Jericó markat jutapkäna uka urutjja, Jesusampi discipulonakapampejj kimsa arumaw Betanian qheparapjjäna. Lunes 10 de nisán urunsti Jerusalenaruw alwat sarapjjäna. Jesusajj manqʼat awtjayasïna, ukatwa mä higos árbol uñjasajj ukar jakʼachasïna, ¿higojj utjpachänti?

Marzo phajjsejj niya tukuyañampïskänwa, higos frutajja junio phajjsinwa achoqaskirïna, ukhamajj janïraw higosajj utjkänti. Ukhamäkchïnsa uka higos arbolajj laphinakanëjjänwa, frutanïkaspas ukhamänwa, ukatwa Jesusajj achoqjjpachawa sasin amuypachäna. Ukampis purisajj janiw kunsa jikjjatkänti. Ukatwa akham säna: “Jichhat uksarojj janipuniw khitis achumat mayampis manqʼjjaniti” sasa (Marcos 11:14). Ukaratpachaw uka higos arbolajj wañsjjäna. Kunsa ukat yateqapjjaspäna ukjja Jesusajj mä uru pasatatwa qhanañchjjäna.

Jesusampi discipulonakapampejja Jerusalén markaruw puripjjäna. Jesusajj temploruw saräna, mä uru nayrakiw templojj kunjamäskänsa uk uñjäna. Jichhajja, janiw aleq uñjirik sarkänti, jan ukasti kimsa mara nayrajj (30 maranjja) kuntï Pascuan lurkäna ukwa mayampi lurarakïna (Juan 2:14-16). Jupajj templon ‘aljiri alasiri jaqenakaruw anqar alisnuküna’. “Qollqe turkirinakan mesanakapsa paloma aljirinakan banconakapsa qʼal jaqorpayäna” (Marcos 11:15). Templon patiopnam pasasin yaqha cheqar kuns apasipkäna uka jaqenakarus jarkʼarakïnwa.

¿Kunatsa Jesusajj templon qollqe turkirinakarusa animalanak aljirinakarus ukham luräna? Jupajj sänwa: “‘Utajajj oración lurañ uta satäniwa, taqe markanakataki’, ¿janit ukajj qellqatäki? Ukampis jumanakajj lunthatanakan utaparuw tukuyapjjtajja” sasa (Marcos 11:17). Uka jaqenakajja, animalanak sacrificiotak alasiñ munapkäna ukanakarojj jila precionak mayipjjerïna. Jesusatakejja ukajj lunthatasiñampi sasïnwa, ukatwa lunthatanaka sasin säna.

Jilïr sacerdotenakasa, escribanakasa, yaqha ukham jilïrinakasa kuntï Jesusajj lurkäna uk yatipjjäna ukhajja, jukʼampiw Jesusar jiwayañ munapjjäna. Ukampis walja jaqenakaw Jesusar istʼañatakejj arknaqapjjäna, ukhamajj janiw kunjamatsa Jesusar jiwayañ puedepkänti.

Pascua amtañatakejj janiw judionakak jutapkänti, jan ukasti proselitonakas jutapjjarakïnwa. Jupanakajj yaqha markatäkasin judionakan religionapar mantirinakäpjjänwa. Ukatjja Diosar adorañatakejj griego jaqenakas jutapjjarakïnwa. Jupanakajja “Jesusaruw uñjañ munapjjta” sasaw Feliper jakʼachasipjjäna, Felipejj griego sutinïnwa, ukatwa jupar jakʼachasipjjpachäna. Felipejj Andresaruw yatiyäna, inas Jesusamp parlapjjañapajj wakisispati janicha uk yatiñ munasa uk yatiychïna. Ukatjja panpachaniw uka toqet Jesusampi parlapjjäna, Jesusasti templonkaskpachänwa.

Jesusajj jiwañapatak mä qhawqha urunakak faltjjatap yatisjjänwa, ukhamasti janiw aleq uñtʼañ munir jaqenakampi parlañ horasäkänti. Ukatwa Jesusajj pä apostolonakaparojj mä uñachtʼäwit parläna, jupajj sänwa: “Jaqen Yoqapar jachʼañchasiñapäki uka horasajj purinjjewa. Cheqpachapuniw sapjjsma, janitï mä trigo jathajj oraqer jalaqtasin jiwkani ukhajja, mä jathakïskaniwa. Ukampis jiwani ukhajja, waljaw achoqani” sasa (Juan 12:23, 24).

Inas trigo jathajj janis valoranïkaspa ukhamächispa, ukampis oraqen jiwjje ukhajja, mä aliw mistuni, tiempompisti walja trigonakani jachʼaw jilsuraki. Niya ukhamarakiwa, Jesusajj perfecto jaqënwa, jiwañkamaw Diosat jan jitheqtkänti, ukhamatwa jupjam chʼamachasipki ukanakarojj wiñay jakañanïpjjañapatak yanaptʼawayi. Ukatwa Jesusajj akham säna: “Khititejj jakañaparu munaski ukajja, aptʼasiniwa. Khititejj jakañaparu akapachan uñiski ukajja, wiñay jakañwa katoqani” sasa (Juan 12:25).

Jesusajj janiw jupa pachpatak lupʼkänti, jupajj sänwa: “Khititï nayar serviñ munkitu ukajj arkitpan. Kawkinkktï nayajj ukankarakiniw nayan servirijajja. Khititï nayar serviñ munkitu ukarojja, alajjpachankir Awkiw jachʼar aptani” sasa (Juan 12:26). ¡Cheqas ukajj mä jachʼa bendicionawa! Diosamp jachʼar aptatäpkani ukanakajja, Jesusamp chikaw Reinon apnaqanipjjani.

Jesusajj wali tʼaqesiyataw jiwañapäna, uk yatisaw akham säna: “Jichhasti nayajj wali llaktʼatätwa. Ukhamajj ¿kamsarakïsti? Awkiy, aka horasat salvita” sasa. Ukampis Jesusajj Diosan munañapwa lurañ munäna, ukatwa akham säna: “Nayajj ukatakiw aka horasar jutta” sasa (Juan 12:27). Jesusajj Diosan amtanakap phoqasiñap munäna, ukatwa pachpa jakañapsa sacrificiot loqtäna.

Lunes 10 de nisán uröjjänwa, Jesusajj jiwañapatwa templon parlaskäna. Jiwasinjja kunjamsa Diosarojj uñjayani uka toqetwa llakisïna, ukatwa “Awkiy, sutim jachʼañcham” sasin säna. Ukatjja mä aruw alajjpachat istʼasïna, akham siri: “Nayajj sutij jachʼañchtwa, mayampis jachʼañchaskakïwa” sasa (Juan 12:27, 28).

Jakʼankasipkäna uka jaqenakajj may maywa amuyapjjäna. Yaqhepajj “qʼejjo qʼejjöpachawa” sasaw sapjjäna. Yaqhepasti “mä angelaw juparojj parljjayani” sasaw sapjjarakïna (Juan 12:29). Cheqansa ¡Jehová Diosan arupwa istʼapjjäna! Ukampis janiw jichhakejj Diosan arup jaqenakajj istʼapkänti, jan ukasti akampejj niya kimsa kutiw Diosajj Jesusjjat parlanjjäna.

Jesusajj kimsa maranak chikatani nayrajj bautisaskäna ukhajja, Bautisir Juanaw Diosan arup istʼäna, Jesusjjat akham siri: “Jupajj Wawajawa, wali munatawa, nayajj wal jupat kusista” sasa. 32 maransti, Pascua fiesta pasatatjja, Jesusajj Santiagona Juanana Pedron nayraqatapanwa kʼajkir tuküna. Uka kimsa apostolonakajj Diosan arup istʼapjjarakïnwa, Diosasti akham sänwa: “Jupajj Wawajawa, wali munatawa, nayajj wal jupat kusista. Jupar istʼapjjam” sasa (Mateo 3:17; 17:5). Jichhajja Diosan arup walja jaqenakaw istʼapjjarakïna, ukampejj kimsa kutiw Diosajj alajjpachat parlanïna.

Jesusasti sänwa: “Uka arojj janiw naya layku istʼaskiti, jan ukasti jumanak laykuw istʼasi” sasa (Juan 12:30). Uka arojja, jupajj Diosan Yoqapäskapunïtapa ukhamaraki jutañapäkäna uka Mesiasätapwa uñachtʼayäna.

Jesusan Diosat jan jitheqtasa sarnaqatapajja, kunjamsa jaqenakajj sarnaqapjjañapa ukwa yatichäna, ukhamarak kunatsa akapach apnaqeri Diablon jiwañapajj wakisi ukwa uñachtʼayäna. Jesusajj sänwa: “Jichhaw akapacharojj juzgasi, jichharakiw akapachan apnaqeripajj anqar jaqonukutäni” sasa. Jesusajj jiwañapäkchïnsa, janiw aynachtʼañapäkänti, antisas atipjañapänwa, ¿kunjamatsa atipjañapäna? Jupa pachpaw akham säna: “Nayajj oraqet aptatäkä ukhajja, taqe kasta jaqenakaruw nayan ukar irpanëjja” sasa (Juan 12:31, 32). Jiwatapampejj walja jaqenakaruw wiñay jakañ katoqapjjañapataki irpaniñapäna.

Jesusajj ‘aptatäñat’ parlkäna ukhajja, jaqenakajj akham sapjjänwa: “Cristojj wiñayatakiw jakani sasaw nanakajj Leyin istʼapjjta, ¿kunjamaraki jumajj jaqen Yoqapajj aptatäniwa sasin parltasti? ¿Khitirak jaqen Yoqapasti?” sasa (Juan 12:34). Jesusan luratanakap uñjkasasa, Diosan arup istʼkasasa, jilapart jaqenakajj janiw Jesusarojj cheqpach jaqen Yoqaparjama, mä arunjja Mesiasarjam uñjapkänti.

Jesusajj mayampiw “nayajj akapachan qhanapätwa” sasajj säna (Juan 8:12; 9:5). Akham sasaw jaqenakar chʼamañchtʼarakïna: “Qhanajj mä jukʼa tiempompiw jumanak taypinkaskani. Jumanakajj qhananïkasin sarnaqapjjam, ukhamat chʼamakamp jan apnaqayasiñataki. [...] Ukhamajj qhananïkasin jumanakajj uka qhanar confiyapjjam, ukhamat qhanan wawanakapäpjjañamataki” sasa (Juan 12:35, 36). Jesusajj janiw 10 de nisán urun jiwañapäkänti, ukatwa uka cheqat sarjjäna. Antisas Pascuajj amtaskani uka 14 de nisán urunwa ‘oraqet aptatäñapäna’, mä arunjja mä lawar chʼakkatatäñapäna (Gálatas 3:13).

Jesusajj yatiyir sarkäna uka toqet lupʼtan ukhajja, kunjamsa judionakajj jan creyiñ munapkäna ukwa amuytanjja, jupanakjjarojj mä profeciaw phoqasiskäna. Isaiasajja, uka jaqenakajj juykhuptapjjaniwa, chuymanakapsa qalarayasipjjaniwa, janiw qollayasiñatakejj kuttʼanipkaniti sasaw säna (Isaías 6:10; Juan 12:40). Ukajj ukhamapunïskänwa, jilapart judionakajja, Jesusajj salvirïtapa jakañar apirïtapa uñjkasasa janiw creyiñ munapkänti.

Nicodemompi, Arimatea markankir Joseampi, walja jilïrinakampiw Jesusar “confiyapjjäna”. Ukampis ¿jupanakajj Jesusar confiyapjjatap uñachtʼayapjjänti, jan ukajj sinagogat jan jaqsuyasiñ layku, jaqenakampi jachʼañchayasiñ laykojj aynachtʼapjjäncha? (Juan 12:42, 43).

Jesús pachpaw kunjamsa jupar confiyapjjatap uñachtʼayapjjañapa uk qhanañchäna: “Khititejj nayar confiykitu ukajja, janiw naya saparukejj confiykituti, jan ukasti khititejj nayar khitankitu ukarus confiyarakiwa. Khititejj nayar uñjkitu ukajja, khitankitu ukarus uñjarakiwa” sasa. Kuna cheqa yatichäwinaktï Diosajj Jesusarojj yatichañapataki churkäna ukwa Jesusajj yatichaskäna, uka yatichäwinakajj wali wakiskirïnwa, ukatwa Jesusajj akham säna: “Khititejj nayar jan yäqkitu, janirak arunakajsa katoqki ukanjja, mayni juchañchiripaw utji. Kuntï nayajj parlkta uka aruw juparojj qhepa urun juchañchani” sasa (Juan 12:44, 45, 48).

Tukuyañatakejja Jesusajj sänwa: “Janiw nayajj pachpa amtajat parlkti, jan ukasti khitankitu uka alajjpachankir Awkiw nayarojj kun sañatakisa kun parlañatakisa mä mandamiento churitu. Nayajj yatiraktwa, jupan mandamientopajj wiñay jakañaruw api” sasa (Juan 12:49, 50). Mä qhawqha urunakatjja Jesusajj jupar confiyapki ukanak laykuw wilap wartasiñapäna, ukjja jupajj sumwa yatisïna (Romanos 5:8, 9).