LECCIÓN 1

Suma arunakamp qalltaña

Hechos 17:22

¿KUNSA LURAÑAMA? Qalltan arskäta uka arunakajja (introducción eficaz), istʼirinakarojj jukʼamp yatiñ munapjjañapatakiw chʼamañchtʼañapa. Ukatjja kuna toqetsa parläta ukwa qhanstayañapa, kunatsa istʼirinakajj uka toqet yatipjjañapa uksa qhan amuytʼayañaparaki.

¿KUNJAMSA UK LURASMA?

Jukʼamp yatiñ munapjjañapatak parltʼam. Mä jisktʼampiw parlañ qalltasma. Mä experienciata, noticianakan kunsa istʼta uka toqetwa parlasma, jan ukajj kuna toqetsa jaqenakajj yatiñ munapjjaspa uka toqetwa parlarakisma.

Istʼirinakarojj kunas llakisiyi, kuna toqetsa yatiñ munapjjaspa, ukwa janïräkipan sum amuytʼañama. Ukatjja, ukarjamaw parlañ qalltañama.
Kuna toqetsa parläta uk qhan amuytʼayam. Kuna toqetsa parläta ukajj qhanaw qallta arunakaman amuyasiñapa. Ukat kunatsa uka toqet parlañ munta ukas qhanäñaparakiwa.
Kunatsa uka toqet parlañajj wakisi uk qhan amuytʼayam. Istʼirinakajj kuna toqetsa yatiñ munapjjaspa ukarjamaw parltʼañama. Kuntï siskäta ukajj jupanakar yanaptʼaspawa, uk qhanwa istʼirinakajj amuyapjjañapa.

Mä arstʼäw wakichtʼaskäta ukhajja, akhamwa jisktʼasiñama: “Congregacionajankir jilat kullakanakajja, ¿kuna jan walinakansa uñjasipjje?” sasa. Ukatjja, ukarjamaw kunjamsa parlañ qalltäta uk wakichtʼasiñama.