¿Kunat qhespiyatäñs muntanjja?

Wiñay jan chuymankipstas jakañajj kunja sumäspasa uk qalltatpachwa jaqenakajj wal munapjjäna. Ukampis janiw ukhamäkiti, taqeniw jiwirïtanjja. Qalltan siski uka arunakjja, kimsa waranqa maranak nayras Job chachajj arsuwaykchïnjja, uka arunakajj jichhakamas cheqakïskiwa.

Taqeniw jan jiwasa wiñay jakañ wal muntanjja. Diosaw chuymasar uka amta uchawayistu, kunatï wiñayäki uk yatiñ munañsa sasaw Bibliajj qhanañchi (Eclesiastés 3:11). Mä munasir Diosajj ¿kuntï jan phoqerjamäki uk chuymasar inamay uchaspati? Cheqas Jupajj janiw uk lurkaspati. Jiwañajj uñisirisawa ukat niyaw ‘qʼala tʼunjatarakïni’ sasaw Biblian qhanañchi (1 Corintios 15:26).

Cheqas jiwañajj uñisirisapunïskiwa ukat janiw pächasksnati. Jiwañjja, janiw khitis munktänti. Antisas kuna jan walis utji ukhajj jankʼakiw jitheqttanjja. Usunttan ukhasa, jankʼakiw qollayasir sartanjja. Jan jiwañatakejj kuntï jan lurañjamäki uksa lurtanwa.

Jiwañajj waranq waranqa maranakas utjkchejja, ¿cheqapunit jan mayampitak chhaqtaspa? Jïsa chhaqtaniwa. Jehová Diosajj janiw mä qawqha maranak jakañasatakik lurawaykistuti. Qalltatpachsa janiw ukajj amtapankkänti. Jupajj aka Oraqen wiñay jakasiñaswa munäna, ukhamajj kuntï Jupajj arski ukjja, phoqapuniniwa (Isaías 55:11).

¿Kunjampunsa Diosajj jiwañar tukjpachäni? Jaqenakajj nayratpachwa jiwañar atipjañatakejj chʼamachasiwayapjje, ukampis janiw atipjapkiti. Jichhakamas chʼamachasisipkakiwa. Cientificonakajj qollanaka, vacunanakwa apsuwayapjje ukajj mä qawqha usunak chhaqtayarakiwa. Jaqenakajj kunjam luratätansa uksa yatjjatasipkarakiwa. Pasïr patak maranakat sipan jukʼampsa walja cheqanakan jakapkchejja, jiwañarojj janikipuniw atipjksnati. Kunjamtï Biblian siskejja, jiwjjasajj ‘taqeniw laqʼaru tukjjapjje’ (Eclesiastés 3:20).

Ukampis wali suma yatiyäwinakaw utji: cheqas janiw jaqenakan uk askichañap suyksnati. Ukampis Jehová Diosajj niyaw jiwañat qhespiyjjestani, uka amtap phoqañatakejj Jesucristoruw ajlliwayi.