1, 2. ¿Kun lurañ wakisitapsa tamanak tumptʼirinakajj amuyapjje?

TAMANAK tumptʼir mä jilatajja, irpir chuymaninakampiw tantachasiñ niya tukuyañampïski. Jupajja, taqe chuyma irnaqtʼir uka jilatanakar wal munasi, jupanakat yaqhepasti chuymanëjjapjjewa. Ukampis mayaw tamanak tumptʼir jilatarojj llakisiyi. Pasïrin uka tamar tumptʼkäna ukhajja, jilatanakar wakichtʼapjjañapatakiw irpir chuymaninakar chʼamachtʼäna. Ukatwa jupanakar akham jisktʼi: “Jilatanaka, mayni jilatanakan jukʼamp luräwinaka taman katoqapjjañapatakejja, ¿kunsa wakichtʼañatak lurawayapjjta?” sasa. Ukatsti irpir chuymaninakat maynïrejj siwa: “Cheqansa, janiw sumpun yanaptʼawayapkti” sasa. Mayninakasti ukhamapunïskiwa sasaw sapjjaraki.

² Jumatï irpir chuymanïstajja, ¿uka irpir chuymaninakjam jikjjatasirïtati? Inas ukhamächi. Tamanak tumptʼir walja jilatanakajja, akhamwa sapjje: ‘Diosan tamapar uñjapjjañapatakejja, walja tamanakanwa jilatanakar wakichtʼañajj munasi’ sasa. Ukampis uk lurañajj chʼamakïspawa. ¿Kunatsa?

3. 1) Jilatanakar wakichtʼañajj kunatsa wakisi ukjja, ¿kunjamsa Bibliajj qhanañchi, ukat uk yatiñajj kunatsa taqenitakis wali askejja? (Qhanañchäwi uñjjattʼäta.) 2) Yaqhep irpir chuymaninakatakejja, ¿kunatsa jilatanakar wakichtʼañajj chʼamakïspa?

³ Irpir chuymanjamajja, jilatanakar wakichtʼañajj kunatsa wali wakiskirejja uk sumwa yattajja.a Tamanakan yanaptʼapjjañapatakisa, machaq tamanakajj utjkani ukan yanaptʼapjjañapatakisa jilatanakaw munasi uksa yatiraktawa (Isaías 60:22 liytʼañataki). ‘Mayninakar yatichapjjam’ sasin Bibliajj siski uksa sumwa yatiraktajja (2 Timoteo 2:2 liytʼañataki). Taqe ukanak yatkasasa, yaqhanakar yanaptʼañajj chʼamakïspawa. Ukwa aka yatichäwi qalltan mä qawqha irpir chuymaninakat amuytanjja. Cheqansa, irpir chuymaninakajj walja lurañanakanïpjjewa, familiaparuw uñjapjje, ukatsti trabajipjjarakiwa. Taman kuna lurañanakatï utjki uksa phoqapjjarakiwa, ukat kunanakatï taman jankʼak lurasiñapäki uksa lurapjjarakiwa. Taqe uka lurañanak utjipanjja, tamankir jilatanakar wakichtʼañatakejj janiw tiempojj utj-jjaspati. Ukhamäkchi ukasa, kunatsa jilatanakar wakichtʼañajj wakisi uk jichhajj uñjañäni.

WAKICHTʼAÑAJJ WALI WAKISKIRIWA

4. ¿Kunsa yaqhep irpir chuymaninakajj amuyapjjaspa?

⁴ ¿Kunatsa yaqhep irpir chuymaninakatakejj jilatanakar wakichtʼañajj chʼamakïspa? Inas akham amuyapjjchispa: “Jilatanakar wakichtʼañajj wakiskchisa, tamanjj yaqha jukʼamp wakiskir lurañanakaw utji. Qhepatwa jilatanakar wakichtʼaskañäni, tamajj nayrar sartaskaniwa” sasa. Cheqas taman jukʼamp wakiskir lurañanakas utjkchejja, jilatanakar wakichañ qhepatak jaytasajj tamaruw jan waltʼayapjjaspa.

5, 6. 1) Janitï aceitejj motorar cambiaskaspa ukhajja, ¿kunas autor pasaspa? 2) Irpir chuymaninakatï jilatanakar jan wakichtʼapkaspa ukhajja, ¿kunas pasaspa?

⁵ Ak amuytʼañäni, auto sartañapatakejja, ¿kunas jukʼamp wakiskirejja? ¿Auton tanquepar gasolina warantaña? Jan ukajj ¿motorar aceite cambiañacha? Inas jumajj akham amuychisma: “Gasolina warantañaw jukʼamp wakiskirejja” sasa. Ukampis ukham amuyañajj sinti jan walïspawa, janitï aceitejj motorar cambiaskaspa ukhajja, tiempompejj autojj saytʼjjaspawa. Ukatsti askichayañatakejj tiempos qollqes waljaw munasispa. ¿Kunsa uka uñachtʼäwit yateqsna?

⁶ ¿Kunas jukʼamp wakiskirejja? ¿Taman utjki uka luräwinak phoqaña? Jan ukajj ¿yaqhanakar wakichtʼañacha? Yaqhep irpir chuymaninakajj inas akham amuyapjjchispa: “Taman luräwinakap phoqañaw jukʼamp wakiskirejja, janitï ukanakajj luraskaspa ukhajja tamajj aynachtʼaspawa” sasa. Jïsa, kunatï askïki uk lurasiñapatakiw Bibliajj chʼamañchi (Fili. 1:10). Ukampis irpir chuymaninakatï mayni jilatanakar wakichtʼañatak jan tiemponïpkaspa ukhajja, ¿kunas pasaspa? Taman utjki uka lurañanak phoqañatakejja, tiempompejj janiw wakichtʼat jilatanakajj utj-jjaspati.

7. Jilatanakar wakichtʼañatak tiempo apstʼasiri irpir chuymaninakarojja, ¿kunjamsa uñjañasa?

⁷ Jilatanakar wakichtʼañajj janis sinti wakiskirïkaspa ukham amuyañajj janiw walïkaspati. Tamat llakisiri irpir chuymaninakajja, jilatanakar wakichtʼañatakiw tiempo apstʼasipjje. Ukhamatwa suma irpir chuymanïpjjatap uñachtʼayapjje, tamatakis mä bendicionäpjjarakiwa (1 Pedro 4:10 liytʼañataki). Jilatanakar wakichtʼañatak tiempo apstʼasiri irpir chuymaninakajja, ¿kunjamsa tamar yanaptʼapjje?

WAKICHTʼAÑAJJ JANIW INAMAYÄKANITI

8. 1) ¿Kunatsa irpir chuymaninakajj jilatanakar wakichtʼapjjañapa? 2) Yanapa munaski uka cheqanakar sariri irpir chuymaninakajja, ¿kunsa jankʼak lurapjjañapa? (“¿Kunsa jankʼak lurapjjañapa?” siski uka recuadro uñjjattʼäta.)

⁸ Wali experienciani irpir chuymaninakajj altʼat chuymanïpjjañapawa ukat jilïrëjjapjjani ukhajj kunanaktï jichhajj taman lurapki ukanak janiw phoqerjamäjjapjjaniti, ukwa amuyasipjjañapa (Miq. 6:8). Ukhamarusa “jan waltʼañajj taqeniruw puri”, ukhaman uñjasisaw taman kunanaktï lurapjjañapäki uk jan lurirjamäjjapjjaspati (Ecl. 9:11, 12; Sant. 4:13, 14). Ukhamajja, Jehová Diosan uwijanakaparu cheqpachapuni munasiri irpir chuymaninakajja, wayna jilatanakar wakichtʼañatakiw tiempo apstʼasipjjañapa (Salmo 71:17, 18 liytʼañataki).

9. ¿Kunapachas wakichtʼat jukʼamp jilatanakajj munasini?

⁹ Maysa toqetjja, jilatanakar wakichtʼiri irpir chuymaninakajj ¿kunatsa tamatak mä bendicionäpjje? Tamarojj jan waltʼäwinakar saykatañatakiw yanaptʼapjje. ¿Kunjamsa? Irpir chuymaninakajj jilatanakar wakichtʼañatak chʼamachasipjje ukhajja, wakichtʼat jilatanakajj jukʼampiw tamanakan utji. Jupanakaw jilat kullakanakan mayachtʼatäñapatakisa Diosat jan jitheqtapjjañapatakis yanaptʼapjje. Yamas jachʼa tʼaqhesiñ tiemponwa jupanakan yanaptʼapajj munasini (Eze. 38:10-12; Miq. 5:5, 6). Ukhamasti, munat irpir chuymaninaka, jichhat uksarojj jilatanakar wakichtʼapjjam, ukatakiw chʼamañchtʼapjjsma.

10. Jilatanakar wakichtʼañatak tiemponïñatakejja, ¿kunsa irpir chuymaninakajj lurapjjaspa?

¹⁰ Taman walja wakiskir lurañanak utjipanjja, irpir chuymaninakajj janis jukʼamp lurirjamäpkaspa ukhamwa amuyasipjjaspa. Ukampis jilatanakar wakichtʼañatakejja, inas uka luräwinakat tiempo apstʼasipjjañapajj wakischispa (Ecl. 3:1). Ukham lurapjjatapajj janiw inamayäkaniti.

YANAPTʼAÑATAKEJJ WAKICHTʼAÑAMAWA

11. 1) Yaqha markanakankir irpir chuymaninakan ewjjtʼanakapatjja, ¿kunas amuyasi? 2) Proverbios 15:22 qellqatarjamajja, ¿kunatsa yaqha irpir chuymaninakan ewjjtʼanakapat yatjjatañajj wakisi?

¹¹ Walja irpir chuymaninakajja, jilatanakaruw Diosan markapan nayrar sartapjjañapatak yanaptʼawayapjje, jupanakarusti jichhakiw akham jisktʼasïna: ‘¿Kunsa jilatanakar yanaptʼañatakejj lurawayapjjta?’ sasa.b Janis taqenis mä kikpa jakasipkchejja, kuntï uka jilatanakajj mayninakar yanaptʼañatak lurawayapki ukajj mä kikpakiwa. Ukhamasti Biblian ewjjtʼanakaparjam jilatanakar wakichtʼañajja, ‘taqpach tamanakatakiwa’, apóstol Pablon urunakapansa ukhamarakïnwa (1 Cor. 4:17). Ukatwa aka yatichäwinsa, jutïr yatichäwinsa uka irpir chuymaninakan ewjjtʼanakapat yatjjataskañäni (Pro. 15:22). Kunjamsa irpir chuymaninakajj uka ewjjtʼanakarjam jilatanakar wakichtʼapjjaspa uk jichhajj uñjañäni.

12. Maynir wakichtʼañatakejja, ¿kunsa irpir chuymanejj nayraqat lurañapa, ukat kunatsa?

¹² Irpir chuymanejja, yanaptʼkani uka jilatan chuymapwa nayraqat wakichtʼañapa. ¿Kunatsa? Ukatakejj mä yapuchirit amuytʼañäni. Nayraqatjja, yapuchañatakejj oraq wakichtʼi, ukhamat kunatï yapuchaskani ukajj sum jilañapataki. Irpir chuymanejj ukhamarakiw mayni jilatan chuymap nayraqat wakichtʼañapa, ukhamatwa uka jilatajj yateqañatak wakichtʼatäni. ¿Kunjamsa irpir chuymanejj maynin chuymap wakichtʼaspa? Samuel profetat yateqasisaw uk luraspa.

13-15. 1) ¿Kunsa Diosajj Samuelor säna? 2) ¿Kunjamsa Samuelojj Saulan chuymap wakichtʼäna? (3 janankir dibujo uñjjattʼäta.) 3) ¿Kunatsa irpir chuymaninakajj Samuel profetat yateqasipjjañapa?

¹³ Kimsa waranq maranak nayrajja, Jehová Diosajj akham sasaw Samuel profetar säna: “Arumanthi alwajj aka kipka horasaruw Benjamín toqet jutiri mä jaqeruw khitanïma, juparuw yaqhachäta Israel markajja apnaqañapataki” sasa (1 Sam. 9:15, 16). Samuel profetajj janiw Israel marka apnaqjjañapäjjänti, Diosan arsutaparjamasti yaqharuw marka apnaqañapatak ajlliñapäna. Ukatwa Israel marka apnaqkani uka chachar kunjamsa wakichtʼaspa uk amtäna.

¹⁴ Qhepürojja, Samuelojj Saúl chachampiw jikisïna. Jehová Diosasti Samuelorojj sänwa: “Akajjay kawkïri jaqettejj parlkayäsma ukajja” sasa. Ukjjarusti, Samuelojj kuntï Saúl chachamp parlañatak amtkäna uk jankʼakiw luräna. Nayraqatjja manqʼasiñatakiw invittʼäna, mesan mä suma cheqar qontʼayasasti suma aychanakwa churäna. Ukatjja, ‘taqe ukanak jumatakiw yaqhachta’ sasaw sarakïna. Manqʼañ tukuyatatsti, utaparuw irpäna, thaki sarkasajj wali sumwa parltʼasipjjäna. Utar purisasti, terraza patar mistusajj arumkamaw parlapjjäna. Qhepärmanthisti, Samuelojj reyïñapatakiw Saular uttʼayäna, jampʼattʼäna ukat kuntï lurañapäkäna uksa yaticharakïnwa. Ukatjja reyïñatak wakichtʼataw Saulajj sarjjäna (1 Sam. 9:17-27; 10:1).

¹⁵ Samuelojj Israel marka apnaqañapatakiw Saular uttʼayäna. Cheqansa, janiw uka kikpapunejj mä jilataru taman irpir chuymanjama, jan ukajj irpir chuymaninakan yanapiripjam serviñapatak wakichtʼaskaspati. Ukampis Samuelojj kunjamsa Saulan chuymap wakichtʼäna uk yatjjatasajja, irpir chuymaninakajj walja toqenakatwa yateqapjjaspa. Uk jichhajj pä toqet uñjañäni.

WAKICHTʼAÑATAKEJJ JANKʼAKÏÑAMAWA, AMIGOPÄÑAMARAKIWA

16. 1) Samuelojj israelitanakan mä reyinïñ munapjjatap yatisajja, ¿kunjamas jikjjatasïna? 2) Jehová Diosajj Saular reyïñapatak uttʼayam sasin siskäna ukhajja, ¿kunsa Samuelojj luräna?

¹⁶ Jilatanakar wakichtʼañatakejj jankʼakïñamawa, taqe chuymaw yanaptʼañamaraki. Samuel profetajj israelitanakan mä rey munapjjatap yatisajja, chuymas ustʼata, aynachtʼata ukhamaw jikjjatasïna (1 Sam. 8:4-8). Samuelojj janiw israelitanakan mä reyinïñap munkänti. Ukatwa Jehová Diosajj Samuelor kimsa kuti akham säna: ‘Israelitanakar istʼam’ sasa (1 Sam. 8:7, 9, 22). Ukhamäkchïna ukhasa, Samuelojj janiw jutïr reyitak coleraskänti ni chuyma ustʼatas qheparkänti. Kunapachatï Jehová Diosajj Saular reyïñapatak uttʼayam sasin Samuelor siskäna ukhajja, jupajj taqe chuymaw luräna. Cheqas Diosar munasitapatwa istʼäna.

17. ¿Kunjamsa walja irpir chuymaninakajj Samuelot yateqasipjje, ukat kunjamsa jikjjatasipjje?

¹⁷ Jichhürunakanjja, walja irpir chuymaninakaw Samuelot yateqasipjje, munasiñampiw jilatanakar wakichtʼapjje (1 Ped. 5:2). Munasirïpjjatap laykuw taman utjki uka yaqhep luräwinak mayni jilatanakar churapjje. Uka jilatanakarusti ‘yanapirinakaparjamaw’ uñjapjje (2 Cor. 1:24; Heb. 13:16). Ukatjja, jilatanakajj kunjamsa tamar yanaptʼapjje uk uñjasajj wal kusisipjjaraki (Hech. 20:35).

18, 19. 1) ¿Kunsa irpir chuymaninakajj mä jilataru janïr wakichtʼkasajj lurapjjañapa? 2) ¿Kunatsa ukham lurañajj wali wakiskirejja?

¹⁸ Janiw yatichiripäñamakïkiti, jan ukasti amigopäñamawa. Samuel profetajja, Saulamp jikiskäna ukaratpachaw aceitemp pʼeqet warjjatasajj reyit uttʼayasapäna. Ukatsti Saulajj jan wakichtʼataw reyïsapäna. Ukampis Samuelojj janiw uk lurkänti, jan ukasti Saulan chuymapwa wakichtʼäna. ¿Kunjamsa uk luräna? Janïr reyit uttʼaykasajja, akanakwa Samuelojj luräna: jupampiw manqtʼasïna, thaknam saräna, wal parltʼasïna, samartʼarakïna. Ukham wakichtʼasaw reyit uttʼayjjäna.

¹⁹ Irpir chuymanjamajj niya ukhamwa lurañamaraki. Janïr mä jilatar wakichtʼkasajj jupan amigopäñamawa. Ukhamatwa uka jilatajj jumamp parlañ jan ajjsarkaniti. Ukatakejja, kawkinjjay jakassta ukat ukan kuna costumbrenakay utjchi ukarjamaw lurañama. Jan tiemponis jikjjataskchïtajja, uka jilatamp parltʼasiñatak tiempo apstʼasiñamawa. Ukhamatwa uka jilatar wali askit uñjatam uñachtʼayäta (Romanos 12:10 liytʼañataki). Ukanak luratam uñjasajja, uka jilatajj kusisitaw jikjjatasini.

20, 21. 1) ¿Kunsa munasiri mä irpir chuymanejj lurañapa? 2) ¿Kuna jisktʼarus jutïr yatichäwin qhanañchaskañäni?

²⁰ Munasir irpir chuymanejja, janiw jilatanakar wakichtʼañapakïkiti, jan ukasti wakichtʼki uka jilatanakarojj munasiñaparakiwa (Juan 5:20 uñjjattʼarakïta). Jumatï ukham lurätajja, wakichtʼkta uka jilatajj jupar yanaptʼañ munatam amuyaniwa. Kuntï yatichkäta uksa taqe chuymaw yateqarakini (Pro. 17:17; Juan 15:15).

²¹ Irpir chuymanejja, mayni jilatan chuymap wakichtʼjjasajj yatichañwa qalltaspa. ¿Kunjamsa irpir chuymaninakajj jilatanakar wakichtʼapjjaspa? Uka jisktʼaruw jutïr yatichäwin qhanañchaskañäni.

1. 1) Mayninakar wakichtʼañ toqetjja ¿kunsa Diosan servirinakapajj nayratpach amuyapjjerïna, ukat kunatsa ukajj jichhürunakan wakisi? 2) ¿Kunsa aka yatichäwin yatjjataskañäni?

‘TAQE kunas sum sarañapatakejja, mayninakar wakichtʼañajj wali wakiskiriwa’ sasaw Diosan servirinakapajj nayratpach amuyapjjerïna. Sañäni, Abram chachajj Lot chachar qhespiyañatakejja ‘suma wakichtʼat chachanakwa tantachthapïna’, (NM) ukatwa jupanakajj Lot chachar qhespiyapjjäna (Gén. 14:14-16). David chachan urunakapansti Diosan utapan qʼochurinakajj ‘wakichtʼatäpjjänwa’, ukhamatwa Jehová Diosar jachʼañchapjjäna (1 Cró. 25:7, NM). Jichhürunakanjja jiwasajj Supay contra ukat jupan apnaqat akapacha contraw nuwastanjja (Efe. 6:11-13). Ukatjja, Jehová Diosan sutip jachʼañchasiñapatakis chʼamachasiraktanwa (Heb. 13:15, 16). Kunjamatï nayra tiemponakan Diosan servirinakapajj wakichtʼatäpkänjja, jiwasajj ukham wakichtʼatäñasarakiwa, ukhamat sum jikjjatasiñataki. Tamanjja, Jehová Diosajj irpir chuymaninakaruw jilatanakar wakichtʼapjjañapatak confiyi (2 Tim. 2:2). ¿Kunjamsa irpir chuymaninakajj jilatanakar wakichtʼapjje? Ukwa aka yatichäwin yatjjataskañäni.

JEHOVÁ DIOSAR MUNASIÑAPATAKIW YANAPTʼAÑAMA

2. Mä jilatar wakichtʼkani ukhajja, ¿kunsa irpir chuymanejj luraspa, ukat kunatsa?

² Irpir chuymaninakajj yapuchirïpkaspas ukhamäpjjewa. Yapuchirejja, janïr satantkasajj wanumpiw oraqer uchi, ukhamat jathajj sum alsuniñapataki. Niya ukhamarakwa mä irpir chuymani jilatajj luraspa, mä jilatar wakichtʼkani ukhajja Biblian jiskʼa tʼaqanakap liytʼayasaw yanaptʼaspa. ¿Kunatsa? Ukhamatwa jilatarojj yateqataparjam lurañapataki yanaptʼani (1 Tim. 4:6).

3. 1) Marcos 12:29, 30 qellqatampejj ¿kunjamsa irpir chuymanejj jilatar yanaptʼaspa? 2) Jilatatï irpir chuymaniru jupatak oración mayir istʼani ukhajja, ¿kunjamsa jikjjatasispa?

³ Jumatï irpir chuymanïsta ukhajja, kunjamsa jilatan chuymaparusa amuyuparusa Biblian cheqa yatichäwinakapajj yanaptʼaski ukwa amuyañama. Uk yatiñatakejja Marcos 12:29, 30 (liytʼañataki) qellqatwa jupamp liytʼasma. Ukatjja ‘¿kunjamsa Jehová Diosar katuyasitamajj jakäwimar yanaptʼawayi?’ sasaw jisktʼarakisma. Ukham jisktʼañajja, kunjamsa Jehová Diosar taqe chuyma loqtsna uka toqet parlañatakiw yanaptʼapjjeristam. Ukatsti jupamp chikaw oracionan Jehová Diosar qollan ajayup mayirakisma, ukhamat taman luräwinak jilatajj katoqkani uk phoqañapataki. Jupatak oración mayir istʼasajja, jilatajj taman jukʼamp lurañatakiw chʼamachasispa.

4. 1) Biblian qellqatäki uka sarnaqäwinakatjja, ¿kawkïrinakas jilatanakar nayraru sartapjjañapatak yanaptʼaspa? 2) ¿Kuna amtampis irpir chuymaninakajj jilatanakar wakichtʼapjjañapa?

⁴ Irpir chuymani, mä jilatar wakichtʼañ qalltäta ukhajja, Biblian qellqatäki uka sarnaqäwinakatwa jilatatak liytʼarapiñama, ukaw kunja wakiskirisa mayninakar yanaptʼañasa, altʼat chuymanïñasa, confiykayäñasa uk amuyañapatak yanaptʼani (1 Rey. 19:19-21; Neh. 7:2; 13:13; Hech. 18:24-26). Ukham chuymanïñajja, oraqerus yapuchirejj wanu uskkaspa ukhamawa. Ukaw jilatarojj ajay toqen jiltañapatak yanaptʼani. Francia markan jakasiri Jean-Claude sat mä irpir chuymanejj akham siwa: “Mä jilatar wakichtʼkta ukhajja, taqe kunsa Bibliarjam amtañapatakiw yanaptʼta. Ukatakejja, Bibliajj ‘muspharkañ arunakanïtap’ amuyañapatakiw Bibliat liytʼarapta” sasa (Sal. 119:18). Jehová Diosar jukʼamp munasipjjañapatakejja, ¿kunanakampi lurasas irpir chuymaninakajj jilatanakar yanaptʼapjjaspa?

KUNATAKISA UKAT KUNATSA CHʼAMACHASIÑAPA UK SAÑAMAWA

5. 1) Diosar jukʼamp loqtañatakejj kuna amtanakanïtasa sasin jilatanakar jisktʼañajj ¿kunatsa wakiskirejja? 2) ¿Kunatsa irpir chuymaninakajj jilatanakar waynitutpach wakichtʼapjjañapa? (Qhanañchäwi uñjjattʼäta.)

⁵ ‘Diosar jukʼamp loqtaskakiñatakejj ¿kuna amtanakanïtasa?’ sasaw jilatar jisktʼañama. Janitï kuna amtanïkchi ukhajja, kunsa lurirjamäspa uk lurañ amtañapatakiw yanaptʼañama. Diosar jukʼamp loqtaskakiñatakejj kun lurañsa jumajj amtayäta, ukat uka amta phoqasajj kunja kusisitas jikjjatasirïta ukanakatwa jupar parltʼasma. Ukham lurañajj janiw chʼamäkiti ukat jilatarojj yanaptʼaniwa. Irpir chuymanjama ukhamaraki precursorjam África markan servir Víctor jilatajja, kunatsa ukham lurañajj wali wakiskirejja uk akham siwa: “Waynitüskayäta ukhajja, mä irpir chuymaniw akham jisktʼitäna: ‘Diosar jukʼamp loqtaskakiñatakejj ¿kunanak lurañsa amtaskta?’ sasa. Ukaw Diosar taqe chuym loqtañatakejj yanaptʼitäna” sasa. Maysa toqetjja, 13 jan ukajj 14 maranïsipki ukhatpach jilatanakar wakichtʼañajj wali wakiskiriwa sasaw experienciani walja irpir chuymaninakajj sapjje. Waynitojj qawqha maranisa ukarjamaw taman lurañanakajj churasispa. ¿Kunatsa irpir chuymaninakajj jilatanakar waynitutpach wakichtʼapjjañapa? Ukham wakichtʼäta ukhajja, jukʼamp maranëjjapjjani ukhajj Diosar loqtasipkakiniwa, janirakiw akapachampis apayasipkaniti (Salmo 71:5, 17 liytʼañataki).a

6. ¿Kunjamsa Jesusajj mayninakar wakichtʼirïna?

⁶ Taman jukʼamp lurañ munañapatakejja, irpir chuymaninakajj janiw kunsa lurañapa ukak jilatar sapjjañapäkiti. Jan ukasti, kunatsa uk lurañapa uksa sapjjañaparakiwa. Ukham lurasaw Jesusajj mayninakar wakichtʼirïna. Apostolonakapar janïr yatiyir khitkasajja, kunatsa yatiyir sarapjjañapa ukwa nayraqat qhanañchtʼäna. Jupasti akham sänwa: “Nayar churatawa taqe munañanïñajja alajjpachansa, akapachansa. Taqe akapachankir jaqenakar yatiyir sarapjjam, nayar arkir tukuyapjjam” sasa (Mat. 28:18, 19). ¿Kunjamsa irpir chuymaninakajj Jesusat yateqasipjjaspa?

7, 8. 1) ¿Kunjamsa irpir chuymaninakajj Jesusat yateqasipjjaspa? 2) ¿Kunatsa jilatar chʼamañchtʼañajj wakisi? 3) ¿Kuna ewjjtʼanakarjamas irpir chuymaninakajj jilatanakar wakichtʼapjjaspa? (“Jilatanakar wakichtʼañatak ewjjtʼanaka” siski uka recuadro uñjjattʼäta.)

⁷ Mä jilatar kun lurañapatakis mayïta ukhajja, kunatsa lurañapa ukjja Bibliampiw qhanañchtʼañama. Ukhamatwa Bibliarjam lurañapataki yanaptʼäta. Sañäni, Tantachasiñ Uta mantaña pichañapataki jilatar mayïta ukhajja, Tito 2:10 qellqatwa jupar uñjjattʼayasma. Ukatjja, akham sasaw uka qellqatampejj qhanañchtʼasma: “Jumatï sum pichstʼäta ukhajja, Diosan yatichäwipajj sumätapwa jaqenakajj amuyapjjani. Ukatjja jilïr jilat kullakanakarus yanaptʼarakïtawa” sasa. Jupampi ukham parltʼasajja, mayninakan askip thaqañapatakiw yanaptʼäta. Kunapachatï luratanakapampi jilat kullakanakar yanaptʼatap amuyani ukhajja, kusisitaw jikjjatasini.

⁸ Jilatajj ewjjtʼamarjam lurani ukhajja, ‘walik ukham lurtajja’ sasaw chʼamañchtʼañamaraki. ¿Kunatsa ukajj wakisi? Ukhamatwa nayrar sartaskakiñapatak yanaptʼäta. Jilatar ukham chʼamañchtʼañajja, mä alirus jiltañapatak umamp warjjatʼkasma ukhamawa (Mateo 3:17 uñjjattʼarakisma).

¿KUNAS AWISAJJ PASASPA?

9. 1) ¿Kunas yaqhep qamir markanakan pasi? 2) Diosar serviñajj ¿kunatsa yaqhep waynanakatakejj jan nayrankki?

⁹ Yaqhep qamir markanakanjja, pä tunka maranit pusi tunka marankama jilatanakar chʼamañchtʼañajj irpir chuymaninakatak chʼamakiwa. Mä kutejja 20 markanakankir irpir chuymaninakarojj akham sasaw jisktʼasïna: “¿Kunatsa uka jilatanakar chʼamañchtʼañajj chʼamaki?” sasa. Jupanakat waljanejj sapjjänwa: “Waynitüsipkäna ukhajja, awk taykanakapajj janiw Jehová Diosar jukʼamp loqtapjjañapatak chʼamañchtʼapkänti. Jupanakat yaqhepajj chʼamachasiñ munapjjäna ukhajja, awk taykanakapajj qollqe ganapjjañapataki jachʼa yateqañ utanakar sarapjjañapatakiw chʼamañchapjjäna. Ukatwa jupanakatakejj Diosar serviñajj jan nayrankkänti” sasa (Mat. 10:24).

10, 11. 1) Taman luräwinak katoqañ munapjjañapatakejja, ¿kunjamsa irpir chuymaninakajj jukʼat jukʼat jilatanakar yanaptʼapjjaspa? 2) ¿Biblian kawkïr jiskʼa tʼaqanakapas jilatan chuymapar purtʼaspa, ukat kunatsa? (Qhanañchäwi uñjjattʼäta.)

¹⁰ Taman jukʼamp luräwinak katoqañataki jan chʼamachasipki uka jilatanakar yanaptʼañajj janiw faciläkiti, ukampis jupanakar yanaptʼasispawa. Ukatakejj pacienciaw munasi, chʼamachasiñas wakisirakiwa. Yapuchirit amuytʼaskakiñäni. Mä ali sum jilañapatakejja, yapuchirejj jukʼat jukʼatwa yanaptʼi. Irpir chuymaninakajj ukhamarakiw jilatanakar jukʼat jukʼata yanaptʼapjjañapa. Ukhamat taman luräwinak katoqañ munapjjañapataki. ¿Kunjamsa uk lurapjjaspa?

¹¹ Jilatan amigopäñamatakiw tiempo apstʼasiñama. ‘Tamanjja yanaptʼamajj waliw munasi’ sasaw sañama. Jupamp qontʼasisinjja, Biblian jiskʼa tʼaqanakap uñjjattʼayam, ukanakasti Diosar jakäwip katuyaskäna ukhajj kunsa arsüna uk amuytʼañapatakiw yanaptʼañapa (Ecl. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5). Chuymapar purtʼañatakejj akham sasaw jisktʼasma: “Jehová Diosar jakäwim katuyaskayäta ukhajja, ¿kunsa arsuwayta? Bautisaskayäta ukhajja, ¿kunjamsa Jehová Diosajj jikjjataspachäna? ¿Kunjamsa Supayajj jikjjatasirakpachäna?” sasa (Pro. 27:11; 1 Ped. 5:8). ¿Kunatsa jilatatakejj Biblian jiskʼa tʼaqanakap liytʼañajj wakisi? Diosan Arupajj wali chʼamaniwa ukatsti jilatan chuymaparuw purtʼarakispa (Hebreos 4:12 liytʼañataki).b

YANAPTʼAYASIR JILATANAKA, ¿KUNJAM CHUYMANÏPJJAÑAMASA?

12, 13. 1) Elías profetampi wakichtʼatäkäna ukhajja, ¿kunjam chuymanïtapsa Eliseojj uñachtʼayäna? 2) ¿Kunjamsa Jehová Diosajj Eliseor bendicïna?

¹² Wayna jilatanaka, tamanjj jumanakan yanaptʼanakamaw wal munasi. ¿Kunjam chuymanïñas Jehová Diosar serviñatak yanaptʼätam? Uk yatiñatakejj Diosar servir Eliseo chachat yatjjatañäni.

¹³ Niya 3.000 maranak nayrajja, Elías profetajj Eliseoruw yanapiripäñapatak invittʼäna. Eliseosti ukaratpachaw iyawsäna. Ukatjja jan jitheqtasaw profetar yanaptʼäna (2 Rey. 3:11). Eliasajj sojjta maranakaw Eliseor wakichtʼäna. Kunapachatï Eliasajj Israel markan lurañap niya tukuyañampëjjäna ukhajja, janiw yanapjjetätati sasaw Eliseor säna. Ukampis Eliseojj kimsa kutiw akham säna: ‘Janiw nayajj jumar jaytkämati’ sasa. Janiw jupajj Eliasar jaytañ munkänti, ukhamätap laykusti Jehová Diosajj bendicïnwa. Ukatsti kunjamsa Eliasar thaya tutukanjam apasjjäna uksa Diosajj Eliseor uñjayarakïnwa (2 Rey. 2:1-12).

14. 1) Wakichtʼatäsipki uka jilatanakajja, ¿kunjamsa Eliseot yateqasipjjaspa? 2) ¿Kunatsa wakichtʼatäsipki uka jilatanakajj taman luräwinak taqe chuyma phoqapjjañapa?

¹⁴ Jumatï mä irpir chuymanimpi wakichtʼatäsksta ukhajja, ¿kunjamsa Eliseo chachat yateqasisma? Taman kuna luräwi churatasa, taqe chuymaw katoqtʼasiñama. Ukhamarus ak amtañamarakiwa, wakichtʼktam uka irpir chuyman jilatajj amigomawa. Jumar yanaptʼañatak kuntï lurki ukatsa yuspärañamawa, ‘jumat jukʼamp yateqañ munaskaktwa’ sasaw sañamaraki. Taqe kunat sipansa, kuna luräwtï churkätam ukjja taqe chuymaw phoqañama. Ukham luratam uñjasajja, Jehová Diosajj jukʼamp luräwinak churañ munatapwa irpir chuymaninakajj amuyapjjani (Sal. 101:6; 2 Timoteo 2:2 liytʼañataki).

RESPETO UÑACHTʼAYAÑAMAWA

15, 16. 1) ¿Kunjamsa Eliseojj wakichtʼiripar respetatap uñachtʼayäna? (9 janankir dibujo uñjjattʼäta.) 2) ¿Kunatsa mayni profetanakajj Eliseor confiyapjjäna?

¹⁵ Irpir chuymanimp wakichtʼat jilata, ¿kunampsa Eliseo chachat yateqasisma? Irpir chuymaninakar respetañajj wali wakiskiriwa, ukwa uka sarnaqäwejj uñachtʼayi. Jericó markan mä qawqha profetanakar visittʼasajja, Eliasampi Eliseompejj Jordán jawiraruw sarapjjäna. “Ukatsti Eliasajj capapa llawtʼasinjja, ukampiwa umaru jisktäna, ukatjja jawir umajja payaruwa jaljtäna, ukatsti panpachaniw jawirjja waña oraqenjama makhatapjjäna.” Parlasisa sarasipkäna ukhajja, Eliseojj wali amuyumpiw Eliasan arunakap istʼäna ukat yateqarakïna. Janipuniw Eliseojj taqe kuns yatkaspa ukham amuykänti. Kunapachatï Jehová Diosajj thaya tutukanjam Eliasar apasjjäna uka qhepatjja, Eliseojj wasitampiw Jordán jawirar kuttʼäna, ukatjja Eliasan capapa katusinsti umaruw jisktäna, ukat akham artʼasïna: “¿Kawkinkis Eliasan [Jehová] Diosapajja?” sasa. Ukjjarojj mayampiw umajj payar jaljtäna (2 Rey. 2:8-14).

¹⁶ Eliseon nayrïr milagropajja, Eliasan qhepïr milagropjamänwa ¿uk amuytati? ¿Kunsa uka luräwit yateqasisma? Eliseojj profetjam uttʼayatäjjäna ukhajja, kunjamtï Elías profetajj lurirïkäna ukhamwa luraskakïna, janiw mayjtʼaykänti. Ukhamatwa wakichtʼiripar respetatap uñachtʼayäna. Ukham luratap uñjasaw mayni profetanakajj jupar confiyapjjarakïna (2 Rey. 2:15). Eliseojj 60 maranakaw profetjam servïna, ukatjja Jehová Diosajj Eliasat sipansa jukʼamp milagronak lurañapatakiw chʼam churäna. Irpir chuymaninakamp wakichtʼatäsipki uka jilatanakajj ¿kunsa uka sarnaqäwit yateqasipjjaspa?

17. 1) Wakichtʼatäsipki uka jilatanakajja, ¿kunsa Eliseot yateqasipjjaspa? 2) Tiempompejja ¿kunanak lurañatakis Jehová Diosajj yanaptʼätamjja?

¹⁷ Jumatï taman jukʼamp luräwinak katoqäta ukhajja, taman taqe kunsa mayjtʼayañamäkaspa ukham janiw amuyañamäkiti. Ak amtañamawa, taman mayjtʼayañajj wakiski, jan ukajj Diosan markapajj kuns mayjtʼayki ukhakiw mayjtʼayasispa. Janipuniw munañamarjamajj mayjtʼayañamäkiti. Eliseot amtaskakiñäni, jupajja kunjamtï Elías profetajj lurirïkäna ukarjamaw luraskakïna, ukhamatwa wakichtʼiripar respetatap uñachtʼayäna. Ukham luratap uñjasarakiw mayni profetanakas jupar confiyapjjäna. Jumatï irpir chuymaninakjam Biblian yatichäwinakaparjam lurarakïta ukhajja, jupanakar respetatamwa uñachtʼayäta. Ukampirusa tamankir jilat kullakanakas confiyapjjarakïtamwa (1 Corintios 4:17 liytʼañataki). Jukʼamp experiencianëjjäta ukhajja, taman nayrar sartañapatakejj kunanak mayjtʼayañas wakisispa ukanakwa lurarakïta. Ukat tiempompejja, kunjamtï Jehová Diosajj Eliseor yanaptʼkänjja ukhamarakiw jumar yanaptʼätamjja. Inas khitinakatï wakichtʼawayapktam uka jilatanakat sipansa jukʼampinak lurchïta (Juan 14:12).

18. ¿Kunatsa jilatanakar jankʼak wakichtʼasiñapa?

¹⁸ Aka yatichäwisa pasïr yatichäwisa, ak lurapjjañapatakiw irpir chuymaninakar yanaptʼi: jilatanakar wakichtʼañatakejj tiempo apstʼasipjjañapawa, ukat taman jukʼamp irnaqañ munapjjañapatakis yanaptʼapjjañaparakiwa. Uka ewjjanakarjam lurasispa ukwa munapjjta. Ukhamatwa taqpach tamanakajj jan walinakar saykatañatak wakichtʼatäpjjani. Ukatsti jan wali urunakajj jakʼachasisinki ukar saykatañatakiw sapa maynir yanaptʼarakistani.