CRISTIANJAM JAKAÑATAKI

Semanan apaski uka tantachäwitak yaqha yanaptʼanaka

Enero de 2018 maratjja, semanan apaski uka tantachäwitakejj yaqha yanaptʼanakaw utjani: Notanaka, dibujonaka ukat videonakampi. Ukajja Internetan Traducción del Nuevo Mundo de las Santas Escrituras (nwtsty) Bibliajj yatjjatañatak utji ukarjamaw lurasini. Pachpa arusat janïras utjkchejja, uka yanaptʼajj tantachäwinakatak sum wakichtʼasiñatakiw yanaptʼistani. Jukʼampisa Jehová Diosar jakʼachasiñatakiw yanaptʼistani, jupajj munasiri wali yatiñani Diosawa.

NOTANAKA

Notanakajja, kunjamsa jakasipjjäna, kawkinsa pasäna, kuna arsa parlapjjäna ukanakwa walja versiculonakat qhanañchistani.

Mateo 12:20

Jewqʼeskiri micha pawila: Nayra michachuwanakajj ñeqʼet luratänwa, olivo aceitempiw naktayapjjerïna, linot lurat pawilo uchapjjarakirïna. ‘Jewqʼeskiri micha pawila’ sasin, jaqokipaski uka arojja, niya jiwtʼirjam jan ukajj jiwtʼat mä michat jewqʼejj mistki uk sañ munaspa. Isaías 42:3 qellqatäki uka profeciarjamajja, Jesusajj wali sinttʼasirïnwa, janipuniw humildenakarusa ni jiskʼachatanakarus jukʼamp aynañchtʼaykänti jan ukasti Diosar jakʼachasipjjañapatakiw yanaptʼäna.

Mateo 26:13

Cheqpachapuni: Hebreo arut griego arur Amén sas jaqokipaski uka arojja, “ukhamäpan” jan ukajj “cheqpachapuni” sañwa muni. Jesusajj uka arunakampiw profecianakatsa kuntï lurañ amtkäna ukanakatsa parlañ qalltirïna. Ukhamatwa arunakapajj cheqätapa, confiykañätap uñachtʼayäna. Jesusajj “cheqpachapuni” sasin aytkäna uka arojja, Biblianakwa qellqatajj uñsti. Kunjamtï Juan libron qellqatäkejja, (amén amén) uka arojj pä kuti juntuki uñstki ukhajja, “cheqpachapuniw” sasin jaqokipasiwayi (Jn 1:51).

DIBUJONAKAMPI VIDEONAKAMPI

Fotonakasa, uñachtʼäwinakasa, videonakasa Biblian yatichäwinakap sumpach amuytʼañatakiw yanaptʼistani.

Betfagué, Olivos Qollu, Jerusalén

Aka videonjja, Jerusalén markar inti jalsu toqet purki uka thakwa uñachtʼayistu, Biblian parlki uka Betfagué markajj uka cheqankpachänwa, jichhürunakanjja et-Tur markat uñtʼatawa. Uka thakejj Olivos Qollukamaw puri. Betania markajj Betfagué markat inti jalsu toqenkänwa, Olivos Qollut inti jalsu thiyankänwa. Jesusajj discipulonakapampi Jerusalén markar sarirïna ukhajja, Betania markanwa alojasipjjerïna. Jichhürunakanjja el-Ázariyeh (El Éizariya) sat markat uñtʼatäjjewa, árabe arunjja uka sutejj “Lazaron lugarapa” sañwa muni. Ukhamajja Jesusajj Martana, Mariana ukat Lazaron utapanwa alojaspachäna (Mt 21:17; Mr 11:11; Lu 21:37; Jn 11:1). Jesusajj Betaniat Jerusalenar sarirïna ukhajja, videon uñjaski ukar uñtasit thaknamwa sarirïpachäna. 9 de nisán 33 maranjja, Jesusajj Olivos Qollu pasawayasajj Jerusalenaruw mä asnoqalljjat mantäna. Inas Betfagué markat sarkäna uka thaknam sarchïna.

Betaniat Betfagué markar sarir thaki
Betfagué
Olivos Qollu
Cedrón Valle
Templojj luraskäna uka qollu

Kayu talonar leqʼentat mä jachʼa clavo

Aka fotonjja, hierrot lurat mä clavompi leqʼentat kayu chʼakhaw uñachtʼayasi, uka clavojj 11,5 centimetronakanïnwa. Uka chʼakhanakjja 1968 maranwa, Jerusalén markat alay toqen jikjjatapjjäna, amuyatajja romanonakajj jakapkäna uka tiempotäpachänwa. Ukajja, kunjamsa mä jaqer jiwayañatakejj clavompi lawar chʼakkatapjjerïna ukwa uñachtʼayistu. Romano soldadonakajj mä lawar Jesusar chʼakkatapkäna uka clavojj inas uka kikpachïna. Uka waña chʼakhanakjja, qalat lurat mä cajanwa jikjjatapjjäna, jiwatan cuerpopajj qʼala chʼakhakamakëjjäna uka qhepatwa chʼakhanak uka cajar imapjjerïna. Ukajja lawar chʼakkatas jiwayata jaqerojj imapjjerïtapwa amuytʼayistu (Mt 27:35).