Apostolonakajj mayampiw jilïrïñ thaqapjjäna

Jesusampi discipulonakapampejja Perea toqe muytasajja, aynach toqeruw sarapjjäna, Jerusalén toqeru. Jordán Jawirjja Jericó jakʼnamwa pasapjjäna. Waljanirakiw jupanakamp chikajj 33 maran Jerusalenar Pascua amtir sarapjjäna.

Jesusajj discipulonakap nayraw saraskäna, Pascua fiestatakejj Jerusalenankañ munäna. Ukampis discipulonakapajj ajjsarayasipjjänwa. Amtañäni, Lazarojj jiwkäna ukhajja, Jesusajj Pereat Judearuw sarañ munäna. Ukanjja Tomás apostolojja mayninakar akham sänwa: “Jiwasajj sararakiñäni, jupamp chik jiwañasataki” sasa (Juan 11:16, 47-53). Cheqansa Jerusalenar sarasajja jan walin uñjasipjjaspäna, ukatwa discipulonakajj ajjsarayasipjjäna.

Jesusajj kunatï pasañapäkäna ukatakiw apostolonakar wakichañ munäna, ukatwa yaqha cheqar irpaqasajj akham säna: “Jerusalén markaruw makatasktanjja, jaqen Yoqapajj jilïr sacerdotenakampiru escribanakampir katuyataw uñjasini. Jupanakaw jiwayañatak juchañchapjjani. Ukatjja yaqha markankir jaqenakaruw katuyapjjani, jupat sawkasipjjañapataki, jawqʼjapjjañapataki ukhamarak mä lawar chʼakkatas jiwayapjjañapataki. Ukampis kimsïr urunwa jupajj jaktayatäni” sasa (Mateo 20:18, 19).

Jesusajj jiwañapampita jaktañapampitjja kimsa kutiw jichhampejj discipulonakapar parljjäna (Mateo 16:21; 17:22, 23). Ukampis jichhajja, mä lawar chʼakkatasaw jiwayapjjetani sasaw säna. Discipulonakajj uk istʼapkchïnsa, kuntï Jesusajj sañ munaskäna uk janiw amuyapkänti. Inas jupanakajja Israelan utjkäna uka reinojj mayampi oraqjjan uttʼayasjjaspa uk suyapjjchïna, inas jupanakajj aka oraqenkir reinon Cristomp chik apnaqaña jachʼañchatäña munapjjchïna.

Santiagompina Juanampina taykapajja, Jesusampi chikaw Jerusalenar saraskarakïna, inas jupajj Salomeachïna. Uka apostolonakarojja Jesusajj “Qʼejjo Qʼejjon Wawanakapa” sasaw sutichäna, jupanakajj ninar uñtatäpjjänwa, taqe kunsa jankʼakiw lurañ munapjjerïna ukatwa ukham sutichpachäna (Marcos 3:17; Lucas 9:54). Santiagompi Juanampejja, nayratpachaw Jesusan Reinopan jilïrïñ munapjjäna. Taykapajj uk sum yatïna, ukatwa Jesusan ukar saräna, nayraqatapan altʼasisasti yoqanakapatakiw ruwtʼasïna. Jesusasti sarakïnwa: “¿Kuns munta?” sasa. Uk satasti akham sasaw uka warmejj jupar säna: “Reinoman apnaqjjäta ukhajja, aka pä yoqajaruy jumamp chik qontʼayarapita, maynirojj kupëjjamaru, maynirojj chʼeqäjjamaruraki” sasa (Mateo 20:20, 21).

Cheqansa Santiagompi Juanampiwa uk munapjjäna. Jesusajja kunjam phenqʼachatasa jiskʼachatasa uñjasiñapäna ukjja uka nayrakiw parlaskäna. Ukatwa jupanakar akham säna: “Kuntï mayipkta ukjja, janiw jumanakajj yatipktati. ¿Niya umtʼañampïskta uka copat jumanakajj umtʼapjjasmati?” sasa. Jupanakasti “jïsa, umtʼapjjeristwa” sasaw sapjjäna (Mateo 20:22). Jesusan arunakapjja janiw jupanakajj sum amuyapkpachänti.

Jesusasti sänwa: “Cheqansa, jumanakajj uka copajat umtʼapjjätawa. Ukampis khitis nayamp chikajj kupëjjajaru jan ukajj chʼeqäjjajaru qontʼasini uk sañajj janiw nayar waktʼkituti. Jan ukasti Awkijaw khitinakas ukan qontʼasipjjani ukanakarojj ajllini” sasa (Mateo 20:23).

Kuntï Santiagompi Juanampejj mayipkäna uk yatisajja, mayni 10 apostolonakajja colerasipjjänwa. Uka nayrajja ukhamarakiw jilïrïñ toqet apostolonakajj chʼajjwapjjäna, ukapachajja inas Santiagompi Juanampejja jilïrïñ munapjjatap qhan sapjjchïna (Lucas 9:46-48). Inas jan ukhamäkarakchïna, ukampis 12 apostolonakajj janiw Jesusan ewjjaparjamajj jiskʼar tukupkänti, jilïrïñ thaqasipkakïnwa.

Jilïrïñ thaqasajja jupanakkamajj janiw waltʼayasipkänti, ukatwa Jesusajj jan ukham chuymanïpjjañapatakejj apostolonakapar ewjjtʼañ munäna. Jesusajj 12 apostolonakapar jawsasaw munasiñampi akham sasin ewjjtʼäna: “Jumanakajj yatipjjtawa, khitinakatï marka apnaqerjam uñjatäpki ukanakajj munañaparuw jaqenakar apnaqapjje, jachʼa jilïrinakas ukhamarakiw jupanakjjar wali munañanïpjje. Jumanak taypinjja janiw ukhamäñapäkiti. Antisas khititejj jumanakat jilïrïñ munki ukajja, jumanakar serviñapawa. Khititejj jumanak taypin nayrankañ munki ukajja, mä esclavjamaw taqenirus serviñapa” sasa (Marcos 10:42-44).

Khititsa yateqasipjjaspa ukwa apostolonakaparojj Jesusajj qhanañchäna. Akham sasa: “[Jumanakajj servipjjañamawa] kunjamtï jaqen Yoqapajj servir jutkejj ukhama, jupajj janiw serviyasir jutkiti. Jupajj jakañap churañatakiw juti, ukhamat waljanir juchat kutsuyañataki” sasa (Mateo 20:28). Niya kimsa maranakaw Jesusajj jaqenakar serviskäna. Jiwañkamaw Jesusajj jaqenak laykojj ukham luräna. Ukhamasti discipulonakajj Cristotwa yateqasipjjañapäna, serviyasiñat sipansa mayninakaruw servipjjañapäna, jilïrïñat sipansa jiskʼaruw tukupjjañapäna.