Awk taykanakataki mä qhawqha arunaka

Awk taykanakajja, wawanakapajj Jehová Diosar munasipjjaspa, jupar vidap katuyasipjjaspa ukwa munapjje. ¿Kunjamsa wawanakamarojj bautisasipjjañapatak yanaptʼapjjasma? ¿Kunapachas wawanakajj bautisasiñatak wakichtʼatäjjapjjaspa?

Jesusajj akham sasaw arkirinakapar ewjjtʼäna: “Taqe markanakankir jaqenakar nayan discipulojar tukuyapjjam, bautisapjjam” sasa (Mat. 28:19). Ukhamajj maynitï bautisasiñ munchi ukhajja, Jesusan discipuloparuw nayraqatajj tukuñapa. Ukatakejj janiw Jesusan yatichäwinakap aleqak yatiñapäkiti ni aleqakis ukanakar creyiñapäkiti, jan ukasti ukarjam sarnaqañatakiw chʼamachasiñapa. Wawanakas uk lurapjjarakispawa.

Luratanakamampiw wawanakamar yatichapjjañama, Jehová Diosan yatichäwinakapajj chuymanakapar purtʼañapatakis yanaptʼapjjañamarakiwa (Deut. 6:6-9). Biblian wiñay yatichäwinakap (principios bíblicos) uñtʼapjjañapatakisa ukarjam sarnaqapjjañapatakisa, ¡Wiñayatakiw kusisit jakasisma! sat librompiw yatichapjjañama. Kuntï Bibliat yateqapki ukanaksa, arunakapampi qhanañchañ yateqapjjañapatakiw yatichapjjañama (1 Ped. 3:15). Jumanakatï wawanakamar yatichapjjäta chʼamañchtʼapjjarakïta ukhajja, jupanakajj bautisasipjjaniwa, Diosar serviñansa nayraruw sartapjjani. Maysa toqetjja, Bibliat sapak yatjjatañasa, Familiampi Bibliat Yatjjatañasa, tantachäwinakar sarañasa, congregacionan suma amigonakanïñasa wawanakamarojj bautisasiñataki ukhamarak Diosar serviñan nayrar sartañapatakiw wal yanaptʼani. Kunjamanakatsa Diosar jukʼamp servipjjaspa uk amuytʼasipjjañapatakisa, jumanakaw wawanakamar yanaptʼapjjañama.

Proverbios 20:11 textojj akham siwa: “Mä wawasa luratanakapampiw uñtʼayasi, sarnaqäwipajj qʼomati cheqapati janicha ukjja” sasa. ¿Wawaman kuna luratanakapas bautisasiñatak wakichtʼatäjjatap uñachtʼayi?

Jesusajj 12 maranïkäna ukhajja, ‘awk taykapar istʼasapuniw sarnaqerïna’ sasaw Bibliajj qhanañchi (Luc. 2:51). Bautisasiñ munir wayn tawaqonakajj ukhamarakiw awk taykapar istʼapjjañapa (Hech. 5:29; Col. 3:20). Awisajj pantjasipjjaniwa, ukampis Jesusat yateqasis sarnaqañatakiw chʼamachasipjjañapa, mayninak nayraqatansa ukham sarnaqerit uñtʼatäpjjañapawa.

Wayn tawaqonakajja, Bibliat jukʼamp yatjjatañ munapjjatapwa uñachtʼayapjjañapa (Luc. 2:46). Akham jisktʼasim: “¿Wawajajj tantachäwinakar sarañatakisa, ukan arstʼañatakis chʼamachasiti? ¿Biblia liyiñatakisa yatjjatañatakis chʼamachasirakiti?” sasa (Sal. 122:1; Mat. 4:4).

Bautisasiñataki chʼamachasir wawanakajja, Diosan Reinop nayraruw jakäwipan uchapjje (Mat. 6:33). Mayninakar Jehová Diosat parlañ wakisitapsa amuyapjjañapawa, kunayman toqet yatiyañatakiw chʼamachasipjjañaparaki. Profesoranakaparusa yateqer masinakaparusa, jan ajjsarasaw “Jehová Diosan Testigopätwa” sasin sapjjañapa. Ukatjja Cristianjam Jakañataki ukat Yatiyañataki tantachäwin asignacionanakap sum phoqañatakis wakichtʼasipjjañapawa.

Taqe kunansa sum sarnaqañatakiw bautisasiñ munir wawanakajj chʼamachasipjjañapa. Ukatakejj suma amigonakwa thaqapjjañapa, wali amuyumpiw videonaksa, musicanaksa, anatañ videonaksa ajllipjjañapa. Televisionansa Internetansa janiw jan walinak uñchʼukipjjañapäkiti (Prov. 13:20; 1 Cor. 15:33).

Walja wayn tawaqonakajja, awk taykapan yanaptʼataw Biblian cheqa yatichäwinakap sum yatjjatawayapjje, bautisasiwayapjjaraki. Kunanaktï jumanakajj wawanakaman bautisasipjjañapatak lurasipkta ukanakjja, Jehová Diosaw bendisini.

Jan bautisat publicadorataki mä qhawqha arunaka

Bibliat yatjjatañajja, Diosar uñtʼañataki, promesanakapar confiyañataki ukat Diosar serviñan nayrar sartañatakiw yanaptʼawaytamjja. Jichhajj jan bautisata publicadorjamaw Diosar servisktajja. ¡Walik ukham chʼamachastajja! (Juan 17:3; Heb. 11:6).

Jehová Diosan Testigonakapampi janïr Bibliat yatjjatkasajja, inas yaqha religionar sarchiyäta jan ukajj religionat jan kuns yatiñ munkchiyätati. Inas kunatï Diosatak jan walïki ukanaksa lurarakchiyäta. Ukampis jan wali luratanakamat arrepentisisaw Diosar confiyatam uñachtʼaytajja, nayra jakäwimsa apanuktawa, ukatjja Diosatakjam sarnaqañwa amtawayaraktajja (Hech. 3:19).

Maysa toqetjja, inas jumajj wawäkasin Diosar uñtʼawaysta. Ukaw sum sarnaqañatakisa, jachʼa juchanakar jan purtʼasiñatakis yanaptʼawaypachätamjja (2 Tim. 3:15). Jan walinak lurañataki yantʼat uñjaskasasa, ukanakar saykatañwa yateqawaytajja. Kuntï Bibliat creykta ukanakat yaqhanakar parlasasa, cheqa yatichäwinak arjjatasasa Diosar confiyatamwa uñachtʼaytajja. Predicañatak wakichtʼawayapktam ukasa, Diosan arunakap yatiyañatakiw chʼamañchtʼawaytamjja.

Wawäkasinsa jan ukajj jilïrëjjasinsa Jehová Diosar uñtʼawaykstajja, jichhajj jupar vidam katuyasiña ukat bautisasiñwa amtaskpachätajja. Mä oración lurasaw Diosar katuyastanjja, ukanjja “wiñayatakiw servïma” sasaw jupar sistanjja (Mat. 16:24). Ukatjja bautisasisaw Diosar katuyasitas uñachtʼaytanjja (Mat. 28:19, 20). Diosar vidas katuyasisin bautisasisajja, jupan serviripäjjtanwa. ¡Ukajj wali kusiskañawa!

Bautisaskäna uka qhepatjja, “espíritu santow Jesusarojj wasarar irpäna, ukanwa Diablojj yantʼäna” (Mat. 4:1). Bibliat yateqatamarjamajja, jumajj ukhamarakiw kunayman yantʼanakan uñjasïta, bautisaskäta uka qhepat jukʼamp yantʼanakanwa uñjasïta (Juan 15:20). Inas familiaranakamajj Diosar serviñam jan munapkchiniti. Colegionkiri jan ukajj trabajonkir masinakamasa, nayra amigonakamasa inas jumat burlasipjjchini (Mat. 10:36). Ukhamanakan uñjasïta ukhajja, Jesusan arunakap amtañaw yanaptʼätam, jupajj akham sänwa: “Qhanakwa sapjjsma, khititejj naya layku ukhamarak suma yatiyäwinak laykojj utsa, jilanaksa, kullakanaksa, tayksa, awksa, wawanaksa, oraqenaksa jaytki ukajja, taqe ukanakat sipansa 100 ukhampwa jichha tiempon katoqani: utanaka, jilanaka, kullakanaka, taykanaka, wawanaka, oraqenaka. Arknaqatas uñjasirakiniwa, ukampis jutir pachanjja wiñay jakañ katoqani” sasa (Mar. 10:29, 30). Ukhamajj kunayman yantʼanakansa uñjaskchïtajja, Jehová Diosat janipun jitheqtamti leyinakaparjam sarnaqañatakis chʼamachasiskakim.

Bautisasiñ munäta ukhajja, coordinador del cuerpo de ancianos jilataruw yatiyañama. Bautisasiñatakejj wakichtʼatäjjtati janicha uk amuyañatakejja, ancianonakaw aka folleton utjki uka jisktʼanak jumamp uñakipapjjani. Bibliat sapaki yatjjatañatak tiempo apstʼaskta ukhaw uka jisktʼanakat yatjjatañ qalltasma.

Jisktʼanakar qhanañchañataki wakichtʼaskasajja, taqpach textonakwa liytʼañama, amuykiptʼañamarakiwa. Yatjjatkasajja, kuntï qellqtʼasiñ munkäta ukanakjja qellqtʼasismawa. Ancianonakampi parlkäta ukhajja, qellqasiwaykta uka notanaksa, aka folletsa uñjjattʼasiskasmawa. Mä jisktʼa jan sum amuykäta ukhajja, yatichirimaru jan ukajj mä ancianoruw jisktʼasisma.

Pachpa arunakamampiw jisktʼanakar qhanañchtʼañama. Wal parlañat sipansa, mä qhawqha arunakamp qhanañchañakiw jukʼamp askejja. Jisktʼanakar qhanañchkasajja, maya jan ukajj pä textonakampiw yanaptʼayasirakisma.

Ancianonakatï Biblian yatichäwinakapat yatjjataskakiñam amuyapjjani ukhajja, jumar jukʼamp yanaptʼasiñapatakiw amtapjjani. Ukaw Diosan Arup sum amuyañatakisa yaqhanakar uka toqet parlañatakis yanaptʼätam. Ukhamat qhepat bautisasiñamataki.

[Ancianonakataki: Bautisasiñ munirinakampejj kunjamsa tantachasipjjasma ukajj 58-63 paginanakanwa qhanañchasi].