QHANAÑCHTʼAT VERSICULONAKA
Romanos 10:13 | “Taqe khititï Jehová Diosan sutip artʼaski ukajj”
“Taqe khititï Jehová Diosan sutip artʼaski ukajj salvatäniwa” (Romanos 10:13, Machaq Mundon Jakirinakataki).
“Taqe khititejj Tatitun sutipa artʼaski ukajj qhespiyatäniwa” (Romanos 10:13, Qullan Arunaka, 1992).
Romanos 10:13 ¿Kamsañs muni?
Maynejj yaqha markatäskpansa, mayja jañchinïskpansa jan ukajj qollqenïskpans janisa, Diosajj janiw khitirus yaqhachkiti. Taqeniw salvasisajj wiñayatak jakassna. Ukampis taqe uka bendicionanak katoqañatakejja, Diosan Jehová sutip artʼasiñasawa, ukajj Taqe Chʼamani Diosan sutipawaa (Salmo 83:18).
Bibliarjamajja, Jehová Diosan sutip artʼasiñajj janiw Diosan sutip aleq yatiñakïkiti ni jupar adorañatak aleq aytasiñakïkisa (Salmo 116:12-14) Diosarojj confiyañasawa, juparurakiw yanaptʼap mayiñatakejj thaqañasa (Salmo 20:7; 99:6).
Diosan sutipajj Jesusatak wali importantënwa. “Alajjpachankir nanakan Awkija, sutimajj jachʼañchatäpan” jan ukajj qʼomachatäpan sasaw Jesusajj orasiñ yatichañ qalltäna (Mateo 6:9). Jesusajj ak yaticharakïna, jiwasatï wiñayatak jakasiñ munstanjja, uka sutini Diosarojj uñtʼañasawa, istʼañasawa, munasiñasarakiwa (Juan 17:3, 6, 26).
Romanos 10:13 texton “Tatitun” siw Qullan Arunaka Biblianjja. ¿Kunjamatsa uka texton Jehová Diosat parlaskatap yattanjja? Kuna laykutejj uka textojja, Joel 2:32 textompejj pachpakiwa. Ukhamarus Bibliajj qellqaskäna uka hebreo arunjja, janiw Tatitu arojj utjkiti, jan ukasti Diosan sutipaw ukan qellqata.b
Romanos 10:13 ¿Kunamps amuysna?
Romanos capítulo 10 ukan kunatsa Diosampi katoqatäñatakejj Jesucristor confiyañajj wakisi ukwa Bibliajj yatichistu (Romanos 10:9). Antiguo Testamentonkir walja versiculonakaw ukhamätap uñachtʼayi. Maynitï Diosar confiychejja, Diosar confiyatap “lakapampiw jaqenakar yatiyañaparaki”, jan creyentëpki ukanakan salvasipjjañapatakejj suma yatiyäwinaks yatiyañaparakiwa. Ukhamatwa walja jaqenakajj Diosar confiyasajj salvasipjjaspa (Romanos 10:10, 14, 15, 17).
Romanos capítulo 10 liytʼam, qhanañchir notanakapsa yaqha versiculonakar apir referencianakapsa liytʼarakim.
a Diosan sutipajja, Biblian 7,000 jila kutiw nayra qellqatanakan uñsti. Hebreo arunjja, uka sutejj pusi letranakampi qellqatawa, Tetragrámaton sasin uñtʼatarakiwa. Yaqhep yatjjattʼatanakajj “Yahweh” sasiñapaw sapkchisa, español arun jilapartejj “Jehová” sasin traducitawa.
b Amuyatajja, Nuevo Testamenton Diosan sutip qellqasajj Antiguo Testamentorjamaw qellqapjjäna. Uka toqet mä librojj akham siwa: “Yatjjatatarjamajja, Antiguo Tatamentot mä qhawqhasa jan ukajj taqpachas aytaskäna ukhajja, Tetragrámaton ukajj Nuevo Testamento qellqatan uñstänwa, mä arunjja Diosan Yahweh sutipajj uñstänwa” sasa (The Anchor Bible Dictionary, volumen 6, página 392). Jukʼamp yatiñatakejja, “Diosan sutipajj Griego Arut Qellqatanakanwa uñsti” siski ukat yatjjatasma, ukajj Biblia Aymara. Machaq Mundon Jakirinakataki sat Biblian Apéndice A5 cheqankiwa. Jukʼamp yatjjatañatak inglés arut Biblianjja, Apéndice C2 cheqan kawkïr Biblianakans Diosan sutipajj Romanos 10:13 texton uñsti ukaw utjaraki.