chʼulla yuntar uñtatäpxasmawa” sasa (2 Corintios 6:14).
Ukhamasti, ¿kamachasmasa?
Janiw jupanakampix mä jukʼsa parlapxañamäkiti, janiw jakʼachasipxañamäkisa, ¿sasati Pablox sañ munpachäna? Janiwa. “Taqi akapachankir jaqinakar yatiyir sarapxam” sasin Jesusax sawaykistu ukar phuqañasatakixa, taqi kasta jañchini, kunayman sarnaqasiri ukat kunayman yupaychäwinkir jaqinakampiw parlapxañasa (Mateo 28:19, MT).
Pablow uka tuqit sum yatichawayistu. Mayni jaqinakat sipansa jupax mayjsa amuychïnxa, ‘taqinimpiw’ parltʼirïna (1 Corintios 9:22, 23). ¿Janit jupat yatiqasiñax askïkaspa? Ukhamasti, yatiqir masinakamampix sumwa apasiñama. Jupanakan amuyunakap respetañamawa, ukhamatwa amuyunakam respetapxarakini. Ukampisa, jan parlatanakapxa yatiqasimti janirak jupanakjamas sarnaqamti. Kunatsa Bibliarjam sarnaqañ amtawayta ukanakxa, horasaparuw respetompi qhanañchtʼäta (2 Timoteo 2:25).
Chiqpachansa, janiw jupanakjamäkapunïtati, ukax chʼamawa (Juan 15:19). Sañäni: jumax botenkaskasin maynir uman warariskiri uñjasaxa, ¿kamachasmasa? ¿Jumax umar thuquntarakikismati jan ukax boter makatañcha yanaptʼasma? ¿Kawkïr lurañas jukʼamp askïspaxa?
Niya ukhamarakiw yatiqir masinakamax uñjasipxi. Jiwasax Jehová Diosan amigonakapjamax jarkʼaqatätanwa, ukampis jupanakax janiw jarkʼaqatäpkiti (Salmo 121:2-8). Ukhamasti, jumatï jupanakar yanaptʼañ layku Jehová Diosan mayitanakap jaytanukütaxa, llakisiñaruw purtʼasïta ukat Diosar yupaychañ tuqitsa aynachtʼawayxarakïtawa (Efesios 4:14, 15; Santiago 4:4). Qhispiyasiñatak boter makataniñwa niyas yanaptʼañamaxa, ¿kunjamsa uk lurasma? Jehová Diosar yupaychañ yatichasa. Ukham lurasakiwa suma amigotamxa uñachtʼayasmaxa, janiw yaqhax utjkiti.
BIBLIAX KAMSISA
“Taqi akanakxa Tatitun arunakap parlañ laykuw lurta, ukhamata kuna askinakatix uka arunak parlañanxa utjki ukanak katuqañaxataki.” (1 Corintios 9:23)
AKHAM LURASMAXA
Inas yatiqir masinakamax religionamat jukʼamp yatxatañ munapxchispa. Ukat amuyunakapxa sumwa istʼañama, llampʼu chuymampi ukat wali respetompirakiw parlañama (1 Pedro 3:15).
¿YATIYÄTATI?
Diosan walja luqtirinakapaxa, yatiqir masinakapan jan axsartʼas parlatapatwa Biblian chiqa yatichäwinakap yatiqapxatayna.
¡AKANAK LURÄ!
Mä yatiqir masijampitï wali amigüpxsta ukhaxa ․․․․․
Mä yatiqir masijatï, Bibliat yatichaskta ukar jiskʼachani ukhaxa ․․․․․
Awkijarus jan ukax taykajarusa, ¿kuns aka tuqit jisktʼañ muntxa? ․․․․․
JUMASTI, ¿KAMSASMASA?
● Tama taypin amigonïñat sipansa, ¿kunatsa yatiqañ utan amigonïñax jan chʼamjamäki?
● Jan cristianüpki ukanakamp walja tiempo pasañaxa, ¿kuna jan walinakarus puriyiristamxa?
● Yatiqir masinakamatï Jehová Diosan Qhanañchiripätam yatipxäni ukhaxa, ¿kuna askinaksa jikxatasma?
[143 janan qhanañchäwipa]
“Mayni masinakajjam sarnaqataj layku ukat jupanakjam lurataj laykux amigonakanïñax janiw chʼamäkänti. Ukampis pantjasitajatwa yatiqawayta. Jichhax cristianonakampikiw amigo katxapxta, kunattix jupanakarukiw atinisxta.” (Daniel)
[146 janan fotopa]
Qutan warariskiriruxa, ¿kunjamatsa jukʼamp sum yanaptʼsna? ¿Umar thuquntasati jan ukax katthapisiñapataki yanaptʼa jaquntasacha?