Jesusajj demonionakjjar munañaniwa

Galilea Qotan jan walin uñjasipkäna uka qhepatjja, Jesusan discipulonakapajj qota khurkataruw purjjapjjäna. Ukar purisajj demonionakan mantat pä jaqenakaw Jesusar jikjjatäna, sepultur taypitwa mistunipjjäna. Wali ajjsarkañ jaqenakäpjjänwa. Marcosampi Lucasampejj maynitakwa jukʼamp qhanañchapjje, inas jupajj wali qhorüchïna ukhamarak jaya tiempo demonionakan mantatächïna.

Uka sintkañ jaqejj jan isiniw sarnaqäna, “uruy arumaw sepulturanak taypinsa qollunakansa wali jachʼat arnaqasis sarnaqäna, jupa pachparakiw qalanakampis kharinoqasïna” (Marcos 5:5). Wali ajjsarkañ jaqënwa, janirakiw khitis uka jakʼankir thaknam pasañ munkänti. Walja kutiw cadenanakampi chinuntapjjäna, jupajj jan kunakiw uka cadenanak tʼaqaräna. Janipuniw khitis katuntañatakejj chʼamanïkänti.

Uka jaqejj Jesusar jakʼachasisajja, nayraqataparuw killptʼasïna. Demonionakasti jachʼatwa uka jaqer arnaqayapjjäna, akham sasa: “Jesús, Jachʼa Diosan Yoqapa, ¿kun luriris akar jutta? Diosan sutipjjar juramentompi arsuñamatakiw ruwtʼassma, janikiy tʼaqesiyistati” sasa. Jesusasti demonionakjjar munañanïtap uñachtʼayasajj akham sänwa: “Uka jaqet mistum demonio” sasa (Marcos 5:7, 8).

Uka jaqerojj walja demonionakaw mantapjjäna. Jesusajj “¿kunas sutimajja?” sasin jisktʼäna ukhajja, “Legión satätwa, waljanïpjjataj layku” sasaw säna (Marcos 5:9). Roma markankir waranqa soldadonakani mä ejercitoruw mä legionat uñtʼasïna. Ukhamasti walja demonionakaw uka jaqer mantapjjäna, uka jaqer tʼaqesiyasajj wal kusisipjjarakïna. Uka demonionakasti “janikiy mikʼayar khitapjjestati” sasaw Jesusar ruwtʼasipjjäna. Amuyatajja jupanakarusa, jupanakar pʼeqtʼiri Supayarusa kunas pasäni uk yatipjjpachänwa (Lucas 8:31).

Uka jakʼanjja 2.000 khuchinakaw manqʼasipkäna, uka animalanakajj Leyirjamajj janiw qʼomäpkänti janirakiw judionakajj uywapjjañapäkänti. Uka demonionakajj akham sasaw Jesusar sapjjäna: “Khä khuchinakar khitapjjeta, ukhamat uka khuchinakar mantañataki” sasa (Marcos 5:12). Jesusasti sarapjjamay sasaw sarakïna. Demonionakajj khuchinakaruw mantapjjäna. Uka 2.000 khuchinakasti mä barranco patjjatwa qotar chhukuntapjjäna, umamp ajjskatasaw jiwarapjjarakïna.

Ukanak uñjasajja, ukaratpachaw khuchi awatirinakajj tʼijtjjapjjäna. Markankir jaqenakampiru markat anqäjjankir jaqenakampiruw yatiyapjjäna. Ukatjja jaqenakajj kunas pasäna ukanak uñjiriw mistunipjjäna. Demonionakan mantatäkäna uka jaqerojj amuyupankjjatapwa uñjapjjäna. Uka jaqejj Jesusamp chik qontʼata, suma isthaptʼatäjjänwa.

Uk uñjirinakasa yatirinakas walpun ajjsarapjjäna, qhepat kunanakampis Jesusajj lurpachäni sasaw sapjjäna. Ukatwa ‘aka lugarat sarjjam’ sasin Jesusar sapjjäna. Jupasti sarjjañatakiw mä boter sarjjatjjäna. Demonionakan mantatäkäna uka jaqejja, ‘jumamp chikaw sarañ munta’ sasaw Jesusar ruwtʼasïna. Ukampis Jesusajj akham sasaw khitjjäna: “Utamar sarjjam, familiaranakaman ukaru. Kunanaktï Jehová Diosajj jumatak lurki, kunjamsa jumat khuyaptʼayastam taqe ukanak jupanakar yatiyanim” sasa (Marcos 5:19).

Jesusajj waliptaykäna uka jaqenakarojja, janiw mayninakar yatiyapjjätati sasaw sirïna. Jesusajj janiw milagronakat istʼasaki arkapjjañap munkänti. Ukampis jichhajj demonion mantatäkäna uka jaqer waliptayasajj Jesusajj kunja chʼamanisa ukwa uñachtʼayäna ukatwa yatiyanim sasin säna. Ukhamatwa Jesusajj jan jikjjatkaspäna uka jaqenakarojj uka jaqejj yatiyaspäna. Maysa toqetjja khuchinakan jiwarapjjatapat jaqenakajj jan wali parlapjjaspäna ukhajja, jupaw uk sum qhanañchaspäna. Ukatwa uka jaqejj kunsa Jesusajj jupa layku luräna, uk Decápolis cheqan utjkän taqe uka markanakar yatiyir saräna.