Septiembre phajjsitjja, Cristianjam Jakañataki ukat Yatiyañataki sat wakichäwin mä machaq yanaptʼaw yatiyañatak utjani. Ukajj “Kunatï cheqäki uk yatichañäni” sat pʼeqeñchäwinïniwa. Uka machaq yanaptʼajja, Biblian cheqa yatichäwinakap mä jisktʼampi ukat Biblian mä jiskʼa tʼaqapampi parlañatakiw yanaptʼistani.

Utanitï wali sum istʼistani ukhajja, Bibliat apstʼat mä qellqatwa jaytsna, jan ukajj mä video uñtaysna. Ukatjja jankʼakiw yatjjatañ munapkani ukanakar visittʼañasa. Uka machaq yanaptʼasa ukat tantachäwin yateqerinakajj arstʼapkani ukanakasa ¿Kunsa Bibliax chiqpachapuni yatichi? sat libron yatichäwinakapat apstʼatäniwa. Uka librotwa jaqenakar wasitampi visittʼañatakisa, Bibliat yatichañatakisa yaqha jisktʼanak apssna.

Jakañaru apir mä sapa thakikiw utji (Mt 7:13, 14). Niyakejjay kunayman jaqenakar yatiystanjja, Biblian cheqa yatichäwinakapampi chuymanakapar purtʼañatakiw chʼamachasiñasa (1Ti 2:4). Biblian cheqa yatichäwinakapat jaqenakar yatiyañasa ukat ‘cheqaparu Tatitun arunakap parlañasa’ Jehová Diosar kusisit chuymampi yupaychañatakiw yanaptʼistani. Ukhamarus Biblian cheqa yatichäwinakapjja, taqeniruw wali sum yatiyarakiñäni (2Ti 2:15).

Aka oraqpachanjja, taqeniw chuymachtʼatäñ muntanjja (Ec 4:1). Septiembre phajjsejja, Yatiyañataki revistampiw yatiyaskañäni. Uka revistajj kunjamsa Diosajj chuymachistu uka toqetwa qhanañchaskani. Cheqas jaqenakar chuymachtʼañ muntanjja, ukatwa khitinakatï istʼapkistu ukanakarukiw revista jaytañasa.

¿KAMSASAS YATIYSNA?

“Taqeniw chuymachtʼatäñ muntanjja. Ukhamajj khitis ¿chuymachtʼistaspa? [2 Corintios 1:3, 4 liytʼäta]. Aka revistajja, Diosajj kuna toqes chuymachistu ukwa qhanañchaski”.

Utanitï revista katoqasini ukat jukʼamp yatjjatañ munani ukhajja:

¿KUNATSA BIBLIAT YATJJATAÑAMA? SAT VIDEO UÑTAYÄTA

Ukatjja Bibliat yateqañapatakiw chʼamañchtʼäta.

WASITAMPI KUTTʼAÑATAKIW AMTÄTA

Kuttʼañatakejj mä jisktʼa jaytawayäta. Inas akham sischisma: “¿Kunatsa Diosajj tʼaqhesiñanak utjayaskaki?” sasa.