Jehová Diosaw imantasiñasajja

1, 2. Jehová Diosan yupaychirinakapajj ¿kunjamsa akapachan jikjjatasipjje? ¿Kuna utjäwinïpjjesa?

AKAPACHANJJA, ¿utamankkasmas ukhamti amuyasta? Janitï ukhamäkchejja, janiw jumakejj ukham amuyasktati. Jehová Diosaru cheqpach munasirinakajja, nayratpachaw sarir jaqenakjam akapachan jikjjatasipjjäna. Amtañäni, Jehová Diosaru taqe chuyma yupaychirinakapajj Canaán oraqen mä cheqan jakkasin yaqha cheqar sarasajja, “sarir jaqenakäpjjatap[wa]” yatiyapjjäna (Heb. 11:13).

² Jupanakjamarakiw Jesusan ajllit arkirinakapajj jikjjatasipjjäna, jupanakajj “alajjpachankir jaqenakä[pjjänwa]” ukat ‘sarir jaqenakjamaw’ akapachan jakapjjarakïna (Fili. 3:20; 1 Ped. 2:11). Ukat Jesusan “yaqha ovejanaka[pajja]”, ukhamarakiw “jan akapachankirï[pkiti]”, kunjamatejj jupajj jan akapachankirïkäna ukhama (Juan 10:16; 17:16). Ukhamäpkchisa, Diosan yupaychirinakapajj mä utjäwinïpjjewa. Uk janis nayrasampi uñjkstanjja, ukajj wali sumwa jarkʼaqestu. ¿Kunas uka utjäwisajja? Uka toqet akham sasaw Moisesajj säna: “Tatay, mitat mitjjar jaqenak taypinjja, jumaw nanakan imantasiñajjätajja, [jan ukajj utjäwijätajja]” sasa (Sal. 90:1). ¿Kunjamsa Jehová Diosajj nayra yupaychirinakapatakejj mä cheqpach imantasiñänjja? Khitinakatï jichhürunakan Sutip apapki ukanakatakejja, ¿kunjamatsa mä cheqpach imantasiñaraki? Ukat jutïrinjja, ¿kunjamsa mä cheqpach imantasiñasäni?

¿KUNJAMSA DIOSAJJ NAYRA YUPAYCHIRINAKAPATAKEJJ MÄ CHEQPACH IMANTASIÑÄNJJA?

3. Salmo 90:1 qellqatarjamajja, ¿kunampi sasis Jehová Diosajja, ukat kunatsa?

³ Bibliajj uñachtʼäwinakampiw Jehová Diosat parlistu, ukhamat kunjamäkitejj Jupajj uk sum amuytʼañasataki. Salmo 90:1 qellqatanjja, mä imantasiñäkaspasa, jan ukajj mä utjäwikaspas ukhamwa Jehová Diosat parli. Kunapachatï mä utjäwit parlktan ukhajja, kawkhantï munasiñasa, sumankañasa ukat jarkʼaqasiñas utjki uka cheqatwa parltanjja. ¿Kunatsa Jehová Diosajj mä utjäwimpi sasispa? Jehová Diosajj “munasiñawa” sasaw Bibliajj qhanañchi (1 Juan 4:8). Sumankañ Diosawa ukat servirinakaparojj jarkʼaqarakiwa sasaw qhanañcharakistu (Sal. 4:8, NM). Kunjamsa Jehová Diosajj Abrahamaru, Isaacaru ukat Jacob chachar jarkʼaqäna uka toqet jichhajj amuytʼañäni.

4, 5. ¿Kunjamsa Jehová Diosajj Abrahamatakejj mä cheqpach imantasiñänjja?

⁴ Kunapachatï Abrahamajj Abram satäkäna ukhajja, kunjamsa aka arunak istʼasin jikjjataspachäna uk amuysnawa, Jehová Diosajj akham sasaw jupar säna: “Oraqem apanukuwayjjam, parientenakamsa [...], kawkïr oraqtejj nayajj uñachtʼaykäm ukar sarjjañataki” sasa. Uk istʼasajj inas jupajj ajjsarayaschïna, ukampis Jehová Diosan aka arunakap istʼasaw chuymachtʼat jikjjataspachäna: “Wawanakamampisti mä jachʼa marka tukuyäma, bendecirakïmawa, sutimsa jachʼaruw aptarakëjja [...]. Khitinakatejj bendecipjjätam ukanakarojj nayaw bendecirakï, maldecipkätam ukanakarusti nayaw maldecirakï” sasa (Gén. 12:1-3).

⁵ Uka arunakampiw Jehová Diosajj Abrahamaru ukat wawanakaparusa jarkʼaqañataki arsuwayäna (Gén. 26:1-6). Ukat arsutaparjamaw phoqhäna. Abrahamar jan jiwayapjjañapataki ukat Sara warmipamp jan ikintasipjjañapatakisa, Egipto marka apnaqer faraonatsa ukat Gerar marka apnaqer Abimelec reyitsa jarkʼaqänwa. Ukhamarakiw Isaacarusa ukat Rebeca warmiparus jarkʼaqäna (Gén. 12:14-20; 20:1-14; 26:6-11). Bibliajj akham siwa: “Diosajj janiw khitin tʼaqhesiyañaps munkänti, jupanak laykuw reyinakarus mutuyäna. Jupajj sänwa: ‘Ajllitanakajjarojj jan llamktʼapjjamti, profetanakajjarojj jan ñanqha lurapjjamti’” sasa (Sal. 105:14, 15).

6. ¿Kun lurañapatakis Isaacajj yoqapar säna, ukat kunjamakis Jacob chachajj jikjjataspachäna?

⁶ Jehová Diosajj ukhamarakiw Jacob sat Abrahaman allchhiparojj uñjäna. Kunapachatï jupajj casarasiñ munkäna ukhajja, akham sasaw Isaac awkipajj säna: “Janipun aka Canaán oraqen jakir warminakampi casarasimti. Padan-aram sata oraqer sarjjam Betuel achachilaman utaparu, ukansti Labán tioman mä phuchapampi casarasim” sasa (Gén. 28:1, 2). Jacob chachasti, jan pächasisaw istʼäna. Ukat Canaán markan familiapampejj wali suma ukat jarkʼaqatas jakaskchïnjja, wali jaypun Harán markar puriñkam saräna, ukat inas sapaki sarchïna (Gén. 28:10). Inas jupajj akham jisktʼaschïna: “¿Qhawqha tiempos chʼusasëjja? ¿Tiojajj sumti katoqtʼpachïtani, ukat Diosar ajjsartʼir warmti churpachïtani?” sasa. Ukhamsa llakiskchïnjja, Qhana (Luz) markar purisajj janiw llakisjjänti, uka markasti, Beerseba markat 100 kilometronaka jayankänwa. ¿Kunas uka cheqan pasäna? (Gén. 28:19.)

7. ¿Kunsa Jehová Diosajj Jacob chachar mä samkan säna?

⁷ Uka markanjja, Jehová Diosaw mä samkan uñstäna ukat akham säna: “Nayaw jumampïskta, kawkirutejj sarkät ukan imaskapunïmawa, ukatsti uka pachpa oraqeruw kuttayanirakïma. Janipuniw antutkämati jan arsutajjar phoqhasajja” (Gén. 28:15). ¡Uka arunakajj walpunwa Jacob chacharojj chuymachtʼpachäna! Kunjamakis Jehová Diosajj arsutap phoqhani uk uñjañatakejj wali kusisitaw Jacob chachajj saraski, ¿uk amuyasmati? Jumatï Diosar serviñataki yaqha markar sarjjstajja, kunjamakis Jacob chachajj jikjjataspachäna uk amuyasmawa. Ukat kunjamsa Jehová Diosajj bendiciwaytam uks amuyarakpachätawa.

8, 9. ¿Kunjamsa Jehová Diosajj Jacob chachatakejj mä cheqpach imantasiñänjja? ¿Kunsa ukat yateqtanjja?

⁸ Kunapachatï Jacob chachajj Harán markar purkäna ukhajja, Labán tiopajj wali sumwa katoqtʼäna. Qhepatjja, Lea ukat Raquel phuchhanakaparuw warmipäñapataki churäna. Ukampis qhepatjja, munañaparukiw irñaqayañ munjjäna, ukat tunka kutiw pagopsa mayjtʼayäna (Gén. 31:41, 42). Ukham luratasa, aguantaskakïnwa. Ukat Jehová Diosaw imaskitani sasaw atinisïna. Ukatwa Jehová Diosajj bendicïna. Kunapachatï Canaán markar kutʼjjäna ukhajja, Jacob chachajj “walja ovejanakanïnwa, esclavonakani, esclavanakani, camellonakani, asnonakani kuna” (Gén. 30:43). Jacob chachajj walpunwa Jehová Diosar yuspäräna ukat akham mayisïna: “Janiw kuna askïktsa juman nayar khuyapayasiñamampi, ukhamarak cheqa kankañamampi uñjatäñatakejja. Nayajj aka Jordán jawira pasayäta, thujru aytʼata mayaki, jichhasti pä tama yänakaniw jikjjatasta” sasa (Gén. 32:10).

⁹ Kuntï Moisesajj oracionan säna ukajj chiqapuniskänwa: “Tatay, mitat mitjjar jaqenak taypinjja, jumaw nanakan imantasiñajjätajja” (Sal. 90:1). Uka arunakajj jichhürunakansa cheqäskakiwa, kunattejj Jehová “Diosajj pachpakipunïskiwa, janirakiw jupanjja sarir chʼiwir uñtatas utjkiti”, Jupar taqe chuyma yupaychirinakapatakejj mä cheqpach imantasiñakïskiwa (Sant. 1:17). Jichhasti uka toqet amuytʼañäni.

JICHHÜRUNAKANJJA JEHOVÁ DIOSAJJ CHEQPACH IMANTASIÑASAKÏSKIWA

10. Jehová Diosajj yupaychirinakapatakejj mä cheqpach imantasiñakïskiwa sasinjja, ¿kunatsa taqe chuyma atinissna?

¹⁰ Aka toqet amuytʼañäni: tribunal nayraqatanwa mä wali qhoru ukat wali munañani chacha contra jan wali luräwinakapat qhanañchasktajja. Jupasti wali kʼari ukat jiwayiri jaqewa, ukat oraqpachanwa yanapirinakapajj utjaraki. ¿Tribunalat mistunkasajj sumakit jikjjatasisma? ¿Janit ajjsarayaskasma? Jïsa, ajjsarayasismawa. Ukatwa jarkʼaqatäñatakejj yanaptʼa mayismajja. Niya ukhamanwa Jehová Diosan yupaychirinakapajj uñjastanjja, kunattejj jan ajjsarasaw Supayan jan wali luräwinakap contra qhanañchtanjja ukat Jehová Dios toqet saytʼastanjja (Apocalipsis 12:17 liytʼasiñapawa). Supayajj kunaymanitwa Diosan markapar amuktʼayañatak chʼamachasiwayi, ukampis ¿amtap phoqhawayiti? Janiwa. Cheqansa, Diosar yupaychañanjja nayrar sartaskaktänwa, ¿kunatsa? Kunattejj Jehová Diosaw cheqpach imantasiñasajja, yamas aka qhepa urunakanjja jukʼampwa jarkʼaqestu (Isaías 54:14, 17 liytʼasiñapawa). Ukampis jiwasatï imantasiñasat Supayampi jayarstʼayassna ukhajja, janiw Diosajj jarkʼaqjjestaspati.

11. ¿Kunsa Abrahamata, Isaacata ukat Jacob chachat yateqaraksna?

¹¹ ¿Kunsa Abrahamata, Isaacata ukat Jacob chachat yateqaraksna? Canaán markansa jakapkchïnjja, janiw uka markankirinakampejj chikachasipkänti, ukat jan wali luräwinakapsa uñisipjjänwa (Gén. 27:46). Jupanakajj Diosan kamachinakaparjamaw sarnaqapjjäna, janiw kuntï lurapjjañapäkäna ukat jan lurapjjañapäkäna ukatak mä listajj wakiskänti. Jan ukasti, kunsa Diosajj uñisi ukat kunsa munasi uk yatipjjañapakiw wakisïna. Niyakejjay Jehová Diosajj imantasiñapächïnjja, janipuniw akapachan luräwinakapar jakʼachasiñ munapkänti. ¡Ukajj jiwasatakejj yateqaskayapuniwa! ¿Kʼuchirtʼäwinaka jan ukajj amigonaka ajlliñatakejj Diosan nayra yupaychirinakapat yateqasisktänti? Yaqhep jilat kullakanakajj Supayan apnaqat akapachan sumakis jikjjatasipkaspa ukhamwa uñachtʼayapjje. Jumatï mä jukʼakis ukham jikjjatastajja, Jehová Diosaruw oracionan mayisiñama. Ukat janipun ak armamti: akapachajj Supayankiwa, jupasti jan sinttʼasiri ukat jupatakik kuns muniri ukhamawa, akapachajj ukhamarakiwa (2 Cor. 4:4; Efe. 2:1, 2).

12. 1) ¿Kunjamsa Jehová Diosajj yupaychirinakapar yanaptʼi? 2) ¿Kuna yanaptʼanaktï Jehová Diosajj churkistu ukanakat lupʼisajj kunjamsa jumajj jikjjatasta?

¹² Supayan sipitanakapar jan jaltʼañatakejja, kuna yanaptʼanaktï Jehová Diosajj yupaychirinakaparu churkistu ukanakat askinakwa apsuñasa. Ukanakajj akanakawa: tantachäwinaka, familiana Diosar yupaychañataki aruma ukat irpir chuymaninaka, jupanakaruw Jehová Diosajj jiwasar chuymachtʼañapataki ukat jan waltʼäwinakan yanaptʼañapatak uttʼayawayi (Efe. 4:8-12). Oraqpachan Jilïr Irpirinakjam walja maranak irnaqtʼir George Gangas jilatajj akham sänwa: “Diosan yupaychirinak taypinkta ukhajja, utajansa familiajamp jikjjataskirista ukham amuyasta, mä paraisökaspas ukhama”. ¿Jumajj ukhamarakti amuyasta?

13. ¿Hebreos 11:13 qellqatat yatjjatasajj kuna aski yatichäwsa yateqsna?

¹³ Abrahamata, Isaacata ukat Jacob chachat akarakwa yateqassna. Jupanakasti janiw uka tiempon jakir jaqenakjamapkänti. Kunjamtï nayrïr tʼaqan yatjjataniwayktanjja, “sarir jaqenakäpjj[twa]” sasaw sapjjäna (Heb. 11:13). ¿Jumajj jan akapachankir jaqenakjamätam uñachtʼayaraktati? Ukhamäñajj chʼamakïspawa. Ukampis Jehová Diosana ukat jilat kullakanakan yanaptʼapampejj uk lursnawa. Janiw jumakejj ukhaman uñjasktati, jan ukasti walja jilat kullakanakaw ukhaman uñjasipjjaraki. Cheqpachansa, taqe khitinakatï Diosar yupaychañ munapktan ukanakaw Supayampi ukat jupan apnaqata akapachampi nuwastanjja (Efe. 6:12). Jehová Diosarutï confiyañäni ukat imantasiñasarjam uñjañäni ukhajja, atipjsnawa.

14. ¿Kuna ‘suma uttʼayata marksa’ Abrahamajj suyäna?

¹⁴ Diosajj kuntï churämaw siskäna uk taqe chuymaw Abrahamajj suyäna, jiwasajj uk yateqasiraksnawa (2 Cor. 4:18). “Abrahamajj suytʼaskarakïnwa suma uttʼayata marka, uka markan luriripajja Diosawa” sasaw apóstol Pablojj säna (Heb. 11:10). “Suma uttʼayata marka[sti]”, Cristojj Diosan Apnaqäwipan apnaqki ukawa. Uk puriniñapwa Abrahamajj suyañapäna. Jiwasajj janiw jupjam suyktanti, kunattejj Cristojj alajjpachan apnaqjjewa. Ukat Biblian profecianakarjamajja, niyaw Oraqe apnaqjjani. ¿Diosan Apnaqäwipajj jumatakejj cheqati? ¿Jakäwiman Diosan Reinopat nayranki ukat akapachat jitheqtaraktati? (2 Pedro 3:11, 12 liytʼasiñapawa.)

JEHOVÁ DIOSAJJ JUTÏRIN MÄ CHEQPACH IMANTASIÑASÄNIWA

15. ¿Khitinakatï akapachar confiyapki ukanakarojj kunas pasani?

¹⁵ Janïr akapach tukuskipanjja, jan waltʼäwinakajj jiljjattaskakiniwa (Mat. 24:7, 8). Ukat jachʼa tʼaqhesiñ uru qalltkani ukhajja, jukʼampiw jan waltʼäwinakajj jiljjattani. Kunanakatejj jakañatak wakiski ukanakajj pistʼaniwa ukat akapachankir organizacionanakas qʼalaw aynachtʼani, ukatwa jaqenakajj wal ajjsarayasipjjani (Hab. 3:16, 17). Ukat jan kun kamachirjamäsajja, qhespiyasiñatakejj ‘qarqa pʼiyanakaruw imantasiñ’ thaqhapjjani (Apo. 6:15-17). Ukat jichhürunakanjja, politiconakasa, jachʼa alakip luririnakas uka qarqar uñtatäsipkchisa, uka urunjja janiw khitirus jarkʼaqkaniti.

16. ¿Kunja askitsa tamanakar uñjañasa, ukat kunatsa?

¹⁶ Jehová Diosajj yupaychirinakapar jarkʼaqaskakiniwa. Habacuc profetjamarakiwa akham sapjjani: “Kusisiñamp phoqtʼatakïskäwa, Dios Tatitojjay nayan qhespiyirejjächejja uka layku” sasa (Hab. 3:18). Jan waltʼäwi urunakanjja, ¿kunjamanakatsa Jehová Diosajj mä cheqpach imantasiñasäni? Uk uñjañatakejj suytʼañasawa. Ukat kunjamtï israelitanakajj Egiptot mistjjasajj mayachtʼatäpkäna ukat kunsa lurapjjañapäna uks Diosat katoqasipkakïnjja, ukhamarakiw Jehová Diosan markapajj mayachtʼatasipkakini ukat kuntï lurapjjañapäki uks Diosat katoqapjjani (Éxodo 13:18 liytʼasiñapawa; Apo. 7:9). Ukanaksti Diosajj inas tama toqe yatiychistani. Ukat Isaías 26:20 qellqatan parlki uka imantasiñ utanakajja, oraqpachan waranq waranqa tamanakajj utjki ukanakampi sasiwa (liytʼasiñapawa). ¿Tamanakan apaski uka tantachäwinakarojj wali askitti uñjtanjja? ¿Kuntï tantachäwinakan ewjjtʼkistu uk istʼasin jankʼakit ukarjam lurtanjja? (Heb. 13:17.)

17. Diosan yupaychirinakapat khitinakatï jiwatäjjapjje ukanakatakejj Jehová Diosajj imantasiñapakïskiwa sasajja, ¿kunatsa sissna?

¹⁷ Diosar taqe chuyma yupaychirinakat janïr jachʼa tʼaqhesiñ uru qalltkipan jiwapkani, ukanakatakejj Jehová Diosajj mä imantasiñakïskaniwa. ¿Kunjamsa? Jupaw jupanakar jaktayani. Abraham, Isaac ukat Jacob chachanakan jiwatap walja maranak qhepatjja, akham sasaw Jehová Diosajj Moisesar säna: “Nayätwa nayra awkinakaman Diosapajja, Abraham, Isaac, Jacob ukanakan Diosapajja” sasa (Éxo. 3:6). Uka arunak aytasajja, Jesusajj akham sarakïnwa: “Diosasti janiw jiwatanakan Diosapäkiti, jan ukasti jakirinakan Diosapawa, jupatakisti taqeniw jakasipki” (Luc. 20:38). Uka arunakarjamajja, Diosan taqe chuyma yupaychirinakapajj jiwatäpkchisa, Jupatakejj jakasipkakispas ukhamawa, ukatwa Diosajj jupanakar jaktayani (Ecl. 7:1).

18. Machaq jutïr pachanjja, ¿kunjamas Jehová Diosajj markapatakejj mä cheqpach imantasiñakïskani?

¹⁸ Machaq jutïr pachanjja, Jehová Diosajj markapatakejj mä cheqpach imantasiñakïskaniwa. Apocalipsis 21:3 qellqatajj akham siwa: “¡Akajjay, Diosajj jichhajj jaqenak taypinwa jaki! Jupanakampiw jakani” sasa. Qalltanjja, Jehová Diosajj Jesucristo toqew markapampïni. Ukampis Jesusajj Waranqa Maranak apnaqañ tukuyjjani ukhajja, kuna amtanïkäntï Diosajj aka Oraqetakejj uk phoqhasajj Dios Awkiparuw Reino katuyjjani (1 Cor. 15:28). Ukhat aksarojja, jan juchan jaqenakarojj janiw Jehová Diosajj Jesús toqe apnaqjjaniti, kunattejj Jupaw jiwasampëjjani. ¡Uka suma suytʼäwinïtanwa! Ukhamasti, Jehová Diosan nayra yupaychirinakapat yateqasisaw jichhürunakan Jehová Diosarojj mä cheqpach imantasiñasarjam uñjañasa.