2. Purapat yanaptʼasiña

¿KAMSAÑSA MUNI?

Purapat yanaptʼasiri chacha warminakajja, avión apnaqeri mä pilotompiru yanapiripampir uñtatäpjjewa. Problemanakajj utjki ukhajja, kunas sapa maynitak walïspa uk lupʼiskañat sipansa, kunas panipar yanaptʼaspa uk amuyañatakiw chʼamachasipjje.

BIBLIAJJ KAMSISA: “Janiw paninëjjapjjeti, jan ukasti mä jañchikëjjapjjewa” (Mateo 19:6).

“Chacha warmjam sum jakasiñatakejja, purapatwa yanaptʼasipjjañapa” (Christopher).

¿KUNATSA WALI WAKISKIRI?

Chacha warmitï purapat jan yanaptʼasipkani ukhajja, problemanakajj utjkani ukhajj askichañat sipansa, jupanakpurakiw jan waltʼayasipjjani. Kuna jiskʼa problemanaksa jachʼaruw tukuyapjjani.

“Matrimonionjja purapat yanaptʼasiñajj wali wakiskiriwa. Nanakatï chacha warmjam purapat jan yanaptʼasipkirista ukhajja, esposojampejj jan kuna amtarus purirjama, pachpa utan jakiri pä jaqjamakëjjapjjeristwa” (Alexandra).

¿KUNSA LURASMA?

AKHAM JISKTʼASIM

• “¿Qollqe ganatajajj nayankkakispas ukhamti amuytjja?”.

• “¿Chachajas jan ukajj warmijas jan utankki ukhakit kusisitätjja?”.

• “Chachajasa jan ukajj warmijas familiapamp sum apasi, ¿nayajj ukhamarakit familiapamp sum apastjja?”.

CHACHA WARMI PARLTʼASIÑATAKI

• ¿Kunanakansa purapat sum yanaptʼastanjja?

• ¿Kunanakansa jukʼamp sum yanaptʼasiñatak chʼamachassna?

• Purapat yanaptʼasiñatakejja, ¿kunanak lurañasäspasa?

AKANAKWA LURASMA

• Casarat chacha warmjam jakasiñajj pelot anatañamp sasiwa. Pachpa equipon anatañatakejj ¿kunsa lurasma?

• Kunjamsa juma sapak atipasma uk lupʼiskañat sipansa, kunjamsa panpachan atipapjjasma ukwa lupʼiñama.

“Khitis pantjasiwayi ukjjat lupʼiskañat sipansa, mayachtʼata suman jakasiñaw jukʼamp wakiskirejja” (Ethan).

BIBLIAJJ KAMSISA: “Jan jumanak pachpatak llakisipjjamti, jan ukasti mayninakatsa llakisipjjarakim” (Filipenses 2:3, 4).