¿Kunatsa tʼunjatäñapajj wakisïna?

Jesusajja jaqenakajj Dios nayraqatan kunjamasipkänsa uk amuyasipjjañapatakiw chʼamachasïna. Mä fariseon utap anqanwa uka toqet yatichäna, jichhajj yaqha cheqanwa yaticharakïna.

Yaqhepanakajj mä jan waltʼäwitwa parlapjjäna. “[Poncio Pilato sat gobernadorajj] Galileankir jaqenakan wilapwa jupanakan pachpa sacrificionakapamp kitanti sasaw Jesusar yatiyapjjäna” (Lucas 13:1). ¿Kunatsa parlasipkäna?

Pilatojja templon utjkän uka qollqempiwa Jerusalenar uma apañataki mä canal lurayäna. Uka qollqe aptañatakejj Pilatojj inas templo uñjiri jilïrinakampi parlchïna. Ukampis walja judionakaw Pilato contrajj saytʼapjjäna, ukanwa yaqhep galileonakajj jiwarapjjäna. Jesusar parlapkäna ukanakajja inas galileonakajj jan wali lurapjjatapatwa jiwarapjjäna sasin amuyapjjchïna. Ukampis Jesusajj janiw ukham amuykänti.

Jesusajj sänwa: “¿Uka jaqenakajj Galileankir taqe jaqenakat sipans jukʼamp juchanïpkaspasa, ukatsa jupanakajj ukham jiwayat uñjasipkaspa ukhamti amuyapjjta?” sasa. Jesusajj ‘janiw ukhamäkiti’ sasaw säna. Uka toqet parlkasajja akham ewjjarakïna: “Janitï jumanakajj arrepentisipkäta ukhajja, ukham jiwayatarakiw taqenis uñjasipjjäta” sasa (Lucas 13:2, 3). Ukatjja Jesusajj ukhak paskäna uka yaqha jan waltʼäwitwa parlarakïna, uka jan waltʼäwejj inas uma apañ canal lurapkäna ukapach pasarakchïna. Jesusajj akham sänwa:

“Siloam cheqankir mä torrejj tunka kimsaqallqoni jaqenakar tinkjjatasin jiwaraykäna uka toqetjja, ¿kunjamsa amuyapjjta? ¿Jupanakajj Jerusalén markan jakir taqe jaqenakat sipansa jukʼamp juchanïpkaspas ukhamti amuyapjjarakta?” sasa (Lucas 13:4). Juchanïpjjatapatsa jiwarapkaspa ukhamwa waljanejj amuyapjjpachäna. Ukampis Jesusajj janiw ukham amuykänti. “Horasajj jan waltʼañajj taqeniruw puri”, ukatwa jan walin uñjasipjjäna, uk Jesusajj sum yatïna (Eclesiastés 9:11). Jaqenakajj uka jan waltʼäwit amuytatasipjjañapänwa. Ukatwa Jesusajj akham säna: “Janitï jumanakajj arrepentisipkäta ukhajja, jupanakjam jiwayatarakiw taqenis uñjasipjjäta” sasa (Lucas 13:5). ¿Kunatsa ukham sispachäna?

Jesusajj qhawqha tiempos yatiyjjäna uka toqetwa parlaskäna, ukjja akham sasaw qhanañchäna: “Mä jaqejj uvas yapunïnwa, mä higos arbolaw uka yapupan ayruntat utjarakïna. Achunak thaqeriw jupajj jutäna, ukampis janiw kuns jikjjatkänti. Ukatwa jupajj uvas yapuchiripar akham säna: ‘Kimsa maraw nayajj aka higos arbolan achunakap thaqerejj jutta, ukampis janiw kunsa jikjjatkti. ¡Ukhamajj apsjjam! ¿Kunatakirak oraq inamay katjjasiskanisti?’ sasa. Uk satasti jupajj sarakïnwa: ‘Tata, aka maramp suytʼañäni, nayaw muytpach qʼawsusin wanumpi uchantäjja. Sum achoqani ukhajja, walïniwa, ukampis jan achoqkani ukhasti, apsjjätawa’ sasa” (Lucas 13:6-9).

Jesusajja kimsa mara jilaw judionakarojj Diosar confiyapjjañapataki yatichäna. Walsa chʼamachaskchïnjja jukʼanikiw discipulonakapar tukupjjäna. Jichhajj pusïr mararuw mantäna, jukʼamp yatiyañatakiw chʼamachasirakïna. Jesusajj Judeana Pereana yatiyäna ukhajja, higos arbolar uñtasitäpki uka judionakarusa ‘qʼawsusin wanumpi uchkaspa’ ukhamänwa. ¿Qhawqhanis istʼapjjäna? Mä jukʼanikiw istʼapjjäna. Niya markpachaw juchanakapat jan arrepentisipkänti, ukatwa tʼunjatäpjjañapajj wakisïna.

Jan istʼasirïpjjatapajj mayampiw mä sábado urun uñjasïna. Jesusajj mä sinagoganwa yatichaskäna, ukanwa 18 maranak kʼumthapit mä warmir uñjäna, uka warmirojj mä demoniow ukham tʼaqesiyäna. Jupat sinttʼasisajja Jesusajj sänwa: “Warmi, jumajj uka usumat walikëjjtawa” sasa (Lucas 13:12). Amparampiw uka warmir loqjjattʼäna, ukaratpachaw jupajj cheqaptjjäna, ukatsti Diosaruw jachʼañcharakïna.

Uk uñjasajj sinagogan pʼeqtʼirejj akham sänwa: “Trabajiñatakejj sojjta urunakaw utji. Ukhamasti uka urunakaw qollayasir jutapjjañama, janiw sábado urun ukajj lurasiñapäkiti” sasa (Lucas 13:14). Uka jaqejja Jesusajj qollañatak chʼamanïtap uñjkchïnsa, sábado urun qollayasir jutapjjatapatwa jaqenakar juchañchäna. Ukatwa Jesusajj qhana arunakampi akham säna: “Kʼari chuyman jaqenaka, ¿janit jumanakajj sábado urun vacsa, jan ukajj asnsa jararasin umtʼayir jikhapkta? Aka warmejj Abrahanan wawapawa, jupajj tunka kimsaqallqon maranakaw Supayan katuntat uñjasïna. Ukhamajj ¿janit jupar sábado urun usupat qollañajj wakiskänjja?” sasa (Lucas 13:15, 16).

Uk istʼasajja Jesús contrapkäna uka jaqenakajj phenqʼasipjjänwa. Ukampis waljaniw Jesusan luratanakap uñjasin wal kusisipjjäna. Ukatjja Jesusajj Diosan Reinopat parlir pä uñachtʼäwinakwa Judeankkasajj mayampi parläna, Jesusajj Galilea Qotanwa uka uñachtʼäwinakat mä botetpach nayrajj parläna (Mateo 13:31-33; Lucas 13:18-21).