Yatiqaskañ sarnaqäwinaka: Asaf

Asaf jaqix mä jan walinwa uñjasïna. Waljaniw Diosan kamachinakaparjam jan sarnaqasax sumakjamaki sarnaqasipxäna. Ukhamasti, Diosan kamachinakaparjam sarnaqañax askipunïpachati sasaw payachasxäna. Ukatwa akham sas mä qʼuchu qillqatayna: “¡Inamayakiw chuyma qʼumachasitaxaxa! ¡Inamayakiw amparanakax ñanqhat jariqasitaxasa!” sasa. Ukampis sumpach amuytʼasisinxa, janiw ukham amuyxänti. Uka jan wali jaqinakax mä jukʼa tiempotakikiw ukham sumjam sarnaqapxi, ukwa amuyasitayna. Ukampis ¿kunjamas Asaf jaqix jikxataspachäna? Akham sasaw Jehová Diosar säna: “Jumamp chik utjasax janiw kuns aka uraqin munkti” sasa (Salmo 73:3, 13, 16, 25, 27).

Inas jumax ukham jikxatasirakirïsta. Inas Diosan kamachinakaparjam sarnaqañax inamayäkaspa ukham amuyirïsta. Ukampis Asafat yatiqasiñamawa, ukat wali sum amuytʼasiñamawa. Jehová Diosan kamachinakap pʼakintasax kunjamsa jan wali sarnaqirinakax jikxatasipxi uk amuyañamawa. ¿Chiqapunit sum jakasipxi? ¿Kunjamatsa kusisit jikxatasipxpacha uk janit Diosar yupaychasax amuykpachätanxa? Wali sum uka tuqinakat amuytʼäta ukhaxa, Asafjamarakiw amuyäta, jupax akham sänwa: “Nayasti Diosaruw jakʼachasï, ukaw nayarux kusisiyitu” sasa (Salmo 73:28).