Jan wali reyitwa escapapjjäna

Joseajj mä yatiyäwi yatiyañatakiw Mariar ikit jankʼak sartayäna. ¿Kunatsa? Jehová Diosan angelapaw Josearojj mä samkan uñstasin akham säna: “Sartam, wawampir mamapampir irpjjarusin Egiptor sarjjam, nayajj siskäma ukapachkam uka markankam; Herodes reyejj wawar jiwayañatakiw thaqani” sasa (Mateo 2:13).

Ukhamasti Joseampi Mariampejj arumpachaw wawapampi sarjjapjjäna. Jupanakajj horasaparuw escapapjjäna. Herodesajj warawaranak uñchʼukisin yatirinakajj jupar engañjapjjatap amuyasïna ukhajja, wal colertʼasïna. Yatirinakajj Jesusajj kawkinkänsa uk yatiyañatakiw kuttʼapjjañapäna, ukampis janiw kuttʼapkänti, jan ukasti yaqha thaknamwa sarjjapjjäna. Ukatwa Herodesajj Jesusar jiwayañ munasajj Belenankiri, ukhamarak uka cheqanakan jakiri taqe yoqall wawanakar jiwarayapjjam pä maranit aynacharu sasin säna. ¿Kunatsa pä maranit aynacharu sispachäna? Ukjja kuntï inti jalsu toqet jutir yatirinakajj sapkäna ukarjamaw tantiyäna.

¡Taqe yoqall wawanakar jiwarayapjjatapajj wali llakkañapachänwa! Qhawqhanirus jiwarayapjjäna ukajj janiw yatiskiti, ukampis Diosan Jeremías profetapajj arskäna uka profeciaw phoqasiskäna. Jupajja, ‘mayniwa chuyma wali ustʼata jachaski, janirakiw chuymachatäñs munkiti’ sasaw säna (Jeremías 31:15).

Ukañkamasti Joseajj Egiptonwa familiapamp jakasipkäna. Mä arumajja, Jehová Diosan angelapaw Josearojj mä samkan uñstäna, akham sasa: “Sartam, wawampir mamapampir irpjjarusina Israel markar kuttʼjjam, wawar jiwayañ munirinakajj jiwarjjapjjewa” sasa (Mateo 2:20). Ukhamasti, Joseajj markapar kuttʼañwa amtäna. Ukhamatwa kuntï Jehová Diosajj profetap toqejj siskatayna ukajj phoqasïna, jupajj akham sänwa: “Egiptotwa wawajar jawsanta” sasa (Oseas 11:1).

Joseajj Judeanwa familiapampi utjnoqañ amtpachäna, inas Belén marka jakʼana, kawkjantï Egiptor janïr escapkasajj jakapkäna ukana. Ukampis Herodesan jan sinttʼasir Arquelao yoqapaw Judea marka apnaqañatak reyit uttʼayatäna, ukwa Joseajj yatïna. Ukatwa Diosajj jan walit jarkʼaqañatakejj jan uksar saramti sasin mä samkan säna. Ukhamasti, Joseajj jukʼamp alay (norte) toqeruw familiapampi sarjjäna, Nazaret markaru, uka markajj Galilea cheqankänwa. Nazaretajja, judionakajj Diosar adorapki uka Jerusalén markat wali jayankänwa. Ukanwa Jesusajj jilsüna, ukhamatwa kuntï profetanakajj qellqapkatayna ukajj phoqasïna. Jupanakasti akham sapjjänwa: “Juparojj Nazareno sasaw sapjjani” sasa (Mateo 2:23).