Jan jachʼa yänak thaqhamti

1, 2. 1) Joacim reyejj pusi mara apnaqaskäna ukhajja, ¿kunjamsa Baruc chachajj jikjjatasïna? 2) ¿Kunjamsa Jehová Diosajj Baruc chachar yanaptʼäna?

KUNAPACHATÏ Joacim (Jehoiaquim) qhoru reyejj Judá marka pusi mara apnaqkäna (niya 625 nayra pacha mara) ukhajj Baruc chachajj qaritaw jikjjatasïna, jupajj Jeremías profetan qellqeripänwa. Kunanaktï 23 maranakajj Jerusalén marka ukat Judá marka contra Jehová Diosajj Jeremías profetar arskäna uka arunakwa mä rollor qellqayäna (Jer. 25:1-3; 36:1, 2). Baruc chachajj qhepa maranwa kuna arunaktï rolloru qellqkäna uka arunakjja judionakatak liytʼaskäna (Jer. 36:9, 10). Jupajj llakitaw jikjjatasïna. ¿Kunas llakisiypachäna?

² “¡Ay kunakïkani nayatakejja! ¡Tatitusti tʼaqhesiñanakampi, llakisiñanakampikwa nayarojj churitu! Jachkäwisa qaritäjjaraktwa” sasaw Baruc chachajj säna. Jiwasajj ukhamarakwa qaritjam jikjjatasisajj jachʼatsa jan ukajj chuymasans sispachätanjja. Baruc chachajj kunjamjjay sischïna, ukjja Jehová Diosajj istʼaskänwa. Chuyma manqhasa uñantiri Jehová Diosajja, kunatsa ukham jikjjatasïna ukjja sum yatïna ukat uksti Jeremías toqew munasiñamp cheqañchäna (Jeremías 45:1-4 liytʼasiñapawa). ¿Kunatsa Baruc chachajj qarit jikjjataspachäna? ¿Kuna lurañanïkänti uk phoqañati jan ukajj jan walin jikjjataskäna ukanakach qariypachänjja? Ukham llakisiñapajja chuymapatwa qalltäna. Jeremías 45:5 (NM) qellqatanjja akham siwa: ‘Ukampis jumajja, jachʼa yänak jumatakikiw thaqhasktajja. Jan ukanak thaqjjamti. Nayasti taqe jaqenakjjarojj jachʼa tʼaqhesiñanakwa apayanëjja, ukampis kawkirutï sarkät ukan jumarojj jakayaskarakïmawa, naya Jehová Diosaw ukjja arsta’ sasa. Kunjamtï uñjtanjja Baruc chachajj ‘jachʼa yänakwa thaqhaskäna’. ¿Kuna ‘jachʼa yänaksa’ thaqhaskpachäna? Istʼitäta ukat ukarjam sarnaqäta ukhajj ¿kun katoqäta sasinsa Jehová Diosajj säna? ¿Kunsa jupan sarnaqäwipat yateqsna?

¿‘JACHʼA YÄNAKAJJA’ KUNANAKÄNSA?

3. ¿Kunatsa Baruc chachajj kuntï lurañapäkäna uk jan sum phoqkpachäna?

³ Kunanakatï akapachan utjki uka ‘jachʼa yänaka’ jikjjatañ munkäna ukanakjja Baruc chachajj uñtʼänwa, ukat Diosajj jaqen sarnaqäwipsa ukat jupan sarnaqäwip uñjaskatapsa yatirakïnwa (Job 34:21). Ukampisa, ¿Jeremiasan profecía arunakap qellqasati jan ‘samartʼkpachänjja’? Janiwa, jan ukasti jachʼa yänakwa chuymapan thaqhäna. Jïsa, ‘jachʼa yänaka’ thaqhasajja, kunatï wali wakiskirïki ukjja janis askïkaspa ukhamwa uñj-jjäna: Diosan munañap lurañäki ukarojj janiw chuyma uchjjänti (Fili. 1:10). Hebreo arurjamajja, Jeremías 45:5 jiskʼa tʼaqan akham siwa “thaqhaskaktawa” sasa. Janiw ukhakejj thaqhañ qalltkänti, ukwa uka arunakampejj amuysna, kunapachatï Jehová Diosajj ukanak jaytam sasin siskäna ukhajja, Baruc chachajj jaya tiempow ‘jachʼa yänaka’ thaqjjatayna. Jeremiasan taqe chuyma yanaptʼir qellqeripajj Diosan munañap phoqaskänwa, uk lurkasajja ‘jachʼa yänak’ jikjjatañwa wal munarakïna.

4, 5. Baruc chachajj ‘jachʼa yänaka’ thaqkäna ukanakajj inas wali aytatäña ukat yäqatäña ukanakächïna sasajja, ¿kunatsa sissna, ukat Diosajj amtaykäna ukajj kunatsa wali wakiskirïnjja?

⁴ Mayajj inas akächïna, taqen uñtʼapjjetaspa ukat yäqapjjetaspa sasaw Baruc chachajj llakispachäna. Jupajj Jeremiasan qellqeripjamas servchïnjja, janiw profeta sapan qellqeripakïkpachänti. Jeremías 36:32 qellqatanjja mä suma luräwinïkaspas ukham uñtʼasi, hebreo arunjja ‘qellqeri’ sasaw sutiñchasi. Arqueología toqet yatjjatatanakarjamajja, palacion mä cargonïkaspäns ukham qhanañchi. Ukatjja, Elisama chachajja uka pachpa sutirakwa api “secretariopa” jan ukajj qellqeripa sasa, jupajja Judá markan reyin servirinakap utjkäna uka sutinak taypinkarakiwa. Niyakejjay Elisama chachamp chik irnaqchïnjja, Baruc chachajj ‘reyin secretario utapan’ utjkäna uka manqʼañ utaruw mantarakirïpachäna, (Jer. 36:11, 12, 14). Taqe ukanak yatjjatasajja, Baruc chachajj palacion wali yatjjattʼat irnaqerïpachänwa sasaw sissna. Seraías (Seraya) mayni jilapajja Sedequías reyin ‘qorpachasiñapatak waktʼayañapatakiw’ uttʼayatarakïna, jupaw reyimp chikajj Babilonia markar mä suma luräwi phoqer saratayna (Jeremías 51:59 liytʼasiñapawa). Amuyatajja, reyejj viajkäna ukhajja, Seraías chachaw manqʼañanak appachäna ukat kawkhansa qorpachasini uk thaqhañapäna. Uka cargon irnaqañajj wali askipunïpachänwa.

⁵ Ukajj qhanawa, khititï jachʼa cargonïki ukajja, Judá markatak taripäwi arunak qellqasajj qaritaw jikjjatasispa, ukatsti Baruc chachajj Diosan profetapar yanaptʼkasajja, palacion luräwipasa ukat kuntï amtkäna ukanaksa qʼal aynachtʼayirjamäpachänwa. Ukat kuntï Jeremías 45:4 jiskʼa tʼaqan siski ukarjam Jehová Diosajj phoqaspäna ukhajj kunjamans uñjasispäna uk amuytʼañäni. Kuna ‘jachʼa yänaktï’ thaqkäna, mä arunjja, palacion wali aytatäñasa ukat walja yänakanïñasa inamayakïsapanwa. Amtañäni, judionakajj jiwapjjañapatak taripataw uñjasipjjäna, jupatï ukan sum utjnoqañ amtaskchïna ukhajja, jan ukar chuym uchañapatak Diosajj amuytʼaykäna ukajj wali askïnwa.

6, 7. Baruc chachajj ‘jachʼa yänak’ thaqkäna ukanakat qamiriptañäspäna ukhajja, ¿kawkir markanakat yateqasitapsa uñachtʼayaspäna?

⁶ Maysa toqetjja, kawkïr ‘jachʼa yänaktï’ Baruc chachajj thaqkäna ukanakatjja, nayrar mistuñatak yänakäspawa. Judá marka jakʼanakan utjkäna uka markankirinakajja, qamir kankañarukiw atinisipjjäna. Moab markajj Amón markjamarakiw ‘chʼamaparu ukat qamir kankañar’ atinisïna. Ukat Babilonia markajj ‘qamir kankañan’ jilankiwa sasaw Jehová Diosajj Jeremías toqejj säna (Jer. 48:1, 7; 49:1, 4; 51:1, 13). Ukampis uka markanakajja Diosampi juchañchatänwa.

⁷ Baruc chachajj yänak jikjjataña ukat qamirïñwa munäna, ukatwa Jehová Diosajj jupar ewjjtʼpachäna. Kunapachatï Diosajj ‘amparap aytañapäkäna’ ukhajja, judionakan utanakapsa, oraqenakapsa enemigonakapaw katusjjäñapäna (Jer. 6:12; 20:5). Jiwasas Jerusalén markan ukham urunakan qamksna ukham amuytʼañäni. Walja jaqenaka, reyin wawanakapa, sacerdotenaka ukat pachpa reyisa Babiloniankir soldadonakamp chʼajjwañ munapjjatap uñjsna. Ukat Jeremiasar akham sir istʼsna: “Babiloniankir reyiru jaysapjjam, ukapachakiw jakapjjarakïta” sasa (Jer. 27:12, 17). ¿Uka markan walja yänakanïsäna ukhajja Diosan ewjjtʼapar jankʼakit istʼasäna? ¿Yänakasaruk munasäna ukhajja, Jeremiasan ewjjtʼaparjamat lurasäna jan ukajj jaqenakarukich istʼasäna? Judá markana, Jerusalén markana ukat templon utjkäna uka walja valorani yänakjja babiloniankirinakaw taqpach apasjjapjjäna. Ukhamajja, yänak thaqhañasa ukat ukanak jikjjatañatak chʼamachasiñas inamayäspanwa (Jer. 27:21, 22). ¿Kuns ukampejj yatichistu?

“JUMAROJJ JAKAYASKARAKÏMAWA”

8, 9. ¿Kunatsa Baruc chachatakejj qhespiñajj wali askïnjja?

⁸ Jichhajj aka toqet amuytʼañäni: Jehová Diosar istʼasajja, ¿kunsa Baruc chachajj jikjjataspäna? Jupajj ‘jakaskakiñapänwa’. Janiw jiwañapäkänti (Jeremías 45:5 liytʼasiñapawa). Jan waltʼäwit qhespir judionakajja jukʼanikïpjjänwa. ¿Khitinakänsa? Caldeonakar katuyasjjapjjam sasin Diosajj siskäna uka ewjjtʼar istʼirinakaw qhespipjjäna (Jer. 21:9; 38:2). “¿Uka ewjjtʼar istʼasajj ukakti katoqapjjäna?”, sasin inas maynejj jisktʼaschispa.

⁹ Jerusalén markajj Babiloniankir soldadonakamp muyuntat uñjasipjjäna ukhajj kunjamänsa uk amuytʼañäni. Uka markajja, jukʼat jukʼatwa tʼaqhesiñar purisipkäna, ukampis Sodoma markajja, jankʼakiw nakhantatäna, ukat jaqenakajj jan añcha tʼaqhesisaw jiwapjjäna (Lam. 4:6). Jerusalén markan jakirinakajja, manqʼat pistʼapjjani, kunayman usunakani ukat espadamp jiwayataw uñjasipjjani sasaw Baruc chachajj mä profecía qellqäna, ukat kunjamsa ukajj phoqasïna uks uñjarakpachänwa. Janiw manqʼas utj-jjänti. ¡Uka markanjja sinttʼasir taykanakasa pachpa wawanakapar phayantasaw manqʼantapjjäna! Ukham markankañajj janipuniw walïkpachänti (Lam. 2:20; 4:10; Jer. 19:9). Ukampis Baruc chachajj janiw jiwkänti. Kunjamtï chʼajjwäwin atipirinakajj premio apasipkejja, ukar uñtasitwa Baruc chachajj jakäwip katoqäna. Baruc chachasti, kuntï Diosajj jan ‘jachʼa yänaka’ thaqhamti siskän ukarojj istʼänwa ukhamatwa Jehová Diosamp sum apasiskakïna, ukaw jan jiwatapat qhan amuyasi (Jer. 43:5-7).

¿‘JACHʼA YÄNAKTI’ THAQHARAKIÑÄNI?

10, 11. ¿Kunjamsa Baruc chachajj sarnaqäna ukat jiwasajj ukhaman jikjjatasiraksnati?

¹⁰ Baruc chachajj jan tiemponis Diosan munañap lurkchïnjja, ‘jachʼa yänaka’ jan jikjjatañatakiw chʼamachasïna. Jan waltʼäwiruw purïta sasin Diosajj siskäna ukar istʼasajja, jiwañatwa qhespïna ukat Diosampis sum apasiskakïna. Baruc chachjamajja, ¿taqe chuyma Diosar yupaychkasas kuntï chuymasan utjki uka amtäwinakamp apayasiraksnati?

¹¹ Wali uñtʼatäñ munañ amuyunakampis Baruc chachajj apayasirakpachänwa. Inas akham lupʼchïna: “¿Qellqerjam irnaqaskakïti? ¿Nayrar sartaskakirïsti?” sasa. Sapa mayn akham jisktʼasirakiñäni: “¿Akapachan nayrar sartañjja jichhasa jan ukajj jutïrinsa chuymajan munaskakti?” sasa. Yaqhep wayn tawaqonakajj akham sasaw jisktʼasipjjarakispa: “¿Yäqatäña ukat jachʼa yateqañ utar sarasajj qollqenïyäwa sasin amuyañajäspati ukat ‘jachʼa yänakaniñti’ thaqajja?” sasa.

12. ¿Kunjamsa mä jilatajj Diosar jachʼañchañ thaqhäna, ukat kuna lurañtï amtkäna ukatjja kunsa amuyta?

¹² Oraqpachan Diosan Apnaqäwipat uñjaski uka utanwa mä jilatajj irnaqe, juparojj 15 maranïkän ukhaw jachʼa yateqañ utar yateqer sarañapatak beca churañ munapjjatayna. Ukat yatichirinakapar istʼañat sipansa, precursorjam irnaqaskakiñatakiw amtäna. Ukampis wal yatjjatañ munatapajj janiw ukharuk qheparkänti. Mä jiskʼa islan misionerjam serviñapäkän uka cheqan parlapki uka arwa yateqañapäna, amuyatajja niya tunka waranqa jaqenakaw uka arjja parlapjjäna. Janiw mä diccionariojj uka arut utjkänti, ukatwa uka arunakani diccionarior uñtasit mä libro luratayna. Qhepatsti sumwa uka aru parlañ yateqjjatayna ukat Bibliat apstʼat qellqatanak uka aruru jaqokipañapatakiw jupar mayipjjatayna. Ukatjja, diccionarior uñtasita libro lurkäna ukajja, uka arut nayrïr diccionario lurasiñapatakiw yanaptʼatayna. Mä jachʼa tantachäwinjja akham sasaw säna: “Jachʼa yateqañ utaru sarañ amtiriskayäta ukhajja, yateqatajamp nä pachpa jachʼañchasiñatakïspänwa. Ukampis yateqañ utar saratajj uñachtʼayañatakejj janiw kuna titulos utjkituti ukhamajj janiw jachʼañchaskirïsti. Jehová Diosaruw taqe kunat jachʼañchtanjja” sasa (Pro. 25:27). Wayn tawaqo, ¿kuntï 15 maranïkasin uka jilatajj amtawaykäna ukat kunsa amuyta? Uka jilatajj walja maranakaw Diosan markapan aski luräwinak kusisit phoqatayna. Ukhamajja, ¿kuntï yatkta ukjja kunjamsa uñjata? Sapa mayni jachʼañchasiñat sipansa, ¿janit Diosar jachʼañchañatak amtkasma?

13. ¿Kunatsa awk taykanakajj Baruc chachan sarnaqäwipat amuytʼapjjañapajj wakisi?

¹³ ¿Kuna taypis maynejj ‘jachʼa yänaka’ thaqhañar uchasirakispa? Khitirutï munaski uka taypiw jachʼa yänak thaqhañar uchasispa. Akapachanjja, awk taykanakajj kunjamañtï munapkäna ukhamäpjjañapatakiw kunaymaninakat wawanakapar yanaptʼapjje ukhamat jupanak taypi jachʼañchayasiñataki. Inas akham arunak istʼirïsta: “Yoqajas jan ukajj phuchajas janiw nayjamäñap munkti” jan ukajj “yoqajasa, phuchajas nayrar mistuñapataki jachʼa yateqañ utar sarañapwa munta” sasa. Diosar yupaychir awk taykanakajj ukham amuyapjjarakispa. Cheqansa, nayajj janiw jachʼa yänak thaqkti sasaw maynejj saspa, ukampis jan amuyasisaw ukanak thaqhaskaspa, yoqapa jan ukajj phuchapa taypi. Baruc chachajj ukhamarakwa kuna lurañanïkänti ukat kuntï lurañ munkäna uka toqen nayrankañ munpachäna, mä awk taykajj ukhamarakwa wawanakap toqejj nayrankañ munaspa. Ukampisa, ¿‘jaqen amtanakapa’ uñtʼirejj janit ukanak uñjkpacha? ¿Kunjamsa Baruc chachar Diosajj uñjäna? (Pro. 17:3.) Ukhamasti, kuntï lupʼktan ukanak sum uñjañapatakejj Jehová Diosaru mayisipjjañäni, kunjamtï David chachajj lurkäna ukhama (Salmo 26:2 ukat Jeremías 17:9, 10 liytʼasiñapawa). Jehová Diosajja kunayman toqetwa ‘jachʼa yänak’ thaqhañ toqet amuytʼayistu, kunjamtï Baruc chachan sarnaqäwipat yatjjatktan ukhamanakampiw yanaptʼistu.

SUMA YÄNAK THAQHAÑAJJ PANTJASIYISTASPAWA

14, 15. ¿Kunjamatsa jiwasatakejj qamiriptañajj ‘jachʼa yänakar’ tukuspa?

¹⁴ Baruc chachajj ‘jachʼa yänaka’ munkäna ukajj qamiriptañs thaqkaspa ukham amuytʼañäni. Kunjamtï uñjaniwayktanjja, jupatï yänakaparu munasispäna ukhajja, caldeonakar katuyasim sasin Diosajj siskäna ukar istʼañajj jupatakejj wali chʼamäspänwa. Kunjamtï yatktanjja, qamir jaqejj suma ‘yänakaparukiw’ atinisi, ukampis ukajj janiw jarkʼaqkaspati inamayakiwa sasaw Bibliajj qhanañchi (Pro. 18:11). Jehová Diosajj yupaychirinakaparojja, yänak jan thaqhapjjamti sasaw Biblia toqejj ewjjtʼistu, uk amtañasapuniwa (Proverbios 11:4 liytʼasiñapawa). Uka toqet yatjjatasajj inas maynejj akham sasin jisktʼaschispa: “¿Akapachan utjki ukanak jikjjatañajj sinti jan walipunïpachati?” sasa.

¹⁵ Mä jilatasa jan ukajj kullakasa akapachan utjki uka yänakakwa thaqjjaspa. Jeremiasasa ukat Baruc chachasa janiw ukar purtʼasipkänti. Walja maranak qhepatjja, “Jaqen Yoqapajj uñstani[ñapakäna]” uka urun jakir jaqenakaruw Jesusajj amtayäna. Jupajj akham sänwa: “Amtasipjjam Lot chachan warmipata” sasa. Ukat “amtasipjjam Jeremías ukat Baruc chachanakatjja” siski uka ewjjtʼajj cristianonakatak ukham askirakïspawa (Luc. 17:30-33). Jiwasatï yänakar wal munsna ukhajja, Jesusan ewjjtʼanakap istʼañajj wali chʼamäspawa. Amtapjjañäni, Baruc chachajja kuntï Diosajj siskäna ukham luratapatwa jakäwip qhespiyasïna.

16. Diosan yupaychirinakapajj kunjamsa yänakap uñjapjjäna uk mä experienciampi qhanañchtʼma.

¹⁶ Rumania markankir jilat kullakanakat amuytʼañäni, marka apnaqerejj comunistäkäna uka pachanwa jakapjjäna. Kunapachatï marka apnaqerin irnaqerinakapajj kawkir utarus mantasipkakïna ukhajja, yänakapwa aparapjjerïna, kunatï aljañjamäki ukwa jil apasipjjerïna (Lam. 5:2). Walja jilat kullakanakajja, yänakap aptʼasiñjja janiw ajjsarapkänti. Kunapachatï yaqha cheqan jakapjjañapatak apatäpkäna ukhajja, yaqhepajj yänakapsa ukat utapsa jaytanukuwayapjjänwa, ukhaman jikjjataskasas Jehová Diosat janipuniw jitheqtapkänti. Jiwasatï ukhaman uñjassna ukhajja, ¿Jehová Diosar munasiñat sipansa yänakasarukit atinisiñäni? (2 Tim. 3:11.)

17. ¿Kunjamanakatsa mitanakapajj Jeremiasarusa ukat Baruc chacharus yanaptʼapjjäna?

¹⁷ Jeremiasasa ukat Baruc chachasa yaqhep mitanakapamp yanaptʼataw uñjasipjjäna, uk amtañajj wali askiwa. Kunapachatï Josías chachajj marka apnaqkäna ukhajja, Sofonías profetajj profecianak arsüna, ukañkamastï Jeremiasajj Diosatakejj wal irnaqtʼaskäna. ¿Jeremiasajj kunsa Sofonías 1:18 qellqatan jikjjataski uka arunakat amuypachäna? (Liytʼasiñapawa.) Kunsa uka profecía arunakat amuyi ukjja Baruc chachampejj parltʼasipjjpachänwa, uk sum amuysna. Jupan mayni mitapajj Ezequiel satarakïnwa, jupajj 617 maranwa Babilonia markar apat uñjasïna. Khitinakatï markapan qheparapkäna uka judionakatakïnwa jupan luratanakapasa ukat yatiyäwinakapasa, kuntï Ezequiel profetajj siskäna ukat lurkäna ukjja Jeremiasajj yatpachänwa ukat Ezequielas jupat yatirakpachänwa. Kuntï arskäna ukanakatjja Ezequiel 7:19 qellqatanwa jikjjatasi (liytʼasiñapawa). Jeremiasarusa ukat Baruc chacharusa uka profecianakajj wal yanaptʼpachäna, jiwasarojj ukhamarakiw yanaptʼistaspa. Jehová Diosan jachʼa urupanjja, walja jaqenakajj kʼari diosanakaparuw qhespiyasiñatak artʼasipjjani, ukampisa Jehová Diosan colerasiñ urupatjja janiw jupanakan diosapasa ukat qollqepas qhespiykaniti (Jer. 2:28).

¿JIWASAROJJ ‘JAKAYARAKISTANITI’?

18. ¿Khitin jakäwipsa katoqañ muntanjja, ukat kunjamsa uk jikjjatañäni?

¹⁸ Amtapjjañäni, ‘jakayaskämawa’ sasaw Jehová Diosajj arsüna. Kunapachatï jachʼa ajjsarkañ animalar uñtata, marka apnaqerinakajj kʼari religionanakar tukjkani uka ‘jachʼa tʼaqhesïwi’ (MT) urunakanjja, Diosan yupaychirinakapajj arknaqata uñjasisajj inas yaqhepanakajj jiwapjjchini, ukampisa janiw wiñayatak jiwapkaniti. Jupanakajj mä suytʼäwinipjjewa, Diosajj suma Oraqe churistani ukanwa jiwatat jaktanipjjani ukat “wiñay jakaña katoqapjja[rakini]” (Apo. 7:14, 15; 1 Tim. 6:19). Ukatjja Diosat jan jitheqtapkani ukanakajja jachʼa tʼaqhesïwi urunakat qhespipjjarakiniwa, ukat janiw pächasiñasäkiti. Kunjamtï yatktanjja, akapachatak Diosajj jan waltʼäwi apankani ukhajja, “khitinakarutejj Tatitojj uka urojj jiwaraykani” ukanakamp chikajj Diosar taqe chuyma loqtirinakajj janiw jiwapkaniti (Jer. 25:32, 33).

19. ¿‘Jachʼa yänaka’ jan thaqhasañatak amtawayktan uk phoqañasatakejj kunjamsa Jeremiasana ukat Baruc chachan sarnaqäwinakapajj yanaptʼistu?

¹⁹ ‘Jakayaskämawa’ siski uka arunak istʼasajja, jakäwikti katoqasti sasin amuyasaw yaqhepajj mayjtʼasipjjaspa, ukampis janiw mayjtʼasiñasäkiti. Amtañäni, Jerusalén markankirinakajj manqʼatjam jiwarasipkäna ukhajja, Jeremiasarojj Diosajj sumwa uñjaskäna. ¿Kunjamatsa? Sedequías reyejj akham sänwa: “Jeremiasajj guardianakan patioparuki preso qheparjjañapa, ukatsti sapa ururaki tʼantʼa apapjjañapa, Panaderonakan callepa satäki uka calleta. Ukhamaw phoqhasïna tʼantʼajj markan [jan] utjkan uka urunakajja” (Jer. 37:21). Ukhamatwa Jeremiasajj qhespïna. Jehová Diosajj kunjamatsa markaparojj jakayapunispawa. Wiñay jakañ churapjjäma siskistu uksa phoqapuniniwa. Jerusalén markajj tukjatäkän ukhajja Baruc chachajj qhespïnwa kunattejja janiw ‘jachʼa yänaka’ thaqjjänti. Jiwasajja ukhamarakiw Diosan jachʼa chʼajjwäwi urupat qhespiñ muntanjja, ukhamat ‘jakäwisampi’ Diosar yupaychañasataki, ukjja Diosan mä churäwipjamwa wiñayatak katoqañäni.