¿Kunas Diosan munañapajja?

Mä paraíso Oraqen wiñayatak kusisita ukat sumankañan jakassna ukwa Jehová Diosajj muni.

Ukampis “¿kunjamarak ukhaman jakassnasti?” sasin inas jisktʼasta. Diosan Reinopaw ukham jakasiñ utjayani sasaw Bibliajj qhanañchi. Ukat taqe kun Luriri Jehová Diosajja, aka oraqetakejj kuna amtanisa, Reinopajj kunjamänisa uk taqen yatipjjañapwa muni (Salmo 37:11, 29; Isaías 9:7).

Diosajj sum jakasiñaswa muni.

Kunjamtï mä munasir awkejj wawanakapan sum jakasipjjañap munkejja, ukhamarakiw alajjpachankir Awkisajj wiñayataki kusisit jakasiñas muni (Isaías 48:17, 18). Ukat “Diosan munañap lurki ukajj wiñayatakiw ja[kani]” sasaw Arupanjj sarakistu (1 Juan 2:17).

Diosajj thakhipan sarnaqañaswa muni.

Bibliarjamajja, taqe kun Luriri Jehová Diosajj ‘thakhinakapatwa yatichañ’ munistu ukhamat “thakipan sarnaqañasataki” (Isaías 2:2, 3). Ukat ‘Jupatakiw mä marka’ uttʼayawayi, ukhamat Munañapajj aka Oraqpachan yatiyasiñapataki (Hechos 15:14).

Diosajj mayachtʼat yupaychañaswa muni.

Tʼaqa tʼaqa sarnaqayañat sipansa, cheqa yupaychäwejj taqe chuyma munasipjjañapatakiw jaqenakar yanaptʼi (Juan 13:35). ¿Khitinakas taqe markankir jaqenakar Diosar mayachtʼat servipjjañapatak yanaptʼasipki? Uka jisktʼar qhanañchañatakejja, aka folletot yatjjatañamajj wali askïspawa.