Akapach ajayur saykatañxa qullan ajayuw yanaptʼistani

“Jiwasasti janiw akapachankir ajayu katuqktanti, jan ukasti Diosan Ajayupwa katuqapxtanxa, ukhamat kuntï Diosax munasiñampi churkistu ukanak amuytʼañasataki.” (1 COR. 2:12.)

1, 2. 1) ¿Khitimpis cristianonakax nuwastanxa? 2) ¿Kuna tuqinakatsa jichhax yatxataskañäni?

JIWASAT sipansa wali chʼamani, wali chʼikhi ukat yäpar wakichtʼat mä uñisirimpiw cristianonakax nuwastanxa. Ukatxa, jaqinakar kunjamat aynachtʼayañsa sumpun uka uñisirisax yati. Chiqas niya taqiniw jupan atipatax jikxatasipxi. Ukampis jiwasax janiw axsarañasäkiti, janiw atipkistaniti (Isa. 41:10). Jan khitin atipkaña mä jarkʼaqasiñaw jiwasatakix utji.

² Janis chiqpach nuwasiñat parlkstanxa, Diosampi jan sum apasiñasatakiw uka uñisirix apaqañ munistu. Chiqas kunaymanitwa Supayax aynachtʼayistaspa. Ukampis “akapachankir ajayu” tuqiw waljanir aynachtʼayi (1 Cor. 2:12). Ukatwa jan atipayasiñatakix Diosan qullan ajayupampi jarkʼaqasiñasaxa. Mä arunxa, Diosar qullan ajayup mayiñasawa ukat ukarjam sarnaqasin achup uñachtʼayañasarakiwa (Gál. 5:22, 23). Ukampis ¿akapachankir ajayux kunäpachasa, ukat kunjamatsa aynachtʼayistaspa? ¿Kunatsa wali chʼamanïpacha? ¿Kunjamatsa uka ajayu katuqatas amuyassna? ¿Kunjamsa Jesusax Diosan ajayup katuqasax akapachankir ajayur saykatpachäna, ukat kunsa jiwasax yatiqassna?

¿Akapach ajayux kunatsa wali chʼamanïpacha?

3. ¿Kunas akapachankir ajayuxa?

³ Akapachankir ajayux pachpa ‘akapach apnaqir’ Supayan uñstayatawa. Ukhamax qullan ajayu contrawa (Juan 12:31; 14:30; 1 Juan 5:19). Jaqinakax uka ajayun apnaqataw maysar sarapxi, jan walinak lurapxaraki ukat Diosan munañap phuqañat sipansa contraw saytʼapxi.

4, 5. ¿Kunjamatsa akapachankir ajayux wali chʼamanir tukuwayi?

⁴ ¿Kunjamatsa akapachankir ajayux wali chʼamanir tukuwayi? Amtapxañäni, kʼarinak parlasaw Supayax Evar pantjasiyäna, Diosat jithiqtasax jukʼamp sumaw jakasïta sasaw säna (Gén. 3:13). ¡Supayax wali kʼaripuniwa! (Juan 8:44.) Ukat ¿kunjamatsa Adanarux Jehová Diosat jithiqtayäna? Pachpa warmipampiw juchar puriyäna. Ukhamasti, Adanan jan wal amtatap laykuw jaqinakax juchar aljantat uñjastanxa. Ukhamatwa Supayax Diosar jan istʼañasatakix akapachankir ajayu uñstayäna (Efesios 2:1-3 liytʼasiñapawa).

⁵ Ukat walja angelanakaruw Supayax Diosat jithiqtayarakïna, uka jan wali angelanakaw saxranaka satäpxi (Apo. 12:3, 4). Jupanakax jaqir tukusaw Uma Juicio nayrax saraqanipxatayna. Diosan kamachinakap pʼakintasin jan wali amtanakar arkañax wali sumäkaspas ukhamwa amuyapxäna (Jud. 6). Qhipatxa alaxpacharuw kuttʼapxäna. Jichhax jupanakan yanapataw Supayax “aka uraqin jaqinakarux wali sallqjañanak” luraski (Apo. 12:9). Ukampis kunjamsa Supayax akapachar apnaqaski ukxa janiw jaqinakax amuyapkiti, mä qhawqhanikiw amuyasipxi (2 Cor. 4:4).

Akapachankir ajayut amuyasipxañäni

6. ¿Khitinakarus akapach ajayux apnaqi?

⁶ Kunjamsa Supayax jaqinakar apnaqaski ukxa janiw akapachan amuyapkiti. Ukampis chiqa cristianonakax wal amuyasipxi (2 Cor. 2:11). Khitinakatix jan amuyasipki ukanakaruw akapach ajayux apnaqaski, jan apnaqäsiñ munirinakarux janiw apnaqkaspati. Ukampis ¿kawkïr ajayus apnaqaskistu? ¿Diosan qullan ajayupati jan ukax akapachan ajayupacha? Uk pusi tuqit amuytʼañäni.

7. ¿Kunjamatsa Supayax Diosat apaqañ munistu?

⁷ ¿Kusistʼäwinak ajllisax kunsa uñachtʼaytxa? (Santiago 3:14-18 liytʼasiñapawa.) Qhawqsa Jehová Diosax nuwasiñ munirinakarux uñisi uk yatisaw Supayax chuymasar nuwasiñanakampi mayjtʼayañ munistu (Sal. 11:5). Peliculanaka, kunayman qillqatanaka, musicanaka ukat anatañ videonak tuqiw uka jan walinakar wiytañ munistu. Ukanakanxa jan axsartʼasaw jiwarayasipxi ukat jan phinqʼanirakiw qʼañu luräwinaksa uñachtʼayapxi. Supayatakixa, mä jukʼaksa chuymasan jan walinak munañäni ukax walikïskiwa. Ukat kunatix chiqapäki ukar munasitasax janiw jupatakix kunäkisa (Amós 5:15).

8, 9. ¿Kusistʼañanak ajlliñ tuqitxa kunanaksa jisktʼasiñasa?

⁸ Ukampis qʼum sarnaqañataki, suma jaqïñataki ukat khuyapayasirïñatakiw Diosan qullan ajayupax yanaptʼistu. Ukat jiwaspacha akham jisktʼasiñasawa: “¿Kunanakampis kusistʼañ yattxa, ukat ukanakax suma jaqïñatakit yanaptʼitu?” sasa. Ukatxa, Diosan yatiñapa ukat qullan ajayupa katuqirinakaxa, taqi kuns askpun lurapxi ukat “qhanaraki kuns parlapxi”, kunjamtï jaqinakar yatichapki ukhamaw sarnaqapxaraki. Utansa janiw qʼañu luräwinaksa nuwasiñanaksa uñchʼukipkaspati.

⁹ Ukat amtapxarakiñäni, Jehová Diosax jupa saparuki taqi chuym yupaychsna ukwa muni; ukampis Supayax mä jukʼa yupaychatas kusisikiwa. Mä kuti yupaychayasiñ laykukiw Jesusar yantʼäna (Luc. 4:7, 8). Ukatwa sapa maynis akham jisktʼasiñasa: “¿Jan wali kusistʼäwinak ajllisax Diosar taqi chuym yupaychaskiristti? ¿Uka kusistʼäwinakax akapach ajayur saykatañatakix kunjamsa yanaptʼitu? ¿Jan ukax antisakich akapachar apxitu? ¿Suma kusistʼäwinak ajlliñatakix jukʼampi amuytʼasiñajat wakisispa?” sasa.

10, 11. 1) ¿Akapachankir ajayux kunarus wiytistu, ukat kunjamsa? 2) ¿Diosan qullan ajayupax kunjamsa yanaptʼarakistu?

¹⁰ ¿Qullqitakis yänakatakis kunjam chuymanïtsa? (Marcos 10:23-30 liytʼasiñapawa.) Supayax akapachankir ajay tuqiw “kuntix nayrax uñjkis” ukanak munañarusa, qullqi chuymäñarusa ukat taqi kun maynitakik munañarus jaqinakar wiyti (1 Juan 2:16). Ukatwa kawkinsa qullqik munasipki (1 Tim. 6:9, 10). Walja qullqinïsakis maynix sum jakasispa ukhamwa Supayax jaqinakar pantjayi (Pro. 18:11). Ukampis jiwasatix yänaka jan ukax qullqi laykuki Diosat jithiqtxsna ukhaxa, Supayan atipataw uñjassna. Ukatwa akham jisktʼasiñax wakisispa: “¿Nayatakix kunas nayranki? ¿Yänakampi ukat kusistʼañanakampikit nayrankaski?” sasa.

¹¹ Ukampis Diosan qullan ajayupaxa, qullqi tuqit sum amuyasiñasatakiw Biblia tuqix yanaptʼistu. Ukat kunanakas familiar yanaptʼañatakix munasi ukanak jikxatañataki chʼamachasipxam sarakistuwa (1 Tim. 5:8). Maysa tuqitxa, Jehová Diosat yatiqasisin suma jaqïñatakiw qullan ajayux yanaptʼarakistu. Ukham chuymanïsaxa, yänakat jan ukax qullqi tuqit llakisiñat sipansa jaqi masitwa llakistanxa. Kun waxtʼirjamäsas jankʼakiw churtanxa ukat yanaptʼirjamäsas jankʼakiw yanaptʼaraktanxa (Pro. 3:27, 28). Jiwasatakixa, qullqi thaqañat sipansa Jehová Diosar taqi chuym yupaychañaw nayrankañapa.

12, 13. ¿Kunjamsa qullan ajayux akapach ajayur atipañ yanaptʼistu?

¹² ¿Akapach ajayurjamati jan ukax qullan ajayurjamach sarnaqasktxa? (Colosenses 3:8-10 ukat Efesios 4:32 liytʼasiñapawa.) Akapachankir ajayux jañchin munañanakaparuw jaqinakar wiyti (Gál. 5:19-21). Ukampis kawkïr ajayurjamas sarnaqasktan ukxa, jan walinakan uñjasisaw sumpach amuyassna. Sañäni, kunapachatï mä cristian masisax yaqhachistu, chuym ustʼayistu jan ukax jan walinak luristu ukhaw akapach ajayurjam sarnaqatassa jan ukax qullan ajayurjam sarnaqatassa uñachtʼaytanxa. Ukat kunanaksa utan lurtan ukarjamaw kawkïr ajayurjam sarnaqatassa uñachtʼayaraktanxa. Ukatwa akham jisktʼasiñasaxa: “Aka qhipa suxta phaxsinakanxa, ¿cristianjam nayrar sartatajax qhanati, jan ukax akapachankir jaqjamakich qhipar kuttʼasin jan wal sarnaqtxa?” sasa.

¹³ ‘Nayra jakäwinaka ukat luräwinaka apanukusin machaqat isthapisiñatakiw’ qullan ajayux yanaptʼistu. Ukhamatwa munasiñasa khuyapayasiñasa chuymasan jukʼampix jiltani. Ukat chuym usuchjatas jankʼakiw mayninakar perdonañäni. Jiwas contra jan walinak lurapxani ukhasa, janiw ‘thitkañäniti’. “Colerat chuymampi jachʼat artʼasiñanakatsa, jan wali arunakampi tuqisiñanakatsa” jithiqtarakiñäniwa. Ukat wali khuyaptʼayasir jaqïñatakiw chʼamachasiñäni (Efe. 4:31, 32).

14. ¿Akapachanxa kunjamsa jaqinakax Diosan Arupar uñjapxi?

¹⁴ ¿Qʼum sarnaqañ tuqit Diosan kamachinakapar respetatajsa munatajsa kunjams uñachtʼaytxa? (Proverbios 3:5, 6 liytʼasiñapawa.) Akapach ajayun wiytatax janiw jaqinakax Diosan arunakapsa yäqapkiti. Kuna chiqanakatï jupanakatakix Biblian jan walïki ukanakxa janiw istʼañs munapkiti, jan ukasti costumbrenakaru ukat jaqi masin uñstayat amuyunakarukiw arkapxi ( 2 Tim. 4:3, 4). Yaqhipasti, Bibliat janiw kuns yatiñ munapkiti. Janiw Diosan amuytʼayatäkiti, jichha tiempotakix pasatäxiwa sasaw parlapxi. Wali yatiñanïpkaspas ukham amuyasisaw Diosan kamachinakapar jiskʼachapxi. Ukatwa chacha puras jan ukax warmi puras sarnaqapxi, wachuq juchanaksa lurapxi ukat divorciasiñax janis kunäkaspa ukham uñjapxi. Mä arunxa, ‘jan walïki ukarux “waliw sapxiwa”’, ukat ‘walïki ukarusti “janiw walikiti” sapxarakiwa’ (Isa. 5:20). ¿Janit uka jan wali amuyunakax jiwasar mayjtʼaykstu? Jan walinakan uñjasisaxa, ¿chuymasarjamakit jaqinakan amuyuparjam kuns askichañ muntanxa? ¿Jan ukax Diosan iwxanakaparjamach askichtanxa?

15. ¿Amuyusar atinisiñat sipansa, kunar atinisiñas wakisispa?

¹⁵ Ukampis qullan ajayux Diosan Arupar respetañasatakiw yanaptʼistu. Kunjamtï salmonak qillqirix siskänxa, Diosan Arupax wali askiwa, sarnaqäwisatakisa thakisatakis mä qhanäkaspas ukhamawa (Sal. 119:105). Ukatwa amuyusar atinisiñat sipansa Bibliar atinistanxa. Ukhamatwa kunatix walïki jan walïki ukanak sum amuytanxa. Chiqasa, Diosan Aruparux wali respetompiw uñjtanxa, ukat jiwasatakix wali munatawa (Sal. 119:97).

Jesusat yatiqasipxañäni

16. ¿Jesusjam chuymanïñatakix kunas wakisi?

¹⁶ Diosan qullan ajayup katuqañ munasaxa “Cristo Tatitun amtäwinakapanï[ñasawa]” (1 Cor. 2:16). Ukat Jesusjam chuymanïñatakisa amtanïñatakisa, kunanaksa luräna, kuna tuqinakatsa lupʼïna ukanak yatxañasawa, ukat jupat yatiqasisin sarnaqañasarakiwa (Rom. 15:5; 1 Ped. 2:21). Ukampis ¿kunjamatsa Jesusat yatiqasitas uñachtʼaysna? Ukanak jichhax uñjarakiñäni.

17, 18. 1) ¿Mayisiñ tuqit kunsa Jesusat yatiqassna? 2) ¿Kunatsa Diosar walja kuti mayisiñax wakisi?

¹⁷ Diosat qullan ajayu mayisiñäni. Jan walinakar saykatañatakixa, qullan ajayumpi yanaptʼita sasaw Jesusax Awkipar mayisirïna (Luc. 22:40, 41). Jiwasatix taqi chuym mayisiñänixa, taqi chuymaw Diosax qullan ajayupampi yanaptʼistani (Luc. 11:13). Jesusax akham siwa: “Mayipxam, Diosax churapxätamwa; thaqapxam, jikxatapxarakïtawa; punksa liqtʼapxam, jistʼaratäpxarakïtawa. Mayirixa katuqiwa, thaqiristi jikxatarakiwa, punku liqtʼirirusti jistʼaratarakiwa” sasa (Mat. 7:7, 8).

¹⁸ Ukampis janiw may kutikix Diosar mayisiñasäkiti. Qullan ajayumpi yanaptʼayasiñatakix walja kuti ukat qhawqha tiempüy munaschini ukarjam mayisiñasawa. Ukampis awisaxa, qhawqsa Jupar atinistan ukat kunjam chuymampis mayistan uk uñjasaw Jehová Diosax tiempopar yanaptʼistu.a

19. ¿Kunas Jesusatakix wali wakiskirïnxa, ukat kunatsa jupat yatiqasiñasa?

¹⁹ Jehová Diosar istʼapuniñäni. Jesusax Awkipar kusisiykirpun taqi kuns luräna. Ukampis mä kutixa, sinti jan walin uñjasïna, Awkipan munañapa phuqañax jupatakix wali chʼamänwa. Ukhampachas Awkipar taqi chuym atinisisaw akham säna: “Jan munañaxa luratäpati, jan ukasti juman munañamak luraspan” sasa (Luc. 22:42). Ukat akham jisktʼasiñäni: “¿Chʼamäkipansa nayax Diosar istʼapuntti?” sasa. Diosar istʼasakiw wiñay jakañ katuqsna. Jupaw taqinirus jakañ churistu ukat kunatï jakañatakix munaski ukanaksa churarakistu. Ukhamasti, taqi kunansa taqi chuym istʼañasawa (Sal. 95:6, 7). Ukhamax Diosar istʼañax wali wakiskiriwa, jan istʼasax janiw kunjamtsa chuymapar purtʼksnati.

20. ¿Kunas Jesusatakix nayrankäna, ukat kunsa jiwasax yatiqassna?

²⁰ Bibliat sum yatxatapxañäni. Supayan yantʼataxa, Jesusax jankʼakiw kuntï Qullan Qillqatanakax yatichki uk chiqaki arsurïna (Luc. 4:1-13). Ukat yupaychäwi pʼiqtʼirinakan jan wali yatichäwinakapsa Qullan Qillqatanakampiw chiqañcharakïna (Mat. 15:3-6). Kuntï Diosax Arupan yatichki ukanak sum yatïna ukat ukarjamaw sarnaqarakïna (Mat. 5:17). Jiwasax ukhamarakiw Qullan Qillqatanakampi wal chʼamachasisax Diosar taqi chuym atinisiñ muntanxa (Fili. 4:8, 9). Ukampis Bibliat sapaki yatxatañatakisa, jan ukax familiamp chika yatiqañatakis janiw tiempox utjkiti sasaw yaqhip jilat kullakanakax sapxaspa. Chiqasa, janiw tiempox ina chʼusat utjkaspati, jan ukasti jiwasaw tiempo apsusiñasa (Efe. 5:15-17).

21. ¿Kunapachas Bibliat jukʼampi yatxatsna?

²¹ Bibliat sapa mayni yatxatañatakisa ukat familiana Diosaru yupaychañatakisa, Amuyasiri Chiqapa Uywataw tiempo apsusiñ yanaptʼistu (Mat. 24:45, MT). Ukampis ¿sapa maynit uka wakichäwinakat chʼamañchasisktanxa? “Cristo Tatitun amtäwinakapanï[ñatakixa]”, Bibliat apstʼat qillqatanakat yatxatañasawa. Ukat kuna tuqit jukʼamp yatxatañ munasasa, Índice de las publicaciones Watch Tower siski uka qillqatampi yanaptʼasiñasawa. Ukat Yatiyañataki sat revistampis yanaptʼasiraksnawa, 2008 marat 2010 marakamax “Jesusan yatichäwinakapa” sat wakichäwinakaw yatiyir sarañatak luratäki uka revistan utji. Niyakixay Diosan arunakap sum uñtʼañatakisa ukat jukʼamp yatxatañatakis wali askïchixa, ¿janit familiampi chikax ukham yatichäwinakat yatxatañax wakiskaspa?

Akapachar atipsnawa

22, 23. ¿Akapachar atipañatakix kun lurañasasa?

²² Diosan qullan ajayupampi yanaptʼayasiñ munasaxa, akapach ajayur taqi chʼamampi saykatañasawa (Jud. 3). Ukhamatakwa janix aynachtʼkañäniti. Jesusax akham sänwa: “Akapachanxa jumanakax tʼaqhisipxätawa, ukampis chʼam katxatapxam, nayax akapacharux atipjtwa” sasa (Juan 16:33).

²³ Jiwasax ukhamarakiw akapachar atipjsna. Ukatakix Jehová Diosan qullan ajayupa katuqañataki ukat akapach ajayur saykatañataki wal chʼamachasiñasawa. Ukat “Diosatix jiwasampï[nixa], ¿khitirak jiwas conträspasti?” (Rom. 8:31). Diosan qullan ajayup katuqañäni ukat kuntï Biblia tuqix yatichkistu ukarjam sarnaqañäni ukhaxa, wali kusisitaw jakasiñäni. Ukat niyaw mä suma uraqin wiñayataki wali sum jakasxañäni.

[Qhanañchäwi]

Yatiqawaytanti

• ¿Kunatsa akapachankir ajayux wali chʼamanixa?

• ¿Kuna pusi tuqinakat jisktʼasiñas wakisispa?

• ¿Diosan qullan ajayup katuqañatakix kunanaksa Jesusat yatiqasiñasa?

[8 janan fotopa]

¿Kunjamats yaqhip angelanakax saxrar tukupxäna?

[10 janan foton]

Akapach ajayumpiw Supayax jaqinakar apnaqi, ukampis antutayassnawa