4 yatichäwi
Diosax amtanakapat yatiyistu
1, 2. Diosax taqi chuym Jupar thaqirinakarux qhanañchiwa, ¿kunjamatsa uk yattanxa?
WALI munasir Diosax khitinakarutï taqi chuyma Jupar thaqhapxi ukanakaruw amtanakap yatiyi. Ukat kunatsa tʼaqhisiñanak jan tukjpacha uksa wali sum qhanañcharaki.
2 Bibliax akham siwa: “Jumatix jupar thaqtätaxa, jupasti jumarux jikxatayasïtamwa”. “Mayni Diosaw utji alaxpachana, khititix taqi imantata [yatiñanaka] qhanañchki uka.” “[Jehová] Tatitux janipuniw kuns lurkaspati profeta servirinakaparu jan yatiyasaxa” sasa (1 Crónicas 28:9; Daniel 2:28; Amós 3:7).
¿Kawkinsa qhanañchäwinak jikxatsna?
3. ¿Kunatsa Diosax tʼaqhisiñanak jan tukjpacha, uk yatiñatakix kawkinsa qhanañchäwinak jikxatsna?
3 Kunatsa tʼaqhisiñanakar jan tukjpacha ukat kunsa uk tukjañatakix lurani uka jisktʼanakar qhanañchañatakixa, Jupan amuytʼayat qillqatanakaw utji. Uka qillqatanakax Qullan Arupawa. “Taqi Qillqatasti Diosan amuytʼayatawa, askirakiw yatichañataki, chiqachañataki, ukhamarak qʼuma jakañan sarnaqañ yatichañatakisa, ukhamat Diosankïrinakax wali yatiñanïpxañapataki, taqi casta suma luräwinakatak suma wakichatäpxañapataki.” (2 Timoteo 3:16, 17.)
4, 5. ¿Kunatsa Bibliax jan yaqha libronakjamäkpacha?
4 Bibliax jan kikpan librowa. Biblianxa nayra sarnaqäwinakatxa chiqpachpun parli ukat janïra jaqinakax aka Uraqin utjkäna ukanakatsa qhanpun parlaraki. Phuqaskir profecianakani librorakiwa, jichhürunakatak qillqatäkäna ukax phuqasiskiwa ukat jutïrinsa phuqasirakiniwa.
5 Janipuniw yaqha librox sarnaqäwi tuqit ukham parlkaspati. Amuytʼañataki, mä qhawqhakiw nayra uñtʼat qillqirinakan libronakapax utjxi. Ukampis Bibliatxa walja qillqaqatanakaw utji: Hebreo arut Qullan Qillqatanakatxa (39 libronaka “Nayra Testamento”) niya, 6.000 qillqaqatanakaw utji, ukat Griego arut Qullan Qillqatanakatxa (27 libronaka “Machaq Testamento”) niya, 13.000 qillqaqatanakaw utjaraki.
6. Bibliasax Diosan amuytʼayata, amparamp nayra qillqaskäna uka kikpakiwa ¿kunatsa ukham sisna?
6 Bibliax taqi chʼaman Diosan amuytʼayatawa ukat juparakiw jan mayjtʼayasiñapatakix uka amparamp qillqaqatanakxa uñjarakïna. Ukatwa Bibliasaxa, amparamp nayra qillqaskäna ukham kipkakixa. Griego arut Qullan Qillqatanakaxa, nayraqat qillqaskäna uka waranqa maranak qhipatwa qillqaqasitayna ukaw uka yatiñatakix yanaptʼistu. Ukham amparamp qillqaqatanakaxa jukʼakiw utjxi.
Diosan mä suma churäwipa
7. ¿Qhawqhsa Bibliax lakirasiwayi?
7 Bibliax niya taqinin utji, janipuniw yaqha librox ukham lakiraskiti. Millón millonanakaw Bibliax lurasiwayi. Janipuniw yaqha librox ukham lurasiwaykiti. Ukat taqpach Bibliaxa jan ukax chikatakisa, niya 2.400 arunakaruw jaqukipasiwayi. Ukhamasti, Uraqpachanxa sapa tunkatxa llätunkaniw Biblianïpxi.
8-10. ¿Kunatsa Bibliax liyiñasapuniw sasax sisna?
8 Bibliaxa, Diosan amuytʼayatapunïskiwa, uk sañatakixa, walja uñachtʼäwinakaw utji.a Ukatwa liyiñasapuni, ukanwa kuna amtampis jaqir lurawayi, kunatsa jan waltʼäwinakax utjaskaki ukat kunsa jutïrin lurani, ukxa Bibliax wali sum qhanañchistu. Janipuniw yaqha librox ukham qhanañchkaspati.
9 Jïsa, Biblia tuqiw Diosax jaqinakarux parli. Jupaw qullan ajayupamp niya 40 jaqinakar qillqayatayna. Ukhamaxa, Diosax Qullan qillqatanakap tuqiw parlistu. Apóstol Pablox akham sasaw qillqatayna: “Kunapachatix jumanakax Diosan arunakap istʼapxta nanakax qhanañchapkayasma ukkhaxa, jumanakax janiw jaqinakan arunakapjamti katuqapkäyätaxa, jan ukasti Diosan arunakapjamwa katuqapxta. Chiqpachansa Diosan arunakapawa” sasa (1 Tesalonicenses 2:13).
10 Abraham Lincoln sat Estados Unidos mark apnaqir chachax akham sasaw säna: “Diosan wali suma churäwipawa, janipuniw jaqix ukham churkaspati [...] janitï Diosax uk churkaspäna ukhaxa, kunatï askïki ukat jan walïki ukxa janiw yatkasänti” sasa. Ukhamaxa, uka suma churäwixa, kunjamsa jan waltʼäwinakax qalltawayi, kunatsa jan tukjawayki ukat kunsa jutïritakix lurani, ¿taqi ukanakat kamsistusa?
[Qhanañchäwinaka]
a Bibliax Diosan Arupapuniti janicha uk jukʼamp yatxatañatakixa, La Biblia... ¿la Palabra de Dios, o palabra del hombre?, uka libro uñxattʼäta, ukax Diosan Qhanañchirinakapan español arut luratawa.
[10 janan fotopa]
Bibliaxa Diosan amuytʼayatawa, uka tuqitwa jaqinakar parlistu