Joseajj Jacobun sullka wawanakapat maynïrïnwa. Tatapan wali munatarakïnwa. ¿Kunjamsa jilanakapajj uñjapjjpachäna? Wal envidiasipjjäna, uñisipjjarakïnwa. Mä kutejj Joseajj mayj samkasisajj jilanakaparuw uk awistʼäna. Uka samkarjamajja jilanakapajj José nayraqatanwa jutïrin altʼasipjjañapäna. Ukatwa jukʼamp uñisipjjäna.

Mä urojja, Josean jilanakapajj Siquem marka jakʼanwa ovejanak awatisipkäna. Ukhaw jilanakapar uñjaniñapatakejj Josear Jacobojj khitäna. Jilanakapajj Josear jutaskir uñjasajj akham sapjjänwa: ‘Khayajjay samkasirejja, jutaskiwa, ¡jiwayapjjañäni!’ sasa. Katuntasajj mä pʼiyaruw jaqontapjjäna. Judá sat jilapajj akham sänwa: ‘Jan jiwayapjjamti, antisas esclavot aljapjjañäni’ sasa. Ukatwa 20 metal qollqenakar Madián markankir alakip jaqenakar aljapjjäna. Uka alakipanakajj Egipto markaruw sarasipkäna.

Uka qhepatjja, mä cabran wilaparuw Josean isip chillsupjjäna. Tatapan ukaruw uk apapjjarakïna, akham sasa: ‘¿Janit aka isejj wawamankki?’ sasa. Tatapajj ‘mä salvaje animalaw wawajar manqʼantpacha’ sasaw säna. Walpun jachäna, janirakiw khitis chuymachtʼirjamäkänti.

Alakip jaqenakajj Egiptor puripjjäna ukhajja, Potifar sat wali uñtʼat oficialaruw Josearojj esclavot aljapjjäna. Jehová Diosajj Joseampïskänwa. Joseajj wali trabajtʼiri confiykañ waynänwa. Ukatwa Potifarajj taqe kunanakatï jupan utjkäna ukanak Josean cargopar jaytjjäna.

Joseajj wali chʼamani suma uñnaqtʼani waynänwa, ukatwa Potifaran warmipajj jupamp ikintasiñatakejj Josear kutin kutin arjjayäna. ¿Joseajj kamachänsa? Janiw munkänti, akham sarakïnwa: ‘Janiwa, uk lurañajj janiw walïkiti. Patronajajj nayar wal confiyitu. Jumasti esposaparakïtawa. Jumamp ikintirista ukhajj Dios contraw juchachasirista’ sasa.

Mä kutejja Potifaran warmipajj jupamp ikintasiñapatakiw Josear obligañ munäna. Isipatwa katuntäna, ukhamïpanjja Joseajj tʼijsuwayjjänwa. Potifarajj utar kuttʼanjjäna ukhajja, ‘Joseaw nayamp ikintasiñ muni’ sasaw uka warmejj kʼarisïna. Potifarajj wal colerasïna, ukatwa Josearojj carcelar llawintayäna. Ukampis Jehová Diosajj janiw Joseat armaskänti.

Joseajj carcelankaskänwa, ukhaw Egipto marka apnaqer faraonajj samkasïna, uka samkapjja janiw khitis qhanañchañ puedkänti. Ukatwa faraonan mä serviripajj ‘Joseaw qhanañchiristam’ sasin säna. Faraonajj ratukiw Josear irptayanïna.

Akham sasaw jisktʼarakïna: ‘¿Samkajajj kamsañsa muni uk qhanañchitasmati?’ sasa. Joseajj sänwa: ‘Egipto markanjja paqallqo maraw manqʼajj wal achoqani, ukatjja paqallqo mararakiw manqʼat pistʼañajj utjani. Mä yatiñan jaqe ajllisim, manqʼa sum imkatañapataki, ukhamatwa jan khitis manqʼatjam jiwkaniti’ sasa. Faraonasti sarakïnwa: ‘¡Jumaruw ajllsma! Jumajj wali autoridadanïyätawa, nayakiw jumat jilireyäjja’ sasa. ¿Kunjamatsa Joseajj faraonan samkapajj kamsañsa muni uk yatpachäna? Jehová Diosaw yanaptʼäna.

Joseajj paqallq maraw manqʼañanak wal imkatäna. Qhepatjja kunjamtï Joseajj siskäna ukhamapuniw manqʼat pistʼañajj taqe cheqan utj-jjäna. Taqe cheqatwa manqʼ alasirejj Egiptor jutapjjäna. Jacob chachas ‘Egiptonwa manqʼajj utjaski’ sasin parlir istʼarakïnwa, ukatwa manqʼañanak alanipjjañapatakejj 10 yoqanakapar khitäna.

Jacobun yoqanakapajj Josearuw jakʼachasipjjäna. Jupajj ratukiw khitinakäpjjes uk amuyäna, jilanakapasti janiw amuyapkänti. Joseajj waynäkasin samkaskäna ukarjamaw jupa nayraqatan altʼasipjjäna. Uñisisipkakïnti janicha uk yatiñwa Joseajj munäna, ukatwa akham säna: ‘Jumanakajj markajajj chʼamanit janich uk uñaqeriw jutapjjtajja’ sasa. Jupanakasti sapjjänwa: ‘¡Janiw uñaqerïpkti! Canaán markatäpjjtwa. 12 jilanakäpjjayätwa, maynejj jiwjjewa. Sullkajj tatajampïskiwa’ sasa. Joseajj sänwa: ‘Sullkamar irptanipjjam ukhaw creyipjjäma’ sasa. Ukhamajj jupanakajj tatapan ukaruw kuttʼjjapjjäna.

Jacobun familiapajj wasitatwa jan manqʼan uñjasïna, ukatwa yoqanakaparojj mayampi Egiptor khitäna. Benjamín sullkaparus irpapjjarakïnwa. Joseajj jilanakapar yantʼañatakejja Benjaminan manqʼa bolsaparuw qollqet lurat copap imantäna. Ukatjja lunthatapjjestawa sasaw juchañchäna. Josean servirinakapajj thaqtasinjja, Benjaminan bolsapatwa uka copa apsupjjäna, jilanakapajj wal sustjasipjjäna. ‘Benjaminar castigañat sipansa, nanakar castigapjjeta’ sasaw Josear ruwtʼasipjjäna.

Jilanakapajj janiw nayrjam uñisirëjjapjjänti, ukwa Joseajj amuyäna. Ukatjja janiw aguantirjamäjjänti, jachtʼasisaw akham säna: ‘Joseätwa, jumanakan sullka jilamätwa. ¿Tatajajj jakaskiti?’ sasa. Jilanakapajj wal llaktʼasipjjäna. Joseasti sarakïnwa: ‘Kuntï lurawayapkista ukat jan llakisipjjamti. Diosaw akar irpanitu, jumanakar salvañataki. Jichhajj tatajar jankʼak irptanipjjam’ sasa.

Jilanakapajj utaparuw kuttʼapjjäna, tatapar suma yatiyäwinak yatiyañataki ukhamarak Egiptor irpañataki. Walja maranakatwa, Joseampi tatapampejj mayamp jikisipjjäna.