Salomonajj Israel marka apnaqañ qalltkäna ukhajja, Jehová Diosajj akham sänwa: ‘¿Kunsa churirisma?’ sasa. Salomonajj sarakïnwa: ‘Waynitüsktwa, janiw kuns sum lurañ yatkti. Markamar cuidañatak yatiñanïñ churita’ sasa. Diosajj sänwa: ‘Niyakejjay yatiñanïñ maychistajja, uk churämawa, wali qamirirakïyätawa. Istʼitäta ukhasti walja maranakaw jakarakïta’ sasa.

Salomonajj templo lurañwa qalltäna. Qorimpi, qollqempi, maderampi ukhamarak suma qalanakampiw luräna. Yatjjattʼat walja chachanaka warminakaw trabajipjjäna. Paqallqo maratwa tukuyapjjäna. Jehová Diosar katuyapkäna uka urojja, ofrendanakwa altarar uchapjjäna. Salomonajj altar nayraqatar qonqortʼasisaw akham orasïna: ‘Jehová Dios Tata, aka templojj janiw jumatakjam wali sumäkiti, ni wali jachʼäkisa. Ukampis mirä amp suma, jumar adoranipksma uk katoqtʼasipjjakitaya, oracionanakajsa istʼapjjakitaya’ sasa. ¿Jehová Diosarojj uka templojj gustpachänti, Salomonan oracionap istʼpachänti? Oración tukuyjjäna ukhajja, ninaw alajjpachat saraqanïna, ofrendanaksa qʼal nakhantäna. Ukhamatwa Diosajj kusisitätap uñachtʼayäna. Israelitanakajj uk uñjasajj wal kusisipjjarakïna.

Israel markansa yaqha markanakansa Salomón reyirojj wali yatiñanitwa uñtʼapjjäna. Jaqenakajj problemanakap askichañatakejj jupan ukaruw yanaptʼa mayir jutapjjäna. Saba markan reinapasa visitirejj jutarakïnwa. Wali chʼama jisktʼanakampi yantʼäna ukhas Salomonajj sum qhanañchäna. Ukatwa uka reinajj akham säna: ‘Kunanaktï jumat sapkitu uk janiw creykayätti. Jichhajj uñjawaytwa, sapkitäna ukat sipansa jukʼampi yatiñanïtawa. Juman Jehová Diosamaw wal bendistam’ sasa. Israel markanjja jaqenakajj wali kusisita ukhamarak wali sumaw jakasipjjäna. Ukampis qhepat janiw ukhamäjjänti.

Salomonajj Jehová Diosar adorkäna ukhajj Israel markan suma jakasiñaw utjäna. Ukampis Salomonajj idolonakar adoriri yaqha markankir walja warminakampiw casarasïna. Jukʼat jukʼatjja Salomonajj janiw pachpäjjänti, idolonakaruw adorjjarakïna. Jehová Diosajj wal colerasïna, sarakïnwa: ‘Janiw familiamajj Israel markar apnaqjjaniti, payaruw reino jaljtayäjja. Jachʼäkani ukjja mä servirimaruw churäjja, jiskʼäkani ukakwa familiamajj apnaqjjani’ sasa.

Kuntï Diosajj siskäna uk jukʼampwa qhanañchäna. Salomonan Jeroboán sat mä serviripajj viajenkaskänwa, ukat Ahíya sat profetampiw thakin jikisipjjäna. Uka profetajj tunka payaniruw mä isip chʼiyjäna, ukatsti Jeroboanar akham sänwa: ‘Jehová Diosajj Salomonan familiapat reino apaqasajj payaruw jaljtayani. 10 chʼiyaqat partenakjja jum apasim, jumaw 10 tribunak apnaqjjäta’ sasa. Salomonajj uk yatïna ukhajja Jeroboanar jiwayañwa munäna. Ukatwa Jeroboanajj Egiptor escapjjäna. Tiempompejja Salomonajj jiwjjänwa, Rehoboam yoqapaw Israel mark apnaqjjarakïna. Jeroboanajj Salomonan jiwjjatap yatisajj Israel markaruw kuttʼanjjäna.

Qhepatjja, Israel markan jilïr jaqenakapajj Rehoboam reyir akham sapjjänwa: ‘Aka markarutï sum uñjätajja, janiw jumat jitheqtapkaniti’ sasa. Wayna masinakapajj akham sapjjarakïnwa: ‘Aka markar tʼaqesiyañamawa. Jukʼamp trabajonak churam’ sasa. Rehoboamajj masinakapar istʼasaw markar tʼaqesiyäna, ukatwa jupa contra saytʼapjjäna, Jeroboanaruw 10 tribunak apnaqañapatak uttʼayapjjarakïna. 10 tribunakajj Israel marka sasin uñtʼatäjjänwa. Jiltʼkäna uka pä tribusti Judá marka sasin uñtʼatäjjarakïnwa, jupanakajj janiw Rehoboamat jitheqtapkänti. Ukhamaw Israelan 12 tribunakapajj payar jaljtäna.

Jerusalén markjja Rehoboam reyiw apnaqäna. Jeroboán reyisti janiw uka markar Diosar adoriri sarapjjañap munkänti. ¿Kunatsa? ‘Jaqenakajj nayat jitheqjjasajj Rehoboamaruw kuttʼjjapjjaspa’ sasaw ajjsaräna. Ukatwa pä vaca qallu qorit luräna, markar akham sarakïnwa: ‘Jerusalén markajj wali jayankiwa. Aka markanaki aka vaca qallunakar adorapjjam’ sasa. Jaqenakajj uka vaca qallunakaruw adorjjapjjäna, wasitatwa Jehová Diosat armasjjapjjäna.