¿Jehová Diosan Testigonakapat qhawqhanirus uñtʼta? Inas yaqhepajj utam jakʼan jakapjjchi, trabajonsa, escuelansa uñtʼaraksta; inas Bibliat jumamp parlapjjchi. ¿Khitinakäpjjesa, ukat kunatsa jaqenakar kuntï yateqapki ukanak yatiyapjjaraki?

Jumjam jaqëpjjarakiwa. Jupanak taypinjja, kunayman markata ukat kunayman jakasir jaqenakaw utji. Ukat janïra Jehová Diosan Testigopäsajja, yaqhepajj kunayman religionaruw sarapjjäna, yaqhepasti “janiw Diosajj utjkiti”, sasaw amuyapjjarakïna; ukampis sapa mayniw Biblian yatichäwinakapat sum yatjjatañatak tiempo apstʼasiwayapjje (Hechos 17:11). Ukat kuntï yateqapki ukar iyaw sasajja, sapa mayniw chuymapat Jehová Diosar serviñ amtawayi.

Janiw inamayak Bibliat yatjjatapkiti. Taqe jaqenakjamaw llakinakana, pantjasiñanakan uñjasipjje. Ukampis Biblian ewjjanakarjam sarnaqañatakiw chʼamachasipjje, ukhamatwa sum jakasiñs jikjjatapjje (Salmo 128:1, 2). Ukatwa suma yatichäwinak Bibliat yateqasajj jaqenakar yatiyapjjaraki.

Diosan yatichäwinakaparjamaw sarnaqapjje. Ukanakajj Bibliankiwa, ukat ukarjam sarnaqasaw sum jakasipjje. Janiw ukakïkiti, mayninakar respetañatakisa, honrado chuymanïñatakisa, khuyapayasirïñatakisa askirakiwa. Ukat kʼumara jakasiñataki, trabajir jaqëñataki, familian mayachtʼat jakasiñataki, ukat qʼoma sarnaqäwinïñatakisa yanaptʼasirakiwa. Cheqas ‘Diosatakejj taqe casta jaqes mayakiwa’, ukatwa Jehová Diosan Testigonakapajj aka oraqpachankir jilat kullakanakampejj mä wawak sarnaqapjje, ukat janiw politicarus mitisipkiti, ukhamajj janiw yaqhachasipkiti ni yaqha jañchinïpjjatap laykusa. Jaqenakakïpkchisa, jan kikpani mä jachʼa markäpjjewa (Hechos 4:13; 10:34, 35).

• Jehová Diosan Testigonakapajja, ¿kunansa mayni jaqenakampejj kikpäpjje?

• ¿Kunjam jaqëpjjañapatakis Bibliajj yanaptʼi?

“Jehová Diosan Testigonakapajj jichhak uñstir religionäpjjewa”, sasaw jaqenakajj amuyapjje. Ukampis cheqpach Diosan servirinakapajja, nayra maranakatpachwa ‘qhanañchirinaka’ sasin uñtʼatäpjjäna, ukhat jichhakamajj 2.700 jila maranakaw pasawayjje (Isaías 43:10-12). Ukat 1931 marakamajja, Jehová Diosan Testigonakapajj Bibliat Yatjjatirinaka (Estudiantes de la Biblia) sasin uñtʼatäpjjänwa. Ukhamajj ¿kunatsa yaqha suti apañ amtawayapjje?

Khiti Diosarus yupaychapjje ukwa uñachtʼayi. Nayra Qollan Qellqatanakarjamajja, Diosan, Jehová, sutipajj waranq waranqa kutiw Biblian uñsti. Ukampis walja Biblianakanwa uka suti lantejj Tatitu, jan ukajj Dios sasin uskupjje. Ukampis cheqpach Diosajja, Jehová sutipampiw Moisesar uñtʼayasïna, akham sänwa: ‘Akawa nayan wiñayatak amtasiña sutejajja’ sasa (Éxodo 3:15, NM). Ukhamatwa kʼari diosanak taypit cheqa Diosätap uñachtʼayäna. Cheqas Diosan qollan sutip apañajj Jehová Diosan Testigonakapatakejj wali askiwa.

Kuna luräwinïpjjesa ukwa qhanstayi. Cheqapar sarnaqeri Abel chachat qalltasinjja, walja jaqenakaw Jehová Diosar iyawsapjjatap qhanañchapjjäna. Ukat tiempompejja, Noé, Abraham, Sara, Moisés, David ukat yaqhanakasa, “walja iyawsañani jaqenakampi” chika jakhutäpjjarakïnwa (Hebreos 11:4–12:1). Amuytʼañataki, mä tribunalan qhanañchirinakaw utji, jan ukajj testigonaka satäpjjarakiwa, jupanakaw cheq parlasin jan juchan jaqeru arjjatañatak qhanañchapjje. Ukhamarakiw Jehová Diosan Testigonakapajja, kunatï Diosat cheqäki uk jan pächasis qhanañchapjje.

Jesusatwa yateqasipjje. Jesusat parlkasinjja, Bibliajj akham siwa: “Khititï cheqap testigöki, cheqpachäkaraki [...] ukawa” sasa (Apocalipsis 3:14, MT). Ukat Jesús pachpaw akham sarakïna: “Nayasti sutimjja jupanakarojj yatiytwa” sasa. Ukatsti, ‘kunatï Diosat cheqäki uk yatiyiriw jutta’ sarakïnwa (Juan 17:26, MT; 18:37). Ukhamajj Jesusan arkirinakapajja, Jehová Diosan sutipwa apapjjañapa ukat yatiyapjjañaparaki. Uk lurañatakiw Jehová Diosan Testigonakapajj chʼamachasipjje.

• ¿Kunatsa Jehová Diosan Testigonakapa suti apañ amtawayapjje?

• ¿Kunapachatsa Jehová Diosan Testigonakapajj utj-jjäna?

• ¿Khitis Jehová Diosan jilïri Testigopajja?

Bibliarjamajja, Jesusan jiwatapatwa nayrïr cristianonak taypit kʼari yatichirinakajj uñstañapäna ukat Diosan yatichäwinakapsa maysaruw uñtayapjjañapäna (Hechos 20:29, 30). Ukhajj phoqhasipunïnwa. Jesusan cheqa yatichäwinakapjja, kʼari yatichirinakaw akapachankir yatichäwinakamp mayjtʼayapjjäna, ukhamatwa cristianöpjjtwa siri kʼari yatichirinakajj uñstawayi (2 Timoteo 4:3, 4). Ukampis Jehová Diosan Testigonakapajja, kunsa Bibliajj cheqpachapuni yatichi uk sum amuyapjje, ¿kunatsa ukham sistanjja?

Jehová Diosaw kunatï cheqäki uk qhanstayi. Qhepa urunakanjja, ‘cheqa yatiñajj jukʼampiw jiljjattani’ sasaw Diosajj säna (Daniel 12:4, NM). 1870 maranjja, mä qhawqha jaqenakaw kunatï cheqäki uk yatiñ munapjjäna, ukat iglesianakan yatichäwinakapajj janiw jila partejj Bibliarjamäkiti, sasaw amuyapjjäna. Ukatwa nayra Qollan Qellqatanakajj kunsa cheqpachapuni yatichi uk yatjjatañatak chʼamachasipjjäna ukat Diosarakiw sum amuytʼapjjañapatak jupanakar yanaptʼäna.

Taqe chuyma yatjjatañ munir jaqenakaw Bibliat yatjjatapjjäna. Bibliat Yatjjatirinakajja, (Jehová Diosan Testigonakaparuw ukham uñtʼasïna) Biblian sapa yatichäwinakapatwa yatjjatapjjäna. Biblian mä cheqajj jan amuytʼañjamäkäna ukhajja, uka toqet parlir yaqha jiskʼa tʼaqanakwa Biblian thaqhapjjerïna, ukat sum yatjjatasajj kuntï taqpach Bibliajj yatichki ukampejj walikïskiti janicha, uk sum amuytʼasaw qellqtʼasipjjerïna. ¡Pachpa Bibliaw kunatï cheqäki uk qhanstayäna! Ukhamatwa Diosan sutipatsa, Reinopatsa, Oraqetakisa, jaqenakatakis kuna amtanisa, jiwatanakajj kawkinkapjjesa ukat kunjamsa mä urojj jaktanipjjani, ukanakat kunatï cheqaki uk sum yatjjatasiwayi. Ukham yatjjatañaw kʼari yatichäwinaka ukat jan wali costumbrenaka jaytañ yanaptʼawayi (Juan 8:31, 32). Jehová Diosan Testigonakapajj ukham yatjjatasipkakiwa.

Ukat 1879 maranjja, Oraqpachanwa Biblian cheqa yatichäwinakap yatiyasiñapa sasaw Bibliat Yatjjatirinakajj amuyapjjäna. Ukatwa uka maran Yatiyañataki. Jehová Diosan Apnaqäwipat yatiyaski sat revista apsuñ qalltasiwayi, jichhakamas apsusiskakiwa. Jichhürkamajj 750 jila arunakana ukat 240 markanakanwa Biblian cheqa yatichäwinakap yatiyasiski. ¡Janiw kunapachas Diosan cheqa yatichäwinakapajj ukham yatiyasiwaykiti!

• Criston jiwatapatjja, ¿kunas cheqa yatichäwimpejj pasäna?

• ¿Kunjamsa Diosan cheqa yatichäwinakapajj qhanstayasiwayi?

Walja maranakaw Jehová Diosan Testigonakapajj kunayman Biblianak apnaqapjjäna ukat papelar imprimisaw lakirapjjarakïna. Ukampis yaqha Bibliaw munasïna, ukhamat jaqenakajj ‘kunatï cheqäki’ uk facilak yatjjatapjjañapataki, kunjamtï Diosajj taqe jaqenakatakejj munki ukhama (1 Timoteo 2:3, 4). Ukatwa 1950 maran Traducción del Nuevo Mundo sat Biblia inglés arut apsusiñ qalltasïna, janis phoqhatpach apsuskchïnjja, kunjamtï uka urunakan parlaskäna ukarjam jaqokipatänwa. Uka Bibliajja, nayra Qollan Qellqatanakarjamaw 120 jila arunakar sum jaqokipasiwayi.

Amuytʼkañ arunakani Bibliaw munasïna. Tiempompejj parlaski uka arojj janiw pachpäjjeti, ukampis walja Biblianakaw jan amuytʼkaña, nayra arunakampi qellqatäsipki. Ukat nayra qellqatanakatsa jukʼampiw jikjjatasiwayi, ukanakaw Bibliajj qellqaskäna uka tiempon hebreo, arameo ukat griego arunakajj kunjamsa parlasïna uk amuytʼañ yanaptʼawayi.

Kuntï Diosan Arupajj cheqpachapuni siski uk qhanañchir Bibliaw munasïna. Biblia yaqha arunakar jaqokipirinakajja, kuntï Qollan Qellqatanakajj siski, ukpunwa arunakapar jaqokipapjjañapa, janiw ukarojj yapjjatapkaspasa ni apaqapkarakispasa. Ukampis niya taqe Biblianakanwa Diosan, Jehová, sutip apsuwayapjje.

Khititejj qellqaykäna ukaruw Bibliajj jachʼañchañapäna (2 Samuel 23:2). Kunjamtï aynach foton uñachtʼayaskejja, Traducción del Nuevo Mundo Biblianjja, nayra Qollan Qellqatanakarjamaw Jehová Diosan sutipajj kawkhantï uñstañapäki ukar mä paqallq waranq kuti uskusiwayi (Salmo 83:18, NM). Walja maranakaw uka Biblia jaqokipasiñatak yatjjatasiwayi, jichhasti uk liytʼañajj wali sumawa, Diosan amuyunakapjja amuytʼkañwa qhanañchi. Ukhamajj Traducción del Nuevo Mundo Bibliajja, parlkta uka arun janis utjkchejja, Diosan Arupat sapür liytʼañamatak chʼamañchtʼatätawa (Josué 1:8; Salmo 1:2, 3).a

• ¿Kunatsa mä machaq Biblianïñajj wakisïna?

• Diosan munañap yatiñ munki ukajja, ¿kunsa sapüru lurañapa?